Mga kaliwat kita sang una nga tawo nga si Adan, gani isa kita tanan ka pamilya. Natural lang tani nga palanggaon kag respetuhon sang mga miembro sang pamilya ang isa kag isa, pero ini nga klase sang gugma halos nadula na subong. Indi amo sina ang gusto sang aton mahigugmaon nga Dios.

“Higugmaon ninyo ang inyo isigkatawo subong sang inyo kaugalingon.”—LEVITICO 19:18.

“Padayon nga higugmaa ang inyo mga kaaway.”—MATEO 5:44.

Talupangda kon paano ginalaragway sang Dios ang gugma nga mabasa sa 1 Corinto 13:4-7:

“Ang gugma mapinasensiahon kag mainayuhon.”

Binagbinaga: Ano ang imo batyagon kon ang iban maayo sa imo, ginapasensiahan ka, kag wala dayon nagapangakig kon nakasala ka?

“Ang gugma indi mahisaon.”

Binagbinaga: Ano ang imo batyagon kon ginahisaan ka ukon ginasuspetsahan sang iban?

Ang gugma ‘wala nagapangita sang kaugalingon nga kaayuhan.’

Binagbinaga: Ano ang imo batyagon kon ginarespeto sang iban ang imo pagpati kag wala ginainsister ang ila opinyon?

Ang gugma ‘wala nagaisip sang kahalitan.’

Binagbinaga: Ginapatawad sang Dios ang mga nakasala sa iya nga naghinulsol. “Indi niya pagdumdumon sing dayon ang aton mga kasaypanan, ukon maghinakit sa aton sa wala sing katubtuban.” (Salmo 103:9) Nalipay kita kon patawaron kita sang nahimuan naton sang sala. Gani dapat man naton patawaron ang mga nakasala sa aton.—Salmo 86:5.

Ang gugma ‘wala nagakalipay sa kalautan.’

Binagbinaga: Kon may malain nga matabo sa aton, indi naton gusto nga magkalipay ang iban bangod nagaantos kita. Gani indi man kita dapat magkalipay kon nagaantos ang iban, bisan pa ginmaltrato nila kita.

Para mabaton naton ang pagpakamaayo sang Dios, dapat naton higugmaon ang iban bisan sin-o man sila. Ang isa ka praktikal nga paagi nga mahimo naton ini amo ang pagbulig sa mga nagakinahanglan.