“Sa adlaw nga magkaon ka sang bunga [sang kahoy],” siling sang Dios kay Adan, “pat-od gid nga mapatay ka.” (Genesis 2:17) Ina nga sugo wala sing pulos kon si Adan magatigulang man lang gihapon sa ulihi kag mapatay. Nabal-an ni Adan nga kon indi sia magkaon sang bunga sina nga kahoy indi sia mapatay.

Indi kinahanglan ni Adan kag ni Eva nga magkaon sang bunga sina nga kahoy para mabuhi kay madamo sang nagapamunga nga kahoy sa hardin. (Genesis 2:9) Kon indi sila magkaon sang bunga sina nga kahoy, mapakita sang una nga mag-asawa nga matinumanon sila sa Isa nga naghatag sing kabuhi sa ila. Ginabaton man nila nga ang Dios amo ang may kinamatarong sa pagsugo sa ila kon ano ang dapat himuon.

Para maintiendihan naton kon ngaa napatay si Adan kag si Eva, usisaon naton ang pag-istoryahanay nga nag-apektar sa aton tanan. Gingamit ni Satanas nga Yawa ang man-ug para ihambal ang isa ka malain gid nga kabutigan. Ang Biblia nagsiling: “Sa tanan nga ilahas nga sapat sa duta nga gintuga ni Jehova nga Dios, ang man-ug ang labing mainandamon. Nagsiling ini sa babayi: ‘Matuod gid bala nga nagsiling ang Dios nga indi kamo magkaon sang bunga sang tanan nga kahoy sa hardin?’”—Genesis 3:1.

Ginsabat ini ni Eva: “Mahimo namon kaunon ang bunga sang mga kahoy sa hardin. Apang tuhoy sa bunga sang kahoy nga yara sa tunga sang hardin, nagsiling ang Dios: ‘Indi kamo magkaon halin sa sini, indi ninyo ini pagtandugon; kay kon himuon ninyo ini, mapatay kamo.’” Dayon ang man-ug nagsiling sa iya: “Indi kamo mapatay. Kay nakahibalo ang Dios nga sa adlaw nga magkaon kamo sini, magamuklat ang inyo mga mata kag mangin kaangay kamo sa Dios, nga nakahibalo kon ano ang maayo kag malain.” Gani, ginpahangop ni Satanas nga si Jehova butigon kag nagadingot sang isa ka maayo nga butang sa aton una nga mga ginikanan.—Genesis 3:2-5.

Ginpatihan ni Eva ang iya nabatian. Ginhimutaran niya ang kahoy. Kanami sini tan-awon, makagalanyat gid! Nagkuha sia sing bunga sini, kag nagkaon. Dayon ang Biblia nagsiling: “Pagkatapos, sang upod na niya ang iya bana, ginhatagan man niya ang iya bana kag nagkaon sia.”—Genesis 3:6.

Sigurado nga nasubuan gid ang Dios nga makita ang iya pinalangga nga mga anak nga hungod nga wala nagtuman sa iya! Ano ang ginhimo niya?  Ginsilingan ni Jehova si Adan: ‘Magabalik ka sa duta, kay ginkuha ka sa sini. Bangod yab-ok ka, sa yab-ok ka man magabalik.’ (Genesis 3:17-19) Bangod sini, “nagkabuhi si Adan sing 930 ka tuig kag napatay sia.” (Genesis 5:5) Si Adan wala nagpalangit ukon nagkadto sa lugar sang mga espiritu. Wala sia nagaluntad antes sia gintuga ni Jehova halin sa yab-ok. Gani sang napatay sia, nagbalik sia sa wala kabuhi nga yab-ok. Wala na sia nagluntad. Kasubo gid!

Bangod hungod nga wala nagtuman si Adan kag si Eva, nadula nila ang pagkaperpekto kag ang paglaum nga mabuhi sing wala katapusan. Nagbag-o ang ila lawas; nangin indi perpekto sila kag makasasala. Pero indi lamang sila ang naapektuhan sang ila ginhimo. Ginpasa nila ang ila pagkamakasasala sa ila mga kabataan. Ang Roma 5:12 nagasiling: “Paagi sa isa ka tawo [kay Adan] nagsulod ang sala sa kalibutan kag ang kamatayon paagi sa sala, kag naglapnag ang kamatayon sa tanan nga tawo bangod sila tanan nakasala.”

Ginasiling sang Biblia nga ang sala kag kamatayon “takurong nga nagatabon sa tanan nga katawhan kag ang tela nga nagaputos sa tanan nga pungsod.” (Isaias 25:7) Ini nga takurong daw pareho sa makahililo nga tun-og nga indi naton malikawan. Matuod gid nga “kay Adan ang tanan nagakapatay.” (1 Corinto 15:22) Pareho kay apostol Pablo, mahimo man kita mamangkot: “Sin-o ang makaluwas sa akon sa lawas nga nagadul-ong sa sini nga kamatayon?” May ara bala?—Roma 7:24.