TULUN-AN NGA ARTIKULO 17
Magpabulig kay Jehova Para Mapamatukan ang Malaut nga mga Espiritu
“Nagapakig-away kita . . . batok sa puersa sang malaut nga mga espiritu sa langitnon nga mga lugar.”—EFE. 6:12.
AMBAHANON 55 Indi Mahadlok sa Ila!
ANG BINAGBINAGON SA SINI NGA ARTIKULO *
1. Suno sa Efeso 6:10-13, ano ang isa sa pinakadalayawon nga paagi nga ginapakita ni Jehova ang pag-ulikid niya sa aton? Ipaathag.
ANG isa sa pinakadalayawon nga paagi nga ginapakita ni Jehova ang pag-ulikid niya sa aton bilang iya mga alagad amo ang pagbulig niya sa aton nga mapamatukan ang aton mga kaaway. Ang aton panguna nga mga kaaway amo si Satanas kag ang mga demonyo. Ginapaandaman kita ni Jehova parte sa sini nga mga kaaway, kag ginahatagan niya kita sang aton kinahanglanon para mapamatukan sila. (Basaha ang Efeso 6:10-13.) Kon magpabulig kita kay Jehova kag magsalig sa iya sing bug-os, mapamatukan naton ang Yawa. Makasalig man kita pareho kay apostol Pablo, nga nagsiling: “Kon ang Dios dampig sa aton, sin-o ang makadaug sa aton?”—Roma 8:31.
2. Ano ang binagbinagon naton sa sini nga artikulo?
2 Bilang matuod nga mga Cristiano, wala naton ginahatagan sing sobra nga atension si Satanas kag ang mga demonyo. Mas nagapokus kita sa pagtuon parte kay Jehova kag sa pag-alagad sa iya. (Sal. 25:5) Pero, dapat naton mabal-an ang mga pamaagi ni Satanas. Ngaa? Para indi niya kita madaya. (2 Cor. 2:11; footnote) Sa sini nga artikulo, binagbinagon naton ang panguna nga pamaagi ni Satanas kag sang mga demonyo para mapatalang ang mga tawo. Binagbinagon man naton kon paano naton sila mapamatukan.
KON PAANO GINAPATALANG SANG MALAUT NGA MGA ESPIRITU ANG MGA TAWO
3-4. (a) Ano ang espiritismo? (b) Daw ano kalapnag ang pagpati sa espiritismo?
3 Ang panguna nga pamaagi ni Satanas kag sang mga demonyo para mapatalang ang mga tawo amo ang espiritismo. Ang mga nagahimo sang espiritismo nagasiling nga mabal-an nila ukon makontrol ang mga butang nga sa masami indi mahimo sang mga tawo. Halimbawa, ang iban nagasiling nga mabal-an nila ang palaabuton paagi sa pagpamakot ukon astrolohiya. Ang iban nagapakunokuno nga maistorya nila ang mga patay. Ang iban nagapanghiwit, nagahimo sing madyik, ukon nagapaniwtiw. *
4 Daw ano kalapnag ang pagpati sa espiritismo? Sa isa ka survey nga ginhimo sa 18 ka pungsod sa Latin America kag sa Caribbean, mga isa sa kada tatlo ka tawo ang nagapati sa madyik, pagpanghiwit, ukon babaylan, kag halos pareho man nga kadamuon ang nagapati nga posible maistorya ang mga espiritu. May survey man nga ginhimo sa 18 ka pungsod sa Aprika, kag sobra katunga sa mga gin-survey ang nagapati sa pagpanghiwit. Bisan diin man kita nagaistar, dapat kita magbantay batok sa espiritismo. Kay man, ginatinguhaan ni Satanas nga mapatalang ang “bug-os napuy-an nga duta.”—Bug. 12:9.
5. Ano ang ginabatyag ni Jehova parte sa espiritismo?
5 Si Jehova “ang Dios sang kamatuoran.” (Sal. 31:5) Gani ano ang ginabatyag niya parte sa espiritismo? Ginakangil-aran niya ini! Ginsilingan ni Jehova ang mga Israelinhon: “Wala sing bisan sin-o sa inyo nga nagasunog sang iya anak nga lalaki ukon anak nga babayi, nagapamakot, nagahimo sing madyik, nagapamakot pasad sa mga panimad-on, babaylan, nagapanglumay, nagadangop sa espiritista ukon sa manugpakot sing mga hitabo, ukon bisan sin-o nga nagapamangkot sa patay. Kay ang nagahimo sini nga mga butang makangilil-ad kay Jehova.” (Deut. 18:10-12) Wala ginapatuman sa mga Cristiano ang Kasuguan nga ginhatag ni Jehova sa mga Israelinhon. Pero, kabalo kita nga wala nagbag-o ang iya pagtamod sa espiritismo.—Mal. 3:6.
6. (a) Paano ginagamit ni Satanas ang espiritismo para halitan ang mga tawo? (b) Suno sa Manugwali 9:5, ano ang kamatuoran parte sa kahimtangan sang mga patay?
6 Ginapaandaman kita ni Jehova batok sa espiritismo bangod kabalo sia nga ginagamit ini ni Satanas para halitan ang mga tawo. Ginagamit ni Satanas ang espiritismo para magpalapta sang kabutigan, lakip ang kabutigan nga ang mga patay nagakabuhi sa iban nga lugar. (Basaha ang Manugwali 9:5.) Ginagamit man ni Satanas ang espiritismo para mahadlok ang mga tawo kag mapahilayo sila kay Jehova. Tuyo niya nga ang mga tawo nga nagahimo sang espiritismo magsalig sa malaut nga mga espiritu sa baylo nga kay Jehova.
KON PAANO NATON MAPAMATUKAN ANG MALAUT NGA MGA ESPIRITU
7. Ano ang ginatudlo sa aton ni Jehova?
7 Ginsambit kaina nga ginatudluan kita ni Jehova sang mga dapat naton mabal-an para indi kita mapatalang ni Satanas kag sang mga demonyo. Binagbinagon naton ang pila ka butang nga mahimo naton para mapamatukan naton si Satanas kag ang mga demonyo.
8. (a) Ano ang panguna nga paagi para mapamatukan naton ang malaut nga mga espiritu? (b) Paano ginapakita sang Salmo 146:4 nga isa gid ka kabutigan ang panudlo ni Satanas parte sa mga patay?
8 Basaha ang Pulong sang Dios kag pamalandungi ini. Amo ini ang panguna nga paagi para masikway naton ang mga kabutigan nga ginapalapta sang malaut nga mga espiritu. Ang Pulong sang Dios daw pareho sa matalom nga espada nga makalapos sa mga panudlo ni Satanas para ipakita nga kabutigan ini. (Efe. 6:17) Halimbawa, ginapakita sang Pulong sang Dios nga isa gid ka kabutigan ang panudlo nga ang mga patay makakomunikar sa mga buhi. (Basaha ang Salmo 146:4.) Ginapahanumdom man kita sini nga si Jehova lang ang masaligan nga makatagna sang matabo sa palaabuton. (Isa. 45:21; 46:10) Kon regular naton nga basahon ang Pulong sang Dios kag pamalandungan ini, mangin handa kita nga sikwayon kag kangil-aran ang mga kabutigan nga gusto sang malaut nga mga espiritu nga patihan naton.
9. Ano nga mga buhat nga may labot sa espiritismo ang ginalikawan naton?
9 Likawi ang tanan nga buhat nga may labot sa espiritismo. Bilang matuod nga mga Cristiano, wala kita nagahimo sang bisan ano nga buhat nga may labot sa espiritismo. Halimbawa, wala kita nagakadto sa mga espiritista ukon nagatinguha nga magkomunikar sa mga patay sa bisan ano nga paagi. Pareho sa ginbinagbinag sa nagligad nga artikulo, wala kita nagaentra sa mga kustombre sa lubong nga ginbase sa panudlo nga ang mga patay nagakabuhi gihapon sa iban nga lugar. Kag wala kita nagagamit sang astrolohiya ukon nagakadto sa mga manugpakot para mabal-an ang palaabuton. (Isa. 8:19) Kabalo kita nga makatalagam ini nga mga buhat, kag mahimo ini gamiton ni Satanas kag sang mga demonyo para makontrol kita.
Iluga ang mga Cristiano sang una paagi sa paghaboy ukon pagsunog sang imo mga ginapanag-iyahan nga may labot sa espiritismo kag paagi sa pagsikway sa mga kalingawan nga may labot sa sini (Tan-awa ang parapo 10-12)
10-11. (a) Ano ang ginhimo sang pila ka taga-Efeso sang unang siglo sang natun-an nila ang kamatuoran? (b) Suno sa 1 Corinto 10:21, ngaa dapat naton ilugon ang halimbawa sang mga Cristiano sang una, kag paano naton ini mahimo?
10 Ihaboy ukon sunuga ang tanan nga may labot sa espiritismo. Ang pila ka taga-Efeso sang unang siglo nadalahig sa espiritismo. Sang natun-an nila ang kamatuoran, naghimo sila sang daku nga sakripisyo. “Gintipon man sang madamo nga nagahimo sing madyik ang ila mga libro kag ginsunog nila ini sa atubangan sang tanan.” (Binu. 19:19) Gusto gid nila nga pamatukan ang malaut nga mga espiritu. Mahal ang bili sang ila mga libro parte sa madyik. Pero imbes nga ipanghatag ini ukon ibaligya, ginsunog nila ini. Mas importante sa ila ang kahamuot ni Jehova sangsa bili sang ila mga libro.
11 Paano naton mailog ining mga Cristiano sang unang siglo? Mas maayo gid nga ihaboy naton ukon sunugon ang bisan ano nga ginapanag-iyahan naton nga may labot sa espiritismo. Nalakip sa sini ang mga anting-anting, habak ukon bulong nga may orasyon, ukon iban pa nga butang nga ginagamit ukon ginapanag-iyahan sang mga tawo para amligan kuno sila batok sa malaut nga mga espiritu.—Basaha ang 1 Corinto 10:21.
12. Kon nagausisa sang aton kalingawan, ano ang mga dapat naton ipamangkot?
12 Usisaa sing maayo ang imo kalingawan. Pamangkuta ang imo kaugalingon: ‘Nagabasa bala ako sang mga libro, mga magasin, ukon mga artikulo sa Internet parte sa espiritismo? Kamusta naman ang mga musika nga akon ginapamatian, ang mga pelikula kag palaguaon sa TV nga akon ginatan-aw, ukon ang mga video game nga akon ginahampang? May labot bala ini sa espiritismo? Parte bala ini sa mga bampira, zombie, ukon indi mapaathag nga mga butang? Ginapakita bala sini nga indi malain ang madyik, pagpanghiwit, ukon pagpaniwtiw?’ Indi man buot silingon nga ang tanan nga kalingawan nga uluistorya lang ukon indi matuod may labot dayon sa espiritismo. Pero kon nagausisa sang aton kalingawan, dapat siguraduhon naton nga ang aton desisyon makabulig sa aton nga malikawan ang mga butang nga ginakangil-aran ni Jehova. Himuon naton ang aton bug-os nga masarangan nga ‘mangin matinlo ang aton konsiensia’ sa atubangan sang aton Dios.—Binu. 24:16. *
13. Ano ang indi naton dapat pag-iistorya?
13 Indi mag-istorya parte sa mga demonyo. Dapat naton ilugon si Jesus. (1 Ped. 2:21) Antes sia magkadto sa duta, nagapuyo sia sa langit, kag madamo sia sing nabal-an parte kay Satanas kag sa mga demonyo. Pero wala sia nag-istorya parte sa ginhimo sining malaut nga mga espiritu. Gusto ni Jesus nga isugid ang parte kay Jehova, indi ang parte kay Satanas. Mailog naton si Jesus paagi sa indi pagpalapta sang mga istorya parte sa mga demonyo. Sa baylo, ipakita naton paagi sa aton mga ginahambal nga ang aton ‘tagipusuon ginpukaw sang maayo nga butang,’ nga amo ang kamatuoran.—Sal. 45:1.
Indi kita dapat mahadlok sa malaut nga mga espiritu. Mas gamhanan sa ila si Jehova, si Jesus, kag ang mga anghel (Tan-awa ang parapo 14-15) *
14-15. (a) Ngaa indi kita dapat mahadlok sa malaut nga mga espiritu? (b) Ano ang pamatuod nga ginaamligan ni Jehova ang iya katawhan subong?
14 Indi mahadlok sa malaut nga mga espiritu. Mahimo kita maapektuhan sang indi maayo nga mga hitabo. Ang mga aksidente, balatian, ukon kamatayon mahimo matabo sa tion nga wala naton ginapaabot. Pero indi naton dapat paghunahunaon nga ang indi makita nga mga espiritu amo ang nagpahanabo sini. Ang Biblia nagapaathag nga “ang tion kag ang wala ginapaabot nga hitabo” nagakatabo sa tanan. (Man. 9:11) Kon parte naman sa mga demonyo, ginpakita ni Jehova nga mas gamhanan sia sangsa ila. Halimbawa, wala gintugutan sang Dios si Satanas nga patyon si Job. (Job 2:6) Sang panahon ni Moises, ginpakita ni Jehova nga mas gamhanan sia sangsa madyikero nga mga saserdote sang Egipto. (Ex. 8:18; 9:11) Sang ulihi didto sa langit, ginhatagan ni Jehova si Jesus sing awtoridad nga himuon ang gusto niya kay Satanas kag sa mga demonyo. Ginpakita ni Jesus nga mas gamhanan sia sangsa ila sang gintagbong niya sila sa duta halin sa langit. Kag sa indi madugay, itagbong sila sa kadadalman, kag indi na sila makapanghalit.—Bug. 12:9; 20:2, 3.
15 Madamo kita sang pamatuod nga ginaamligan ni Jehova ang iya katawhan subong. Binagbinaga ini: Nagabantala kita kag nagatudlo sang kamatuoran sa bilog nga kalibutan. (Mat. 28:19, 20) Paagi sini, ginapahibalo naton sa iban ang malain nga mga ginahimo sang Yawa. Kon masarangan ni Satanas nga pauntaton ang tanan naton nga hilikuton, kuntani ginhimo na niya ini. Pero indi niya ini masarangan. Gani indi kita dapat mahadlok sa malaut nga mga espiritu. Kabalo kita nga “ang mga mata ni Jehova nagatan-aw sa bug-os nga duta agod ipakita ang iya kusog para sa ila nga ang tagipusuon bug-os sa iya.” (2 Cron. 16:9) Kon matutom kita kay Jehova, limitado lang ang halit nga mahimo sa aton sang mga demonyo.
MGA PAGPAKAMAAYO KON MAGPABULIG KITA KAY JEHOVA
16-17. Maghatag sing halimbawa nga kinahanglan ang kaisog para mapamatukan ang malaut nga mga espiritu.
16 Kinahanglan ang kaisog para mapamatukan naton ang malaut nga mga espiritu, ilabi na kon ang aton mga abyan ukon mga paryente maghingabot sa aton. Pero ginapakamaayo ni Jehova ang mga nagapakita sang kaisog. Binagbinaga ang natabo sa isa ka utod nga si Erica, nga taga-Ghana. Nagaedad sia sing 21 anyos sang nagtuon sia sa Biblia. Bangod ang iya amay isa ka babaylan, ginapaabot sang iya pamilya nga magaentra sia sa ila kustombre nga nagalakip sang pagkaon sang karne nga ginhalad sa mga dios sang iya amay. Sang nangindi si Erica, nagsiling ang iya pamilya nga ginainsulto niya ang mga dios. Nagapati ang iya pamilya nga ang mga dios magasilot sa ila sang balatian sa lawas kag hunahuna.
17 Ginpilit si Erica sang iya pamilya nga mag-entra sa ila kustombre, pero wala gid sia mag-entra, bisan pa nabal-an niya nga magaresulta ini sa pagpalayas sa iya. Pero ginpaistar sia sang pila ka Saksi sa ila balay. Gani, ginpakamaayo ni Jehova si Erica paagi sa paghatag sa iya sang bag-o nga pamilya, kay daw pareho lang nga nangin mga utod niya nga lalaki kag babayi ang mga kauturan. (Mar. 10:29, 30) Bisan pa ginsikway si Erica sang iya mga paryente kag ginsunog nila ang iya mga pagkabutang, nangin matutom sia kay Jehova. Dayon nagpabawtismo sia, kag regular payunir na sia subong. Wala sia nahadlok sa mga demonyo. Kag parte sa iya pamilya, nagsiling si Erica, “Nagapangamuyo ako adlaw-adlaw nga kabay pa nga makilala man sang akon pamilya si Jehova kag malipay man sila, kag mahilway man sila paagi sa pag-alagad sa aton mahigugmaon nga Dios.”
18. Ano ang mga pagpakamaayo kon magsalig kita kay Jehova?
18 Indi tanan makaatubang sang pareho sini nga pagtilaw sa aton pagtuo. Pero, tanan kita dapat magpamatok sa malaut nga mga espiritu kag magsalig kay Jehova. Kon himuon naton ini, madamo kita sang mabaton nga pagpakamaayo kag indi kita mapatalang sang mga kabutigan ni Satanas. Indi man kita mapauntat sang kahadlok sa mga demonyo sa aton pag-alagad. Labaw sa tanan, magabakod ang aton pagpakig-abyan kay Jehova. “Magpasakop kamo sa Dios,” sulat ni disipulo Santiago, “apang pamatuki ang Yawa, kag magapalagyo sia sa inyo. Magpalapit kamo sa Dios, kag magapalapit sia sa inyo.”—Sant. 4:7, 8.
AMBAHANON 150 Pangitaa ang Dios Para Maluwas
^ par. 5 Mahigugmaon nga ginapaandaman kita ni Jehova parte sa malaut nga mga espiritu kag sa halit nga mahimo nila. Paano ginapatalang sang malaut nga mga espiritu ang mga tawo? Ano ang mga puede naton himuon para mapamatukan ang malaut nga mga espiritu? Binagbinagon sa sini nga artikulo kon paano kita ginabuligan ni Jehova para indi nila kita mapatalang.
^ par. 3 DUGANG NGA PAATHAG: Ang espiritismo nagapatuhoy sa mga pagpati ukon mga buhat nga may labot sa mga demonyo. Nalakip sa sini ang pagpati nga kon mapatay ang isa ka tawo, may espiritu ini nga padayon nga nagakabuhi kag nagakomunikar sa mga buhi paagi sa isa ka espiritista. Nalakip man sa espiritismo ang mga buhat pareho sang pagpanghiwit kag pagpamakot. Sa sini nga artikulo, ang madyik nagapatuhoy sa mga buhat nga may labot sa espiritismo. Nalakip sa sini ang pagpaniwtiw ukon pagkadto sa babaylan, manugbulong, ukon siruhano para magpabulong. Wala ini nagapatuhoy sa ginahimo sang iban nga tawo para lingawon ang iban, pareho sang pagtago ukon pagpakita sang isa ka butang paagi sa maabtik nga paggiho sang mga kamot.
^ par. 12 Ang mga gulang wala nagahimo sang mga pagsulundan parte sa kalingawan. Sa baylo, ang kada Cristiano dapat maggamit sang iya konsiensia nga nahanas sa Biblia kon nagapili sang gusto niya basahon, tan-awon, ukon hampangon. Ginasiguro sang maalamon nga mga ulo sang pamilya nga ginasunod sang ila pamilya ang mga prinsipio sa Biblia kon nagapili sang kalingawan.—Tan-awa ang artikulo sa jw.org® nga “Ginadilian Bala sang mga Saksi ni Jehova ang Pila ka Pelikula, Libro, ukon Kanta?” Buksi ang PARTE SA AMON > MGA PIRME GINAPAMANGKOT.
^ par. 54 PIKTYUR: Ginalaragway si Jesus bilang aton gamhanan nga Hari sa langit nga nagapanguna sa kasuldadusan sang mga anghel. Ara sa ibabaw nila ang trono ni Jehova.
