1. Ano ang espirituwal nga paraiso, kag ano ang determinado naton nga himuon?

 MAY isa ka paraiso subong sa duta nga may ara minilyon ka tawo nga masako nga nagahimo sing maayo nga mga butang. Malipayon gid sila sa sini nga paraiso bangod nabatyagan nila ang matuod nga paghidait. Pinasahi gid ang ila kahimtangan, gani determinado gid sila nga indi maggua sa sini. Gusto man nila nga mas madamo pa gid nga tawo ang mag-upod sa ila. Ano ini nga paraiso? Ginatawag ini nga espirituwal nga paraiso. a

2. Ngaa tumalagsahon ang espirituwal nga paraiso?

² Tumalagsahon gid ang pagtuga ni Jehova sing isa ka malaragwayon nga lugar. Kay man, may paghidait kag nahiusa ang iya katawhan nga ara diri bisan pa nga nagakabuhi sila sa malain kag makatalagam nga kalibutan ni Satanas nga puno sing mga tawo nga nagadinumtanay. (1 Juan 5:19; Bug. 12:12) Makita sang aton mahigugmaon nga Dios ang indi maayo nga epekto sining sistema sang mga butang sa mga tawo, gani ginaamligan niya kita para padayon naton sia nga maalagad sing malipayon. Ginalaragway sang iya Pulong ang espirituwal nga paraiso bilang isa ka lugar nga “mapasilungan” kag “hardin nga nabunyagan sing maayo.” (Isa. 4:6; 58:11) Ginapakamaayo ni Jehova ang mga nagaistar sa sini nga paraiso, gani malipayon sila bisan pa sa sining mabudlay nga katapusan nga mga adlaw.​—Isa. 54:14; 2 Tim. 3:1.

3. Paano natuman ang Isaias kapitulo 65 sang una?

³ Paagi kay manalagna Isaias, ginlaragway ni Jehova ang mangin kabuhi sang mga magaistar sa espirituwal nga paraiso. Mabasa mo ini sa Isaias kapitulo 65. Ang una nga katumanan sini natabo sang 537 B.C.E. Sadto nga tion, ginhilway sa pagkabihag sa Babilonia ang naghinulsol nga mga Judiyo kag nagbalik sila sa ila pungsod.  Ginpakamaayo ni Jehova ang iya katawhan kag ginbuligan niya sila para mapatahom nila liwat ang naguba nga siudad sang Jerusalem. Ginbuligan man niya sila sa pagkay-o sang templo nga amo ang sentro sang matuod nga pagsimba sa Israel.​—Isa. 51:11; Zac. 8:3.

4. Paano natuman ang Isaias kapitulo 65 sa aton tion subong?

⁴ Ang ikaduha nga katumanan sang tagna ni Isaias nagsugod sang 1919 C.E. sang ginhilway ang mga alagad ni Jehova sa ila pagkabihag sa Babilonia nga Daku. Pagkatapos sini, amat-amat nga naglapad ang espirituwal nga paraiso sa bilog nga duta. Nagporma sang madamo nga kongregasyon ang mapisan nga mga manugbantala sang Ginharian kag ginpakita nila ang diosnon nga mga kinaiya. Ang mga lalaki kag mga babayi nga bayolente kag imoral sadto ‘nagsuklob na sang bag-o nga personalidad nga gintuga suno sa kabubut-on sang Dios.’ (Efe. 4:24) Ang madamo nga pagpakamaayo nga ginlaragway ni Isaias literal nga matuman sa bag-ong kalibutan sa palaabuton. Pero bisan subong pa lang, madamo na kita sing pagpakamaayo bangod ara kita sa espirituwal nga paraiso. Binagbinagon naton kon ano ini nga mga pagpakamaayo kag kon ngaa indi gid kita dapat maggua sa espirituwal nga paraiso.

ANG GINABATYAG SANG MGA ARA SA ESPIRITUWAL NGA PARAISO

5. Base sa promisa sa Isaias 65:​13, ano ang pagpakamaayo bangod ara kita sa espirituwal nga paraiso?

⁵ Mapagros kag naumpawan. Ginapakita sang tagna ni Isaias ang daku nga kinalain sa kabuhi sang mga ara sa sulod sang espirituwal nga paraiso kag sa kabuhi sang mga ara sa gua. (Basaha ang Isaias 65:13.) Bugana nga ginahatag ni Jehova ang espirituwal nga mga kinahanglanon sang iya mga alagad. Ara ang iya balaan nga espiritu, ang iya Pulong, kag ang bugana nga espirituwal nga pagkaon. Gani ‘nagakaon kita, nagainom, kag nagasinadya.’ (Ipaanggid ang Bugna 22:17.) Pero lain gid ang kahimtangan sang mga ara sa gua sang espirituwal nga paraiso. ‘Ginagutom sila, ginauhaw, kag nahuy-an’ kon parte sa ila espirituwal nga mga kinahanglanon.​—Amos 8:11.

6. Paano ginalaragway sang Joel 2:​21-24 ang espirituwal nga pagkaon nga ginahatag ni Jehova, kag paano ini makabulig sa aton?

⁶ Sa tagna ni Joel, gingamit niya ang importante nga mga butang pareho sang uyas, alak, kag lana sang olibo para ipakita nga bugana nga ginahatag ni Jehova ang mga kinahanglanon sang Iya katawhan, lakip na ang espirituwal nga pagkaon. (Joel 2:​21-24) Ginahimo ini ni Jehova paagi sa Biblia kag sa aton mga publikasyon nga nabase sa Biblia, paagi sa aton website, kag paagi man sa aton mga miting, mga asembleya, kag mga kombension. May makaon kita nga espirituwal nga pagkaon adlaw-adlaw, gani mapagros kita sa espirituwal kag nagakaumpawan kita.

7. Ano ang nagahatag sa aton sang “maayo nga kahimtangan sang tagipusuon”? (Isaias 65:14)

⁷ Malipayon kag kontento. ‘Nagasinggit sa kalipay’ ang katawhan sang Dios bangod nagapasalamat gid sila sa iya. (Basaha ang Isaias 65:14.) Ano ang nagahatag sa aton sang “maayo nga kahimtangan sang tagipusuon”? Ang makapalig-on kag makapaumpaw nga mga kamatuoran kag mga promisa sa Pulong sang Dios, kag ang aton malig-on nga paglaum nga nabase sa halad-gawad sang Cristo. Nalipay gid kita kon ginaistorya naton ini nga mga butang sa aton mga kauturan.​—Sal. 34:8; 133:​1-3.

8. Ano ang duha ka importante nga kinaiya nga makita sa espirituwal nga paraiso?

⁸ Ang gugma kag ang paghiusa sang katawhan ni Jehova amo ang duha ka importante nga kinaiya nga makita sa espirituwal nga paraiso. Ginabuligan kita sining “higot sang paghiusa” nga maimadyin ang kabuhi sa bag-ong kalibutan. Didto sa bag-ong kalibutan, mas magabakod pa gid ang gugma kag ang paghiusa sang mga alagad ni Jehova. (Col. 3:14) Ari ang ginsiling sang isa ka sister nga natalupangdan niya sa mga Saksi ni Jehova sang nakilala niya sila sa pinakauna nga  tion: “Indi ako malipayon, kag wala ko ini nabatyagan bisan sa akon pamilya. Sa mga Saksi ni Jehova ko una nga nakita ang matuod nga gugma kay ginapakita gid nila ini sa isa kag isa.” Kon gusto sang isa ka tawo nga mabatyagan ang matuod nga kalipay kag pagkakontento, dapat maeksperiensiahan niya ang aton espirituwal nga paraiso. Gani ano man ang ginahunahuna sini nga kalibutan parte sa aton bilang mga alagad ni Jehova, kabalo kita nga nalipay sia sa aton. Maayo ang aton ngalan, ukon reputasyon, sa pamilya ni Jehova sa bilog nga uniberso.​—Isa. 65:15.

9. Ano ang ginapromisa sang Isaias 65:​16, 17 parte sa mga butang nga nagapaantos sa aton?

⁹ Relaks kag kalmado. Ang Isaias 65:14 nagasiling nga ang mga indi gusto magsulod sa espirituwal nga paraiso ‘nagasinggit bangod sang kasakit sang tagipusuon kag nagahaya sila bangod sang tuman nga kalisod.’ Pero kamusta naman ang tanan nga butang nga nagapabudlay kag nagapaantos sa katawhan sang Dios? Sa ulihi, ‘malipatan na ini kag indi na ini liwat makita sang Dios.’ (Basaha ang Isaias 65:​16, 17.) Gani dulaon ni Jehova ang aton mga problema. Sa ulihi, malipatan na naton ang aton nabatyagan sa sini nga mga problema.

10. Ngaa makasiling ka nga isa ka pagpakamaayo nga makaupod mo ang imo mga kauturan? (Tan-awa man ang piktyur.)

¹⁰ Bisan subong pa lang, makapaumpaw gid kon ara kita sa aton Cristianong mga miting. Kalmado kita sa aton mga miting kay wala kita nagapokus sa mga problema nga nagapa-stress sa aton. Ginabuligan man naton ang aton mga kauturan nga mangin kalmado paagi sa pagpakita sang gugma, kalipay, paghidait, kaayo, kag kalulo nga nalakip sa mga kinaiya nga ginapatubas sang espiritu sang Dios. (Gal. 5:​22, 23) Gani isa gid ka pagpakamaayo nga mangin bahin sang organisasyon sang Dios. Kon magpabilin kita sa espirituwal nga paraiso, makita naton ang pagtuman sang Dios sing bug-os sa iya promisa parte sa “bag-o nga langit kag bag-o nga duta.”

11. Suno sa Isaias 65:​18, 19, ano ang dapat naton mabatyagan bangod gintuga ni Jehova ang espirituwal nga paraiso?

¹¹ Nagapasalamat kag excited. Ginpaathag ni Isaias kon ngaa dapat kita ‘magkasadya kag magkalipay’ bangod sa espirituwal nga paraiso. Kay man, gintuga ni Jehova ini nga kahimtangan. (Basaha ang Isaias 65:​18, 19.) Gani indi katingalahan nga ginagamit kita ni Jehova para buligan ang mga tawo nga maggua sa mga organisasyon sini nga kalibutan nga wala nagatudlo sang kamatuoran. Dayon ginabuligan naton sila nga magsulod sa aton matahom nga espirituwal nga paraiso. Nalipay gid kita sa mga pagpakamaayo nga nabaton naton bangod ara kita sa kamatuoran, gani gusto gid naton nga isugid ini sa iban.​—Jer. 31:12.

12. Ano ang ginabatyag mo parte sa mga promisa nga ginsambit sa Isaias 65:​20-24, kag ngaa?

 ¹² Nagapasalamat man kita kag excited parte sa aton paglaum bilang mga pumuluyo sang espirituwal nga paraiso. Imadyina ang tanan nga puede naton makita kag himuon sa bag-ong kalibutan sang Dios. Ang Biblia nagapromisa: “Wala na . . . sing lapsag nga mabuhi sing pila lang ka adlaw, ukon sing tigulang nga mapaslawan sa pagkabuhi sing bug-os.” “Magapatindog [kita] sing balay kag magapuyo sa sini, kag magatanom [kita] sing mga ulubasan kag magakaon sang bunga sini.” “Indi [kita] magpangabudlay sa wala sing pulos” bangod “[pakamaayuhon kita] ni Jehova.” Nagapromisa sia nga amligan niya kita kag mangin kontento kita kay may katuyuan ang aton kabuhi. “Sa wala pa sila magpanawag,” kabalo na sia sang kinahanglanon sang kada isa kag “[ihatag niya] ang handum sang tagsa ka buhi nga butang.”​—Isa. 65:​20-24; Sal. 145:16.

13. Paano ginalaragway sang Isaias 65:25 ang mga pagbag-o nga ginahimo sang mga tawo kon mag-umpisa sila sa pag-alagad kay Jehova?

¹³ May paghidait kag naamligan. Sa bulig sang espiritu sang Dios, madamo nga tawo nga daw sapat ang batasan ang naghimo sang daku nga pagbag-o sa ila kabuhi. (Basaha ang Isaias 65:25.) Nagpanikasog gid sila para madula nila ang ila indi maayo nga mga kinaiya. (Roma 12:2; Efe. 4:​22-24) Siempre, indi gihapon perpekto ang katawhan sang Dios, gani padayon kita nga makahimo sing mga sala. Pero, gintipon ni Jehova ang “tanan nga sahi sang mga tawo” nga nagahigugma sa iya kag nagahigugmaanay sa isa kag isa. Bangod sini, may paghidait sila kag nahiusa. (Tito 2:11) Isa ini ka milagro nga ang labing gamhanan nga Dios lang ang makahimo.

14. Paano ginapamatud-an sang eksperiensia sang isa ka brother nga matuod ang ginasiling sang Isaias 65:25?

¹⁴ Masarangan gid man bala nga bag-uhon sang mga tawo ang ila personalidad? Binagbinaga ining eksperiensia sang isa ka pamatan-on nga lalaki. Beinte anyos pa lang sia sadto pero pila ka beses na sia nga napriso. Imoral sia kag bayolente katama. Napriso sia bangod nangawat sia sing salakyan, napriso sia bangod nangawat sia sa balay, kag napriso sia bangod sa iban pa nga mabug-at nga mga krimen. Wala gid sia nagaatras sa mga inaway. Sang una niya nga nabatian ang kamatuoran sa Biblia kag sang nag-umpisa sia sa pag-attend sa mga miting sang mga Saksi ni Jehova, nakumbinsi sia nga may katuyuan ang iya kabuhi nga amo ang simbahon si Jehova sa espirituwal nga paraiso. Sang nabawtismuhan sia, pirme niya ginahunahuna nga nangin matuod gid sa iya ang ginasiling sang Isaias 65:25. Daw pareho sia sa isa ka mabangis nga leon sadto, pero daw pareho na sia sa isa ka mabuot nga karnero subong.

15. Ngaa gusto naton nga agdahon ang iban nga mag-upod sa aton sa espirituwal nga paraiso, kag paano naton ini mahimo?

¹⁵ Ang umpisa sang Isaias 65:13 nagasiling: “Amo ini ang ginasiling sang Soberanong Ginuong Jehova.” Ang katapusan sang bersikulo 25 nagasiling sing “siling ni Jehova.” Pirme gid nagakatuman ang ginasiling ni Jehova. (Isa. 55:​10, 11) Nagaluntad na subong ang espirituwal nga paraiso. Nagtuga si Jehova sing isa ka pinasahi gid nga pamilya nga nagasimba sa iya. Bangod bahin kita sang iya pamilya, may matuod kita nga paghidait kag naamligan kita sa sining malain nga kalibutan. (Sal. 72:7) Amo ini ang mga rason kon ngaa gusto naton buligan ang madamo nga tawo para makaupod naton sila sa espirituwal nga paraiso. Mahimo naton ini kon magpokus kita sa pagtudlo sa mga tawo para mangin disipulo sila.​—Mat. 28:​19, 20.

KON PAANO NATON MAPALIG-ON ANG IBAN NGA MAGSULOD SA ESPIRITUWAL NGA PARAISO

16. Ano ang nagapalig-on sa mga tawo nga magsulod sa espirituwal nga paraiso?

¹⁶ May dapat himuon ang kada isa sa aton para mapalig-on ang mga tawo nga magsulod sa espirituwal nga paraiso. Para mahimo naton ang dapat naton himuon, dapat naton ilugon si Jehova.  Wala niya ginapilit ang mga tawo nga magsulod sa iya organisasyon. Sa baylo, ‘ginabuyok’ niya sila sing mainayuhon. (Juan 6:44; Jer. 31:3) Kon matun-an sang sinsero nga mga tawo ang parte sa gugma ni Jehova kag ang iya dalayawon nga mga kinaiya, indi gid nila mapunggan nga magpalapit sa iya. Sa aton bahin, paano makabulig ang aton maayo nga mga kinaiya kag paggawi para mapalig-on ang mga tawo nga magsulod sa espirituwal nga paraiso?

17. Paano naton mapalig-on ang iban nga magsulod sa espirituwal nga paraiso?

¹⁷ Ari ang isa ka paagi para mapalig-on naton ang iban nga magsulod sa espirituwal nga paraiso: Pakitaan naton sang gugma kag kaayo ang aton mga kauturan. Kon may mga bag-uhan nga mag-attend sa aton mga miting, gusto naton nga mabatyagan nila ang ginbatyag sang mga naka-attend sa mga miting sa kongregasyon sa Corinto sang una. Nagsiling sila: “Ang Dios yara gid sa inyo.” (1 Cor. 14:​24, 25; Zac. 8:23) Gani, dapat naton padayon nga tumanon ang laygay nga ‘huptan ang aton paghidait sa isa kag isa.’—1 Tes. 5:13.

18. Ano ang posible magpalig-on sa mga tawo nga magsulod sa aton organisasyon?

¹⁸ Dapat naton pirme panikasugan nga tamdon ang aton mga kauturan suno sa pagtamod ni Jehova sa ila. Mahimo naton ini paagi sa pagpokus sa ila maayo nga mga kinaiya. Indi kita dapat magpokus sa ila mga kakulangan kay madula na ini sa ulihi. Dapat naton solbaron sa mahigugmaon nga paagi ang mga indi pag-intiendihanay. Mahimo naton ini kon pirme kita ‘mangin mainayuhon sa isa kag isa, mangin maluluy-on, nga nagapatawad sing kinabubut-on sa isa kag isa.’ (Efe. 4:32) Kon himuon naton ini, mapalig-on ang mga tawo nga magsulod sa espirituwal nga paraiso kay gusto nila mabatyagan ini nga klase sang pagtratar sa ila. b

 MAGPABILIN SA SULOD SANG ESPIRITUWAL NGA PARAISO

19. (a) Base sa kahon nga “ Naggua Sila kag Nagbalik,” ano ang ginsiling sang iban sang nagbalik sila sa espirituwal nga paraiso? (b) Ano ang dapat naton panikasugan nga himuon? (Tan-awa man ang piktyur.)

¹⁹ Nagapasalamat gid kita nga ara kita sa espirituwal nga paraiso. Mas matahom pa gid ini subong, kag mas madamo pa gid ang nagasimba diri kay Jehova subong. Kabay pa nga padayon naton nga pabaloran ang paraiso nga gintuga ni Jehova para sa aton. Kon gusto sang isa ka tawo nga maumpawan, mangin kontento, mangin kalmado, kag maamligan, dapat sia magsulod sa espirituwal nga paraiso kag indi gid sia dapat maggua sa sini. Pero dapat kita mag-andam bangod ginatinguhaan ni Satanas nga sulayon kita nga maggua sa sini. (1 Ped. 5:8; Bug. 12:9) Indi gid kita dapat magpasulay sa iya. Gani panikasugan gid naton nga amligan ang katahom, katinlo, kag paghidait sang aton espirituwal nga paraiso.