1. Ano ang makahatag sa aton sang matuod nga kalipay?

 GUSTO ni Jehova nga mangin malipayon kita. Masiling naton ini bangod ang kalipay isa sa mga kinaiya nga ginapatubas sang iya balaan nga espiritu. (Gal. 5:22) Bangod mas malipayon ang nagahatag sangsa nagabaton, makabatyag kita sang matuod nga kalipay kon ginahimo naton ang aton bug-os nga masarangan sa pagbantala kag sa pagbulig sa aton mga kauturan.—Binu. 20:35.

2-3. (a) Base sa Galacia 6:4, ano ang duha ka butang nga makabulig sa aton nga makapabilin nga malipayon sa aton pag-alagad kay Jehova? (b) Ano ang binagbinagon naton sa sini nga artikulo?

² Ginsambit ni apostol Pablo sa Galacia 6:4 ang duha ka butang nga makabulig sa aton nga makapabilin nga malipayon. (Basaha.) Una, dapat naton ihatag kay Jehova ang aton pinakamaayo. Kon ginahatag naton sa iya ang aton pinakamaayo, dapat kita malipay. (Mat. 22:36-38) Ikaduha, indi naton dapat pag-ikumparar ang aton kaugalingon sa iban. Ang aton masarangan nga himuon nagadepende sa aton kusog, sa kondisyon sang aton lawas, sa paghanas nga aton nabaton, kag sa aton ikasarang. Pero ano man ang aton masarangan nga himuon, dapat kita magpasalamat kay Jehova. Kay man, naghalin sa iya ang tanan nga ara sa aton. Kon may mga utod naman nga mas maayo magbantala ukon magtudlo sa iban sangsa aton, dapat kita malipay kay ginagamit nila ang ila ikasarang para dayawon si Jehova, indi para magpabugal ukon para lang sa ila kaayuhan. Gani imbes nga kompetensiahan sila, dapat naton sila ilugon.

³ Sa sini nga artikulo, tun-an naton kon ano ang makabulig sa aton kon nagaluya ang aton buot bangod indi na naton mahimo ang tanan nga gusto naton nga himuon sa aton pag-alagad kay Jehova. Binagbinagon man naton kon paano naton gamiton ang aton mga ikasarang sa pinakamaayo nga paagi, kag kon ano ang matun-an naton sa halimbawa sang iban.

4. Ano ang posible nga rason kon ngaa nagaluya ang buot sang pila sa aton? Maghatag sing halimbawa.

⁴ Kon tigulang na kita ukon nagamasakit, indi na naton masarangan ang tanan nga gusto naton nga himuon sa pag-alagad kay Jehova. Bangod sini, nagaluya ang aton buot. Amo ini ang nabatyagan ni Carol. Nagaalagad sia sadto sa lugar nga kinahanglan ang dugang nga manugbantala. May ara sia sadto 35 ka Bible study, kag may mga nabuligan sia nga magdedikar kag magpabawtismo. Madamo gid sang ginahimo si Carol sa iya pagbantala kag pagtudlo sa iban! Pero sang ulihi, nagmasakit sia gani ara na lang sia pirme sa iya balay. “Nahangpan ko nga bangod sang akon balatian, indi ko na masarangan nga himuon ang ginahimo sang iban,” siling ni Carol, “pero nagabatyag ako nga indi ako pareho katutom sa ila. Indi ko na masarangan ang tanan nga gusto ko himuon. Gani, grabe gid ang pagluya sang akon buot.” Gusto gid ni Carol nga himuon ang iya bug-os nga masarangan para kay Jehova. Dalayawon gid ang iya panimuot! Makasigurado kita nga nalipay sa iya ang aton mahigugmaon nga Dios bangod ginahimo niya ang iya bug-os nga masarangan.

5. (a) Ano ang dapat naton dumdumon kon nagaluya ang aton buot bangod indi na naton masarangan ang tanan nga gusto naton himuon? (b) Base sa mga piktyur, paano ginpakita sang brother nga pirme niya ginahimo ang iya bug-os nga masarangan sa iya pag-alagad kay Jehova?

⁵ Kon nagaluya ang buot mo kon kaisa bangod indi mo na masarangan ang tanan nga gusto mo himuon, pamangkuta ang imo kaugalingon, ‘Ano bala ang gusto ni Jehova nga himuon ko?’ Gusto niya nga himuon mo ang imo bug-os nga masarangan depende sa imo sitwasyon. Binagbinaga ini nga halimbawa: Nagaluya ang buot sang isa ka sister nga 80 anyos na bangod diutay na lang ang mahimo niya sa iya pag-alagad kon ikumparar sa mahimo niya sang 40 anyos sia. Ginahunahuna niya nga bisan pa ginahimo niya ang iya bug-os nga masarangan, wala nalipay si Jehova sa iya. Pero husto bala sia? Hunahunaa ini: Kon ginahimo sini nga sister ang iya bug-os nga masarangan halin sang 40 anyos sia asta nga nag-80 anyos sia, ginapakita niya nga wala gid sia nag-untat sa paghimo sang iya bug-os nga masarangan. Kon pamatyag naton kulang ang aton ginahimo sa pag-alagad kay Jehova para malipay sia sa aton, dapat naton dumdumon nga si Jehova ang nagasiling kon ano ang makapahalipay sa iya. Kon ginahimo naton ang aton bug-os nga masarangan, daw pareho lang nga ginasilingan kita ni Jehova: “Dalayawon gid ang ginhimo mo!”—Ipaanggid ang Mateo 25:20-23.

6. Ano ang matun-an naton sa eksperiensia ni Maria?

⁶ Mangin malipayon kita kon magpokus kita sa masarangan naton nga himuon imbes nga sa indi naton masarangan nga himuon. Binagbinaga ang eksperiensia sang isa ka sister nga si Maria. Diutay na lang ang iya mahimo sa iya pag-alagad bangod may balatian sia. Sang primero, na-depress sia kag pamatyag niya wala sia sing pulos. Pero nahunahuna ni Maria ang isa ka sister sa ila kongregasyon nga nagamasakit kag nagahigda na lang. Nagdesisyon si Maria nga buligan ini nga sister. “Naghimo ako sang iskedyul para updan sia sa pagbantala paagi sa telepono kag paghimo sang sulat,” siling ni Maria. “Kada pauli ko pagkatapos namon bantala, malipayon gid ako kay nabuligan ko ang akon utod.” Mangin mas malipayon man kita kon magpokus kita sa masarangan naton nga himuon imbes nga sa indi naton masarangan nga himuon. Pero ano abi kon puede pa naton dugangan ang aton ginahimo ukon may ikasarang kita sa pila ka hilikuton nga ginahimo naton sa pag-alagad kay Jehova?

7. Ano ang ginlaygay ni apostol Pedro sa mga Cristiano?

⁷ Sa una nga sulat ni apostol Pedro, ginpalig-on niya ang mga Cristiano nga gamiton nila ang ila mga dulot kag mga ikasarang para palig-unon ang ila mga kauturan. Nagsulat si Pedro: “Suno sa dulot nga nabaton sang kada isa sa inyo, gamita  ninyo ini sa pag-alagad sa isa kag isa subong maayong mga tulugyanan sang wala tupong nga kaayo sang Dios.” (1 Ped. 4:10) Indi naton paghunahunaon nga indi naton paggamiton ang aton mga dulot kag mga ikasarang sa bug-os naton nga masarangan kay basi mahisa ang iban kag magluya ang ila buot. Kon indi naton paghimuon ang aton bug-os nga masarangan bangod nabalaka kita sa posible nga batyagon sang iban, indi naton mahatag kay Jehova ang aton pinakamaayo.

8. Suno sa 1 Corinto 4:6, 7, ngaa indi naton dapat pag-ipahambog ang aton mga ikasarang?

⁸ Dapat naton gamiton ang aton mga ikasarang sa bug-os naton nga masarangan, pero indi naton ini dapat pag-ipahambog. (Basaha ang 1 Corinto 4:6, 7.) Halimbawa, basi madasig ka makaumpisa sang Bible study sa imo ginabantalaan. Dapat mo gamiton ini nga ikasarang! Pero indi mo ini dapat pag-ipahambog. Ibutang ta nga may maayo ka nga eksperiensia sa inyo pagbantala kay nakaumpisa ka sang Bible study. Excited ka nga isugid sa inyo grupo ang parte sa sini. Pero pagbalik mo sa inyo grupo, nabatian mo nga nagaistorya ang isa ka sister parte sa iya nabantalaan nga nagbaton sang magasin. Sa bahin sang sister, ginbaton sang iya ginbantalaan ang magasin. Sa imo naman bahin, nakaumpisa ka sang Bible study. Ano ang himuon mo? Kabalo ka nga mapalig-on ang inyo grupo sa imo eksperiensia, pero mas maayo kon sa sunod mo na lang ini isugid kay indi mo gusto ipabatyag sa imo utod nga mas maayo ka sangsa iya. Pagpakita ini sing kaayo. Pero may ara ka dulot ukon ikasarang sa pag-umpisa sang Bible study, gani indi gid mag-untat sa paggamit sini nga ikasarang.

9. Paano naton dapat gamiton ang aton mga ikasarang?

⁹ Tandaan naton nga regalo sa aton sang Dios ang tanan naton nga ikasarang. Gamiton naton ini para palig-unon ang kongregasyon, indi para sa aton kaugalingon nga kaayuhan. (Fil. 2:3) Kon ginagamit naton ang aton kusog kag mga ikasarang sa paghimo sang kabubut-on sang Dios, mangin malipayon kita, indi bangod mas madamo ang masarangan naton nga himuon sangsa iban ukon bangod ginapakita naton nga mas maayo kita sangsa ila, kundi bangod ginagamit naton ini sa pagdayaw kay Jehova.

10. Ngaa indi husto nga ikumparar naton ang aton kaugalingon sa iban?

¹⁰ Kon indi kita maghalong, posible nga ikumparar naton ang aton masarangan nga himuon sa indi masarangan nga himuon sang iban. Halimbawa, ibutang ta nga maayo mag-public talk ang isa ka brother. Amo ini ang iya ikasarang. Kon indi sia maghalong, basi hunahunaon niya nga mas maayo sia sangsa isa ka brother nga nabudlayan mag-public talk. Pero posible nga mas maabiabihon ang brother nga nabudlayan mag-public talk,  maayo sia maghanas sa iya kabataan, kag mapisan sia sa pagbantala. Nagapasalamat gid kita nga madamo kita sang kauturan nga ginagamit ang ila mga ikasarang sa pag-alagad kay Jehova kag sa pagbulig sa iban.

11. Ngaa dapat naton sundon sing maayo ang halimbawa ni Jesus?

¹¹ Indi naton dapat pag-ikumparar ang aton kaugalingon sa iban. Pero madamo kita sing matun-an kon obserbahan naton ang matutom nga mga alagad ni Jehova. Ang aton pinakamaayo nga halimbawa amo si Jesus. Indi kita pareho kay Jesus nga perpekto, pero madamo kita sing matun-an sa iya dalayawon nga mga kinaiya kag sa iya mga ginhimo. (1 Ped. 2:21) Kon ginahimo naton ang aton bug-os nga masarangan para masunod naton sing maayo ang iya halimbawa, mangin mas maayo kita nga alagad ni Jehova kag mangin mas epektibo kita sa aton pagbantala.

12-13. Ano ang matun-an naton kay Hari David?

¹² Sa Pulong sang Dios, madamo kita sing mabasa nga maayo nga halimbawa sang matutom nga mga lalaki kag babayi nga puede naton ilugon bisan pa indi sila perpekto. (Heb. 6:12) Binagbinaga si Hari David nga gintawag ni Jehova nga “isa ka tawo nga kalahamut-an sa akon tagipusuon.” (Binu. 13:22) Pero indi perpekto si David. Nakahimo pa gani sia sang serioso nga mga sala. Pero isa sia ka maayo nga halimbawa para sa aton. Ngaa? Kay sang ginsabdong sia, wala sia magrason. Sa baylo, ginbaton niya ang masakit nga laygay kag naghinulsol gid sia sa iya nahimo. Bangod sini, ginpatawad sia ni Jehova.—Sal. 51:3, 4, 10-12.

¹³ Makatuon kita kay David paagi sa pagpamangkot sa aton kaugalingon: ‘Ano ang reaksion ko kon ginalaygayan ako? Ginaako ko bala dayon ang akon sala, ukon nagarason pa ako? Ginabasol ko bala dayon ang iban? Ginapanikasugan ko gid bala nga indi masulit ang akon sala?’ Puede mo man ini ipamangkot samtang ginabasa mo ang iban pa nga halimbawa sang matutom nga mga lalaki kag babayi sa Biblia. Pareho bala sa imo problema ang naeksperiensiahan nila nga kabudlayan? Ano nga dalayawon nga mga kinaiya ang ila ginpakita? Sa kada halimbawa, pamangkuta ang imo kaugalingon: ‘Paano ko mailog ining matutom nga alagad ni Jehova?’

14. Ano ang benepisyo kon obserbahan naton ang maayo nga halimbawa sang aton mga kauturan?

¹⁴ Makatuon man kita sa halimbawa sang aton mga kauturan. Makatuon kita bisan sa mga pamatan-on ukon sa mga tigulang na. Halimbawa, may ara bala utod sa inyo kongregasyon nga matutom nga nagabatas sang pagtilaw, pareho sang pag-pressure sang mga kaedad, pagpamatok sang  pamilya, ukon pagmasakit? Ano nga dalayawon nga mga kinaiya ang nakita mo sa sini nga utod ang gusto mo ilugon? Kon binagbinagon mo ang maayo nga halimbawa sini nga utod, may matun-an ka nga makabulig sa imo nga mabatas ang imo mga problema. Nagapasalamat gid kita sa sini nga mga kauturan nga nagapakita sang mabakod nga pagtuo kag maayo nga halimbawa.—Heb. 13:7; Sant. 1:2, 3.

15. Ano ang ginlaygay ni apostol Pablo nga makabulig sa aton nga padayon nga mangin malipayon sa aton pag-alagad kay Jehova?

¹⁵ Para indi madula ang paghidait kag indi maguba ang paghiusa sang kongregasyon, dapat himuon sang kada isa sa aton ang aton bug-os nga masarangan. Binagbinaga ang mga Cristiano sang unang siglo. Lainlain ang ila mga dulot ukon mga ikasarang, kag lainlain man ang ila mga responsibilidad. (1 Cor. 12:4, 7-11) Pero wala sila nagkompetensiahanay, kag wala sila nabahinbahin. Sa baylo, ginpalig-on ni Pablo ang kada isa sa ila nga dapat nila himuon ang ‘makapabakod sa lawas sang Cristo.’ Nagsulat si Pablo sa mga taga-Efeso: “Kon ang tagsa ka bahin nagapanghikot sing nagakaigo, nagabulig ini sa pagpatubo sang lawas samtang ginapabakod sini ang lawas paagi sa gugma.” (Efe. 4:1-3, 11, 12, 16) Ang mga nag-aplikar sang laygay ni Pablo nakabulig para indi madula ang paghidait kag indi maguba ang paghiusa sang kongregasyon. Makita gihapon naton ini sa aton mga kongregasyon subong.

16. Ano ang dapat naton panikasugan nga himuon? (Hebreo 6:10)

¹⁶ Panikasugi nga indi pag-ikumparar ang imo kaugalingon sa iban. Sa baylo, tun-i ang halimbawa ni Jesus, kag tinguhai nga ilugon ang iya mga kinaiya. Binagbinaga ang maayo nga halimbawa kag mabakod nga pagtuo sang mga alagad ni Jehova sang una kag sang aton mga kauturan subong. Kon padayon mo nga ihatag ang imo pinakamaayo, makasalig ka nga ‘matarong si Jehova kag indi niya pagkalimtan ang imo binuhatan.’ (Basaha ang Hebreo 6:10.) Padayon nga mag-alagad kay Jehova sing malipayon, kay kabalo ka nga nalipay sia kon ginahimo mo ang imo bug-os nga masarangan.