1. Ano ang makita ni Jehova sa iya katawhan?

SI Jehova nga Dios “nahamuot sa iya katawhan.” (Sal. 149:4) Nalipay gid kita sa sini. Makita ni Jehova ang aton maayo nga mga kinaiya. Kabalo sia sang aton masarangan himuon kag ginabuligan niya kita nga mangin suod sa iya. Kon mangin matutom kita sa iya, mangin suod kita sa iya sing wala sing katapusan.—Juan 6:44.

2. Ngaa indi makapati ang iban nga palangga sila ni Jehova?

² Ang iban mahimo magsiling, ‘Kabalo ’ko nga palangga ni Jehova ang iya katawhan, pero paano ko masigurado nga palangga gid ako ni Jehova?’ Ngaa ginapamangkot ini sang iban? Si Oksana, * nga may madamo nga indi maayo nga naeksperiensiahan sang bata pa sia, nagsiling: “Nalipay gid ako sang nabawtismuhan ako kag sang nagpayunir ako. Pero pagligad sang 15 ka tuig, nadumduman ko ang malain nga natabo sa akon sang bata pa ako. Nahunahuna ko nga wala na nalipay si Jehova sa akon kag indi na niya ako palangga.” Ang payunir nga sister nga si Yua may madamo man nga indi maayo nga naeksperiensiahan sang bata pa sia. Nagsiling sia: “Nagdedikar ako kay Jehova kay gusto ko nga malipay sia sa akon. Pero para sa akon, indi gid niya ako pagpalanggaon.”

3. Ano ang binagbinagon naton sa sini nga artikulo?

³ Pareho sa sining duha ka matutom nga sister, palangga mo gid si Jehova pero basi nagaduhaduha ka nga palangga ka niya. Ngaa dapat ka mangin kumbinsido nga palangga ka gid niya? Kag ano ang makabulig sa imo kon ginahunahuna mo nga indi ka palangga ni Jehova? Binagbinagon naton ang sabat sa sini nga mga pamangkot.

4. Ngaa indi gid maayo kon magduhaduha kita nga palangga kita ni Jehova?

⁴ Kon nagapati gid kita nga palangga kita ni Jehova, mapalig-on kita sini nga alagaron sia sa bug-os naton nga masarangan, bisan pa mabudlay ang aton kahimtangan. Pero kon nagaduhaduha kita nga palangga kita sang Dios, ‘magaluya ang aton kusog.’ (Hulu. 24:10) Kag kon magluya ang aton buot kag kon maghunahuna kita nga indi kita palangga sang Dios, indi na naton mabatuan ang mga pag-atake ni Satanas.—Efe. 6:16.

5. Ano ang natabo sa pila ka kauturan nga nagduhaduha nga palangga sila sang Dios?

⁵ Nagluya ang pagtuo sang pila naton ka matutom nga mga kauturan bangod nagduhaduha sila nga palangga sila ni Jehova. Ang isa ka gulang nga si James nagsiling: “Nagaalagad ako sa Bethel kag malipayon ako nga nagabulig sa kongregasyon nga nagabantala sa mga tawo nga lain ang lenguahe. Pero indi ako sigurado kon bala nalipay si Jehova sa akon mga sakripisyo. Nagduhaduha pa gani ako kon bala ginapamatian ni Jehova ang akon mga pangamuyo.” Si Eva nga nagaalagad man sa Bethel nagsiling: “Narealisar ko nga indi gid maayo nga hunahunaon nga indi kita palangga ni Jehova kay maapektuhan gid sini ang imo pag-alagad sa iya. Bangod sini, daw wala ka na sing gana nga himuon ang mga ginapahimo ni Jehova kag wala ka na nalipay sa pag-alagad sa iya.” Si Michael nga isa ka regular payunir kag gulang nagsiling: “Kon wala ka nagapati nga palangga ka sang Dios, amat-amat ka nga magapalayo sa iya.”

6. Ano ang dapat naton himuon kon mabatyagan naton nga nagaduhaduha kita nga palangga kita sang Dios?

⁶ Ginapakita sini nga mga eksperiensia nga magaluya gid ang aton pagtuo kon hunahunaon naton nga indi kita palangga ni Jehova. Pero ano ang dapat naton himuon kon mabatyagan naton nga nagaduhaduha kita nga palangga kita sang Dios? Dapat naton isikway gilayon ini nga panghunahuna. Pangabaya si Jehova nga buligan ka nga madula ining “makatulublag nga mga panghunahuna” kag buslan ini sang ‘paghidait sang Dios nga magabantay sang imo tagipusuon kag ikasarang sa paghunahuna.’ (Sal. 139:23; footnote; Fil. 4:6, 7) Kag dumduma nga indi lang ikaw ang nagabatyag sini. Nabatyagan man ini sang iban nga matutom nga mga kauturan. Ginpakigbatuan man ini sang mga alagad ni Jehova sang una. Binagbinagon naton kon ano ang matun-an naton sa halimbawa ni apostol Pablo.

7. Ano nga mga problema ang naeksperiensiahan ni Pablo?

⁷ Nagabatyag ka bala kon kaisa nga indi mo masarangan himuon ang madamo mo nga responsibilidad? Pareho kamo ni Pablo. Nabalaka sia, indi lang sa isa ka kongregasyon, kundi “sa tanan nga kongregasyon.” (2 Cor. 11:23-28) Nasubuan ka bala bangod may balatian ka? Nag-antos si Pablo sang “tunok sa unod,” nga posible isa ka balatian, kag gusto gid niya nga mag-ayo. (2 Cor. 12:7-10) Nagaluya bala ang buot mo kon kaisa bangod sang imo mga kaluyahon? May mga tion nga nabatyagan man ini ni Pablo. Nagsiling sia nga “makaluluoy gid” sia kay nabudlayan sia nga himuon ang husto.—Roma 7:21-24.

8. Ano ang nakabulig kay Pablo para mabatas niya ang iya mga problema?

⁸ Bisan pa madamo nga problema ang ginbatas ni Pablo, padayon sia nga nag-alagad kay Jehova. Ano ang nakabulig sa iya? Mabakod gid ang iya pagtuo sa gawad bisan pa may mga kaluyahon sia. Nabal-an niya ang promisa ni Jesus nga “ang tanan nga nagatuo [kay Jesus] makatigayon sang kabuhi nga wala sing katapusan.” (Juan 3:16; Roma 6:23) Nagatuo gid si Pablo sa gawad. Kumbinsido gid sia nga handa si Jehova nga patawaron ang mga nakahimo sang serioso nga mga sala kon maghinulsol sila.—Sal. 86:5.

9. Ano ang matun-an naton sa ginsiling ni Pablo sa Galacia 2:20?

⁹ Nagatuo man si Pablo nga palangga gid sia sang Dios kay ginpadala sang Dios si Jesus. Nagapati si Pablo nga napatay si Jesus para sa iya. (Basaha ang Galacia 2:20.) Talupangda ang ginsiling ni Pablo sa ulihi nga bahin sini nga bersikulo. Nagsiling sia: “[Ang Anak sang Dios] naghigugma sa akon kag nagtugyan sang iya kaugalingon para sa akon.” Wala gid ginhunahuna ni Pablo nga indi sia pagpalanggaon sang Dios kay malain sia nga tawo. Wala sia nagsiling, ‘Sigurado ako nga palangga ni Jehova ang akon mga kauturan, pero imposible nga palanggaon niya ako.’ Nagsiling sia sa mga taga-Roma: “[Napatay] ang Cristo para sa aton samtang makasasala pa kita.” (Roma 5:8) Palangga kita sang Dios kag wala sing makapugong sa iya nga ipakita ini sa aton.

10. Ano ang matun-an naton sa Roma 8:38, 39?

¹⁰ Basaha ang Roma 8:38, 39. Kumbinsido gid si Pablo nga palangga kita sang Dios. Nagsulat sia nga wala sing ‘makapugong sa Dios para mabaton naton ang iya gugma.’ Kabalo si Pablo nga nangin mapinasensiahon gid si Jehova sa mga Israelinhon. Kabalo man sia nga ginpakitaan sia ni Jehova sang kaluoy. Daw nagasiling si  Pablo sang amo sini, ‘Bangod gintugutan ni Jehova nga mapatay ang iya Anak para sa akon, sigurado gid nga palangga niya ako.’—Roma 8:32.

11. Ngaa sigurado si Pablo nga palangga sia sang Dios bisan pa nakahimo sia sang mga sala nga ginsambit niya sa 1 Timoteo 1:12-15?

¹¹ Basaha ang 1 Timoteo 1:12-15. Posible nga may mga tion nga nagalalain si Pablo kon madumduman niya ang mga ginhimo niya antes sia nangin Cristiano. Nagsiling si Pablo nga sia ang “labing makasasala.” Antes natun-an ni Pablo ang kamatuoran, ginhingabot niya ang mga Cristiano sa madamo nga siudad, ginpapriso niya ang iban, kag ginsuportahan niya ang desisyon sang mga korte nga patyon ang pila ka Cristiano. (Binu. 26:10, 11) Ano ayhan ang ginabatyag ni Pablo kon makilala niya ang isa ka pamatan-on nga Cristiano nga anak gali sang ginpapatay niya? Ginhinulsulan ni Pablo ang nahimo niya nga mga sala, pero kabalo sia nga indi na niya mabag-o ang nagligad. Nagapati sia nga napatay ang Cristo para sa iya, kag nagsulat sia: “Paagi sa wala tupong nga kaayo sang Dios may yara ako sini nga katungdanan.” (1 Cor. 15:3, 10) Ano ang matun-an naton sa sini? Dapat mangin kumbinsido ka nga napatay ang Cristo para sa imo, gani posible gid nga mangin suod ka kay Jehova. (Binu. 3:19) Ang importante sa Dios amo ang ginahimo naton subong kag ang pagahimuon naton sa palaabuton, indi ang nahimo naton nga mga sala sang una sang indi pa kita Saksi ni Jehova ukon bisan sang Saksi na kita.—Isa. 1:18.

12. Paano makabulig sa aton ang ginasiling sang 1 Juan 3:19, 20 kon nagabatyag kita nga wala kita sing pulos ukon wala sing magapalangga sa aton?

¹² Kon ginapamalandungan mo ang ginhimo ni Jesus nga paghatag sang iya kabuhi para sa imo mga sala, mahimo magsiling ka, ‘Indi ako nagakabagay nga magbaton sini nga regalo.’ Ngaa posible nga mabatyagan mo ini? Mahimo kita papatihon sang aton indi perpekto  nga tagipusuon nga wala kita sing pulos ukon wala sing magapalangga sa aton. (Basaha ang 1 Juan 3:19, 20.) Kon amo sini ang aton ginabatyag, dapat naton dumdumon nga “ang Dios labaw pa sa aton tagipusuon.” Dapat mangin kumbinsido kita nga palangga kita sang aton Amay sa langit kag gusto niya kita patawaron. Kag para mangin maathag sa aton nga amo sini ang ginabatyag ni Jehova sa aton, dapat naton tun-an pirme ang iya Pulong, dapat kita mangamuyo pirme, kag dapat regular kita nga magpakig-upod sa iya matutom nga katawhan. Ngaa importante gid ini?

13. Paano makabulig sa aton ang pagtuon sang Pulong sang Dios? (Tan-awa man ang kahon nga “ Kon Paano Sila Nabuligan sang Pulong sang Dios.”)

¹³ Tun-i ang Pulong sang Dios kada adlaw para mahangpan mo pa gid sing maayo ang dalayawon nga mga kinaiya ni Jehova. Mahangpan mo man nga palangga ka gid niya. Kon pamalandungan mo ang Pulong sang Dios kada adlaw, mabuligan ka sini nga maghunahuna sing maayo, kag ‘matadlong’ mo ang imo ginahunahuna kag ginabatyag. (2 Tim. 3:16) Nagabatyag anay ang isa ka gulang nga si Kevin nga wala sia sing pulos. Nagsiling sia: “Ginbasa ko ang Salmo 103 kag ginpamalandungan ko ini. Nakabulig ini sa akon nga matadlong ang akon ginahunahuna kag mahangpan kon ano gid ang pagtamod ni Jehova sa akon.” Si Eva nga ginsambit kaina nagsiling: “Antes ako magtulog, ginapamalandungan ko kon ano gid ang importante kay Jehova. Nagabulig ini sa akon nga mangin matawhay ang akon hunahuna kag nagapabakod ini sang akon pagtuo.”

14. Paano makabulig sa aton ang pangamuyo?

¹⁴ Mangamuyo pirme. (1 Tes. 5:17) Kon gusto mo mangin suod nga abyan ang isa ka tawo, ginaistorya mo sia pirme kag ginasugid mo sa iya kon ano gid ang imo ginabatyag. Amo man ini ang dapat naton himuon kay Jehova para mangin suod naton sia nga Abyan. Kon nagapangamuyo kita sa iya kag ginasugid naton sa iya ang aton ginabatyag, ginahunahuna, kag mga ginakabalak-an, ginapakita naton nga nagasalig kita sa iya kag nagapati kita nga palangga niya kita. (Sal. 94:17-19; 1 Juan 5:14, 15) Si Yua nga ginsambit kaina nagsiling: “Kon nagapangamuyo ako, indi lang ang mga ginhimo ko sa bilog nga adlaw ang ginasugid ko kay Jehova. Ginasugid ko man sa iya kon ano ang akon ginahunahuna kag ginabatyag. Bangod sini, amat-amat ko nga nakilala pa gid sing maayo si Jehova. Para sa akon, indi sia pareho sa isa ka boss sang kompanya, kundi pareho sia sa isa ka Amay nga nagapalangga gid sa iya mga anak.”—Tan-awa ang kahon nga “ Nabasa Mo Na Bala Ini nga Libro?”

15. Paano ginpakita ni Jehova nga nagaulikid sia sa aton?

¹⁵ Magpakig-upod sa matutom nga mga abyan, kay regalo sila ni Jehova. (Sant. 1:17) Nagaulikid gid sa aton ang aton Amay sa langit kay ginhatagan niya kita sang aton mga kauturan sa  kongregasyon nga ‘nagahigugma sa aton sa tanan nga tion.’ (Hulu. 17:17) Sa sulat ni Pablo sa mga taga-Colosas, ginsambit niya ang pila ka Cristiano nga nagbulig sa iya, kag nagsiling sia nga ‘naghatag sila sing daku nga lugpay’ sa iya. (Col. 4:10, 11) Bisan si Cristo Jesus ginbuligan man sang iya mga abyan nga mga anghel kag mga tawo, kag ginpasalamatan gid niya sila.—Luc. 22:28, 43.

16. Paano makabulig sa aton ang matutom nga mga abyan para mangin suod pa gid kita kay Jehova?

¹⁶ Nagapabulig ka bala sa imo matutom nga mga abyan nga ginregalo ni Jehova sa imo? Indi buot silingon nga maluya ang aton pagtuo kon ginasugid naton sa aton hamtong nga abyan ang aton mga problema. Ang matuod, makaamlig ini sa aton. Binagbinaga ang ginsiling ni James nga ginsambit kaina: “Daku gid ang nabulig sa akon sang akon hamtong nga mga abyan. Kon grabe gid ang akon kabalaka, mapinasensiahon nila ako nga ginapamatian kag ginasilingan nila ako nga palangga nila ako. Paagi sa ila, mabatyagan ko nga palangga ako ni Jehova kag nagaulikid sia sa akon.” Gani importante gid nga mangin suod naton nga abyan ang aton mga kauturan.

17-18. Sin-o ang dapat naton pamatian, kag ngaa?

¹⁷ Gusto ni Satanas nga indi na kita magpanikasog nga himuon ang husto. Gusto niya kita papatihon nga indi kita palangga ni Jehova kag indi kita nagakadapat luwason. Pero natun-an naton nga indi ini matuod.

¹⁸ Palangga ka ni Jehova. Hamili ka gid para sa iya. Kon tumanon mo sia, ‘magapabilin ka sa iya gugma’ sing wala sing katapusan, pareho kay Jesus. (Juan 15:10) Gani indi pagpamatii si Satanas ukon ang imo tagipusuon kon nagabatyag ka nga indi ka palangga ni Jehova. Sa baylo, pamatii si Jehova kay makita niya ang aton maayo nga mga kinaiya. Mangin kumbinsido nga ‘nahamuot sia sa iya katawhan,’ gani nahamuot sia sa imo.