Biskwit Para sa Akon mga Ido
“SANG 2014, pirme ko ginaupod sa paglakatlakat sa sentro sang siudad ang akon duha ka gamay nga ido,” siling ni Nick, nga taga-Oregon, U.S.A. “Makita ko diri pirme ang mga Saksi nga nagatindog sa tupad sang ila mga cart nga may displey nga mga publikasyon. Pormal ang ila pamayo, kag ginayuhuman nila ang tanan nga nagalabay.
“Mainabyanon gid ang mga Saksi. Kabuot sa ila bisan sa akon mga ido. Isa ka adlaw, samtang nagatindog sa tupad sang cart si Elaine, ginhatagan niya sang biskwit ang akon duha ka ido. Sugod sadto, kada maglabay kami malapit sa cart, ginaguyod dayon ako sang akon mga ido pakadto sa cart kay gusto nila nga hatagan sila liwat sang biskwit.
“Sa sulod sang pila ka bulan, nalipay ang akon mga ido sa ginahatag sa ila nga biskwit kag nanamian man ako sa pag-istorya sa mga Saksi. Pero indi ko gusto nga mag-istorya sa ila sing malawig. Sobra na ako 70 anyos, kag wala ako sing nabal-an parte sa ginapatihan sang mga Saksi. Wala gid ako nalipay sang nag-entra ako sa pila ka relihion, gani nahunahuna ko nga mas maayo siguro kon ako na lang ang magtuon sang Biblia.
“May makita man ako nga mga Saksi sa iban pa nga mga lugar sa siudad, kag nagatindog man sila sa tupad sang ila mga cart. Mainabyanon man sila. Pirme nila ginagamit ang Biblia sa pagsabat sa akon mga pamangkot, gani nakumbinsi ako nga masaligan sila.
“Isa ka adlaw, ginpamangkot ako ni Elaine, ‘Sa banta mo, regalo bala sa aton sang Dios ang mga sapat?’ Nagsabat ako, ‘Huo gid eh!’ Dayon ginbasa ni Elaine ang Isaias 11:6-9. Bangod sini, nangin interesado ako nga tun-an ang Biblia. Pero nagaalang-alang gihapon ako nga batunon ang ila mga publikasyon.
“Sugod sadto, madamo pa nga beses nga naistorya ko si Elaine kag ang iya bana nga si Brent. Nanamian gid ako sa amon pag-istoryahanay bisan kadali lang. Ginsilingan nila ako nga basahon ko ang Mateo asta sa Binuhatan para mabal-an ko kon ano ang ginasiling sang Biblia parte sa matuod nga mga Cristiano. Ginhimo ko ini. Wala madugay pagkatapos sini, nagpasugot ako nga magpa-Bible study kay Brent kag kay Elaine. Natabo ini sang tungatunga sang 2016.
“Excited ako pirme sa pag-Bible study kada semana kag sa pag-attend sa mga miting sa Kingdom Hall. Nalipay gid ako kay natun-an ko kon ano gid ang ginatudlo sang Biblia. Pagligad sang sulusobra isa ka tuig, nabawtismuhan ako bilang isa ka Saksi. Subong, 79 anyos na ako. Nagapasalamat gid ako kay nakita ko ang matuod nga relihion. Ginpakamaayo ako ni Jehova kay ginbuligan niya ako nga mangin bahin sang iya pamilya sa bilog nga kalibutan.”
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
