NAPIANG ANG WALA NGA TIIL NI LUZIA. Sang bata pa sia, nagbalatian sia sing polio, isa ka makalalaton nga balatian nga nagaguba sang nervous system. Sang 16 anyos sia, ginsilingan sia sang iya ama, “Ginsilutan ka sang Dios amo nga naparalisar ka kay indi ka matinumanon kag suplada ka sa imo iloy.” Madumduman pa gihapon ni Luzia ang iya ginbatyag sadto bisan pila na ka tuig ang nagligad.

SANG NAHIBALUAN NI DAMARIS NGA MAY KANSER SIA SA UTOK, ginpamangkot sia sang iya amay: “Ngaa natabo ini sa imo? Basi may ginhimo ka nga malain gid. Amo nga ginsilutan ka sang Dios.” Nasakitan gid si Damaris sa iya ginsiling.

Madugay na ginapatihan nga ang balatian silot sang Dios. Ang libro nga Manners and Customs of Bible Lands nagsiling nga sang panahon sang Cristo, madamo ang nagapati nga ang “balatian resulta sang sala sang isa, ukon sang sala sang iya pinalangga.” Ang Medieval Medicine and the Plague nagsiling nga sang 500-1500 C.E., “ang pila nagapati nga nagpadala sing mga kalalat-an ang Dios bilang silot sa ila mga sala.” Gani sang napatay ang minilyon sa Europa bangod sang kalalat-an sang ika-14 nga siglo, ginhukman bala sang Dios ang mga malauton? Ukon bangod lang ini sa paglapta sang bakterya, suno sa mga nag-research sa medisina? Ang pila mahimo mamangkot, ginahatagan bala sang Dios ang mga tawo sing balatian para silutan sila sa ila mga sala? *

BINAGBINAGA: Ngaa gin-ayo ni Jesus ang mga nagabalatian kon ang balatian kag pag-antos silot sang Dios? Indi bala nga daw ginapakadiutay niya ang hustisya kag pagkamatarong sang Dios? (Mateo 4:23, 24) Indi gid pagkontrahon ni Jesus ang ginahimo sang Dios. Nagsiling sia: “Pirme ko ginahimo ang kalahamut-an sa iya” kag, “ginahimo ko ang suno sa sugo nga ginhatag sang Amay sa akon.”—Juan 8:29; 14:31.

Ang Biblia nagasiling: “Wala gid sing pagkadimatarong” kay Jehova nga Dios. (Deuteronomio 32:4) Halimbawa, indi gid pagpahanabuon sang Dios nga madisgrasya ang eroplano kag mapatay ang ginatos ka inosente nga tawo kay may isa sa ila nga gusto niya silutan! Bangod matarong ang Dios, si Abraham, nga isa ka matutom nga alagad sang Dios, nagsiling nga indi gid ‘pagpapason sang Dios ang matarong upod sa malauton.’ “Indi mo gid ina mahimo,” siling niya. (Genesis 18:23, 25) Nagsiling man ang Biblia nga “ang Dios wala gid nagahimo sing malain”; wala sia ‘nagahimo sing sayop.’—Job 34:10-12.

Ang aton mga pag-antos indi silot sang Dios sa aton sala. Gin-athag ini ni Jesus sang nakita niya kag sang iya mga disipulo ang isa nga natawo nga bulag. “Ginpamangkot [sia] sang iya mga disipulo: ‘Rabbi, sin-o ang nakasala amo nga natawo sia nga bulag, sia ukon ang iya mga ginikanan?’ Nagsabat si Jesus: ‘Indi tungod sa sala sini nga tawo ukon sa sala sang iya mga ginikanan nga nabulag sia, apang paagi sini makita sang mga tawo ang mga buhat sang Dios.’”—Juan 9:1-3.

Bangod sining sayop nga pagpati, mahimo nakibot ang mga disipulo ni Jesus sang ginsilingan niya sila nga indi ini bangod sa sala sang tawo ukon sang iya mga ginikanan. Wala lamang gin-ayo ni Jesus ang bulag kundi gintadlong niya ang sayop nga pagpati nga ang pag-antos silot sang Dios. (Juan 9:6, 7)  Malipay gid ang mga nagabalatian subong kon mahibaluan nila nga indi ang Dios ang naghatag sa ila sing balatian.

Ang Biblia nagapasalig sa aton

• “Ang Dios indi matilawan paagi sa malaut nga mga butang kag wala man sia nagatilaw sa kay bisan sin-o.” (SANTIAGO 1:13) Pat-od gid nga ang “malaut nga mga butang” nga madugay na nga nagapaantos sa katawhan lakip ang balatian, kasakit, kag kamatayon, dali na lang madula.

• “Gin-ayo niya [ni Jesucristo] ang tanan nga nagaantos.” (MATEO 8:16) Paagi sa pag-ayo sang tanan nga nagapalapit sa iya, ginpakita sang Anak sang Dios ang himuon sang Ginharian sang Dios sa bilog nga kalibutan.

• “Pahiran niya [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”—BUGNA 21:3-5.

Pero ngaa grabe gid ang kasakit kag pag-antos sang mga tawo? Madugay na ini nga ginapaligban. Kon indi ang Dios ang balasulon, sin-o? Sabton ini sa masunod nga artikulo.