1-2. Ano nga ilustrasyon ang makabulig sa aton nga mahangpan ang 1 Pedro 2:21?

IMADYINA nga nagalakat kamo sa bukid nga madamo sing kahoy kag lunangon ang inyo ginaagyan. Delikado gid kon magtalang kamo. May upod kamo nga eksperiensiado nga guide nga nagauna sa inyo. Makita ninyo ang mga agi sang iya sapatos. Sang ulihi, natalupangdan ninyo nga indi na ninyo makita ang inyo guide. Pero wala kamo ginkulbaan. Ginsundan ninyo sing maayo ang mga agi sang inyo guide.

² Bilang matuod nga mga Cristiano, nagalakat man kita sa sining malain nga kalibutan nga delikado katama. Nagapasalamat gid kita nga ginhatagan kita ni Jehova sang pinakamaayo nga Guide ukon Manugtuytoy nga amo ang iya Anak nga si Jesucristo. Dapat naton sundon sing maayo ang iya mga tikang. (1 Ped. 2:21) Suno sa isa ka reperensia sa Biblia, ginpaanggid ni Pedro si Jesus sa isa ka guide. Pareho sang mga agi sang mga tiil sang guide, dapat man naton sundon ang mga tikang ni Jesus. Binagbinagon naton ang tatlo ka pamangkot: Ano ang buot silingon sang pagsunod sa mga tikang ni Jesus? Ngaa dapat naton ini himuon? Paano naton ini mahimo?

3. Ano ang buot silingon sang pagsunod sa mga tikang sang isa ka tawo?

³ Ano ang buot silingon sang pagsunod sa mga tikang sang isa ka tawo? Sa Biblia, ang mga tinaga nga “paglakat” kag “mga tiil” nagapatuhoy kon kaisa sa ginahimo sang isa ka tawo sa iya kabuhi. (Gen. 6:9; Hulu. 1:15) Ang paagi sang pagkabuhi sang isa ka tawo ukon ang ginapakita niya nga halimbawa mahimo mapaanggid sa mga agi sang iya mga tiil ukon sa iya mga tikang samtang nagalakat sia. Gani ang pagsunod sa mga tikang sang isa ka tawo nagakahulugan sang pagsunod sa iya halimbawa ukon pag-ilog sa iya.

4. Ano ang buot silingon sang pagsunod sa mga tikang ni Jesus?

 ⁴ Gani ano ang buot silingon sang pagsunod sa mga tikang ni Jesus? Nagakahulugan ini sang pagsunod sa iya halimbawa. Sa teksto nga ginbasihan sini nga artikulo, ginpatuhuyan ni apostol Pedro ang maayo nga halimbawa ni Jesus sang pagbatas sang mga kabudlayan. Pero madamo pa gid sang ginhimo si Jesus nga dapat naton ilugon. (1 Ped. 2:18-25) Ang matuod, dapat naton sundon ang halimbawa ni Jesus nga ginpakita niya sa bilog niya nga kabuhi, buot silingon, ang tanan niya nga ginsiling kag ginhimo.

5. Masunod gid bala sang indi perpekto nga mga tawo ang perpekto nga halimbawa ni Jesus? Ipaathag.

⁵ Pero masunod gid bala naton ang halimbawa ni Jesus bisan pa indi kita perpekto? Huo. Dumduma nga wala nagsiling si Pedro nga dapat naton sundon sing perpekto ang mga tikang ni Jesus. Sa baylo, ginpalig-on niya kita nga ‘sundon sing maayo ang mga tikang ni Jesus.’ Kon himuon naton ang aton bug-os nga masarangan para masunod sing maayo ang iya mga tikang bisan pa indi kita perpekto, ginatuman naton ang ginasiling ni apostol Juan: “Magpadayon [kamo] sa paglakat subong sang paglakat [ni Jesus].”—1 Juan 2:6.

6-7. Ngaa makasiling kita nga magasuod pa gid kita kay Jehova kon sundon naton ang mga tikang ni Jesus?

⁶ Kon sundon naton ang mga tikang ni Jesus, magasuod pa gid kita kay Jehova. Ngaa masiling naton ini? Una, nalipay gid ang Dios sa paagi sang pagkabuhi ni Jesus nga amo ang pinakamaayo naton nga halimbawa. (Juan 8:29) Gani kon sundon naton ang mga tikang ni Jesus, malipay man sa aton si Jehova. Kag makasalig kita nga magapalapit ang aton Amay sa langit sa mga nagatinguha nga mangin abyan sia.—Sant. 4:8.

⁷ Ikaduha, perpekto nga gin-ilog ni Jesus ang iya Amay. Gani nakasiling si Jesus: “Ang bisan sin-o nga nakakita sa akon nakakita man sa Amay.” (Juan 14:9) Mailog naton ang mga kinaiya ni Jesus kag ang mga ginhimo niya para sa iban.  Halimbawa, naluoy sia sa aruon, ginpakitaan niya sang empatiya ang babayi nga may malubha nga balatian, kag nag-ulikid sia sa mga napatyan sang pinalangga. Kon ginailog naton si Jesus, ginailog man naton si Jehova. (Mar. 1:40, 41; 5:25-34; Juan 11:33-35) Kon pirme naton ginailog ang mga kinaiya ni Jehova, magasuod pa gid kita sa iya.

8. Ngaa ang pagsunod sa mga tikang ni Jesus makabulig sa aton nga ‘madaug’ ang kalibutan?

⁸ Kon sundon naton ang mga tikang ni Jesus, indi kita mapauntat sining malain nga kalibutan sa aton pag-alagad kay Jehova. Sang gab-i antes ginpatay si Jesus, nagsiling sia: “Nadaug ko ang kalibutan.” (Juan 16:33) Buot silingon, wala sia naimpluwensiahan sang mga ginahunahuna, ginahandum, kag ginahimo sang mga tawo sa sini nga kalibutan. Wala gid niya ginkalimtan nga ang rason nga ginpadala sia diri sa duta amo ang pagpakabalaan sang ngalan ni Jehova. Ano ang matun-an naton sa sini? Sa sini nga kalibutan, madamo ang posible nga makapauntat sa aton pag-alagad kay Jehova. Pero kon ilugon naton si Jesus nga nagpokus sa paghimo sang kabubut-on ni Jehova, ‘madaug’ man naton ang kalibutan.—1 Juan 5:5.

9. Ano ang dapat naton himuon para padayon kita nga makalakat sa dalan nga nagapadulong sa kabuhi nga wala sing katapusan?

⁹ Kon sundon naton ang mga tikang ni Jesus, mabaton naton ang kabuhi nga wala sing katapusan. Sang namangkot ang isa ka manggaranon nga pamatan-on kon ano ang dapat niya himuon para matigayon ang kabuhi nga wala sing katapusan, nagsabat si Jesus: “Kari ka, mangin sumulunod ko.” (Mat. 19:16-21) May ginsiling si Jesus sa pila ka Judiyo nga wala nagapati nga sia ang Cristo. Nagsiling sia: “Ang akon mga karnero [nagasunod] sa akon. Hatagan ko sila sing kabuhi nga wala sing katapusan.” (Juan 10:24-29) May ginsiling man si Jesus kay Nicodemo nga miembro sang Sanhedrin nga gusto makatuon sing dugang pa parte sa mga gintudlo ni Jesus. Ginsilingan sia ni Jesus nga ang mga ‘nagatuo sa iya makatigayon sang kabuhi nga wala sing katapusan.’ (Juan 3:16) Nagatuo kita kay Jesus kon ginatuman naton ang iya mga gintudlo kag ginailog naton ang iya halimbawa. Kon himuon naton ini, padayon kita nga makalakat sa dalan nga nagapadulong sa kabuhi nga wala sing katapusan.—Mat. 7:14.

10. Ano ang dapat naton himuon para ‘makilala’ naton sing maayo si Jesus? (Juan 17:3)

¹⁰ Para masunod naton sing maayo ang mga tikang ni Jesus, dapat naton sia makilala. (Basaha ang Juan 17:3.) Dapat padayon naton nga himuon ang “pagkilala” kay Jesus. Makilala pa gid naton sia sing maayo paagi sa pagtuon sang iya mga kinaiya, mga panghunahuna, kag sang iya ginasunod nga mga prinsipio. Bisan pa madugay na kita nga Saksi, dapat padayon gihapon naton nga panikasugan nga makilala sing maayo si Jehova kag ang iya Anak.

11. Ano ang ginasugid sa aton sang apat ka Ebanghelyo?

¹¹ Ginlakip ni Jehova ang apat ka Ebanghelyo sa iya Pulong para makilala naton ang iya Anak. Ang  apat ka Ebanghelyo amo ang Mateo, Marcos, Lucas, kag Juan. Mabasa sa sini ang kabuhi kag ministeryo ni Jesus. Ginasugid sini ang mga ginsiling ni Jesus, ang iya mga ginhimo, kag ang iya mga balatyagon. Mabuligan kita sining apat ka libro nga ‘mabinagbinag sing maayo’ ang halimbawa ni Jesus. (Heb. 12:3) Daw pareho lang nga ginapakita sini ang mga tikang ni Jesus. Gani kon tun-an naton ang mga Ebanghelyo, mas makilala pa gid naton sing maayo si Jesus. Kon himuon naton ini, masunod naton sing maayo ang iya mga tikang.

12. Ano ang dapat naton himuon para makabenepisyo gid kita sa mga Ebanghelyo?

¹² Indi bastante nga basahon lang naton ang mga Ebanghelyo kon gusto naton nga makabenepisyo gid kita sa sini. Dapat kita maghatag sing tion para tun-an ini kag pamalandungan sing maayo. (Ipaanggid ang Josue 1:8.) Binagbinagon naton ang duha ka panugda nga makabulig sa aton para mapamalandungan naton ang aton mabasa sa mga Ebanghelyo kag maaplikar ini.

13. Paano mo mahimo nga tuodtuod ang mga kasaysayan sa mga Ebanghelyo?

¹³ Una, himua nga tuodtuod ang mga kasaysayan sa mga Ebanghelyo. Imadyina ang nagakatabo nga daw makita, mabatian, kag mabatyagan mo gid ini. Makabulig sa imo ang pag-research sa mga publikasyon sang organisasyon ni Jehova. Hibalua kon ano ang mga natabo antes ukon pagkatapos sang kasaysayan nga imo ginatun-an. Mangita sang dugang nga impormasyon parte sa mga tawo kag mga lugar sa sini nga kasaysayan. Ipaanggid ang kasaysayan nga imo ginatun-an sa iban nga Ebanghelyo nga nagasambit man sa sini. Kon kaisa, may detalye nga ginsambit ang manunulat sang isa ka Ebanghelyo nga wala ginsambit sa iban nga Ebanghelyo.

14-15. Ano ang dapat naton himuon para maaplikar naton ang aton natun-an sa mga kasaysayan sa mga Ebanghelyo?

¹⁴ Ikaduha, iaplikar ang imo natun-an sa mga Ebanghelyo. (Juan 13:17) Pagkatapos mo matun-an sing maayo ang isa ka kasaysayan sa Ebanghelyo, pamangkuta ang imo kaugalingon: ‘Ano ang natun-an ko sa sini nga kasaysayan nga puede ko maaplikar sa akon kabuhi? Paano ko gamiton ini nga kasaysayan para mabuligan ang iban?’ Hunahunaa kon sin-o ang makabenepisyo sa imo  natun-an. Dayon, isugid ini sa iya sa husto nga tion kag himua ini sa mahigugmaon kag maayo nga paagi.

¹⁵ Binagbinagon naton ang isa ka halimbawa kon paano naton masunod ining duha ka panugda. Binagbinagon naton ang kasaysayan sang imol nga balo nga nakita ni Jesus sa templo.

16. Isaysay ang ginaimadyin mo nga nagakatabo base sa ginasiling sang Marcos 12:41.

¹⁶ Himua nga tuodtuod ang kasaysayan. (Basaha ang Marcos 12:41.) Imadyina kon ano ang natabo. Nisan 11, 33 C.E. sadto. Pila na lang ka adlaw kag patyon na si Jesus. Halos bilog nga adlaw nga nagpanudlo si Jesus sa templo. Pero ginpamatukan sia sang mga lider sang relihion. Ginkuestyon sang iban sa ila ang iya awtoridad. Ang iban naman nagpamangkot sa iya sang mga pamangkot nga abi nila indi niya masabat. (Mar. 11:27-33; 12:13-34) Dayon, nagkadto si Jesus sa isa pa ka lugar sa templo. Makita niya ang mga bahandian, gani mahimo nga ara sia sa Luwang sang mga Babayi. Dayon, nagpungko sia kag nakita niya ang mga tawo nga nagahulog sang ila amot sa mga bahandian. Nakita niya ang madamo nga manggaranon nga nagahulog sing madamo nga kuarta. Mahimo nga malapit lang si Jesus sa mga bahandian kag mabatian niya ang paglinagating sang mga sensilyo nga ginahulog sa mga bahandian.

17. Ano ang ginhimo sang imol nga balo nga ginsambit sa Marcos 12:42?

¹⁷ Basaha ang Marcos 12:42. Dayon, nakita ni Jesus ang isa ka babayi. Isa sia ka “imol nga balo.” (Luc. 21:2) Mabudlay gid ang iya kahimtangan kag mahimo nga kulang ang iya kuarta para sa iya mga kinahanglanon. Pero nagkadto sia sa isa sa mga bahandian kag naghulog sia sing duha lang ka sensilyo. Daw wala sing nakatalupangod sa iya kay halos wala ka sing mabatian nga gahod sa duha ka sensilyo. Kabalo si Jesus nga naghulog sia sing duha ka lepton. Ini nga sensilyo amo ang may pinakagamay nga balor sadto nga tion. Ang iya ginhulog indi gani makabakal sang isa ka maya, nga isa sa pinakabarato nga pispis nga ginabaligya para kaunon.

18. Suno sa Marcos 12:43, 44, ano ang ginsiling ni Jesus parte sa amot sang balo?

¹⁸ Basaha ang Marcos 12:43, 44. Nagdayaw gid si Jesus sa ginhimo sang balo. Gani gintawag niya ang iya mga disipulo, ginpatalupangod niya sa ila ang ginhimo sang balo, kag nagsiling sia sa ila: “Ining imol nga balo nga babayi naghulog sing kapin pa sangsa tanan.” Dayon, ginpaathag niya: “Sila tanan [ilabi na ang mga manggaranon] naghulog kon ano lang ang sobra sa ila manggad, apang ang balo, bisan pa imol, naghulog sang tanan niya nga palangabuhian.” Sang ginhatag sining matutom nga balo ang tanan niya nga kuarta sadto nga adlaw, ginpakita niya nga nagasalig sia kay Jehova nga magaatipan sa iya.—Sal. 26:3.

19. Ano ang matun-an naton sa ginsiling ni Jesus parte sa imol nga balo?

¹⁹ Iaplikar ang imo natun-an. Pamangkuta ang imo kaugalingon, ‘Ano ang matun-an ko sa ginsiling ni Jesus parte sa imol nga balo?’ Hunahunaa ini nga balo. Mahimo nga gusto niya nga daku kuntani ang nahatag niya kay Jehova. Pero ginhatag niya kay Jehova ang iya pinakamaayo kay ginhatag niya ang iya bug-os nga masarangan. Kag kabalo si Jesus nga ginpabaloran gid sang iya Amay ang amot sang balo. Matun-an naton sa sini nga nalipay si Jehova kon ginahatag naton sa iya ang aton pinakamaayo, ukon ang aton pag-alagad sa iya sing bug-os tagipusuon kag bug-os kalag. (Mat. 22:37; Col. 3:23) Nalipay si Jehova kon ginahimo naton ang aton bug-os nga masarangan. Dapat naton gamiton ang aton tion kag kusog sa bug-os naton nga masarangan sa pagsimba sa iya. Nalakip sa sini ang aton pagbantala kag pagtambong sa mga miting.

20. Paano mo gamiton ang natun-an mo sa kasaysayan sang balo para mabuligan ang iban? Maghatag sing halimbawa.

²⁰ Paano mo gamiton ang natun-an mo sa kasaysayan sang balo para mabuligan ang iban? Hunahunaa kon sin-o ang kinahanglan palig-unon kag pasaligon nga nalipay si Jehova sa ila mga pagpanikasog.  Halimbawa, may kilala ka bala nga tigulang nga sister nga maluya na ang panglawas kag limitado na ang iya mahimo sa pag-alagad? Mahimo nga nasubuan sia ukon nagabatyag nga wala na sia sing pulos. Ukon may kilala ka bala nga brother nga may madugay na nga balatian nga nagapabudlay gid sa iya? Mahimo nga naluyahan sia sang buot bangod may mga tion nga indi na sia makatambong sa mga miting sa Kingdom Hall. Buligi sila paagi sa paghambal sang ‘maayo nga pinamulong nga makapabakod’ sa ila. (Efe. 4:29) Isugid sa ila ang natun-an naton sa kasaysayan sang imol nga balo nga makapalig-on gid. Magapasalig ini sa ila nga nalipay si Jehova kon ginahatag naton sa iya ang aton pinakamaayo. (Hulu. 15:23; 1 Tes. 5:11) Kon ginadayaw mo ang iban bangod ginahatag nila kay Jehova ang ila pinakamaayo, bisan pa daw kagamay lang sini, ginasunod mo sing maayo ang mga tikang ni Jesus.

21. Ano ang gusto mo nga panikasugan nga himuon?

²¹ Nagapasalamat gid kita nga madamo sing ginasugid ang mga Ebanghelyo parte sa kabuhi ni Jesus kay nagabulig ini sa aton nga mailog sia kag masunod sing maayo ang iya mga tikang. Tilawi nga ilakip sa imo personal nga pagtuon ukon sa inyo Pangpamilya nga Pagsimba ang mga kasaysayan sa mga Ebanghelyo. Tandaan naton nga makabenepisyo gid kita sa aton pagtuon kon himuon naton nga tuodtuod ang mga kasaysayan nga aton ginabasa kag iaplikar naton ang aton matun-an. Dapat naton ilugon ang ginhimo ni Jesus, kag dapat man naton pamatian ang iya ginsiling. Sa masunod nga artikulo, binagbinagon naton kon ano ang matun-an naton sa mga ginsiling ni Jesus sang lapit na lang sia mapatay.