1-2. (a) Sin-o si Eunice, kag ano nga kabudlayan ang iya naeksperiensiahan bilang isa ka iloy? (b) Komentuhi ang piktyur sa kober.

 WALA ginrekord sa Biblia ang parte sa pagpabawtismo ni Timoteo, pero puede naton imadyinon ang kalipay sang iya iloy, nga si Eunice, sadto nga adlaw. (Hulu. 23:25) Maimadyin naton nga nagayuhum sia samtang ginatan-aw niya si Timoteo nga bawtismuhan na sa taga-hawak nga tubig. Makita sa iya mga mata nga ginapabugal niya ang iya bata, kag ara sa tupad niya ang lola ni Timoteo nga si Loida. Nagginhawa sing madalom si Eunice sang gintum-oy na sa tubig si Timoteo. Mabatian niya ang tubig sang nagbutwa na si Timoteo, kag nakita niya nga grabe gid ang kalipay ni Timoteo. Indi na mapunggan ni Eunice ang iya luha bangod sang iya kalipay. Bisan pa mabudlay ang pagtudlo sa kabataan, madinalag-on nga natudluan ni Eunice ang iya bata nga palanggaon si Jehova kag ang Iya Anak, nga si Jesucristo. Ano nga mga kabudlayan ang naeksperiensiahan ni Eunice samtang ginatudluan niya ang iya bata?

² Indi pareho ang relihion sang mga ginikanan ni Timoteo. Griego ang iya amay, pero Judiyo ang iya iloy kag lola. (Binu. 16:1) Posible nga tin-edyer pa lang si Timoteo sang nangin Cristiano si Eunice kag si Loida. Pero wala nangin Cristiano ang iya amay. Ano nga relihion ang pilion ni Timoteo? Posible nga ara na sia sa husto nga edad para magdesisyon. Pilion bala niya ang relihion sang iya amay? Sundon bala niya gihapon ang mga tradisyon sang mga Judiyo nga gintudlo sa iya sugod sang gamay pa sia? Ukon pilion bala niya nga mangin disipulo ni Jesucristo?

3. Suno sa Hulubaton 1:8, 9, paano ginatamod ni Jehova ang ginahimo sang mga iloy para buligan ang ila kabataan nga mangin suod sa iya?

³ Subong, palangga man sang Cristiano nga mga iloy ang ila pamilya. Ang pinakagusto gid nila nga himuon amo ang buligan ang  ila kabataan nga mangin suod kay Jehova. Kag ginapabaloran gid sang aton Dios ang ila mga pagpanikasog. (Basaha ang Hulubaton 1:8, 9.) Madamo na nga iloy ang gingiyahan ni Jehova para matudluan nila ang ila kabataan nga batunon ang kamatuoran.

4. Ano nga mga kabudlayan ang naeksperiensiahan sang mga iloy?

⁴ Natural lang nga magpalibog kon kaisa ang isa ka iloy kon bala magaalagad man kay Jehova ang iya kabataan, pareho sa ginhimo ni Timoteo. Kay man, kabalo ang mga ginikanan kon daw ano kabudlay batuan ang impluwensia sang kalibutan ni Satanas sa ila kabataan. (1 Ped. 5:8) Madamo man nga iloy ang nabudlayan sa pagpadaku sang ila kabataan bangod wala na sila sing bana ukon indi alagad ni Jehova ang ila bana. Halimbawa, ang isa ka sister nga si Christine b nagsiling: “Maayo nga amay ang akon bana kag palangga niya ang amon pamilya, pero indi gid niya gusto nga tudluan ko ang amon kabataan parte sa kamatuoran kag mangin Saksi ni Jehova sila. Sa sulod sang madamo nga tinuig, pirme ako nagahibi kay ginapaligban ko kon paano ko mabuligan ang amon kabataan nga mag-alagad kay Jehova.”

5. Ano ang binagbinagon naton sa sini nga artikulo?

⁵ Kon isa ikaw ka Cristiano nga iloy, masarangan mo man nga himuon ang ginhimo ni Eunice. Sa sini nga artikulo, binagbinagon naton kon paano mo mailog ang iya halimbawa sa pagtudlo sa imo kabataan paagi sa imo ginasiling kag ginahimo. Binagbinagon man naton kon paano ka buligan ni Jehova.

6. Base sa 2 Timoteo 3:14, 15, paano nangin Cristiano si Timoteo?

⁶ Sang gamay pa si Timoteo, ginhimo sang iya iloy ang iya bug-os nga masarangan para tudluan sia parte sa paghangop sang mga Judiyo sa “balaan nga mga sinulatan.” Limitado lang ang ihibalo sang iya iloy kay wala sia sing nabal-an parte kay Jesucristo. Pero, bastante na ang natun-an ni Timoteo halin sa Kasulatan para makumbinsi sia nga mangin Cristiano. Pero pilion gid bala niya nga mangin Cristiano? Bilang isa ka pamatan-on, makapili sia kon bala gusto niya mangin Cristiano ukon indi. Sigurado gid nga nakabulig ang mga pagpanikasog sang iloy ni Timoteo para ‘mabuyok sia nga patihan’ ang kamatuoran parte kay Jesus. (Basaha ang 2 Timoteo 3:14, 15.) Nalipay gid si Eunice kay gintudluan niya ang iya bata parte kay Jehova bisan pa nga mabudlay ini himuon. Ang ngalan nga Eunice naghalin sa tinaga nga nagakahulugan sing “nagdaug.” Kag matuod gid nga nadaug niya ang mga kabudlayan sa pagtudlo kay Timoteo.

7. Paano mabuligan ni Eunice ang iya bata nga mag-uswag pagkatapos mabawtismuhan ang iya bata?

⁷ Importante gid ang ginhimo ni Timoteo nga pagpabawtismo. Pero nabalaka gihapon si Eunice bisan pa bawtismado na ang iya bata. Ano ang panikasugan nga himuon sang iya bata sa bilog niya nga kabuhi? Ano abi kon mag-upod sia sa malain nga kaupdanan kag maimpluwensiahan nila sia? Ano abi kon mag-eskwela sia sa Atenas kag patihan niya ang mga ginatudlo didto sang mga pagano nga ginakabig sang iban nga mga maalam? Ano abi kon gamiton niya ang tanan niya nga tion kag kusog para lang magmanggaranon samtang pamatan-on pa sia? Si Timoteo lang ang makadesisyon parte sa sini, pero mabuligan sia ni Eunice nga makahimo sang maayo nga mga desisyon. Paano? Dapat padayon niya nga tudluan ang iya bata nga palanggaon gid si Jehova kag pasalamatan ang Iya Anak. Mabudlay gid ini kon isa lang sa mga ginikanan ang nagaalagad kay Jehova. Pero bisan pa pareho nga nagaalagad kay Jehova ang mga ginikanan, indi gihapon mahapos ang pagtandog sa tagipusuon sang ila kabataan para buligan sila nga mag-alagad sing matutom kay Jehova. Ano ang matun-an sang mga ginikanan sa halimbawa ni Eunice?

8. Paano mabuligan sang isa ka iloy ang iya Saksi nga bana sa pagtudlo sa ila kabataan parte kay Jehova?

 ⁸ Tudlui ang imo kabataan parte sa Biblia. Mga iloy, kon Saksi ang inyo bana, gusto ni Jehova nga buligan ninyo ang inyo bana sa pagtudlo sa inyo kabataan parte sa Iya. Ang isa ka paagi para mahimo ninyo ini amo ang regular nga pagsuporta sa inyo family worship. Panikasugi nga pirme positibo ang inyo ihambal parte sa family worship, kag hunahunaa kon ano ang puede ninyo himuon para mangin masadya ini kag makapalig-on. Puede ninyo buligan ang inyo bana nga magplano sang isa ka Bible study project ukon activity. Kag kon may kabataan kamo nga puede na mag-Bible study sa libro nga Magkabuhi sing Wala Katapusan!, makabulig kamo para matudluan sang inyo bana ang inyo kabataan.

9. Kay sin-o puede makapangayo sang bulig ang mga iloy nga indi Saksi ang bana?

⁹ May pila ka iloy nga sila mismo ang dapat mag-Bible study sa ila kabataan bangod wala na sila sing bana ukon indi Saksi ang ila bana. Kon amo ini ang imo sitwasyon, indi ka dapat mabalaka sing sobra. Buligan ka ni Jehova. Gamita sa pag-Bible study sa imo kabataan ang epektibo nga mga gamit sa pagtudlo nga ginhatag niya paagi sa iya organisasyon. Puede mo pamangkuton ang mga ginikanan nga sagad sa paggamit sa sini nga mga gamit sa ila family worship. c (Hulu. 11:14) Mabuligan ka man ni Jehova sa pag-istorya sa imo kabataan. Pangabaya sia nga buligan ka nga mapamensaran ang mga pamangkot nga makabulig sa imo nga mabal-an ang ginabatyag kag ginahunahuna sang imo kabataan. (Hulu. 20:5) Madamo ka na sing mabal-an sa ila bisan sa simple lang nga pamangkot pareho sang ‘Ano ang pinakanabudlayan mo gid sa eskwelahan ukon sa imo pag-eskwela?’

10. Ano pa ang puede mo himuon para mabuligan mo ang imo kabataan nga makatuon parte kay Jehova?

¹⁰ Mangita sing mga kahigayunan nga matudluan mo ang imo kabataan parte kay Jehova. Iistorya sa ila ang parte kay Jehova kag ang madamo nga maayo nga mga butang nga ginhimo niya para sa imo. (Deut. 6:6, 7; Isa. 63:7) Importante gid nga himuon mo ini ilabi na kon indi posible nga maka-Bible study kamo sing regular sang imo kabataan sa inyo balay. Amo ini ang sitwasyon ni Christine nga ginsambit kaina. Nagsiling sia: “Talagsa lang gid ang kahigayunan nga maistorya ko ang akon kabataan parte kay Jehova, gani ginakalitan ko ang mga tion nga updanay kami. Kon kaisa, nagalakatlakat kami. Kon kaisa naman, nagasakay kami sa baruto kag nagabugsay patunga. Sa sini nga mga tion, ginaistoryahan namon ang parte sa dalayawon nga mga tinuga ni Jehova kag ang parte sa madamo nga topiko nga makabulig sa ila nga mangin abyan ni Jehova. Sang may buot na ang akon kabataan, ginpalig-on ko sila nga personal nila nga tun-an ang Biblia.” Iistorya man ang maayo nga mga butang parte sa organisasyon ni Jehova kag parte sa imo mga kauturan. Indi pagpakalaina ang mga gulang. Nagadepende sa imo ginasiling parte sa mga gulang kon bala saligan sila sang imo kabataan kon may problema sila.

11. Suno sa Santiago 3:18, ngaa importante nga tinguhaan mo nga mangin malinong ang sitwasyon sa inyo balay?

¹¹ Tinguhai nga mangin malinong ang sitwasyon sa inyo balay. Pirme ipabutyag sa imo bana kag kabataan nga palangga mo sila. Kon nagaistorya ka parte sa imo bana, isugid ang iya maayo nga mga kinaiya kag ipakita nga ginarespeto mo sia. Dayon hanasa ang imo kabataan nga amo man sini ang himuon kon nagaistorya sila parte sa ila amay. Kon himuon mo ini, mangin malinong ang sitwasyon sa inyo balay kag mangin mahapos sa imo kabataan nga makatuon parte kay Jehova. (Basaha ang Santiago 3:18.) Binagbinaga ang eksperiensia ni Jozsef nga isa ka espesyal payunir  sa Romania. Samtang nagadaku sia, ginhimo sang iya amay ang tanan para mabudlayan sia kag ang iya iloy kag mga utod sa pag-alagad kay Jehova. Si Jozsef nagsiling: “Ginpanikasugan gid ni Nanay nga mangin malinong ang sitwasyon sa balay. Kon grabe ang pangakig ni Tatay, mas ginapakitaan pa gid sia ni Nanay sang kaayo. Kon matalupangdan niya nga nabudlayan kami nga respetuhon kag tumanon si Tatay, ginabinagbinag niya sa amon ang Efeso 6:1-3. Dayon istoryahan niya kami parte sa maayo nga mga kinaiya ni Tatay, kag ginabuligan niya kami nga mahangpan kon ngaa dapat namon palanggaon si Tatay. Paagi sa iya ginahimo, madamo nga beses nga nalikawan nga maglala ang indi maayo nga sitwasyon.”

12. Suno sa 2 Timoteo 1:5, ano ang epekto kay Timoteo sang halimbawa ni Eunice?

¹² Basaha ang 2 Timoteo 1:5. Maayo gid nga halimbawa si Eunice para kay Timoteo. Posible nga gintudluan niya si Timoteo nga kon matuod ang aton pagtuo, dapat makita ini sa aton ginahimo. (Sant. 2:26) Sigurado gid nga nakita ni Timoteo nga palangga gid sang iya iloy si Jehova kay makita ini sa iya mga ginahimo. Nakita man ni Timoteo nga ang pag-alagad kay Jehova amo ang nagapahalipay sa iya iloy. Ano ang epekto kay Timoteo sang halimbawa ni Eunice? Nagsiling si Pablo nga ang pagtuo ni Timoteo pareho kabakod sang pagtuo sang iya iloy. Indi ini natabuan lang. Nakita ni Timoteo ang halimbawa sang iya iloy, kag napalig-on si Timoteo nga ilugon sia. Subong, madamo nga iloy ang nakabulig man sa mga miembro sang ila pamilya nga mag-alagad kay Jehova. Nahimo nila ini nga “wala sang pulong.” (1 Ped. 3:1, 2) Mahimo mo man ini. Paano?

13. Ngaa dapat himuon sang isa ka iloy nga pinakaimportante sa iya kabuhi ang iya kaangtanan kay Jehova?

¹³ Himua nga pinakaimportante sa imo kabuhi ang imo kaangtanan kay Jehova. (Deut. 6:5, 6) Pareho sa kalabanan nga iloy, madamo ka sang ginahimo nga sakripisyo. Halimbawa, nagahatag ka sang madamo nga tion, nagagasto ka sang daku nga kuarta, kag nagapulaw-bugtaw ka para maatipan ang imo kabataan. Pero indi ka dapat mangin sobra kasako sa sini kay basi wala ka na sang tion para pabakuron ang imo kaangtanan kay Jehova. Regular nga hatagi sang tion ang imo personal nga pagpangamuyo, personal nga pagtuon sang Biblia, kag ang pag-attend sa mga miting sang kongregasyon. Kon himuon mo ini, magabakod ang imo kaangtanan kay Jehova kag mangin maayo ka nga halimbawa sa imo pamilya kag sa iban.

14-15. Ano ang matun-an mo sa halimbawa ni Leanne, ni Maria, kag ni João?

¹⁴ Binagbinaga ang pila ka halimbawa sang mga pamatan-on nga nagdesisyon nga palanggaon si Jehova kag magsalig sa iya bangod sa naobserbahan nila sa ila iloy. Ang bata ni Christine nga si Leanne nagsiling: “Indi kami maka-Bible study kon ara si Tatay sa balay. Pero wala gid naga-absent si Nanay sa mga miting. Bisan diutay lang ang amon nabal-an parte sa Biblia, napalig-on kami sang iya halimbawa kag pagtuo. Gani bisan wala pa kami naka-attend sa mga miting, kumbinsido kami nga ang ginatudlo sang mga Saksi ni Jehova amo ang kamatuoran.”

¹⁵ Ang isa pa amo si Maria. Kon mag-attend sia sa mga miting upod ang iya iloy kag mga utod, ginasakit sila sang iya amay kon kaisa. Nagsiling sia: “Para sa akon, si Nanay ang isa sa pinakamaisog nga alagad ni Jehova. Sang bata pa ako, may mga tion nga wala ko ginahimo ang mga dapat ko himuon kay nahadlok ako sa posible isiling sang iban. Pero bangod sa nakita ko nga kaisog ni Nanay kag bangod pirme niya ginauna si Jehova, nabuligan ako sini nga madula ang akon kahadlok sa tawo.” Ang isa pa gid amo si João. Indi gusto sang iya amay nga istoryahan sa ila balay ang parte kay Jehova ukon sa Biblia. Nagsiling sia: “Handa si Nanay nga isakripisyo ang tanan para  malipay si Tatay. Pero ginasigurado ni Nanay nga indi niya masakripisyo ang iya kaangtanan kay Jehova kay palangga gid niya si Jehova. Sa banta ko, amo gid ini ang nagpalig-on sa akon.”

16. Ano ang posible nga epekto sa iban sang halimbawa sang isa ka iloy?

¹⁶ Mga iloy, tandai ninyo nga may epekto sa iban ang inyo halimbawa. Ngaa masiling naton ini? Binagbinaga ang epekto kay apostol Pablo sang halimbawa ni Eunice. Nagsiling sia nga ‘una niya nga nakita kay Eunice’ ang pagtuo ni Timoteo nga indi salimpapaw. (2 Tim. 1:5) San-o una nga nakita ni Pablo ang pagtuo ni Eunice? Posible nga nakilala niya si Loida kag si Eunice sa Listra sa tion sang iya una nga paglakbay bilang misyonero, kag posible nga nabuligan niya sila nga mangin Cristiano. (Binu. 14:4-18) Hunahunaa ini: Sang ginsulatan ni Pablo si Timoteo pagligad sang 15 ka tuig, nadumduman gihapon ni Pablo ang mga ginhimo ni Eunice bangod sang iya pagtuo. Ginsambit man niya si Eunice bilang isa ka halimbawa nga dapat ilugon. Ginapakita sini nga napalig-on gid si Pablo sa iya halimbawa, kag posible pati man ang madamo nga Cristiano sadto nga tion. Kon wala na kamo sing bana ukon indi Saksi ang inyo bana, pero ginapanikasugan ninyo nga padakuon ang inyo kabataan, makasalig kamo nga makapalig-on sa iban ang inyo halimbawa sang pagtuo.

17. Ano ang dapat mo himuon kon daw indi gusto sang imo bata nga mag-alagad kay Jehova bisan pa sang imo mga pagpanikasog?

¹⁷ Pero ano abi kon daw indi gusto sang imo bata nga mag-alagad kay Jehova bisan pa sang imo mga pagpanikasog? Tandai nga nagakinahanglan sang tion ang paghanas sa bata. Halimbawa,  base sa makita sa piktyur, kon nagtanom ka sang binhi, posible ginapamensar mo kon kaisa kon bala magatubo ini kag magapamunga sa ulihi. Bisan pa indi ka sigurado kon ano ang matabo sa imo gintanom, padayon mo ini nga ginabunyagan kay gusto mo himuon ang imo bug-os nga masarangan para magtubo ini. (Mar. 4:26-29) Bilang isa ka iloy, posible ginapamensar mo man kon kaisa kon bala ang imo ginatudlo sa imo kabataan naglab-ot gid sa ila tagipusuon. Indi mo makontrol ang mangin desisyon sang imo kabataan. Pero kon padayon mo sila nga hanason, ginapakita mo nga ginahimo mo ang imo bug-os nga masarangan para buligan sila nga mangin abyan ni Jehova.—Hulu. 22:6.

18. Paano mabuligan ni Jehova ang imo kabataan para mangin abyan niya sila?

¹⁸ Sugod pa sang panahon sang Biblia, madamo na nga pamatan-on ang ginbuligan ni Jehova para mangin abyan niya sila. (Sal. 22:9, 10) Gani kon gusto gid sang imo kabataan nga mangin abyan si Jehova, buligan man niya sila. (1 Cor. 3:6, 7) Bisan pa daw wala ginaserioso sang imo kabataan ang pag-alagad kay Jehova, palangga niya sila gihapon. (Sal. 11:4) Kon may makita si Jehova bisan gamay lang nga pamatuod nga ‘may husto sila nga panimuot,’ buligan niya sila dayon para mangin abyan niya sila. (Binu. 13:48; 2 Cron. 16:9) Posible nga buligan ka ni Jehova nga mahunahuna ang imo ihambal sa imo kabataan nga kinahanglan gid nila mabatian sa husto nga tion. (Hulu. 15:23) Ukon posible gamiton niya ang isa ka utod sa kongregasyon para hatagan sila sang atension. Kon magdalagku na ang imo kabataan, posible ipahanumdom sa ila ni Jehova ang imo mga gintudlo sa ila sang una. (Juan 14:26) Kon padayon mo nga hanason ang imo kabataan paagi sa imo ginasiling kag ginahimo, padyaan ni Jehova ang imo mga pagpanikasog.

19. Ngaa makasalig ka nga nalipay sa imo si Jehova?

¹⁹ Palangga ka ni Jehova bisan ano man ang mangin desisyon sang imo kabataan. Palangga ka niya kay palangga mo sia. Kon wala ka na sing bana, nagapromisa si Jehova nga mangin Amay sia sang imo kabataan kag amligan ka niya. (Sal. 68:5) Wala ka sing kontrol kon bala magaalagad kay Jehova ang imo kabataan ukon indi. Pero kon padayon ka nga magsalig nga buligan ka ni Jehova kag himuon mo ang imo bug-os nga masarangan, malipay sa imo si Jehova.