1. Ngaa nagakomento kita sa mga miting?

 NGAA naga-attend kita sa mga miting sang kongregasyon? Ang panguna nga rason amo nga gusto naton dayawon si Jehova. (Sal. 26:12; 111:1) Naga-attend man kita sa mga miting kay gusto naton palig-unon ang isa kag isa sa sining mabudlay nga mga tion. (1 Tes. 5:11) Kon nagakomento kita sa mga miting, madayaw naton si Jehova kag mapalig-on naton ang isa kag isa.

2. San-o kita puede makakomento sa aton mga miting?

² Kada semana, may kahigayunan kita nga magkomento sa aton mga miting. Halimbawa, kon Sabado ukon Domingo, puede kita makakomento sa Pagtinuon sa Ang Lalantawan sa kongregasyon. Kon midweek miting, puede kita makakomento sa Espirituwal nga mga Hiyas, Pagtinuon sang Kongregasyon sa Biblia, kag sa iban pa nga bahin nga may paghinun-anon.

3. Ano ang posible nga mga problema parte sa pagkomento, kag paano makabulig sa aton ang Hebreo 10:24, 25?

³ Gusto naton tanan nga dayawon si Jehova kag palig-unon ang aton mga kauturan. Pero posible nga may mga problema kita kon parte sa pagkomento. Posible nakulbaan kita magkomento, ukon posible nanamian kita magkomento kag gusto naton kuntani nga madamo nga beses kita matuksuan. Ano ang makabulig sa aton? Makabulig sa aton ang sulat ni apostol Pablo para sa mga Hebreo. Ginbinagbinag ni Pablo sa iya sulat kon ngaa importante ang pagtipon sing tingob, kag nagsiling sia nga dapat kita magpokus sa ‘pagpalig-unay sa isa kag isa.’ (Basaha ang Hebreo 10:24, 25.) Para indi kita makulbaan nga magkomento, importante nga dumdumon  naton nga kon ipabutyag naton ang aton pagtuo bisan sa simple lang nga komento, mapalig-on na naton ang iban. Kag kon indi naman posible nga makakomento kita sing madamo nga beses, dapat kita malipay kay may tsansa ang iban nga kauturan nga makakomento.—1 Ped. 3:8.

4. Ano ang tatlo ka punto nga binagbinagon naton sa sini nga artikulo?

⁴ Sa sini nga artikulo, binagbinagon naton kon paano naton mapalig-on ang iban kon gamay ang kongregasyon kag diutay lang ang nagakomento. Dayon, binagbinagon naton kon paano naton mapalig-on ang iban kon daku ang kongregasyon kag madamo ang nagabayaw para magkomento. Kag sa katapusan, binagbinagon naton ang mga puede naton himuon para mangin makapalig-on sa iban ang aton komento.

5. Paano naton mapalig-on ang iban kon diutay lang kita sa kongregasyon?

⁵ Bangod diutay lang ang naga-attend sa gamay nga mga kongregasyon ukon grupo, diutay man ang makakomento. Kon kaisa, posible nga kinahanglan pa maghulat sang nagadumala sang pagtinuon antes may magbayaw para magkomento. Bangod sini, posible nga mangin makatalaka ang miting, kag indi gid ini makapalig-on. Ano ang puede mo himuon? Pirme magbayaw para magkomento. Kon himuon mo ini, posible nga mapalig-on mo ang iban nga pirme magkomento.

6-7. Ano ang makabulig sa aton para indi kita masyado makulbaan nga magkomento?

⁶ Kamusta naman kon nakulbaan ka magkomento? Amo man sina ang ginabatyag sang madamo nga kauturan. Pero para mapalig-on mo ang imo mga kauturan, dapat may himuon ka para indi ka masyado makulbaan nga magkomento. Ano ang puede mo himuon?

⁷ Puede mo tun-an ang pila ka panugda sa nagligad nga mga isyu sang Ang Lalantawan. b Halimbawa, maghanda sing maayo. (Hulu. 21:5) Kon natun-an mo sing maayo ang pagatun-an nga materyal, mas may kompiansa ka nga magkomento. Dugang pa, lip-uta lang ang imo komento. (Hulu. 15:23; 17:27) Kon lip-ot lang ang imo komento, posible nga indi ka masyado makulbaan. Mas mahapos man maintiendihan sang mga kauturan ang imo komento kon isa ukon duha lang ini ka sentence, sangsa malawig nga komento nga madamo sing punto. Ang imo malip-ot nga komento nga wala ginabasa ang parapo nagapakita man nga nahandaan mo sing maayo kag nahangpan mo gid ang ginatun-an.

8. Ano ang ginabatyag ni Jehova kon himuon naton ang aton bug-os nga masarangan?

⁸ Pero ano abi kon nakulbaan ka gihapon magkomento bisan pa ginsunod mo na ang pila sa sini nga mga panugda? Posible nga nagabatyag ka nga isa lang ka komento ang imo masarangan kay mas nakulbaan ka pa gid kon makomento ka pa liwat. Kon amo sini ang imo ginabatyag, makasalig ka nga kon himuon mo ang imo bug-os nga masarangan, malipay gid si Jehova. (Luc. 21:1-4) Pero indi buot silingon sini nga pabudlayan mo gid ang imo kaugalingon. (Fil. 4:5) Gani, hibalua kon ano ang imo masarangan, panikasugi nga himuon ini, kag mangamuyo nga buligan ka nga mangin kalmado. Sa umpisa, posible nga isa lang ka malip-ot nga komento ang imo masarangan.

9. Ano ang posible nga problema parte sa pagkomento sa daku nga kongregasyon?

⁹ Lain naman ang problema kon ara ka sa daku nga kongregasyon. Posible nga madamo  nga kauturan ang nagabayaw para magkomento, gani indi ka pirme matuksuan. Halimbawa, nanamian gid ang isa ka sister nga si Danielle nga magkomento sa mga miting. c Ginatamod niya ini nga bahin sang iya pagsimba, isa ka paagi para mapalig-on niya ang iban, kag isa ka paagi para mapabakod niya ang iya pagtuo sa mga ginatudlo sang Biblia. Pero sang nagsaylo sia sa daku nga kongregasyon, talagsa na lang sia matuksuan. Kag kon kaisa, indi gid sia matuksuan. “Nagalalain gid ako,” siling niya. “Pamatyag ko may puede ako himuon nga wala ko nahimo. Kag kon indi ka pirme matuksuan, makahunahuna ka nga daw ginhungod gid sang nagadumala nga indi ka pagtuksuon.”

10. Ano ang himuon naton para mas daku ang tsansa nga makakomento kita?

¹⁰ Nabatyagan mo man bala ang ginbatyag ni Danielle? Kon huo, posible magbatyag ka nga mas maayo kon indi ka na lang magkomento kag mamati na lang sa miting. Pero padayon nga panikasugi nga magkomento. Ano ang puede mo himuon? Puede mo testingan nga magpreparar sang pila ka komento sa kada miting. Kay kon indi ka matuksuan sa umpisa sang pagtinuon, may tsansa ka pa nga makakomento asta matapos ang pagtinuon. Kon nagahanda ka para sa Pagtinuon sa Ang Lalantawan, pamalandungi kon paano ginapadaku sang kada parapo ang tema sang artikulo. Kon himuon mo ini, labanlaban nga may manami ka gid nga punto nga makomento. Puede mo man handaan ang mga parapo nga nagabinagbinag sang madalom nga mga kamatuoran sa Biblia. (1 Cor. 2:10) Ngaa? Kay posible nga diutay lang ang magbayaw sa sini nga mga parapo. Pero ano abi kon pagkatapos sang pila ka miting wala ka gihapon matuksuan bisan pa ginsunod mo na ini nga mga panugda? Puede mo palapitan ang nagadumala sang pagtinuon antes sang miting kag hambalon mo sia kon diin nga pamangkot ang gusto mo komentuhan.

11. Ano ang ginapalig-on sa aton sang Filipos 2:4?

¹¹ Basaha ang Filipos 2:4. Gintuytuyan si apostol Pablo nga palig-unon ang mga Cristiano nga pangitaon ang kaayuhan sang iban. Paano naton maaplikar ini nga prinsipio sa aton mga miting? Dapat naton dumdumon nga pareho sa aton, gusto man sang iban nga magkomento.

12. Ano ang isa ka maayo nga paagi para mapalig-on naton ang iban sa aton mga miting? (Tan-awa man ang piktyur.)

 ¹² Binagbinaga ini nga sitwasyon. Kon nagaistoryahanay kamo sang imo mga abyan, gusto mo bala nga ikaw lang pirme ang nagahambal? Siempre indi. Gusto mo nga mag-istorya man sila. Amo man sini sa aton mga miting. Gusto naton nga madamo nga kauturan ang makakomento. Ang matuod, ang isa sa pinakamaayo nga paagi para mapalig-on naton ang aton mga kauturan amo ang paghatag sa ila sang tsansa nga mapabutyag ang ila pagtuo. (1 Cor. 10:24) Binagbinagon naton kon paano naton ini mahimo.

13. Ano ang puede naton himuon para mas madamo ang makakomento?

¹³ Para madamo ang makakomento, lip-uton lang naton ang aton komento. Dapat mangin halimbawa sa sini ang mga gulang kag ang iban pa nga hamtong nga mga utod. Bisan pa malip-ot lang ang imo komento, likawi nga magkomento sang madamo nga punto. Kon ubuson mo ang tanan nga punto sa parapo, diutay na lang ang puede ikomento sang iban. Halimbawa, ginbinagbinag sa sini nga parapo ang duha ka panugda nga amo ang pagkomento sing malip-ot kag paglikaw nga magkomento sang madamo nga punto. Kon ikaw ang una nga gintukso nga magkomento sa sini nga parapo, panikasugi nga isa lang ka panugda ang ikomento.

14. Ano ang makabulig sa aton para mabal-an naton kon bala dapat gid kita magbayaw pirme? (Tan-awa man ang piktyur.)

¹⁴ Mag-obserbar para mabal-an mo kon bala dapat ka gid magbayaw pirme. Kon pirme kita nagabayaw, posible magbatyag ang nagadumala nga dapat gid niya kita tuksuon liwat bisan wala pa nakakomento ang iban. Bangod sini, posible nga madulaan sing gana ang iban nga magbayaw.—Man. 3:7.

15. (a) Ano ang indi naton paghunahunaon kon wala kita natuksuan? (b) Paano mapakita sang nagadumala sang pagtinuon ang konsiderasyon sa tanan nga tumalambong? (Tan-awa ang kahon nga “ Kon Ikaw ang Nagadumala.”)

¹⁵ Mahimo nga gusto naton nga magkomento  sing madamo nga beses sa tion sang pagtinuon, pero indi ini posible kon madamo nga utod ang nagabayaw. May mga tion pa gani nga posible indi kita matuksuan. Kon matabo ini, posible nga masubuan kita. Pero indi naton dapat paghunahunaon nga ginhungod sang nagadumala nga indi kita pagtuksuon.—Man. 7:9.

16. Paano naton mapalig-on ang iban nga nagkomento?

¹⁶ Kon indi posible nga makakomento ka sang madamo nga beses bisan pa gusto mo pa kuntani magkomento, tilawi nga pamatii sing maayo ang komento sang iban kag pasalamati sila pagkatapos sang miting. Kon pasalamatan mo ang mga kauturan sa ila komento, mapalig-on mo gid sila nga daw pareho lang nga nabatian nila ang gusto mo ikomento. (Hulu. 10:21) Ang pagpasalamat isa man ka paagi para mapalig-on naton ang isa kag isa.

17. (a) Paano mabuligan sang mga ginikanan ang ila kabataan nga makahanda sang komento base sa ila edad? (b) Suno sa video, ano ang apat ka butang nga puede naton himuon kon nagahanda kita sang komento? (Tan-awa ang footnote.)

¹⁷ Paano pa naton mapalig-on ang isa kag isa sa aton mga miting? Kon isa ikaw ka ginikanan, buligi ang imo mga bata nga makahanda sang ila komento base sa ila edad. (Mat. 21:16) Kon kaisa, ginabinagbinag ang parte sa serioso nga mga butang pareho sang problema sa pag-asawahay ukon mga prinsipio parte sa husto kag sala,  pero posible nga may parapo gid nga puede makakomento ang imo mga bata. Ipaintiende man sa imo mga bata nga kon magbayaw sila, posible nga indi sila ang tuksuon. Kon himuon mo ini, mabuligan mo sila nga indi sila maluyahan sang buot kon iban ang tuksuon.—1 Tim. 6:18. d

18. Paano naton malikawan nga magpokus sa aton kaugalingon kon nagakomento kita? (Hulubaton 27:2)

¹⁸ Tanan kita puede makahanda sang komento nga makadayaw kay Jehova kag makapalig-on sa aton mga kauturan. (Hulu. 25:11) Kon kaisa, puede naton isugid sing malip-ot ang aton eksperiensia, pero indi kita dapat magpokus sa aton kaugalingon. (Basaha ang Hulubaton 27:2; 2 Cor. 10:18) Sa baylo, dapat naton tinguhaan nga nakapokus ini kay Jehova, sa iya Pulong, kag sa iya katawhan. (Bug. 4:11) Siempre kon personal ang pamangkot, dapat personal man ang aton sabat. Ang isa ka halimbawa sini amo ang pamangkot sa masunod nga parapo.

19. (a) Ano ang resulta kon magpakita kita sing konsiderasyon sa tanan nga tumalambong? (Roma 1:11, 12) (b) Ano gid ang naapresyar mo parte sa pagkomento sa mga miting?

¹⁹ Wala kita sing estrikto nga kasuguan parte sa pagkomento, pero dapat naton tanan tinguhaan nga mapalig-on ang isa kag isa. Para mahimo ini, posible nga kinahanglan naton magkomento sing pila ka beses. Ukon posible man nga kon nakakomento na kita, kinahanglan naton hatagan sang tsansa nga makakomento ang iban kay nalipay kita nga mabatian ang ila mga komento. Kon unahon naton ang kaayuhan sang iban sa aton mga miting, malipay gid kita tanan nga “makapalig-unay.”—Basaha ang Roma 1:11, 12.