Ang Masubo nga Realidad sang Kamatayon
IMADYINA nga nagatan-aw ka sing video parte sa bantog nga tawo, ayhan isa ka musikero nga nanamian mo. Ang video nagsugod sang gamay pa sia, kon paano sia nakatuon sang musika, kag ang iya daw halos wala untat nga pagpraktis. Dayon nagatokar na sia sa mga concert, nagabiyahe sa malayo nga mga lugar, kag nangin bantog sa bilog nga kalibutan. Sang ulihi, makita sa video ang iya hitsura sang nagaedad na, kag sa katapusan sang video—napatay sia.
Ini nga istorya indi lamang himuhimo kundi matuod gid nga hitabo. Bisan parte man kay sin-o ang istorya—isa ka musikero, scientist, atleta, ukon kilala nga tawo—pareho lang gihapon ang nagakatabo sa katapusan. Posible nga madamo sing nahimo ang isa ka tawo, pero sa banta mo ano pa gid ayhan ang iya nahimo kon wala niya naeksperiensiahan ang mapintas nga realidad sang pagtigulang kag kamatayon?
Bisan pa masubo pensaron, amo ini ang matabo sa aton tanan. (Manugwali 9:5) Bisan ano pa nga panikasog ang himuon naton, indi naton malikawan ang pagtigulang kag kamatayon. Isa pa, puede pa gid maglip-ot ang aton kabuhi bangod sa aksidente kag balatian. Ginasiling sang Biblia nga pareho lang kita sang tun-og sa aga nga “nagatuhaw sa malip-ot nga tion kag dayon nagakadula.”—Santiago 4:14.
Para naman sa iban, bangod wala sing kasiguruhan kag kahulugan ang kabuhi nagahunahuna na lang sila nga ‘magkaon kag mag-inom, kay buas mapatay kita.’ (1 Corinto 15:32) Pero ugyon ka bala nga kon amo sina ang imo himuon ginabaton mo ang masubo nga realidad sang kamatayon? Sa indi madugay—ilabi na kon makaatubang ka sing mga kabudlayan sa kabuhi—mamangkot ka gid, ‘Amo lang bala sini ang kabuhi?’ Diin ka makakita sang sabat?
Ang iban nagapangita sing sabat sa science. Bangod sa pag-uswag sang science kag medisina ang aton kabuhi mas naglawig. Ginatinguhaan pa gid sang mga scientist nga palawigon pa ang aton kabuhi. Bisan ano man ang resulta sang ila mga panikasog, nagapabilin gihapon ang pamangkot: Ngaa nagatigulang kita kag nagakapatay? May paglaum bala nga ang kaaway nga kamatayon mapierde naton? Binagbinagon sang masunod nga mga artikulo ining mga topiko kag sabton ang pamangkot: Amo lang bala sini ang kabuhi?
Basi Manamian Ka Man
ANG LALANTAWAN
Ang Pagpangita sa Malawig nga Kabuhi
Ginatinguhaan sang pila ka biologist kag geneticist nga matukiban ang sekreto sang pagtigulang. Ano na ang resulta sang ila research?
SABAT SA MGA PAMANGKOT SA BIBLIA
Natalana Na Bala Kon San-o Kita Mapatay?
Ngaa ang Biblia nagsiling nga may “tion sa pagkapatay”?
