1. Ilaragway ang sitwasyon sang ginhimo ni Jesus ang iya una nga milagro.

 IMADYINA ang natabo sang hingapusan sang 29 C.E. sang gin-umpisahan ni Jesus ang iya ministeryo. Gin-agda si Jesus kag ang iya iloy nga si Maria kag ang pila niya ka disipulo sa isa ka punsion sa kasal sa Cana. Isa ini ka baryo sa naaminhan sang lugar nanday Jesus sa Nazaret. Abyan ni Maria ang pamilya sang ginkasal kag nagabulig sia sa pag-abiabi sa mga bisita. Pero naubusan sang alak ang punsion sa kasal. Daku gid ini nga problema kay posible mahuy-an ang bag-ong kasal kag ang ila pamilya. b Posible nga sobra sa ila ginapaabot ang nagkadto nga mga bisita. Dalidali nga ginpalapitan ni Maria ang iya anak kag ginsilingan sia: “Wala na sila sing alak.” (Juan 2:1-3) Ano ang ginhimo ni Jesus? Paagi sa milagro, ginhimo ni Jesus ang tubig nga “maayo nga alak.”—Juan 2:9, 10.

2-3. (a) Ano nga mga milagro ang ginhimo ni Jesus? (b) Ano ang mabenepisyo naton kon binagbinagon naton ang mga milagro ni Jesus?

² Madamo pa sing ginhimo nga milagro si Jesus sa tion sang iya ministeryo. c Paagi sa iya gahom, naghimo sia sang mga milagro para buligan ang linibo ka tawo. Binagbinaga ining duha lang sa iya mga milagro. Isa ka bes, ginpakaon niya ang 5,000 ka lalaki. Kag sang ulihi, 4,000 ka lalaki naman ang iya ginpakaon. Pero kon isipon ang mga babayi kag mga kabataan sa sining duha ka milagro,  posible nga sobra sa 27,000 ka tawo ang iya ginpakaon. (Mat. 14:15-21; 15:32-38) Sa sining duha ka milagro ni Jesus, madamo man sia sing gin-ayo nga nagamasakit. (Mat. 14:14; 15:30, 31) Sigurado nga nagdayaw gid ang mga tawo nga gin-ayo kag ginpakaon ni Jesus.

³ Madamo kita sing matun-an sa mga milagro ni Jesus. Sa sini nga artikulo, binagbinagon naton ang pila ka leksion nga matun-an naton sa sini nga mga milagro nga makapabakod sang aton pagtuo. Binagbinagon man naton kon paano naton mailog ang pagkamapainubuson kag kaluoy ni Jesus nga ginapakita niya kon nagahimo sia sang milagro.

4. Parte kay sin-o ang matun-an naton nga mga leksion sa mga milagro ni Jesus nga makapabakod sang aton pagtuo?

⁴ Makapabakod sang aton pagtuo ang mga milagro ni Jesus. Pero indi lang parte kay Jesus ang matun-an naton sa sini nga mga milagro, kundi parte man sa iya Amay. Kay man, si Jehova ang naghatag sang gahom kay Jesus para mahimo ini nga mga milagro. Ang Binuhatan 10:38 nagasiling: “Ginhaplasan [si Jesus] sang Dios sing balaan nga espiritu kag ginhatagan sing gahom, kag naglibot sia sa kadutaan nga nagahimo sing maayo kag nagapang-ayo sa tanan nga ginapabudlayan sang Yawa, bangod ang Dios kaupod niya.” Dumduma man nga perpekto nga gin-ilog ni Jesus ang panghunahuna kag ginabatyag sang iya Amay. Makita ini sa tanan niya nga ginsiling kag ginhimo, lakip na sa iya mga milagro. (Juan 14:9) Binagbinagon naton ang tatlo ka leksion nga matun-an naton sa mga milagro ni Jesus.

5. Ano ang nagpalig-on kay Jesus nga maghimo sang milagro? (Mateo 20:30-34)

⁵ Una, palangga gid kita ni Jesus kag sang iya Amay. Sang ari si Jesus sa duta, gingamit niya ang iya gahom sa paghimo sang milagro para buligan ang mga nagaantos. Paagi sa sini, ginpakita ni Jesus nga palangga gid niya ang mga tawo. Isa ka bes, nagpakiluoy kay Jesus ang duha ka tawo nga bulag. (Basaha ang Mateo 20:30-34.) “Naluoy gid” si Jesus sa ila, gani gin-ayo niya sila. Ang Griego nga tinaga nga gin-translate “naluoy gid” nagapakita nga nagalalain ukon nasakitan gid si Jesus kon may makita sia nga nagaantos. Bangod sa gugma ni Jesus sa mga tawo, nabatyagan niya ini nga klase sang kaluoy. Kag amo man ini nga klase sang kaluoy ang nagpalig-on sa iya nga pakaunon ang mga ginagutom kag ayuhon ang isa ka aruon. (Mat. 15:32; Mar. 1:41) Sigurado kita nga palangga gid kita ni Jehova, ang Dios nga may “mapinalanggaon nga kaluoy,” kag sang iya Anak. Nasakitan gid sila nga makita nga nagaantos kita. (Luc. 1:78; 1 Ped. 5:7) Gusto na gid nila nga dulaon ang tanan nga problema nga nagapaantos sa mga tawo.

6. Ano nga gahom ang ginhatag sang Dios kay Jesus?

⁶ Ikaduha, ginhatagan sang Dios si Jesus sang gahom nga makasolbar sang tanan nga problema sang mga tawo. Ang mga milagro nga ginhimo ni Jesus nagapakita nga masarangan niya solbaron ang tanan naton nga problema nga indi gid naton masarangan solbaron. Halimbawa, ang napanubli naton nga sala amo ang rason sang tanan nga problema sang mga tawo. Pero may gahom si Jesus para hilwayon kita sa sala kag dulaon ang tanan nga epekto sini lakip ang balatian kag kamatayon. (Mat. 9:1-6; Roma 5:12, 18, 19) Ginapakita man sang mga milagro ni Jesus nga masarangan niya ayuhon ang “tanan nga sahi” sang balatian kag banhawon ang mga patay. (Mat. 4:23; Juan 11:43, 44) May gahom man sia nga kontrolon ang mabaskog nga mga unos kag hilwayon ang mga tawo sa malaut nga mga espiritu. (Mar. 4:37-39; Luc. 8:2) Makapaumpaw gid mahibaluan nga ginhatagan ni Jehova sini nga gahom ang iya Anak.

7-8. (a) Ano ang ginapasalig sa aton sang mga milagro ni Jesus? (b) Ano nga milagro ang gusto mo nga makita sa bag-ong kalibutan?

 ⁷ Ikatlo, makasalig kita nga mabaton gid naton ang mga pagpakamaayo nga ihatag sang Ginharian sang Dios. Ang mga milagro nga ginhimo ni Jesus sang ari sia sa duta sampol lang sang himuon niya sa bilog nga kalibutan bilang Hari sang Ginharian sang Dios sa langit. Binagbinaga ang maeksperiensiahan naton sa indi na lang madugay kon gamhan na sang Cristo ang bilog nga duta. Mangin perpekto na ang aton panglawas bangod dulaon niya ang tanan nga balatian kag kasablagan nga nagapaantos sa mga tawo. (Isa. 33:24; 35:5, 6; Bug. 21:3, 4) Indi na gid kita mag-antos bangod sa gutom ukon bangod sa epekto sang mga kalamidad. (Isa. 25:6; Mar. 4:41) Kag kon banhawon na ang aton mga pinalangga nga ara sa “handumanan nga mga lulubngan,” sigurado nga malipay gid kita sa pag-abiabi sa ila. (Juan 5:28, 29) Ano nga milagro ang gusto mo gid nga makita sa bag-ong kalibutan?

⁸ Nagpakita si Jesus sang pagkamapainubuson kag kaluoy sang naghimo sia sang mga milagro. Dapat man naton ipakita ini nga mga kinaiya. Binagbinagon naton ang duha ka halimbawa. Una naton nga binagbinagon ang milagro nga natabo sa punsion sa kasal sa Cana.

9. Ano ang ginhimo ni Jesus sa punsion sa kasal? (Juan 2:6-10)

⁹ Basaha ang Juan 2:6-10. Sang naubusan sang alak sa punsion sa kasal, dapat bala nga may himuon gid si Jesus? Wala. Kay man, wala sing tagna nga nagasiling nga ang Mesias magahimo  sing alak paagi sa milagro. Pero ano ayhan ang batyagon mo kon maubusan sang makaparepresko nga ilimnon sa imo kasal? Posible nga naluoy gid si Jesus sa pamilya, ilabi na sa bag-ong kasal, kag indi niya gusto nga mahuy-an sila. Gani pareho sang ginsambit sa umpisa sini nga artikulo, naghimo si Jesus sang milagro. Ginhimo niya ang mga 390 ka litro nga tubig nga maayo nga alak. Posible nga amo sini kadamo nga alak ang ginhimo ni Jesus para indi ini maubos. Puede ini magamit sang mag-asawa sa ulihi ukon puede man nila ini ibaligya para may kuarta sila. Sigurado nga daku gid ang pagpasalamat sang bag-ong kasal.

10. Ano ang pila ka importante nga detalye nga mabasa sa Juan kapitulo 2? (Tan-awa man ang piktyur.)

¹⁰ Binagbinaga ang pila ka importante nga detalye nga mabasa sa Juan kapitulo 2. Talupangda nga puede kuntani nga pun-on ni Jesus sang tubig ang mga tadyaw nga bato para dayawon sia. Pero wala niya ini ginhimo. Sa baylo, ginsugo niya ang mga alagad nga pun-on ang mga tadyaw. (Bersikulo 6, 7) Kag pagkatapos niya ginhimo nga alak ang tubig, indi sia ang nagdala sang alak sa manugdumala sang punsion. Sa baylo, ginsugo niya ang mga alagad nga himuon ini. (Bersikulo 8) Wala nagkuha si Jesus sang alak para magpadayaw sa mga bisita kag magsiling, ‘Tilawi ninyo ang alak nga ginhimo ko!’

11. Ano ang matun-an naton sa milagro ni Jesus?

¹¹ Ano ang matun-an naton sa milagro ni Jesus sang ginhimo niya nga alak ang tubig? Mangin mapainubuson. Wala ginpadayaw ni Jesus ang milagro nga ginhimo niya. Ang matuod, wala gid niya ginpadayaw ang iya mga ginhimo. Sa baylo, mapainubuson gid si Jesus kag pirme niya ginahatag sa iya Amay ang tanan nga pagdayaw kag dungog. (Juan 5:19, 30; 8:28) Maayo gid kon ilugon naton ang pagkamapainubuson ni Jesus. Makabulig ini sa aton nga indi pag-ipadayaw ang aton mga hinimuan. Bisan ano man ang aton ginahimo sa pag-alagad kay Jehova, indi gid naton ini pag-ipadayaw. Sa baylo, dapat naton ipabugal ang parte sa dalayawon nga Dios nga aton ginaalagad. (Jer. 9:23, 24) Dapat naton sia padunggan kay sia lang ang nagakabagay sini. Kay man, wala gid kita sing masarangan nga himuon kon indi kita pagbuligan ni Jehova.—1 Cor. 1:26-31.

12. Ano ang isa pa ka paagi nga mailog naton ang pagkamapainubuson ni Jesus? Maghatag sing halimbawa.

¹² Binagbinaga ang isa pa ka paagi nga mailog naton ang pagkamapainubuson ni Jesus. Imadyina ini nga sitwasyon: Madamo nga oras ang gingamit sang isa ka gulang para buligan ang bataon nga ministeryal nga alagad sa paghanda sa iya pinakauna nga pamulongpulong. Bangod sa pagbulig sang gulang, napalig-on gid ang mga kauturan sa pamulongpulong sang bataon nga brother kag nanamian gid sila sa sini. Pagkatapos sang miting, ginpalapitan sang isa ka utod ang gulang kag ginsilingan sia: ‘Kanami sang iya pamulongpulong no?’ Kon mapainubuson ang gulang, indi gid sia magsiling: ‘Gani, pero grabe man ang amon nga praktis nga duha.’ Sa baylo, mas maayo kon magsiling sia: ‘Huo, kanami gid. Nalipay gid ’ko para sa iya.’ Kon mapainubuson kita, indi naton gusto nga dayawon kita bangod sa maayo nga ginhimo naton para sa iban. Nalipay kita kay kabalo kita nga nakita ni Jehova ang aton ginahimo kag ginapabaloran niya ini. (Ipaanggid ang Mateo 6:2-4; Heb. 13:16) Nalipay gid si Jehova kon ginailog naton ang pagkamapainubuson ni Jesus.—1 Ped. 5:6.

13. Ano ang nakita ni Jesus malapit sa siudad sang Nain, kag ano ang iya ginhimo? (Lucas 7:11-15)

¹³ Basaha ang Lucas 7:11-15. Binagbinaga ang natabo mga duha ka tuig pagkatapos ginsugdan ni Jesus ang iya ministeryo. Nagkadto sia sa Nain, nga isa ka siudad sa Galilea malapit sa Sunem. Mga 900 ka tuig antes sini, ginbanhaw ni manalagna Eliseo ang anak nga lalaki  sang isa ka iloy sa Sunem. (2 Hari 4:32-37) Sang malapit na si Jesus sa gawang sang siudad, nakita niya nga nagakumpanyar ang mga tawo bangod napatay ang bugtong nga anak sang isa ka balo. Grabe gid ang pagpangasubo sang iloy kag sang madamo nga tawo. Sang nasugata sila ni Jesus, ginpadulog niya sila. Dayon may ginhimo sia nga tumalagsahon gid para sa nagapangasubo nga iloy. Ginbanhaw ni Jesus ang iya anak. Amo ini ang una sa tatlo ka pagbanhaw nga ginhimo ni Jesus nga mabasa sa mga Ebanghelyo.

14. Ano ang pila ka importante nga detalye nga mabasa sa Lucas kapitulo 7? (Tan-awa man ang piktyur.)

¹⁴ Binagbinaga ang pila ka importante nga detalye nga mabasa sa Lucas kapitulo 7. Talupangda nga sang “nakita” ni Jesus ang nagapangasubo nga iloy, “naluoy sia sa iya.” (Bersikulo 13) Posible nga nakita ni Jesus nga nagahibi sia samtang nagalakat sia sa tupad sang bangkay sang iya anak. Bangod sini, nakabatyag sang kaluoy si Jesus sa iya. Pero, may ginhimo pa si Jesus para ipakita ang iya kaluoy. Gin-istorya sia ni Jesus, kag posible makapaumpaw gid ang tingog ni Jesus sang ginsilingan niya sia: “Indi ka na maghibi.” Dayon, may ginhimo si Jesus para buligan sia. Ginbanhaw ni Jesus ang iya anak kag ‘gintugyan sia sa iya iloy.’—Bersikulo 14, 15.

15. Ano ang matun-an naton sa milagro ni Jesus?

¹⁵ Ano ang matun-an naton sa milagro ni Jesus sang ginbanhaw niya ang anak nga lalaki sang isa ka balo? Dapat kita magpakita sang kaluoy sa mga nagapangasubo nga namatyan sang pinalangga. Siempre, indi kita pareho kay Jesus nga may gahom nga banhawon ang mga patay. Pero pareho kay Jesus, mapakita naton ang kaluoy sa ila paagi sa pagpanilag sa ila sitwasyon. Mabuligan naton sila kag mapaumpawan paagi sa aton mga ginasiling kag ginahimo. d (Hulu. 17:17; 2 Cor. 1:3, 4; 1 Ped. 3:8) Mapalig-on na sila kag maumpawan bisan simple lang aton ihambal kag himuon para sa ila.

16. Base sa piktyur nga isa lang ka reenactment, ano ang natun-an mo sa eksperiensia sang isa ka iloy nga bag-o lang napatyan sang bata?

¹⁶ Binagbinaga ini nga eksperiensia. Mga pila ka tuig na ang nagligad, samtang nagakanta  sang ambahanon sa miting sang kongregasyon, natalupangdan sang isa ka sister ang isa ka iloy nga nagahibi. Parte sa paglaum nga pagkabanhaw ang ambahanon, kag bag-o lang napatay ang bata nga babayi sini nga iloy. Kabalo ang sister nga nagapangasubo ini nga iloy, gani gintuparan niya sia, gin-agbayan, kag gin-updan sia sa pagkanta. Ang iloy nagsiling: “Nabatyagan ko nga palangga gid ako sang mga kauturan.” Nagapasalamat gid sia nga nag-attend sia sa miting. Nagsiling sia, “Sa Kingdom Hall kita makabaton sang paumpaw.” Makasalig kita nga nakita kag ginapabaloran gid ni Jehova bisan ang gamay lang nga butang nga aton ginahimo para sa mga “nalisdan” nga namatyan sang pinalangga.—Sal. 34:18.

17. Ano ang matun-an naton sa mga milagro ni Jesus?

¹⁷ Mapalig-on gid kita kon tun-an naton ang mga milagro ni Jesus nga mabasa sa Biblia. Matun-an naton sa sini nga palangga gid kita ni Jehova kag ni Jesus, nga may gahom si Jesus nga solbaron ang tanan nga problema sang mga tawo, kag makasalig kita nga malapit na lang naton mabaton ang mga pagpakamaayo nga ihatag sang Ginharian sang Dios. Samtang ginausisa naton ini nga mga kasaysayan, pamalandungan naton kon paano naton mailog ang mga kinaiya ni Jesus. Gani puede mo tun-an sa imo personal nga pagtuon ukon sa inyo Family Worship ang iban pa nga mga milagro ni Jesus. Madamo ka gid sing matun-an sa sini, kag puede mo isugid sa iban ang imo natun-an. Kon himuon mo ini, sigurado nga mangin makapalig-on gid ang inyo pag-istoryahanay.—Roma 1:11, 12.

18. Ano ang binagbinagon naton sa masunod nga artikulo?

¹⁸ Sang malapit na lang matapos ang ministeryo ni Jesus, ginhimo niya ang iya ikatlo kag katapusan nga pagbanhaw nga mabasa sa Biblia. Pero lain ini sa iban pa nga pagbanhaw nga ginhimo niya. Kay man, sa sini nga tion, ginbanhaw niya ang iya pinalangga nga abyan nga apat ka adlaw na nga napatay. Ano ang matun-an naton sa sini nga milagro nga mabasa sa Ebanghelyo? Kag paano pa gid naton mapabakod ang aton pagtuo sa paglaum nga pagkabanhaw? Binagbinagon ini nga mga pamangkot sa masunod nga artikulo.