Mga 3,500 ka tuig na ang nagligad, ginhambal ni Jehova nga Dios sa mga nagasimba sa iya kon ano ang dapat nila himuon para mangin maayo ang ila palaabuton: “Ginabutang ko sa inyo atubangan ang kabuhi kag ang kamatayon, ang pagpakamaayo kag ang pagpakamalaut; pilia ninyo ang kabuhi agod magkabuhi kamo kag ang inyo mga kaliwat.”—Deuteronomio 30:19.

Gani para mangin maayo ang ila palaabuton, dapat sila maghimo sing husto nga desisyon. Subong, amo man sina ang dapat naton himuon. Kag ginasugiran kita sang Biblia kon paano kita makapili sang maayo nga palaabuton: “Paagi sa paghigugma kay Jehova nga inyo Dios, sa pagpamati sa iya.”—Deuteronomio 30:20.

TUN-I ANG BIBLIA: Para mahigugma mo si Jehova, dapat mo sia anay makilala paagi sa pagtuon sa Biblia. Kon himuon mo ini, matun-an mo nga isa sia ka mapinalanggaon nga Dios kag gusto niya ang pinakamaayo para sa imo. Gusto man niya nga mangamuyo ka sa iya pirme bangod “nagaulikid sia sa [imo].” (1 Pedro 5:7) Ang Biblia nagapasalig man nga kon magtinguha ka nga magpalapit sa iya, “magapalapit sia sa [imo].”—Santiago 4:8.

HIMUA ANG IMO NATUN-AN: Ang pagpamati sa Dios nagakahulugan sang pagsunod sa iya masaligan nga mga giya nga mabasa sa Biblia. Kon himuon mo ini, “mangin madinalag-on ka kag maalamon.”—Josue 1:8.