1. Sa ano kita kumbinsido?

 BILANG katawhan ni Jehova, kabalo kita nga palangga niya kita kag gusto niya ang pinakamaayo nga kabuhi para sa aton. (Roma 8:35-39) Kumbinsido man kita nga para gid sa aton kaayuhan ang pag-aplikar sang mga prinsipio sa Biblia. (Isa. 48:17, 18) Pero ano ang himuon naton kon may mga problema kita nga wala naton ginapaabot?

2. Ano nga mga problema ang posible naton maeksperiensiahan, kag ano ang posible naton hunahunaon?

² Tanan kita nga mga alagad ni Jehova may mga problema. Halimbawa, posible maglalain kita bangod sa ginhimo sang isa ka miembro sang aton pamilya. Posible nga magbalatian kita amo nga limitado na lang ang aton mahimo sa pag-alagad kay Jehova. Posible nga mag-antos kita bangod sa kalamidad. Ukon posible nga hingabuton kita bangod sa aton mga ginapatihan. Kon makaeksperiensia kita sini nga mga problema, posible nga maghunahuna kita: ‘Ngaa natabo ini sa akon? Ano ang sala ko nga ginhimo? Wala na bala nalipay si Jehova sa akon?’ Nabatyagan mo na bala ini? Kon huo, indi ka dapat maluyahan sang buot. May mga tion nga nabatyagan man ini sang madamo nga matutom nga alagad ni Jehova.—Sal. 22:1, 2; Hab. 1:2, 3.

3. Ano ang matun-an naton sa Salmo 34:19?

³ Basaha ang Salmo 34:19. Talupangda ang duha ka importante nga punto sa sini nga salmo: (1) May mga problema ang matarong nga mga tawo. (2) Ginabuligan kita ni Jehova kon may mga problema kita. Paano kita ginabuligan ni Jehova? Ang isa ka paagi amo nga ginabuligan niya kita nga mangin husto ang aton pagtamod sa aton kabuhi sa sini nga kalibutan. Nagpromisa si Jehova nga mangin malipayon kita sa aton pag-alagad sa iya, pero wala  sia nagsiling nga indi gid kita makaeksperiensia sang mga problema. (Isa. 66:14) Ginapalig-on niya kita nga pamalandungan ang tion nga maeksperiensiahan na naton sing wala sing katapusan ang gusto niya nga kabuhi para sa aton. (2 Cor. 4:16-18) Pero samtang wala pa ina nga tion, ginabuligan niya kita nga makapadayon sa pag-alagad sa iya kada adlaw.—Pan. 3:22-24.

4. Ano ang binagbinagon naton sa sini nga artikulo?

⁴ Binagbinagon naton kon ano ang matun-an naton sa halimbawa sang matutom nga mga alagad ni Jehova sang panahon sang Biblia kag sa aton tion subong. Ginapakita sang ila mga halimbawa nga posible kita makaeksperiensia sang mga problema nga wala naton ginapaabot. Pero kon magsalig kita kay Jehova, buligan gid niya kita. (Sal. 55:22) Samtang ginabinagbinag naton ini nga mga halimbawa, pamangkuta ang imo kaugalingon: ‘Kon ako ang sa ila sitwasyon, ano ayhan ang himuon ko? Paano ang ila mga halimbawa makabulig sa akon nga magsalig pa gid kay Jehova? Ano nga mga leksion ang puede ko iaplikar sa akon kabuhi?’

5. Ano nga mga problema ang naeksperiensiahan ni Jacob bangod kay Laban? (Tan-awa ang piktyur sa kober.)

⁵ Sang panahon sang Biblia, nakaeksperiensia ang mga alagad ni Jehova sang mga problema nga wala nila ginapaabot. Binagbinaga ang halimbawa ni Jacob. Ginsugo sia sang iya amay nga magpili sing asawa sa mga anak ni Laban nga paryente nila nga nagasimba man sa Dios. Ginpasalig man sia sang iya amay nga pakamaayuhon sia ni Jehova. (Gen. 28:1-4) Gintuman ni Jacob ang iya amay. Ginbiyaan niya ang Canaan kag naglakbay sia pakadto sa balay ni Laban. May duha ka anak nga babayi si Laban nga amo si Lea kag si Raquel. Ginhigugma ni Jacob ang kamanghuran nga anak ni Laban nga si Raquel, kag nagpasugot sia nga mag-alagad kay Laban sing pito ka tuig antes niya pangasaw-on si Raquel. (Gen. 29:18) Pero lain sa ginapaabot ni Jacob ang natabo. Gindayaan sia ni Laban para ang mapangasawa niya amo ang kamagulangan nga anak ni Laban nga si Lea. Isa ka semana sang ulihi, ginpasugtan ni Laban nga pangasaw-on ni Jacob si Raquel, pero dapat sia magpangalagad sing pito pa ka tuig. (Gen. 29:25-27) Gindayaan man ni Laban si Jacob sa ila kasugtanan parte sa iya suhol. Sa sulod sang 20 ka tuig, indi gid maayo ang ginhimo ni Laban kay Jacob.—Gen. 31:41, 42.

6. Ano pa ang iban nga mga problema nga ginbatas ni Jacob?

⁶ May iban pa nga mga problema nga ginbatas si Jacob. Bangod daku ang iya pamilya, may mga tion nga wala nagaintiendihanay ang iya mga anak. Ginbaligya pa gani sang pila niya ka anak ang ila utod nga si Jose para mangin ulipon. Ginpakahuy-an sang duha niya ka anak nga si Simeon kag si Levi ang ila pamilya kag ang ngalan ni Jehova. Dayon napatay ang iya pinalangga nga asawa nga si Raquel sang ginbun-ag niya ang ila ikaduha nga bata. Kag bangod sa grabe nga tiggulutom, napilitan si Jacob nga magsaylo sa Egipto bisan pa tigulang na sia.—Gen. 34:30; 35:16-19; 37:28; 45:9-11, 28.

7. Paano ginpakita ni Jehova nga nalipay sia kay Jacob?

⁷ Bisan pa sang tanan nga problema nga naeksperiensiahan ni Jacob, wala gid nadula ang iya pagtuo kay Jehova kag sa Iya mga promisa. Bangod sini, nalipay gid si Jehova sa iya, gani ginpakamaayo sia ni Jehova. Halimbawa, bisan pa gindayaan sia ni Laban, ginhatagan sia ni Jehova sang madamo nga pagkabutang. Imadyina man ang kalipay ni Jacob sang nakita niya liwat ang iya anak nga si Jose nga abi niya madugay na nga napatay. Sigurado nga nagapasalamat gid sia kay Jehova. Bangod suod si Jacob kay Jehova, nabatas niya ang iya mga problema. (Gen. 30:43; 32:9, 10; 46:28-30) Kon panikasugan naton nga padayon nga mangin suod kay Jehova, mabatas man naton ang aton mga problema nga wala naton ginapaabot.

8. Ano ang gusto himuon ni Hari David?

 ⁸ May mga gusto himuon si Hari David para sa pag-alagad kay Jehova, pero indi niya ini tanan mahimo. Halimbawa, gusto ni David nga magpatindog sang templo para sa iya Dios. Ginsugid niya ini kay manalagna Natan. Bilang sabat, nagsiling si Natan sa iya: “Himua kon ano ang luyag mo himuon, kay kaupod mo ang matuod nga Dios.” (1 Cron. 17:1, 2) Sigurado nga napalig-on gid si David sa ginsiling ni Natan. Posible gani nga ginsugdan niya dayon ang pagplano sa sining daku katama nga proyekto.

9. Ano ang reaksion ni David sang nabatian niya ang balita nga posible nagpaluya sang iya buot?

⁹ Pero wala madugay pagkatapos sini, nagbalik ang manalagna ni Jehova para sugiran si David sang balita nga posible magpaluya sang iya buot. “Sina mismo nga gab-i,” ginsilingan ni Jehova si Natan nga indi si David ang magapatindog sang templo, kundi ang isa sa iya mga anak. (1 Cron. 17:3, 4, 11, 12) Ano ang reaksion ni David sang nabatian niya ini? May ginhimo sia nga pagbag-o sa iya gusto himuon. Nagpokus sia sa pagtipon sang pondo kag mga materyales nga gamiton sang iya anak nga si Solomon para sa pagpatindog sang templo.—1 Cron. 29:1-5.

10. Paano ginpakamaayo ni Jehova si David?

¹⁰ Sa tapos ginpabalo ni Jehova si David nga indi sia ang magapatindog sang templo, naghimo dayon sing katipan si Jehova sa iya. Nagpromisa si Jehova kay David nga ang isa sa iya mga kaliwat magagahom sing wala sing katapusan. (2 Sam. 7:16) Sa bag-ong kalibutan, sa tion sang Isa ka Libo ka Tuig nga Paggahom, sigurado nga malipay gid si David kon mabal-an niya nga ang Hari nga si Jesus isa sa iya mga kaliwat. Ano ang matun-an naton sa sini nga kasaysayan? Bisan pa indi naton mahimo ang tanan nga gusto naton himuon sa pag-alagad kay Jehova, posible nga hatagan kita sang aton Dios sang mga pagpakamaayo nga wala gid naton ginapaabot.

11. Ano nga pagpakamaayo ang nabaton sang mga Cristiano sang unang siglo bisan pa wala nag-abot ang Ginharian sa tion nga ginapaabot nila? (Binuhatan 6:7)

¹¹ Ang mga Cristiano sang unang siglo nakaeksperiensia sang mga problema nga wala nila ginapaabot. Halimbawa, gusto nila nga mag-abot na ang Ginharian sang Dios, pero wala sila kabalo kon san-o ini matabo. (Binu. 1:6, 7) Ano ang ila ginhimo? Nangin masako sila sa pagbantala. Samtang nagadamo ang lugar nga ila ginabantalaan, nakita nila nga ginabuligan sila ni Jehova.—Basaha ang Binuhatan 6:7.

12. Ano ang ginhimo sang mga Cristiano sang unang siglo sang may natabo nga tiggulutom?

¹² Sang unang siglo, may natabo nga daku nga tiggulutom “sa bug-os nga duta.” (Binu. 11:28) Naapektuhan man ang mga Cristiano sadto. Posible nga nag-antos gid sila bangod sa sining daku nga tiggulutom. Sigurado nga nagapalibog ang mga ulo sang pamilya kon diin sila makakita sang pagkaon para sa ila pamilya. Kamusta naman ang mga pamatan-on nga nagaplano nga dugangan ang ila ginahimo sa pag-alagad? Ginhunahuna ayhan nila nga himuon na lang nila ini kon matapos na ang tiggulutom? Bisan ano man ang kahimtangan sang mga Cristiano sadto, nag-adjust sila. Ginhimo nila ang ila bug-os nga masarangan para makapadayon sila sa pagbantala, kag nalipay gid sila sa pagbulig sa ila mga kauturan sa Judea.—Binu. 11:29, 30.

13. Ano nga mga pagpakamaayo ang nabaton sang mga Cristiano sa tion sang tiggulutom?

¹³ Ano nga mga pagpakamaayo ang nabaton sang mga Cristiano sa tion sang tiggulutom? Nabatyagan gid sang mga nakabaton sang bulig nga wala sila ginapabay-an ni Jehova. (Mat. 6:31-33) Sigurado nga nangin suod pa gid sila sa mga kauturan nga nagbulig sa ila. Kamusta naman ang mga naghatag sang donasyon ukon ang mga nagbulig sa iban pa nga paagi? Nabatyagan gid nila ang kalipay nga resulta sang paghatag. (Binu. 20:35) Bangod nag-adjust sila sa ila kahimtangan, ginpakamaayo gid sila tanan ni Jehova.

14. Ano ang natabo kay Bernabe kag kay apostol Pablo, pero ano ang resulta kay padayon sila nga nagbantala? (Binuhatan 14:21, 22)

 ¹⁴ Pirme ginahingabot ang mga Cristiano sang unang siglo. Pero nagakatabo ini kon kaisa sa tion nga wala nila ginapaabot. Binagbinaga ang natabo kay Bernabe kag kay apostol Pablo sang nagbantala sila sa Listra. Sang primero, ginbaton sila sang mga tawo kag nagapamati sila sa ila. Pero sang ulihi, ‘ginhaylo sang mga manugpamatok ang mga tawo,’ kag ginbato sang pila sa ila si Pablo kag ginbiyaan nila sia kay abi nila patay na sia. (Binu. 14:19) Pero padayon nga nagbantala sanday Bernabe kag Pablo sa iban nga lugar. Ano ang resulta? Nabuligan nila ang “madamo nga tawo nga mangin disipulo,” kag napabakod nila ang ila mga kauturan paagi sa ila mga ginsiling kag halimbawa. (Basaha ang Binuhatan 14:21, 22.) Bangod wala nag-untat sanday Bernabe kag Pablo sa pagbantala bisan pa ginhingabot sila, madamo sila sang nabuligan. Kon indi man kita mag-untat sa paghimo sang hilikuton nga ginsugo ni Jehova sa aton, pakamaayuhon gid niya kita.

15. Ano ang natun-an mo sa eksperiensia kag halimbawa ni Brother A. H. Macmillan?

¹⁵ Antes sang 1914, may pila ka butang nga ginapaabot nga matabo ang katawhan ni Jehova. Binagbinaga ang halimbawa ni Brother A. H. Macmillan. Ginapaabot niya nga malapit na lang niya mabaton ang iya padya sa langit, kag amo man sini ang ginahunahuna sang madamo sadto. Sa iya pamulongpulong sang Septiembre 1914, nagsiling sia: “Posible nga amo na ini ang katapusan ko nga pamulongpulong.” Pero indi amo ’to ang iya katapusan nga pamulongpulong. Sang ulihi, nagsulat si Brother Macmillan: “Nahunahuna sang pila sa amon nga mapalangit kami dayon, pero posible nga nagpadasudaso lang kami sa paghunahuna sini.” Nagsiling pa sia: “Ang dapat namon himuon amo ang padayon nga mangin masako sa pag-alagad sa Ginuo.” Amo gid sini ang ginhimo ni Brother Macmillan. Nangin mapisan sia sa pagbantala. Nalipay man sia nga nakabulig sia sa pagpalig-on sa madamo nga kauturan nga napriso bangod nagpangindi sila nga magsoldado. Kag bisan sang tigulang na sia, matutom sia gihapon nga naga-attend sa mga miting sang kongregasyon. Paano nakabenepisyo si Brother Macmillan bangod nangin masako sia sa pag-alagad kay Jehova samtang ginahulat niya nga mabaton ang iya padya? Antes sia napatay sang 1966, nagsulat sia: “Kon ano kabakod sang akon pagtuo sang una, amo man ini gihapon kabakod subong.” Maayo gid nga ilugon naton ang panimuot ni Brother Macmillan ilabi na kon may mga problema kita nga madugay na naton nga ginabatas.—Heb. 13:7.

16. Ano nga problema ang naeksperiensiahan ni Herbert Jennings kag sang iya asawa nga wala nila ginapaabot? (Santiago 4:14)

¹⁶ Madamo nga alagad ni Jehova ang nagaantos bangod sa balatian nga wala nila ginapaabot. Binagbinaga ang eksperiensia ni Brother Herbert Jennings. b Sa iya sugilanon sang kabuhi, ginsugid niya nga nalipay gid sila sang iya asawa sa ila asaynment bilang mga misyonero sa Ghana. Pero sang ulihi, nagbalatian sia sang isa ka malala nga klase sang mood disorder. Ginsambit ni Brother Jennings nga ang iya sitwasyon amo ang ginasiling sang Santiago 4:14 nga “buas” nga wala ginapaabot. (Basaha.) Nagsiling sia nga dapat nila batunon ang ila sitwasyon. Nagsulat sia: “Naghanda kami agod magbiya sa Ghana kag sa amon madamong suod nga mga abyan kag magbalik sa Canada [para magpabulong].” Ginbuligan ni Jehova si Brother Jennings kag ang iya asawa para padayon sila nga makaalagad sa iya sing matutom bisan pa sang ila problema.

17. Paano nakabenepisyo ang iban nga kauturan sa halimbawa ni Brother Jennings?

 ¹⁷ Ang ginsiling ni Brother Jennings sa iya sugilanon sang kabuhi nakabulig gid sa iban. Ang isa ka sister nagsulat: “Karon pa lang ako natandog sing tudok sang mabasa ko ini nga artikulo. . . . Nabuligan ako nga tamdon ang akon kahimtangan sing balanse pagkatapos ko mabasa kon paano napilitan si Utod Jennings nga mag-untat sa iya pinasahi nga asaynment agod atipanon ang iya balatian.” Ang isa ka brother nagsulat man: “Pagkatapos mag-alagad subong isa ka gulang sa kongregasyon sing napulo ka tuig, gin-untatan ko ini nga pribilehiyo bangod sang isa ka sahi sang balatian sa hunahuna. Nakabatyag ako sing daku gid nga kapaslawan sa akon kaugalingon amo nga masami ako nagakasubo kon makabasa ako sing mga artikulo tuhoy sa mga sugilanon sang kabuhi. . . . Apang nakahatag sa akon sing kalipay ang pagbatas ni Utod Jennings.” Matun-an naton sa sini nga kon batason naton ang aton mga problema nga wala naton ginapaabot, mapalig-on naton ang iban. Bisan pa ang aton kabuhi subong lain sa kabuhi nga gusto naton, puede naton gihapon mapalig-on ang iban paagi sa aton pagtuo kag pagbatas.—1 Ped. 5:9.

18. Base sa piktyur nga isa lang ka reenactment, ano ang natun-an mo sa halimbawa sang isa ka balo sa Nigeria?

¹⁸ Madamo nga alagad ni Jehova ang naapektuhan sang mga kalamidad kag pandemic pareho sang COVID-19. Binagbinaga ang eksperiensia sang isa ka balo sa Nigeria nga namigado gid. Isa ka aga, pagkatapos nila gintig-ang ang ila nabilin nga bugas, ginpamangkot sia sang iya bata nga babayi kon ano ang ila lutuon para sa panyaga. Ginsilingan niya ang iya bata nga wala na sila sing pagkaon kag kuarta, pero dapat nila ilugon ang balo nga babayi sa Sarepta. Ihanda nila ang ila katapusan nga pagkaon kag magsalig sing bug-os kay Jehova. (1 Hari 17:8-16) Antes pa nila mapamensaran kon ano ang ila panyagahon, nakabaton sila sang mga pagkaon halin sa mga kauturan. Bastante na ini nga pagkaon para sa ila kinahanglanon sa sobra duha ka semana. Bangod sini nakasiling ang sister nga daw ara lang sa tupad niya  si Jehova kag nagapamati Sia samtang ginaistorya niya ang iya bata. Ginapakita sini nga kon magsalig kita kay Jehova kon may mga problema kita nga wala naton ginapaabot, magasuod pa gid kita sa iya.—1 Ped. 5:6, 7.

19. Ano nga paghingabot ang ginbatas ni Aleksey Yershov?

¹⁹ Sang nagligad nga mga tinuig, ginbatas sang madamo naton nga kauturan ang mga paghingabot nga posible wala nila ginapaabot. Binagbinaga ang natabo kay Brother Aleksey Yershov, nga nagaistar sa Russia. Sang nabawtismuhan sia sang 1994, hilway pa nga makaalagad kay Jehova ang iya katawhan sa sini nga pungsod. Pero pagligad sang mga tinuig, nagbag-o ang ila kahimtangan sa Russia. Sang 2020, gin-raid ang balay ni Brother Yershov, kag ginkompiskar ang madamo niya nga pagkabutang. Pagligad sang pila ka bulan, ginkasuhan sia sang gobierno. Ang malain pa gid kay ginkasuhan sia base sa mga video nga ginrekord sang isa ka tawo nga sobra isa ka tuig nga nagpakunokuno nga interesado sa pagtuon sang Biblia. Grabe gid kalain sang ginhimo sini nga tawo.

20. Paano ginpabakod ni Brother Yershov ang iya kaangtanan kay Jehova?

²⁰ May maayo bala nga resulta ang paghingabot kay Brother Yershov? Huo. Nagbakod pa gid ang iya kaangtanan kay Jehova. Nagsiling sia: “Ako kag ang akon asawa pirme nagapangamuyo sing magkaupod. Nahibaluan ko nga indi ko ini mabatas kon wala ang bulig ni Jehova.” Nagsiling pa sia: “Nabuligan ako sang personal nga pagtuon nga indi maluyahan sing buot. Ginapamalandungan ko ang mga halimbawa sang matutom nga mga alagad sang Dios sang una. Madamo nga rekord sa Biblia ang nagapakita nga importante nga mangin kalmado kag magsalig kay Jehova.”

21. Ano ang natun-an naton sa sini nga artikulo?

²¹ Ano ang natun-an naton sa sini nga artikulo? Kon kaisa, may mga problema kita nga wala naton ginapaabot. Pero kon magsalig kita kay Jehova, buligan gid niya kita. Ang teksto nga ginbasihan sini nga artikulo nagsiling nga “madamo ang kabudlayan sang matarong, apang ginaluwas sia ni Jehova sa sini tanan.” (Sal. 34:19) Gani importante nga padayon kita nga magpokus kon paano kita ginabuligan ni Jehova kag indi sa aton mga problema. Kon himuon naton ini, masiling man naton ang ginsiling ni apostol Pablo: “Sa tanan nga butang may kusog ako paagi sa isa nga nagapabakod sa akon.”—Fil. 4:13.