Isa ka Domingo sang hapon, sanday Kenneth kag Filomena, nga nagaistar sa Curaçao, nagbisita sa isa ka mag-asawa nga ginatun-an nila sa Biblia.

“Sang nag-abot kami,” siling ni Kenneth, “sirado ang balay kag wala ang ila salakyan. Pero daw may nagpahulag sa akon nga tawgan ang asawa.”

Ginsabat ini sang babayi kag nagsiling sia nga nag-obra ang iya bana. Pero, sang nahibaluan niya nga ara sa gua sanday Kenneth kag Filomena, ginbuksan niya ang puertahan kag ginpasulod sila.

Natalupangdan nila dayon nga naghibi ang babayi. Sang ginbuksan ni Kenneth ang ila pagtuon sa Biblia paagi sa pangamuyo, naghibi naman liwat ang babayi. Gani ginpamangkot sia nanday Kenneth kag Filomena kon ano ang problema.

Ginpaathag sang babayi nga nagaplano sia nga maghikog sa sina nga hapon, kag nagasulat sia sang iya pamilinbilin sa iya bana sang gintawgan sia ni Kenneth. Ginhambalan niya sila nga may depresyon sia, gani ginsugiran nila sia sing makapaumpaw nga mga teksto sa Biblia. Bangod sina nga pagpalig-on, wala nadayon ang iya paghikog.

“Nagapasalamat kami kay Jehova sa pagtugot sa amon nga mabuligan ini nga babayi,” siling ni Kenneth, “kag sa pagpahulag sa amon, ayhan paagi sa isa ka anghel ukon paagi sa Iya balaan nga espiritu, nga tawgan sia sa telepono!” *

Husto bala sanday Kenneth kag Filomena sa pagpati nga nagpasilabot ang Dios, paagi man ini sa isa ka anghel ukon paagi sa Iya balaan nga espiritu, ukon aktibo nga puersa? Ukon natabuan lang ang pagtawag ni Kenneth?

Wala kita makahibalo. Pero ang nahibaluan naton nga ginagamit sang Dios ang iya mga anghel agod buligan ang mga tawo sa espirituwal. Halimbawa, ang Biblia nagasiling nga gingamit sang Dios ang isa ka anghel para tuytuyan ang Cristianong ebanghelisador nga si Felipe nga buligan ang isa ka Etiopianhon nga opisyal nga nagapangita sang espirituwal nga bulig.—Binuhatan 8:26-31.

Ginatudlo sang lainlain nga relihion ang pagpati sa gamhanan nga espiritu nga mga tinuga, ang iban ginalaragway nga mabuot nga mga tinuga nga nagahimo sang kabubut-on sang Dios ukon mga anghel de la guardia. Madamo nga tawo ang wala lamang nagapati sa mga anghel kundi nagapati man sila nga may mabulig ini sa ila. Pero, madamo man ang wala gid nagapati sa mga anghel.

Matuod gid bala ang mga anghel? Kon huo, diin sila naghalin? Ano ang kamatuoran parte sa mga anghel? May mahimo bala sila sa imo kabuhi? Usisaon naton ang ebidensia.