Natawo ako sang 1955, kag ako ang kamanghuran sa tatlo ka lalaki. Nagdaku ako sa lugar nga ginatawag subong nga siudad sang Vantaa, kag malapit ini sa nabagatnan nga baybayon sang Finland.

Nabawtismuhan si Nanay bilang isa sa mga Saksi ni Jehova mga pila ka tuig antes ako natawo. Pero, isa ka opposer si Tatay. Indi gusto ni Tatay nga tudluan kami ni Nanay nga mag-ulutod parte sa Biblia, kag indi niya gusto nga dal-on kami ni Nanay sa mga miting sang kongregasyon. Gani ginatudluan kami ni Nanay sang panguna nga mga kamatuoran sa Biblia kon wala si Tatay.

Halin sang bata pa ako, ginatuman ko gid si Jehova. Halimbawa, isa ka bes sang siete anyos ako, naakig ang akon maestra bangod indi ako magkaon sing verilättyjä (pancake sa Finland nga ginbutangan sing dugo). Gani, ginpisga niya ang akon guya para magnganga ako. Dayon, ginpilit niya nga idasok sa akon baba ang tinidor nga may pancake. Maayo lang kay natapi ko ang tinidor kag nabuy-an niya ini.

Sang 12 anyos ako, napatay si Tatay. Gani, maka-attend na ako sa mga miting sang kongregasyon. Ginpakitaan ako sing kaayo sang mga brother sa kongregasyon, kag nakabulig ini sa akon nga mangin suod pa gid kay Jehova. Ginsugdan ko ang pagbasa sang Biblia adlaw-adlaw kag gintun-an ko sing maayo ang aton mga publikasyon. Nakabulig ini sa akon nga mag-uswag. Nabawtismuhan ako sang Agosto 8, 1969 sa edad nga 14.

 Sang naggradweyt ako, nagregular payunir ako. Pagligad sang pila ka semana, nagsaylo ako sa Pielavesi nga malapit sa sentro sang Finland bangod nagakinahanglan didto sang dugang nga manugbantala.

Sa Pielavesi ko nakilala ang akon pinalangga nga asawa nga si Sirkka. Naluyag ako sa iya bangod mapainubuson sia kag palangga gid niya si Jehova. Wala niya gintinguhaan nga mangin bantog ukon mangin manggaranon. Pareho kami nga gusto gid nga mag-alagad kay Jehova sa bug-os namon nga masarangan, kag handa namon nga batunon ang bisan ano man nga asaynment. Nagpakasal kami sang Marso 23, 1974. Imbes nga mag-honeymoon, nagsaylo kami sa Karttula bangod mas kinahanglan pa gid didto ang dugang nga manugbantala.

Sugod sang nag-asawahay kami, ginpamatud-an ni Jehova nga amanan gid niya kami sang amon materyal nga mga kinahanglanon basta unahon namon ang pagpangita sa iya Ginharian. (Mat. 6:33) Halimbawa, sang ara kami sa Karttula, wala kami sang salakyan. Sang primero, bisikleta ang amon ginagamit sa pagbiyahe. Pero kon tigtulugnaw, grabe katugnaw sang tiempo. Para mabantalaan namon ang malapad nga teritoryo sang amon kongregasyon, kinahanglan namon sang salakyan. Pero wala kami sing kuarta para ibakal sang salakyan.

Wala ko ginpaabot nga bisitahan kami sang akon magulang. Nagsiling sia nga ihatag niya sa amon ang iya awto. Nabayran na niya ang insurance sang awto, gani ang inugtughong na lang ang amon problemahon. Sugod sadto, may salakyan na kami nga kinahanglan gid namon.

Ginpakita sa amon ni Jehova nga indi namon dapat pagproblemahon ang amon materyal nga mga kinahanglanon kay sia na ang bahala sa sini. Ang amon responsibilidad amo ang pag-una sa iya Ginharian.

Samtang nagaeskwela kami sa Pioneer Service School sang 1978, ginpalig-on kami ni Raimo Kuokkanen a nga isa sa amon mga instruktor nga mag-aplay sa Gilead School. Gani nag-umpisa kami sa pagtuon sing English para makalipikar kami sa Gilead School. Pero sang 1980, antes kami makaaplay, gin-agda kami nga mag-alagad sa branch office sa Finland. Sadto nga tion, indi makaaplay sa Gilead ang mga Bethelite. Pero handa kami nga mag-alagad kay Jehova bisan diin. Bisan pa may  gusto kami nga pribilehiyo, kumbinsido kami nga kabalo si Jehova kon ano ang pinakamaayo nga pribilehiyo para sa amon. Gani ginbaton namon ang pangagda nga mag-alagad sa Bethel. Pero padayon kami nga nagtuon sing English kay basi may kahigayunan kami nga makaaplay sa Gilead sa ulihi.

Pagligad sang pila ka tuig, nagdesisyon ang Nagadumala nga Hubon nga puede na makaaplay sa Gilead ang mga Bethelite. Ginpil-apan namon dayon ang application form para sa Gilead. Ginhimo namon ini indi bangod wala kami nalipay sa Bethel. Ang matuod, nalipay gid kami sa Bethel. Gusto lang namon ipakita nga handa kami mag-alagad sa lugar nga mas daku ang kinahanglanon. Nabaton kami sa Gilead kag nag-eskwela kami sa ika-79 nga klase. Naggradweyt kami sang Septiembre 1985, kag ang amon asaynment amo ang Colombia.

Ang amon una nga asaynment sa Colombia amo ang mag-alagad sa branch office. Ginhimo ko ang akon bug-os nga masarangan sa akon asaynment. Pero pagligad sang isa ka tuig, nahunahuna ko nga mas maayo siguro kon may bag-o kami nga asaynment. Gani nangabay ako sang lain nga asaynment. Isa ka beses ko lang gid ini ginhimo sa bilog ko nga kabuhi. Gani gin-asayn kami bilang mga misyonero sa siudad sang Neiva, sa rehiyon sang Huila.

Nanamian gid ako magbantala. Sang soltero pa ako kag nagapayunir ako sa Finland, may mga tion nga aga pa ako nagaumpisa sa pagbantala asta nga maggab-i na gid. Sang nag-asawahay kami ni Sirkka, bilog nga adlaw man kami nga nagabantala. Kon layo ang amon teritoryo, may mga tion nga nagatulog kami sa amon awto. Paagi sa sini, temprano kami makaumpisa sa pagbantala pagkasunod nga adlaw kay indi na kami magbiyahe sing malayo.

Bilang mga misyonero, excited gid kami magbantala. Pareho ini sa nabatyagan namon sadto sang nagapayunir kami. Nag-uswag gid ang amon kongregasyon. Matinahuron, mahigugmaon, kag mapinasalamaton ang mga kauturan sa Colombia.

May mga banwa nga indi man gid masyado malayo halin sa Neiva ang wala sing mga Saksi. Nabalaka gid ako kon paano makalab-ot ang maayong balita sa sini nga mga lugar. Pero bangod sa mga rebelde, delikado ini nga mga lugar para sa mga indi tumandok didto. Gani nangamuyo ako nga kabay pa nga may mag-Saksi nga taga-didto. Nahunahuna ko nga para matun-an sini nga tawo ang kamatuoran, dapat sia mag-istar sa Neiva. Gani nangamuyo man ako nga kon mabawtismuhan na ini nga tawo, kabay pa nga maghamtong sia kag magbalik sia sa ila banwa para magbantala. Pero siempre, may mas maayo nga solusyon si Jehova.

Wala madugay pagkatapos sini, na-Bible study ko ang isa ka pamatan-on nga si Fernando González nga taga-Algeciras. Isa ini sa mga banwa nga wala sing Saksi. Kada semana, nagabiyahe sia sing sobra 50 ka kilometro pakadto sa Neiva para mag-obra. Ginahandaan gid niya sing maayo ang amon pagtuon kag nag-umpisa sia dayon sa pag-attend sa tanan nga miting. Halin sang nag-umpisa si Fernando sa pag-study, ginatipon niya ang iban sa ila banwa para tudluan sila sang iya mga natun-an sa Biblia.

Pagligad sang anom ka bulan sugod sang nag-Bible study si Fernando, nabawtismuhan sia sang Enero 1990. Dayon, nagregular payunir sia. Bangod may isa na ka Saksi nga tumandok sang  Algeciras, puede na makapadala ang branch office sing mga espesyal payunir sa sini nga lugar. Sang Pebrero 1992, may naporma nga kongregasyon sa sini nga banwa.

Sa ila lang bala banwa nagbantala si Fernando? Indi. Pagkatapos niya magpangasawa, nagsaylo sila sang iya asawa sa San Vicente del Caguán. Isa man ini sa mga banwa nga wala sing Saksi. Nakabulig sila nga maporma ang kongregasyon didto. Sang 2002, gintangdo si Fernando bilang circuit overseer. Nagapadayon sia kag ang iya asawa, nga si Olga, sa sini nga asaynment asta subong.

Natun-an ko sa sini nga eksperiensia nga importante gid nga espesipiko naton nga ipangamuyo ang mga butang nga may labot sa aton asaynment sa pag-alagad. Si Jehova ang nagahimo sang indi naton masarangan. Kay man, iya ini alanyon, indi ini aton.​—Mat. 9:38.

Sang 1990, gin-asayn kami nga mag-alagad sa sirkito. Sakop sang Bogotá, nga amo ang kapital nga siudad, ang amon una nga asaynment. Nahunahuna namon nga indi namon masarangan ang amon asaynment. Ordinaryo lang kami nga mga tawo kag wala kami sing pinasahi nga mga ikasarang. Kag wala kami naanad sa kabuhi sa daku nga siudad. Pero, gintuman ni Jehova ang iya promisa sa Filipos 2:13: “Ang Dios amo ang isa nga nagapapagsik sa inyo, nga nagahatag sa inyo sang handum kag kusog nga himuon kon ano ang iya nahamut-an.”

Sang ulihi, gin-asayn kami sa sirkito sa lugar sang Medellín. Amo ini ang siudad nga ginsambit ko sa umpisa. Naanad na sa kinagamo ang mga tawo diri amo nga daw wala na lang ini sa ila. Halimbawa, samtang gina-Bible study ko ang isa ka lalaki, may nagtiniruhay sa gua sang iya balay. Mahapa na ’ko kuntani sa salog, pero kalmado lang nga ginpadayon sang Bible study ang pagbasa sang parapo. Pagkatapos niya basa, nagsiling sia nga magua sia anay. Pagbalik niya, may upod na sia nga duha ka bata kag kalmado lang sia nga nagsiling, “Pasensia gid, pero kinahanglan ko pasudlon ang akon mga bata.”

May iban pa nga mga tion nga nabutang sa peligro ang amon kabuhi. Isa ka bes samtang nagapamalaybalay kami, nagapalanglapsi nga nagadalagan pakadto sa akon ang akon asawa. Nagsiling sia nga may nagtiro kuno sa iya. Kinulbaan gid ako. Pero sang ulihi, narealisar namon nga indi gali sia ang gusto tiruhon sang isa ka tawo, kundi ang isa ka lalaki nga naglabay malapit kay Sirkka.

Sang ulihi, medyo naanad naman kami sa mga kinagamo. Napalig-on gid kami sa kabakod sang tumandok nga mga Saksi. Sobra pa sa amon naeksperiensiahan ang naeksperiensiahan sang iban sa ila. Nahunahuna namon nga ginabuligan sila ni Jehova, gani buligan man niya kami. Pirme namon ginasunod ang mga laygay sang tumandok nga mga gulang kag pirme kami nagahalong. Wala kami masyado nabalaka kay nagasalig gid kami kay Jehova.

Pero, indi man puro peligro lang ang amon naeksperiensiahan. Isa ka bes, nabatian ko nga daw may duha ka babayi nga nagabaisay sa gua sang balay nga akon ginabisitahan. Indi ako interesado nga tan-awon kon sin-o ang nagabaisay, pero ginhagad ako sang tagbalay sa balkon sang iya balay. Nakita ko didto nga duha gali ka pikoy ukon parrot ang daw nagabaisay kay ginailog nila ang mabatian nila sa ila mga kaingod.

Sang 1997, gintangdo ako nga mangin instruktor sa Ministerial Training School. b Nanamian gid ako mag-eskwela sa mga eskwelahan sang organisasyon. Pero wala ko gid mahunahuna nga mangin instruktor ako sa isa sa sini nga mga eskwelahan. Kanami gid sini nga pribilehiyo.

Sang ulihi, nag-alagad ako bilang district overseer. Sang gin-untat ini nga asaynment, nagbalik ako sa pag-alagad bilang circuit overseer. Gani sa sulod sang sobra 30 ka tuig, nakapribilehiyo ako nga mag-alagad bilang instruktor kag traveling overseer. Madamo gid nga pagpakamaayo ang ginhatag sa akon sini nga mga asaynment. Pero, nakaeksperiensia man ako sang mga kabudlayan. Ipaathag ko kon ngaa.

Kon may ginhimo ako nga desisyon, ginapanindugan ko gid ini. Nakabulig sa akon ini nga kinaiya nga masarangan ang mabudlay nga mga sitwasyon. Pero may mga tion nga gusto ko nga bag-uhon dayon ang mga dapat bag-uhon sa mga kongregasyon. May mga tion nga prangka ko nga ginlaygayan ang iban nga kauturan nga dapat sila mangin mahigugmaon kag makatarunganon. Pero ang matuod, ako ang dapat magpakita sini nga mga kinaiya.​—Roma 7:​21-23.

Bangod sang akon mga kaluyahon, may mga tion nga grabe gid ang pagluya sang akon buot. (Roma 7:24) Isa ka bes, nangamuyo ako kay Jehova kag ginsiling ko sa iya nga mas maayo nga mauntat na lang ako sa pag-alagad bilang misyonero kag mabalik na lang ako sa Finland. Sadto nga gab-i, nag-attend ako sa miting sang kongregasyon. Napalig-on gid ako sa akon nabatian sa miting, gani nakumbinsi ako nga dapat ako magpabilin sa akon asaynment kag dapat ko panikasugan nga dulaon ang akon mga kaluyahon. Sa kada tion nga madumduman ko kon paano ginsabat ni Jehova ang akon pangamuyo, nagapalig-on gid ini sa akon. Kag ginapasalamatan ko gid sia kay ginbuligan niya ako nga madula ang akon mga kaluyahon.

Gingamit namon ni Sirkka ang halos bilog namon nga kabuhi sa bug-os tion nga pag-alagad, kag nagapasalamat gid kami kay Jehova sa sini nga pribilehiyo. Daku man ang pagpasalamat ko kay Jehova kay ginhatagan niya ako sang mahigugmaon kag matutom nga asawa.

Lapit na lang ako mag-70 anyos kag magauntat na ako sa pag-alagad bilang field instructor kag circuit overseer. Pero wala ako nasubuan. Ngaa? Bangod kumbinsido ako nga ang pinakaimportante kay Jehova amo ang alagaron naton sia sing mapainubuson kag dayawon naton sia sing tinagipusuon. Dapat naton ipakita sa iya nga palangga gid naton sia kag dapat naton sia pirme pasalamatan. (Miq. 6:8; Mar. 12:​32-34) Para mapadunggan naton si Jehova, indi kinahanglan nga may ara gid kita importante nga asaynment.

Kon panumdumon ko ang mga asaynment nga akon nabaton, narealisar ko nga nabaton ko ini indi bangod mas maayo ako sangsa iban ukon bangod may pinasahi ako nga ikasarang. Sa baylo, ginhatag sa akon ni Jehova ini nga mga asaynment bangod ginapakitaan niya ako sang iya wala tupong nga kaayo. Ginhatagan niya ako sini nga mga pribilehiyo bisan pa may mga kaluyahon ako. Kumbinsido ako nga nasarangan ko ini nga mga asaynment bangod ginbuligan ako ni Jehova. Gani, makita sa akon mga kaluyahon nga ginapabakod ako sang Dios.​—2 Cor. 12:9.