1-2. Ngaa nabalaka gid si Jesus?

SANG katapusan nga adlaw ni Jesus bilang tawo, nabalaka gid sia. Sa indi madugay, paantuson sia kag patyon sang malaut nga mga tawo. Pero indi lang ang iya kamatayon ang ginakabalak-an ni Jesus. Palangga gid niya ang iya Amay kag gusto niya nga pahamut-an Sia. Kabalo si Jesus nga kon mangin matutom sia sa mabudlay gid nga pagtilaw, makabulig sia sa pagbindikar sa ngalan ni Jehova. Palangga man ni Jesus ang mga tawo, kag kabalo sia nga may paglaum lang kita nga mabuhi sing wala sing katapusan kon mangin matutom sia asta sa iya kamatayon.

² Bisan pa mabudlay gid ang kahimtangan ni Jesus, malinong ang iya hunahuna. “Ginabilin ko sa inyo ang paghidait nga ginhatag ko sa inyo,” siling niya sa iya mga apostoles. (Juan 14:27) May “paghidait [sia] sang Dios,” ukon kalmado sia. Kag amo ini ang ginabatyag sang mga may hamili nga kaangtanan kay Jehova. Ini nga paghidait nagbulig kay Jesus nga indi mabalaka.—Fil. 4:6, 7.

3. Ano ang binagbinagon naton sa sini nga artikulo?

³ Indi tanan nga kabudlayan nga ginbatas ni Jesus maeksperiensiahan naton, pero ang tanan nga nagasunod sa iya makaatubang gid sang mga pagtilaw. (Mat. 16:24, 25; Juan 15:20) Kag pareho kay Jesus, may mga tion nga nabalaka man kita. Ano ang himuon naton para mangin malinong ang aton hunahuna bisan pa nabalaka kita? Binagbinagon naton ang tatlo ka butang nga ginhimo ni Jesus sa tion sang iya ministeryo diri sa duta, kag tan-awon naton kon paano naton sia mailog kon nagaatubang kita sang mga pagtilaw.

4. Samtang ginapamalandungan mo ang 1 Tesalonica 5:17, maghatag sing mga halimbawa nga nagapakita nga madamo nga beses nga nangamuyo si Jesus sa iya katapusan nga adlaw sa duta.

⁴ Basaha ang 1 Tesalonica 5:17. Sa katapusan nga adlaw ni Jesus sa duta, madamo nga beses sia nga nangamuyo. Sang ginsugdan niya ang okasyon sa pagdumdom sang iya kamatayon, nangamuyo sia para sa tinapay kag alak. (1 Cor. 11:23-25) Antes sila maghalin sa lugar nga ginhiwatan nila sang Paskua, nangamuyo sia upod sa iya mga disipulo. (Juan 17:1-26) Sadto man nga gab-i, pag-abot niya kag sang iya mga disipulo sa Bukid sang mga Olibo, sulitsulit sia nga nangamuyo. (Mat. 26:36-39, 42, 44) Kag ang katapusan nga ginsiling ni Jesus antes sia mapatay isa ka pangamuyo. (Luc. 23:46) Paagi sa pagpangamuyo, ginlakip ni Jesus si Jehova sa tanan nga natabo sa iya sadto nga adlaw.

5. Ngaa hinadlukan ang mga apostoles?

⁵ Ang isa ka rason kon ngaa nabatas ni Jesus ang pagtilaw amo ang pagsalig niya sa iya Amay paagi sa pangamuyo. Pero ang mga apostoles napaslawan nga magpadayon sa pagpangamuyo sadto nga gab-i. Gani hinadlukan sila sang gintilawan sila. (Mat. 26:40, 41, 43, 45, 56) Kon may mga pagtilaw, makapabilin lang kita nga matutom kon sundon naton si Jesus kag ‘magpadayon kita sa pagpangamuyo.’ Ano ang puede naton ipangamuyo?

6. Paano makabulig ang pagtuo para mangin malinong ang aton hunahuna?

⁶ Makapangamuyo kita kay Jehova nga ‘dugangan ang aton pagtuo.’ (Luc. 17:5; Juan 14:1) Kinahanglan naton ang pagtuo bangod pagatilawan ni Satanas ang tanan nga nagasunod kay Jesus. (Luc. 22:31) Paano makabulig ang pagtuo para mangin malinong ang aton hunahuna  bisan pa nagainasud-asod ang aton mga problema? Kon nahimo na naton ang tanan para mabatas ang isa ka pagtilaw, ang pagtuo magabulig sa aton nga itugyan kay Jehova ang aton problema. Bangod nagasalig kita nga mas kabalo sia sang dapat himuon, mangin malinong ang aton hunahuna kag tagipusuon.—1 Ped. 5:6, 7.

7. Ano ang natun-an mo sa ginsiling ni Robert?

⁷ Ang pangamuyo nagabulig sa aton nga mangin malinong ang aton hunahuna bisan ano pa nga pagtilaw ang aton ginaatubang. Binagbinaga ang halimbawa ni Robert nga isa ka matutom nga gulang kag sobra na 80 anyos. Nagsiling sia: “Ang laygay sa Filipos 4:6, 7 nakabulig sa akon nga maatubang ang madamo nga pagtilaw. May problema ako sadto sa pinansial. Kag may tion nga ginkuha sa akon ang pribilehiyo bilang gulang.” Ano ang nakabulig kay Robert nga mangin malinong ang iya hunahuna? “Kon nabalaka ako, nagapangamuyo ako dayon,” siling niya. “Nabatyagan ko nga kon pirme ako nagapangamuyo sing hanuot, mas nagalinong ang akon hunahuna.”

8. Suno sa Juan 8:29, ano ang isa pa ka rason nga nagbulig kay Jesus nga mangin malinong ang iya hunahuna?

⁸ Basaha ang Juan 8:29. Bisan pa ginhingabot si Jesus, malinong ang iya hunahuna bangod kabalo sia nga nalipay sa iya ang iya Amay. Nagtuman sia bisan pa mabudlay ini para sa iya. Palangga niya ang iya Amay kag ginhimo niya nga pinakaimportante sa iya kabuhi ang pag-alagad kay Jehova. Antes sia magkadto sa duta, sia ang “batid nga manugpangabudlay” sang Dios. (Hulu. 8:30) Kag sang ari sia sa duta, mapisan niya nga gintudluan ang iban parte sa iya  Amay. (Mat. 6:9; Juan 5:17) Nalipay gid si Jesus sa sini nga hilikuton.—Juan 4:34-36.

9. Kon masako kita sa pagbantala, paano ini makabulig nga mangin malinong ang aton hunahuna?

⁹ Ginailog naton si Jesus kon ginatuman naton si Jehova, kag kon “madamo [kita] pirme sing ginahimo sa hilikuton sang Ginuo.” (1 Cor. 15:58) Kon “masako gid” kita sa pagbantala, mangin positibo gihapon kita bisan may mga problema. (Binu. 18:5) Halimbawa, ang mga maistorya naton sa aton pagministeryo masami nga mas mabudlay pa ang problema sangsa aton. Pero, sang matun-an nila nga higugmaon si Jehova kag iaplikar ang iya mga laygay, nangin maayo ang ila pagkabuhi kag nangin mas malipayon sila. Sa kada tion nga makita naton ini, mas nagabakod ang aton pagsalig nga atipanon kita ni Jehova. Kag nagabulig ini sa aton nga mangin malinong ang aton hunahuna. Napamatud-an ini sang isa ka sister nga pirme nagakadepres kag nagabatyag nga wala sia sing pulos. “Kon masako ako sa pagministeryo,” siling niya, “nagaayo ang akon pamatyag kag mas malipayon ako. Pamatyag ko mas nagasuod ako kay Jehova kon nagabantala ako.”

10. Ano ang natun-an mo sa ginsiling ni Brenda?

¹⁰ Binagbinaga man ang eksperiensia ni Brenda. Sia kag ang iya anak may malala nga balatian nga multiple sclerosis. Naga-wheelchair si Brenda kag madali sia kapuyon. Nagapamalaybalay sia kon masarangan sang iya lawas, pero ang paghimo sang sulat amo ang iya panguna nga paagi sa pagpanaksi. Nagsiling sia: “Sang nabaton ko na nga ang akon balatian indi mabulong sa sini nga sistema, mas nakapokus ako sa pagministeryo. Ang matuod, kon nagabantala ako, nagakadula ang akon mga kabalaka. Kay man, mas nagapokus ako sa pagbulig sa mga nabantalaan ko sa teritoryo sang amon kongregasyon. Kag pirme ako sini ginapahanumdom sang paglaum ko sa palaabuton.”

11-13. (a) Paano ginpakita sang mga apostoles kag sang iban pa nga matuod sila nga mga abyan ni Jesus? (b) Ano ang nabatyagan ni Jesus bangod sa iya mga abyan?

¹¹ Sa tion sang pagministeryo ni Jesus, ginpakita sang matutom nga mga apostoles nga matuod sila nga mga abyan ni Jesus. Pareho sila sa abyan nga ginalaragway sa sini nga hulubaton: “May abyan nga mas suod pa sangsa isa ka utod.” (Hulu. 18:24) Ginpabaloran gid ni Jesus ini nga klase sang mga abyan. Sa tion sang iya pagministeryo, wala sing bisan isa sa iya mga utod ang nagtuo sa iya. (Juan 7:3-5) May tion pa gani nga naghunahuna ang iya mga paryente nga nagbuang na sia. (Mar. 3:21) Pero lain ang iya matutom nga mga apostoles. Sang gab-i antes sang iya kamatayon, ginsilingan niya sila: “Gin-unungan ninyo ako sa akon mga pagtilaw.”—Luc. 22:28.

¹² May mga tion nga nasubuan si Jesus sa ginhimo sang iya mga apostoles, pero wala sia nagpokus sa ila mga sala kundi sa ila pagtuo sa iya. (Mat. 26:40; Mar. 10:13, 14; Juan 6:66-69) Sa katapusan nga gab-i ni Jesus kaupod ang iya matutom nga mga apostoles, ginsilingan niya sila: “Ginatawag ko kamo nga mga abyan, bangod ang tanan nga butang nga nabatian ko sa akon Amay ginapahibalo ko sa inyo.” (Juan 15:15) Napalig-on gid si Jesus sa iya mga abyan, kag nalipay gid sia sa ila bulig sa iya pagministeryo.—Luc. 10:17, 21.

¹³ Magluwas sa iya mga apostoles, may iban pa nga mga lalaki kag mga babayi nga mga abyan si Jesus nga nagbulig sa iya sa pagbantala kag sa iban pa nga paagi. Ang iban nag-agda sa iya sa ila mga balay para magkaon. (Luc. 10:38-42; Juan 12:1, 2) Ang iban nag-upod sa iya paglakbay kag nagpagamit sang ila mga pagkabutang. (Luc. 8:3) May maayo nga mga abyan si Jesus bangod maayo man sia nga abyan sa ila.  Ginbuligan niya sila kag wala sia nagpaabot sang indi nila masarangan. Perpekto si Jesus, pero nalipay sia sa bulig sang iya indi perpekto nga mga abyan. Sigurado gid nga nakabulig sila sa iya nga mangin malinong ang iya hunahuna.

14-15. Paano kita makakita sang maayo nga mga abyan, kag paano sila makabulig sa aton?

¹⁴ Ang maayo nga mga abyan makabulig sa aton nga mangin mainunungon kay Jehova. Kag ano ang pinakamaayo nga paagi para makakita kita sang maayo nga mga abyan? Dapat mangin maayo man kita nga abyan. (Mat. 7:12) Halimbawa, ginapalig-on kita sang Biblia nga gamiton ang aton tion kag kusog sa pagbulig sa iban, ilabi na sa mga “nagakinahanglan.” (Efe. 4:28) May ara bala sa inyo kongregasyon nga puede mo buligan? Puede ka bala makapanindahan para sa utod nga nagamasakit ukon tigulang na? Puede mo bala mahatagan sang pagkaon ang pigado nga pamilya? Kon kabalo ka maggamit sang jw.org^® nga website kag sang JW Library^® nga app, puede mo bala mabuligan ang iban sa inyo kongregasyon sa paggamit sini? Kon masako kita sa pagbulig sa iban, mas mangin malipayon kita.—Binu. 20:35.

¹⁵ Ang aton mga abyan makabulig sa aton sa tion sang mga pagtilaw para mangin malinong ang aton hunahuna. Pareho kay Elihu nga nagpamati kay Job samtang ginasugid niya ang ginaatubang niya nga mga pagtilaw, ang aton mga abyan makabulig man sa aton paagi sa pagpamati sing mapinasensiahon sa aton mga ginakabalak-an. (Job 32:4) Indi kita dapat magpaabot nga ang aton mga abyan amo ang magdesisyon para sa aton, pero maalamon kita kon pamatian naton ang ila mga laygay nga nabase sa Biblia. (Hulu. 15:22) Kag pareho kay  Hari David nga mapainubuson nga nagbaton sang bulig sang iya mga abyan, indi naton dapat pagtugutan ang bugal nga mangin rason para indi naton pagbatunon ang bulig sang aton mga abyan. (2 Sam. 17:27-29) Ang matuod, ang maayo nga mga abyan regalo ni Jehova.—Sant. 1:17.

16. Suno sa Filipos 4:6, 7, ano lang ang paagi para mabaton naton ang paghidait? Ipaathag.

¹⁶ Basaha ang Filipos 4:6, 7. Ngaa nagsiling si Jehova nga ang paghidait nga ginahatag niya mabaton naton “paagi kay Cristo Jesus”? Bangod mangin malinong lang ang aton hunahuna kag tagipusuon kon nahangpan naton ang papel ni Jesus kag nagatuo kita sa sini. Halimbawa, paagi sa halad-gawad ni Jesus, mahimo mapatawad ang tanan naton nga sala. (1 Juan 2:12) Nagahatag gid ini sa aton sang paumpaw! Kag bilang Hari sang Ginharian sang Dios, dulaon ni Jesus ang tanan nga halit nga ginhimo sa aton ni Satanas kag sang iya sistema. (Isa. 65:17; 1 Juan 3:8; Bug. 21:3, 4) Nagahatag gid ini sa aton sang paglaum! Kag bisan pa mabudlay ang asaynment nga ginhatag sa aton ni Jesus, kaupod naton sia nga nagabulig sa aton sa katapusan nga mga adlaw sang sini nga sistema. (Mat. 28:19, 20) Nagahatag gid ini sa aton sang kaisog! Importante gid ang paumpaw, paglaum, kag kaisog para mangin malinong ang aton hunahuna.

17. (a) Paano mangin malinong ang hunahuna sang isa ka Cristiano? (b) Suno sa promisa sa Juan 16:33, ano ang masarangan naton nga himuon?

¹⁷ Gani, paano mangin malinong ang imo hunahuna kon makaeksperiensia ka sang mabudlay nga mga pagtilaw? Iluga ang ginhimo ni Jesus. Una, mangamuyo kag padayon nga magpangamuyo. Ikaduha, tumana si Jehova kag mapisan nga magbantala bisan pa mabudlay ini. Kag ikatlo, magpabulig sa imo mga abyan para maatubang mo ang mga pagtilaw. Kon himuon mo ini, ang paghidait sang Dios magabantay sang imo hunahuna kag tagipusuon. Kag pareho kay Jesus, madaug mo ang bisan ano nga pagtilaw.—Basaha ang Juan 16:33.