1. Ano ang gusto nga himuon sang tanan nga alagad sang Dios, kag ngaa? (Tan-awa ang piktyur sa kober.)

GINSUGO ni Cristo Jesus ang iya mga sumulunod nga ‘kadtuan ang mga tawo sa tanan nga pungsod kag tudluan sila agod mangin disipulo niya.’ (Mat. 28:19) Gusto mabal-an sang tanan nga matutom nga alagad sang Dios kon paano nila ‘matuman sing bug-os’ ini nga ministeryo. (2 Tim. 4:5) Kay man, ini nga hilikuton mas importante, mas mapuslanon, kag mas hilingagawon sangsa bisan ano nga hilikuton. Gani gusto gid naton nga madamo kita sing tion sa ministeryo. Pero mahimo nga nabudlayan kita nga himuon ini.

2. Ano nga mga kahimtangan ang nagapabudlay sa aton nga matuman sing bug-os ang aton ministeryo?

² May iban pa nga importante nga hilikuton nga nagakinahanglan sang aton tion kag kusog. Mahimo nga nagakaubos ang aton tion sa ulubrahan kada adlaw para maamanan naton ang aton mga kinahanglanon kag sang aton pamilya. Mahimo nga nabudlayan kita bangod sang mga responsibilidad sa pamilya, pagmasakit, depresyon, ukon pagtigulang. Paano naton matuman sing bug-os ang aton ministeryo bisan pa sa sining mabudlay nga mga kahimtangan?

3. Ano ang buot silingon sang ginsiling ni Jesus sa Mateo 13:23?

³ Kon limitado lang ang aton tion sa pag-alagad kay Jehova bangod sang aton kahimtangan, indi kita dapat maluyahan sing buot. Kabalo si Jesus nga indi palareho ang mapatubas nga bunga sang Ginharian sang kada isa. (Basaha ang Mateo 13:23.) Kon ginahimo naton ang aton bug-os nga masarangan sa pag-alagad kay Jehova, ginapabaloran gid niya ini. (Heb. 6:10-12) Pero ano abi kon madamo pa kita sang mahimo sa aton pag-alagad kag posible man lang ini sa aton kahimtangan? Sa sini nga artikulo, binagbinagon naton kon paano naton mauna ang ministeryo, mapasimple ang  aton kabuhi, kag mapauswag ang aton ikasarang sa pagbantala kag pagtudlo. Pero, hibaluon anay naton kon ano ang buot silingon sang pagtuman sing bug-os sang aton ministeryo.

4. Ano ang buot silingon sang pagtuman sing bug-os sang aton ministeryo?

⁴ Para matuman naton sing bug-os ang aton ministeryo, dapat himuon naton ang aton bug-os nga masarangan sa pagbantala kag pagtudlo nga hilikuton. Pero indi lang kadamuon sang oras sa pagministeryo ang nadalahig sa sini. Importante kay Jehova ang aton motibo. Bangod ginahigugma naton si Jehova kag ang aton isigkatawo, ginahimo naton sing bug-os kalag ang aton Cristianong pagministeryo. * (Mar. 12:30, 31; Col. 3:23) Ang pag-alagad sa Dios sing bug-os kalag nagakahulugan nga malipayon naton nga ginagamit ang aton bug-os nga kusog para maalagad sia. Kon ginaapresyar naton ang pribilehiyo nga magbantala, ginatinguhaan naton nga masugid ang maayong balita sa madamo nga tawo.

5-6. Maghatag sing halimbawa kon paano mauna sang isa ang iya ministeryo bisan pa limitado lang ang iya tion.

⁵ Imadyina ang isa ka pamatan-on nga nanamian maggitara. Pirme sia nagagitara kon may tion sia. Sang ulihi, nakaobra sia sa isa ka restawran bilang gitarista kag nagatokar sia kon Sabado kag Domingo. Pero, kulang ang iya sueldo para sa iya mga galastuhan. Gani nag-obra sia bilang janitor sa isa ka eskwelahan halin sa Lunes asta sa Biernes. Bisan pa nga mas malawig ang tion niya sa pag-obra sa eskwelahan, mas gusto niya ang musika. Gani ginapanikasugan niya nga magsagad pa gid sia sa iya talento kag makaobra sing full-time bilang musikero. Pero subong, nalipay sia sa mga tion nga makatokar sia sang gitara bisan malip-ot lang.

⁶ Sing kaanggid, mahimo nga diutay lang nga tion ang magamit mo sa pagbantala. Pero, gusto mo gid himuon ini nga hilikuton. Gani nagapanikasog ka nga mapauswag ang imo ikasarang sa pagsugid sa mga tawo sang maayong balita sa paagi nga mapabaloran nila ini. Pero bangod madamo ka sing dapat asikasuhon, mahimo nagapamensar ka kon paano mo mauna ang pagbantala nga hilikuton.

7-8. Paano naton mailog ang pagtamod ni Jesus sa ministeryo?

⁷ Maayo gid nga halimbawa si Jesus sa iya pagtamod sa ministeryo. Ang pagsugid sa iban parte sa Ginharian sang Dios amo ang pinakaimportante sa iya kabuhi. (Juan 4:34, 35) Naglakat sia sing ginatos ka kilometro para mabantalaan ang madamo nga tawo. Pirme sia nagapangita sang kahigayunan nga makabantala sa mga tawo sa pangpubliko nga mga lugar kag sa ila mga balay. Gin-una gid ni Jesus ang ministeryo sa iya kabuhi.

⁸ Ginailog naton ang Cristo kon nagapangita kita sang kahigayunan nga mabantala ang maayong balita bisan diin man kita kag bisan ano nga oras. Handa kita nga magsakripisyo para makabantala. (Mar. 6:31-34; 1 Ped. 2:21) Ang pila ka kauturan nagaalagad bilang espesyal, regular, ukon auxiliary payunir. Ang iban nagtuon sang lain nga lenguahe ukon nagsaylo sa lugar nga kinahanglan ang dugang nga manugbantala. Pero ang aktibo nga mga manugbantala sang Ginharian, nga nagaalagad sing regular sa bug-os nila nga masarangan, amo ang may daku nga ginahimo sa pagbantala nga hilikuton. Ano man ang aton kahimtangan, wala kita ginasugo ni Jehova nga himuon ang indi naton masarangan. Gusto niya nga malipay kita sa aton sagrado nga pag-alagad samtang ginapahayag naton ang “mahimayaon nga maayong balita sang malipayon nga Dios.”—1 Tim. 1:11; Deut. 30:11.

9. (a) Paano gin-una ni Pablo ang pagbantala nga hilikuton bisan pa kinahanglan niya mag-obra? (b) Suno sa Binuhatan 28:16, 30, 31, ano ang pagtamod ni Pablo sa iya ministeryo?

⁹ Maayo nga halimbawa si apostol Pablo sa paghimo sang ministeryo nga pinakaimportante sa iya kabuhi. Sang ara sia sa Corinto sa tion sang iya ikaduha nga paglakbay bilang misyonero, diutay na lang ang iya kuarta gani naghimo sia sang mga tolda. Pero para kay Pablo, ang paghimo sang mga tolda indi amo ang pinakaimportante. Nag-obra sia para masuportahan ang iya ministeryo, kag indi niya gusto nga magpabug-at sa mga taga-Corinto samtang ginapahayag niya ang maayong balita sa ila. (2 Cor. 11:7) Bisan pa kinahanglan mag-obra ni Pablo, pirme niya ginauna ang ministeryo, kag nagabantala sia kada Adlaw nga Inugpahuway. Sang nag-ayoayo na ang iya kahimtangan, mas nahatagan niya sing tion ang pagministeryo. Kag “nangin masako gid [sia] sa pagbantala sang pulong sang Dios, kag sa pagpanaksi sa mga Judiyo agod pamatud-an nga si Jesus amo gid ang Cristo.” (Binu. 18:3-5; 2 Cor. 11:9) Sang ulihi, sang ginpriso si Pablo sa iya balay sa Roma sing duha ka tuig, ginpanaksihan niya ang mga nagabisita sa iya kag naghimo sia sing mga sulat. (Basaha ang Binuhatan 28:16, 30, 31.) Wala gid gintugutan ni Pablo ang bisan ano nga magsablag sa iya ministeryo. Nagsulat sia: “May amo kami sini nga ministeryo, gani wala kami nagauntat.” (2 Cor. 4:1) Pareho kay Pablo, bisan pa madamo nga tion ang aton ginagamit sa pag-obra, puede gihapon naton himuon nga pinakaimportante sa aton kabuhi ang hilikuton para sa Ginharian.

10-11. Paano naton matuman sing bug-os ang aton ministeryo kon nagamasakit kita?

¹⁰ Kon limitado na lang ang aton mahimo sa pamalaybalay nga hilikuton bangod sang pagtigulang ukon pagmasakit, may iban pa nga paagi sa pagbantala. Ang mga manugbantala sang unang siglo nagapanaksi sa mga tawo bisan diin. Ginahingalitan nila ang kada kahigayunan nga mabantalaan ang mga tawo sa mga balay, sa pangpubliko nga mga lugar, kag sing indi pormal. (Binu. 17:17; 20:20) Kon madali kita kapuyon kon nagalakat, mahimo kita magpungko sa pangpubliko nga mga lugar kag bantalaan ang mga tawo nga nagalabay. Ukon mahimo kita magpanaksi sing indi pormal, maghimo sing sulat, ukon magpanaksi paagi sa telepono. Madamo nga manugbantala nga nabudlayan na sa  pagpamalaybalay ang nalipay gid sa sining iban pa nga paagi sa pagbantala.

¹¹ Bisan pa nagamasakit ka, matuman mo gihapon sing bug-os ang imo ministeryo. Binagbinaga liwat ang halimbawa ni apostol Pablo. Nagsiling sia: “Sa tanan nga butang may kusog ako paagi sa isa nga nagapabakod sa akon.” (Fil. 4:13) Kinahanglan ni Pablo ini nga pagpabakod sang nagmasakit sia samtang nagalakbay sia bilang misyonero. Nagsiling sia sa mga taga-Galacia: “Bangod sang akon balatian nahatagan ako sang nahauna nga kahigayunan nga ipahayag ang maayong balita sa inyo.” (Gal. 4:13) Sing kaanggid, kon nagamasakit ka, kahigayunan ini nga mabantala mo ang maayong balita sa mga doktor, mga nars, kag iban pa nga nagaatipan sa imo. Madamo sa ila ang ara sa ulubrahan kon ginakadtuan sang mga manugbantala ang ila mga balay.

12. Ano ang buot silingon sang ‘pagpokus’ sang aton mata?

¹² Si Jesus nagsiling: “Ang mata amo ang suga sang lawas. Gani, kon ang inyo mata nakapokus [ukon “simple,” footnote], ang inyo bug-os nga lawas masanag.” (Mat. 6:22) Ano ang buot niya silingon? Buot silingon ni Jesus nga dapat simple lang ang aton kabuhi ukon dapat kita magpokus sa isa lang ka tulumuron, ukon katuyuan, kag indi kita dapat magpatublag. Maayo gid nga halimbawa si Jesus sa pagpokus sang iya kabuhi sa ministeryo, kag gintudluan niya ang iya mga disipulo nga magpokus sa pag-alagad kay Jehova kag sa Iya Ginharian. Mailog naton si Jesus kon himuon naton nga pinakaimportante sa aton kabuhi ang Cristianong pagministeryo, nga  ‘ginauna ang pagpangita sa Ginharian kag sa pagkamatarong sang Dios.’—Mat. 6:33.

13. Ano ang makabulig sa aton para makapokus kita sa aton Cristianong pagministeryo?

¹³ Ang isa ka paagi para makapokus kita sa aton ministeryo amo ang pagpasimple sang aton kabuhi. * Kon himuon naton ini, mas madamo kita sing tion sa pagbulig sa iban nga makilala kag higugmaon si Jehova. Halimbawa, puede bala naton ma-adjust ang aton oras sa pag-obra para mas madamo kita sing tion sa ministeryo kada semana? Kon madamo nga oras ang aton ginagamit sa paglingawlingaw, puede bala naton ini mabuhinan?

14. Ano nga mga pagbag-o ang ginhimo sang isa ka mag-asawa para madugangan ang ila tion sa ministeryo?

¹⁴ Ginhimo ini sang isa ka gulang nga si Elias kag sang iya asawa. Nagsiling sia: “Indi kami sadto makapayunir, pero may mahimo kami para madugangan ang amon tion sa ministeryo. Naghimo kami sing gamay nga mga pagbag-o. Halimbawa, nagkinot kami sa amon mga ginagastuhan. Narealisar man namon nga madamo nga tion ang ginagamit namon sa paglingawlingaw gani ginbuhinan namon ini. Kag ginpangabay namon ang amon mga boss nga bag-uhon ang amon iskedyul sa obra. Bangod sini, makabantala na kami kon gab-i, makadumala sang madamo nga pagtuon sa Biblia, kag makabantala pa gani kami sa tungatunga sang semana sing duha ka beses kada bulan. Nalipay gid kami!”

15-16. Suno sa 1 Timoteo 4:13, 15, paano naton mapauswag ang aton ikasarang sa pagbantala? (Tan-awa man ang kahon nga “ Mga Puede Ko Himuon Para Matuman Ko sing Bug-os ang Akon Ministeryo.”)

¹⁵ Ang isa pa ka paagi para matuman naton sing bug-os ang aton ministeryo amo ang pagpauswag  sang aton ikasarang sa pagbantala. May mga obra nga kinahanglan ang padayon nga paghanas kag pagtudlo para mapauswag sang mga nagaobra ang ila ihibalo kag ikasarang. Dapat man ini himuon sang mga manugbantala sang Ginharian. Dapat padayon naton nga pauswagon ang aton ikasarang sa pagministeryo.—Hulu. 1:5; basaha ang 1 Timoteo 4:13, 15.

¹⁶ Pero, paano naton mapauswag ang aton pagministeryo? Paagi sa pagpamati sing maayo sa mga instruksion sa Pagkabuhi kag Pagministeryo nga Miting kada semana. Ini nga miting nagahanas sa aton nga mapauswag ang aton ikasarang sa pagbantala kag pagtudlo. Halimbawa, kon may ginapatalupangod ang tsirman sa mga naghatag sang bahin, makatuon kita sang pila ka panugda nga makabulig sa aton nga mag-uswag ang aton ministeryo. Mahimo naton iaplikar ini nga mga panugda kon magbantala kita. Mahimo kita magpabulig sa manugtatap sang aton grupo sa pag-alagad sa latagon ukon mag-upod sa iya sa ministeryo. Mahimo man kita mag-upod sa eksperiensiado nga mga manugbantala, mga payunir, ukon sa manugtatap sang sirkito. Samtang nagauswag ang aton ikasarang sa paggamit sang aton Mga Gamit sa Pagpanudlo, mas manamian kita magbantala kag magtudlo.

17. Ano ang resulta kon ginatuman mo sing bug-os ang imo ministeryo?

¹⁷ Isa gid ka pribilehiyo nga gintugutan kita ni Jehova nga mangin “masigkamanugpangabudlay” niya! (1 Cor. 3:9) Kon ‘ginapat-od mo ang mas importante nga mga butang’ kag nagapokus ka sa Cristianong ministeryo, ‘maalagad mo si Jehova nga may kasadya.’ (Fil. 1:10; Sal. 100:2) Bilang ministro sang Dios, makasalig ka nga hatagan ka niya sing kusog para matuman mo ang imo ministeryo bisan pa may mga kabudlayan. (2 Cor. 4:1, 7; 6:4) Sarisari ang aton kahimtangan, kay ang iban madamo sing tion sa ministeryo pero ang iban limitado lang. Ano man ang imo kahimtangan, mangin ‘malipayon’ ka gihapon kon nagaalagad ka sing bug-os kalag. (Gal. 6:4) Kon ginatuman mo sing bug-os ang imo ministeryo, ginapakita mo ang imo gugma kay Jehova kag sa imo isigkatawo. Kag “sa paghimo sini maluwas mo ang imo kaugalingon kag ang mga nagapamati sa imo.”—1 Tim. 4:16.