1-2. Ano ang buot silingon ni Jesus sa iya ginsiling sa Juan 4:35, 36?

SANG nagapakadto si Jesus sa Galilea, nag-agi sia sa kaumhan nga mahimo bag-o pa lang magtubo ang gintanom nga sebada. (Juan 4:3-6) Mga apat pa ka bulan antes ini anihon. Gani daw matingala kita sa ginsiling ni Jesus: “Tuluka ninyo kag tan-awa ang kaumhan. Maputi na ini kag alanihon na.” (Basaha ang Juan 4:35, 36.) Ano ang buot niya silingon?

² Mahimo gid nga ginatumod ni Jesus ang malaragwayon nga pag-ani sa mga tawo. Binagbinaga ang natabo sadto. Bisan pa ginalikawan sang mga Judiyo ang mga Samaritano, ginbantalaan ni Jesus ang isa ka Samaritana kag nagpamati sia! Ang matuod, sang nagahambal si Jesus parte sa kaumhan nga ‘maputi na kag alanihon na,’ madamo nga Samaritano nga ginsugiran sang Samaritana parte kay Jesus ang nagapakadto sa iya para magpatudlo pa gid sa iya. (Juan 4:9, 39-42) Ang isa ka eksperto sa Biblia nagsulat parte sa sini: “Bangod nagkadto gilayon ang mga tawo kay Jesus kag namati sa iya . . . , daw pareho sila sang uyas nga alanihon na.”

3. Kon pareho kay Jesus ang pagtamod mo sa mga tawo, ano ang epekto sini sa imo pagbantala?

³ Paano mo ginatamod ang mga tawo nga ginabantalaan mo sang maayong balita? Daw pareho bala sila sang uyas nga alanihon na? Kon para sa imo alanihon na sila, tatlo ka butang ang himuon mo. Una, mangin mas mapisan ka pa gid sa pagbantala. Malip-ot lang ang tion sa pag-ani; indi dapat mag-uyaya. Ikaduha, malipay ka nga nagapamati ang mga tawo sa maayong balita. Ang Biblia nagsiling: “Nagakasadya [ang mga tawo] kon tig-alani.” (Isa. 9:3) Kag ikatlo, tamdon mo ang kada tawo nga puede mangin disipulo. Gani ibagay mo ang imo introduksion sa topiko nga gusto niya istoryahan.

4. Ano ang matun-an naton kay apostol Pablo sa sini nga artikulo?

 ⁴ Naghunahuna ang pila ka sumulunod ni Jesus nga imposible mangin disipulo ang mga Samaritano, pero wala ini ginhunahuna ni Jesus. Para sa iya, puede sila mangin disipulo. Dapat man naton tamdon ang mga tawo sa aton teritoryo nga puede mangin disipulo sang Cristo. Maayo gid nga halimbawa si apostol Pablo. Ano ang matun-an naton sa iya? Sa sini nga artikulo, binagbinagon naton kon ano ang ginhimo niya para (1) mabal-an ang ginapatihan sang mga ginabantalaan niya, (2) mahangpan kon ano nga topiko ang gusto nila istoryahan, kag (3) tamdon sila nga puede mangin disipulo ni Jesus.

5. Ngaa nahangpan ni Pablo ang mga nagpamati sa iya sa sinagoga?

⁵ Masami nga nagbantala si Pablo sa mga sinagoga sang mga Judiyo. Halimbawa, sa sinagoga sa Tesalonica, “nagpangatarungan sia sa [mga Judiyo] pasad sa Kasulatan sa sulod sang tatlo ka adlaw nga inugpahuway.” (Binu. 17:1, 2) Mahimo gid nga wala nabudlayan si Pablo magbantala sa sinagoga. Isa sia ka Judiyo. (Binu. 26:4, 5) Nahangpan niya ang mga Judiyo, gani may kompiansa sia nga makabantala sa ila.—Fil. 3:4, 5.

6. Ngaa ang mga tawo sa tiendahan sa Atenas indi pareho sa mga ginbantalaan ni Pablo sa sinagoga?

⁶ Bangod sang paghingabot, naghalin si Pablo sa Tesalonica kag sa Berea, kag nagkadto sia sa Atenas. “Nagsulod sia sa sinagoga kag nangatarungan sa mga Judiyo kag sa iban nga mga tawo nga nagsimba sa Dios.” (Binu. 17:17) Pero sang nagbantala si Pablo sa tiendahan, indi na mga Judiyo ang nagpamati sa iya. Lakip sa ila ang maalam nga mga tawo kag iban pa nga mga Gentil nga naghunahuna nga ang mensahe ni Pablo isa ka “bag-o nga panudlo.” Nagsiling sila sa iya: “Nagahambal ka sing pila ka butang nga bag-o sa amon palamatin-an.”—Binu. 17:18-20.

7. Suno sa Binuhatan 17:22, 23, paano ginbagay ni Pablo ang iya paagi sang pagbantala?

⁷ Basaha ang Binuhatan 17:22, 23. Sang nagbantala si Pablo sa mga Gentil sa Atenas, ang iya paagi indi pareho sang nagbantala sia sa mga Judiyo sa sinagoga. Mahimo gid nga ginhunahuna ni Pablo ang ginapatihan sang mga tawo sa Atenas. Gin-obserbahan niya sing maayo ang palibot kag ang relihioso nga mga kinabatasan sang mga tawo. Dayon, nagpamensar si Pablo sang isa ka topiko parte sa kamatuoran sa Kasulatan nga mahimo magakomporme sila. “Bangod isa sia ka Judiyo nga Cristiano, nahangpan niya nga ang pagano nga mga Griego wala nagasimba sa ‘matuod’ nga Dios sang  mga Judiyo kag mga Cristiano,” siling sang isa ka eksperto sa Biblia, “pero gintinguhaan niya nga ipaathag sa mga taga-Atenas nga indi bag-o nga Dios ang iya ginasugid sa ila.” Gani ginbagay gid ni Pablo ang iya paagi sang pagbantala. Ginsilingan niya ang mga taga-Atenas nga ang iya mensahe naghalin sa “Isa ka Dios nga Wala Makilala,” nga ila ginasimba. Bisan pa ang mga Gentil wala sing nabal-an sa Kasulatan, wala naghunahuna si Pablo nga imposible sila mangin Cristiano. Para sa iya, daw pareho sila sang uyas nga alanihon na, gani ginbagay niya sa ila ang iya paagi sang pagbantala sang maayong balita.

8. (a) Ano ang makabulig sa imo nga mabal-an ang ginapatihan sang mga tawo sa inyo teritoryo? (b) Kon ang imo maistorya maghambal nga may relihion na sia, ano ang puede mo isiling sa iya?

⁸ Pareho kay Pablo, mag-obserbar. Obserbahi ang mga butang sa palibot nga makabulig sa imo nga mabal-an ang ginapatihan sang mga tawo sa inyo teritoryo. Ano nga mga dekorasyon ang makita mo sa ila balay ukon salakyan? Mabal-an mo bala ang iya relihion base sa iya ngalan, bayo, pamustura, ukon paagi sang paghambal? Basi maghambal sia nga may relihion na sia. Kon maghambal nga may relihion na ang maistorya sang espesyal payunir nga si Flutura, nagasiling sia, “Nagkadto ako diri indi para piliton ka nga patihan ang ginapatihan ko. Gusto ko lang isugid sa imo ang parte sa . . . ”

9. Ano nga topiko ang mahimo kompormihan sang relihioso nga tawo?

⁹ Ano nga topiko ang puede mo gamiton sa relihioso nga tawo? Gamita ang topiko nga magakomporme sia. Mahimo nga nagasimba sia sa isa lang ka Dios, ginakilala niya si Jesus bilang Manluluwas sang katawhan, ukon nagapati sia nga nagakabuhi kita sa tion nga malapit na madula ang kalainan. Gamita ang mga punto nga magakomporme sia para pamatian niya ang mensahe sang Biblia nga ginasugid mo sa iya.

10. Ano ang tinguhaan naton nga himuon, kag ngaa?

¹⁰ Tandai nga posible nga wala ginapatihan sang mga tawo ang pila ka panudlo sang ila relihion. Gani bisan pa mabal-an mo ang relihion sang isa ka tawo, tinguhai nga mabal-an kon ano gid ang iya ginapatihan. “Madamo nga tawo nga relihioso ang nagapati man sa mga panudlo sang ginataha nila nga mga tawo,” siling ni David nga espesyal payunir sa Australia. Si Donalta nga taga-Albania nagsiling, “Ang iban nga maistorya namon nagasiling nga may relihion na sila, pero sang ulihi gin-aku nila nga wala sila nagapati nga may Dios.” Natalupangdan man sang brother nga misyonero sa Argentina nga may mga tawo nga nagasiling nga nagapati sila sa Trinidad, pero mahimo nga wala sila nagapati nga isa lang ka Dios ang Amay, ang Anak, kag ang balaan nga espiritu. “Ginatandaan ko ini pirme para mas madali ako makakita sang topiko  nga magakomporme ang akon ginaistorya,” siling niya. Gani tinguhai nga mabal-an kon ano gid ang ginapatihan sang mga tawo. Kon himuon mo ini, mangin pareho ka kay Pablo nga ‘nakigbagay sa tanan nga sahi sang tawo.’—1 Cor. 9:19-23.

11. Suno sa Binuhatan 14:14-17, ano ang ginhimo ni Pablo para mas pamatian sang mga tawo sa Listra ang iya mensahe?

¹¹ Basaha ang Binuhatan 14:14-17. Nahangpan ni Pablo kon ano nga topiko ang gusto istoryahan sang mga nagpamati sa iya, gani ginbagay niya sa sini ang iya ginhambal. Halimbawa, diutay lang ukon wala gid sing nabal-an sa Kasulatan ang mga tawo nga ginbantalaan niya sa Listra. Gani naghambal si Pablo sa paagi nga mahangpan nila. Ginsambit niya ang bugana nga patubas kag ang mga butang nga makapahalipay sa mga tawo. Naggamit sia sang mga tinaga kag mga halimbawa nga madali mahangpan sang mga nagpamati sa iya.

12. Paano mo mabal-an kon ano nga topiko ang gusto istoryahan sang isa ka tawo kag ibagay sa sini ang imo ihambal?

¹² Hibalua kon ano nga topiko ang gusto istoryahan sang mga tawo sa inyo teritoryo kag ibagay sa sini ang imo ihambal. Paano mo mabal-an kon ano nga topiko ang gusto istoryahan sang isa ka tawo kon nagapalapit ka sa iya ukon sa iya balay? Sa liwat, mag-obserbar. Basi nagapananom sia sa iya ugsaran, nagabasa sang libro, nagakay-o sang salakyan, ukon may iban pa nga ginahimo. Mahimo ka mag-umpisa paagi sa pagmuno sang iya ginahimo. (Juan 4:7) Posible naton mabal-an ang pungsod nga ginhalinan sang isa ka tawo, ang iya trabaho, ukon paborito nga team sa sports paagi sa iya ginasuksok. “Naistorya ko ang 19 anyos nga lalaki nga nagasuksok sang T-shirt nga may piktyur sang isa ka bantog nga singer,” siling ni Gustavo. “Ginpamangkot ko sia parte sa sini, kag ginsugiran niya ako kon ngaa nanamian sia sa sini nga singer. Sang ulihi, nagsugot sia nga magtuon sang Biblia, kag utod na naton sia subong.”

13. Paano mo mapalig-on ang isa ka tawo nga magtuon sang Biblia sa paagi nga manamian sia sa sini?

 ¹³ Kon ginapalig-on mo ang isa ka tawo nga magtuon sang Biblia, himua ini sa paagi nga manamian sia sa pagtuon; kag ipakita sa iya nga makabulig ini sa iya. (Juan 4:13-15) Halimbawa, ginpasulod sang interesado nga babayi sa iya balay ang sister nga si Poppy. Nakita sang sister ang isa ka diploma sa dingding nga nagapakita nga ang babayi isa ka professor nga nagtuon parte sa mga pamaagi sang pagtudlo. Gani ginpaathag niya sa babayi nga nagatudlo man kita sa mga tawo paagi sa aton pag-Bible study sa ila kag paagi sa aton mga miting. Nagsugot ang babayi nga magtuon sang Biblia, nagkadto sia sa aton miting sang masunod nga adlaw, kag nagtambong sia sang ulihi sa sirkito nga asembleya. Pagligad sang isa ka tuig, nabawtismuhan sia. Pamangkuta ang imo kaugalingon: ‘Ano nga topiko ang gusto istoryahan sang mga tawo nga ginabalikan ko? Mapaathag ko bala sa ila ang aton ginahimo nga pagtuon sa Biblia sa paagi nga manamian sila sa sini?’

14. Paano mo ibagay sa imo ginatudluan sang Biblia ang inyo pagtuon?

¹⁴ Kon naumpisahan mo na ang pagtudlo sang Biblia sa isa ka tawo, maghanda sing maayo para sa inyo pagtuon. Hunahunaa ang iya pamilya, ineskwelahan, mga eksperiensia, kag ang gusto niya istoryahan. Samtang nagahanda ka, pamensara kon ano nga mga teksto ang imo pagabasahon, kon ano nga mga video ang imo ipalantaw, kag kon ano nga mga ilustrasyon ang gamiton mo para ipaathag ang mga kamatuoran sa Biblia. Pamangkuta ang imo kaugalingon, ‘Ano gid ayhan ang makapalig-on sa iya kag makatandog sang iya tagipusuon?’ (Hulu. 16:23) Sa Albania, ang babayi nga ginatudluan sang payunir nga si Flora nagsiling sa iya, “Indi ko gid mapatihan ang panudlo parte sa pagkabanhaw.” Wala ginpilit ni Flora ang babayi nga magpati sa pagkabanhaw. Nagsiling sia, “Napamensaran ko nga para patihan niya ang pagkabanhaw, dapat niya anay makilala ang Dios nga nagpromisa sini.” Gani sugod sadto, ginapaathag gid ni Flora ang gugma, kaalam, kag gahom ni Jehova kon magtuon sila. Sang ulihi, ginpatihan na sang iya ginatudluan ang pagkabanhaw. Subong, isa na sia ka matutom nga Saksi ni Jehova.

15. Suno sa Binuhatan 17:16-18, ano ang kahimtangan sa Atenas nga nagpaugot kay Pablo, pero ngaa nagbantala sia gihapon sa mga taga-Atenas?

¹⁵ Basaha ang Binuhatan 17:16-18. Nagbantala gihapon si Pablo sa mga taga-Atenas bisan pa lapnag sa ila siudad ang pagsimba sa mga diosdios, seksuwal nga imoralidad, kag pagano nga mga panudlo. Wala sia nag-untat bisan pa gin-insulto nila sia. Nangin Cristiano si Pablo bisan pa sang una “manugpasipala [sia], manughingabot, kag arogante nga tawo.” (1 Tim. 1:13) Para kay Jesus, puede mangin disipulo si Pablo. Gin-ilog ni Pablo si Jesus. Gani para kay Pablo, puede mangin disipulo ang mga taga-Atenas. Kag husto gid sia.—Binu. 9:13-15; 17:34.

16-17. Ngaa masiling naton nga puede mangin disipulo sang Cristo ang tanan nga klase sang tawo? Maghatag sing halimbawa.

¹⁶ Sang unang siglo, nangin disipulo ni Jesus ang tanan nga klase sang tawo. Sang nagsulat si Pablo sa mga Cristiano sa kongregasyon sa siudad sang Corinto sa Gresya, nagsiling sia nga ang iban sa ila mga kriminal ukon mga imoral sang una. Dayon nagsiling pa sia: “Amo sina anay ang iban sa inyo. Apang ginhugasan na kamo sang aton Dios.” (1 Cor. 6:9-11) Kon nagakabuhi ka sadto nga tion, tamdon mo bala ini nga mga tawo nga puede magbag-o kag mangin disipulo?

¹⁷ Subong, madamo ang handa nga magbag-o para mangin disipulo ni Jesus. Halimbawa, sa Australia, narealisar sang espesyal payunir nga si Yukina nga puede mamati sa mensahe sang  Biblia ang tanan nga klase sang tawo. Isa ka adlaw, sa isa ka opisina, nakita niya ang isa ka pamatan-on nga babayi nga madamo sang tattoo kag tam-an ka halog sang pamayo. “Sang primero, daw nagduhaduha ako,” siling ni Yukina, “pero gin-istorya ko sia. Interesado gid gali sia sa Biblia kay ang pila niya ka tattoo mga teksto sa Salmo!” Nagtuon sang Biblia ang pamatan-on kag nagtambong sa mga miting. *

18. Ngaa indi naton dapat paghukman ang mga tawo?

¹⁸ Ginpaabot bala ni Jesus nga magasunod sa iya ang kalabanan nga tawo amo nga para sa iya alanihon na sila? Indi. Gintagna sang Kasulatan nga diutay lang ang magatuo sa iya. (Juan 12:37, 38) Kag mabasa ni Jesus ang tagipusuon sang mga tawo. (Mat. 9:4) Pero ginhatagan niya sang atension ang diutay nga magatuo sa iya, kag mapisan sia nga nagbantala sa tanan. Indi kita makabasa sang tagipusuon, gani indi naton dapat paghukman ang isa ka teritoryo ukon ang isa ka tawo. Sa baylo, tamdon naton nga puede mangin disipulo ang mga tawo. Si Marc, nga misyonero sa Burkina Faso, nagsiling: “Ang mga tawo nga abi ko magapadayon sa pag-uswag sa masami amo ang nagauntat sa pagtuon. Pero ang mga tawo nga abi ko mauntat sa pagtuon amo pa ang nagauswag sa ulihi. Gani narealisar ko nga mas maayo nga magpagiya kita sa espiritu ni Jehova.”

19. Paano naton dapat tamdon ang mga tawo sa aton teritoryo?

¹⁹ Mahimo nga nahunahuna mo nga diutay lang sa inyo teritoryo ang pareho sa uyas nga alanihon na. Pero dumduma ang ginsiling ni Jesus sa iya mga disipulo. Alanihon na ang mga tawo sa aton teritoryo. Puede magbag-o ang mga tawo kag mangin disipulo sang Cristo. Para kay Jehova, ang mga tawo sa aton teritoryo puede mangin disipulo kag mangin “malahalon nga mga butang.” (Hag. 2:7) Kon tamdon naton ang mga tawo pareho sa pagtamod ni Jehova kag ni Jesus, tinguhaan naton nga makilala sila kag mabal-an ang topiko nga gusto nila istoryahan. Indi kita magasiling nga wala na gid sila sing paglaum. Tamdon naton sila nga puede mangin aton utod.