1. Ano ang ginabatyag sang iban parte sa pagbantala? (Tan-awa man ang piktyur.)

 BILANG katawhan ni Jehova, ginabantalaan naton ang iban bangod palangga naton ang aton Amay sa langit kag gusto naton sila buligan nga makilala sia. Madamo nga manugbantala ang nalipay gid magbantala. Pero may iban nga daw wala nalipay sa sini nga hilikuton. Ngaa? May iban nga mahuluy-on kag kulang sing kompiansa. May iban nga nasaw-ahan magkadto sa mga balay sang indi nila kilala. May iban nga nahadlok kay basi akigan sila sang ila bantalaan. Kag gintudluan naman ang iban nga likawan nila nga makigbais. Bisan pa palangga gid sang sini nga mga kauturan si Jehova, nabudlayan sila nga isugid sa mga tawo nga indi nila kilala ang parte sa maayong balita. Pero, regular sila nga nagabantala bangod kabalo sila nga importante gid ini nga hilikuton. Sigurado nga nalipay gid si Jehova sa ila.

2. Kon daw wala ka nalipay sa pagbantala, ngaa indi ka dapat maluyahan sang buot?

² May mga tion bala nga daw wala ka nalipay sa pagbantala bangod sa nasambit nga mga rason? Kon huo, indi ka dapat maluyahan sang buot. Kon kulang ang imo kompiansa, posible ginapakita sini nga mapainubuson ka kag indi mo gusto ang sobra nga atension. Ginapakita man sini nga indi mo gusto makigbais sa mga tawo. Kag indi gid naton gusto nga akigan kita, ilabi na kay para man sa kaayuhan sang mga tawo ang aton ginahimo. Kabalo ang imo Amay sa langit sang imo ginabatyag kag gusto ka gid niya buligan. (Isa. 41:13) Sa sini nga artikulo, binagbinagon naton ang lima ka panugda nga makabulig sa imo nga masarangan ang imo ginabatyag para mangin mas malipayon ka sa imo pagbantala.

 PABAKURA ANG IMO KAUGALINGON PAAGI SA PULONG SANG DIOS

3. Ano ang nakabulig kay manalagna Jeremias nga bantalaan ang iban?

³ Halin pa sang una, ang mensahe sang Dios amo ang nagapabakod sa iya mga alagad kon may mabudlay sila nga asaynment. Binagbinaga ang halimbawa ni manalagna Jeremias. Sang ginhatagan sia ni Jehova sing asaynment nga magbantala, daw indi niya ini pagbatunon. Nagsiling si Jeremias: “Indi ako makahibalo kon ano ang ihambal ko, kay bata pa ako.” (Jer. 1:6) Ano ang nakabulig sa iya para madaug niya ang iya kakulang sing kompiansa? Napabakod sia sa ginsiling ni Jehova sa iya. Nagsiling si Jeremias: “Nangin pareho ini sang kalayo nga nagadabdab sa akon mga tul-an, kag ginkapoy ako sa pagpugong sini.” (Jer. 20:​8, 9) Gani bisan pa mabudlay ang teritoryo ni Jeremias, ang mensahe nga dapat niya ibantala amo ang nagpabakod sa iya nga tumanon ang iya asaynment.

4. Ano ang epekto sa aton kon ginabasa naton ang Pulong sang Dios kag ginapamalandungan ini? (Colosas 1:​9, 10)

⁴ Ang mga ginsiling ni Jehova nga mabasa sa Biblia amo ang nagapabakod sa mga Cristiano. Sang ginsulatan ni apostol Pablo ang kongregasyon sa Colosas, nagsiling sia nga ang pagkuha sing ihibalo amo ang magapalig-on sa iya mga kauturan nga “maglakat nga takus kay Jehova” samtang padayon sila nga “nagapamunga sa tagsa ka maayong buhat.” (Basaha ang Colosas 1:​9, 10.) Nalakip sa maayong buhat ang pagbantala sang maayong balita. Gani kon ginabasa naton ang Pulong sang Dios kag ginapamalandungan ini, nagabakod ang aton pagtuo kay Jehova kag mas nagaathag sa aton kon ngaa importante gid nga ibantala naton ang iya Ginharian.

5. Ano ang himuon naton para makabenepisyo kita sa aton pagbasa kag pagtuon sang Biblia?

⁵ Para makabenepisyo kita sa aton pagbasa kag pagtuon sang Pulong sang Dios, indi kita dapat magdali sa aton pagbasa, pagtuon, kag pagpamalandong sa sini. Sa baylo, hatagan naton ini sing bastante nga tion. Kon nabudlayan ka nga hangpon ang ginbasa mo nga teksto, i-research ini dayon. Gamita ang Giya sa Pagtuon Para sa mga Saksi ni Jehova ukon ang iban pa nga mga gamit sa pag-research para pangitaon ang paathag sa sini nga teksto. Kon wala ka nagadali sa imo pagtuon, mas magabakod ang imo pagsalig nga matuod gid ang ginasiling sang Pulong sang Dios. (1 Tes. 5:21) Kon mas kumbinsido ka sa imo natun-an, mangin mas malipayon ka sa pagsugid sini sa iban.

 HANDAI SING MAAYO ANG IMO PAGBANTALA

6. Ngaa dapat naton handaan sing maayo ang aton pagbantala?

⁶ Kon handaan mo sing maayo ang imo pagbantala, mabuhinan ang imo kulba sa pag-istorya sa mga tawo. Ginbuligan ni Jesus ang iya mga disipulo nga maghanda antes niya sila ginpalakat para magbantala. (Luc. 10:​1-11) Bangod gin-aplikar nila ang gintudlo sa ila ni Jesus, nalipay gid sila sa nasarangan nila nga himuon.​—Luc. 10:17.

7. Paano naton handaan ang aton pagbantala? (Tan-awa man ang piktyur.)

⁷ Paano naton handaan ang aton pagbantala? Dapat naton handaan kon paano naton isugid ang kamatuoran sa aton kaugalingon nga mga tinaga. Makabulig man kon hunahunaon naton ang duha ukon tatlo ka kinaandan nga reaksion sang mga tawo sa aton teritoryo, kag dayon handaan naton kon ano ang aton isiling sa kada reaksion. Kag kon nagaistorya kita sa aton ginabantalaan, dapat magrelaks kita, magyuhum, kag mangin mainabyanon.

8. Ano ang pagkaanggid sang mga Cristiano kag sang mga suludlan nga daga nga ginsambit ni apostol Pablo sa iya ilustrasyon?

⁸ Parte sa aton pagbantala, naggamit si apostol Pablo sing isa ka ilustrasyon. Nagsiling sia: “May yara kami sini nga bahandi sa mga suludlan nga daga.” (2 Cor. 4:7) Ano ini nga bahandi? Nagapatuhoy ini sa hilikuton nga makaluwas sing kabuhi nga amo ang pagbantala parte sa Ginharian. (2 Cor. 4:1) Ano ang mga suludlan nga daga? Nagarepresentar ini sa mga alagad sang Dios nga nagasugid sang maayong balita sa iban. Sang panahon ni Pablo, ginagamit sang mga negosyante ang mga suludlan nga daga para sudlan sang importante nga mga butang, pareho sang pagkaon, alak, kag kuarta. Sing kaanggid, gintugyan sa aton ni Jehova ang importante nga mensahe sang maayong balita. Gani buligan kita ni Jehova kag hatagan niya kita sing kusog para makapadayon kita sa pagbantala.

MANGAMUYO SING KAISOG

9. Paano naton madaug ang kahadlok sa tawo ukon ang kahadlok nga basi indi kita pagpamatian sang aton bantalaan? (Tan-awa man ang piktyur.)

⁹ Kon kaisa, posible makabatyag kita sang kahadlok sa tawo ukon sang kahadlok nga basi indi kita pagpamatian sang aton bantalaan. Paano naton ini madaug? Binagbinaga ang ginpangamuyo sang mga apostoles sang ginmanduan sila nga mag-untat sa pagbantala. Imbes nga mahadlok, nangabay sila kay Jehova nga buligan sila para ‘padayon nila nga mabantala ang iya pulong  nga may daku nga kaisog.’ Ginsabat dayon ni Jehova ang ila pangamuyo. (Binu. 4:​18, 29, 31) Kon nagakaapektuhan ang aton pagbantala bangod sa kahadlok sa tawo, dapat man kita mangamuyo kay Jehova para magpabulig sa iya. Pangabaya si Jehova nga buligan ka niya nga pabakuron ang imo pagpalangga sa mga tawo para madaug mo ang imo kahadlok sa ila.

10. Paano kita ginabuligan ni Jehova para mahimo naton ang aton responsibilidad bilang iya mga Saksi? (Isaias 43:​10-12)

¹⁰ Gintangdo kita ni Jehova bilang iya mga Saksi, kag nagpromisa sia nga buligan niya kita nga mangin maisog. (Basaha ang Isaias 43:​10-12.) Binagbinaga ang apat ka paagi nga ginahimo niya ini. Una, kaupod naton si Jesus sa kada tion nga ginabantala naton ang maayong balita. (Mat. 28:​18-20) Ikaduha, nagtangdo si Jehova sang mga anghel para buligan kita. (Bug. 14:6) Ikatlo, ginhatag sa aton ni Jehova ang iya balaan nga espiritu para buligan kita nga madumduman ang aton mga natun-an. (Juan 14:​25, 26) Ikap-at, ginhatagan kita ni Jehova sang mga kauturan para mangin kaupod naton. Sa bulig ni Jehova kag sang aton mahigugmaon nga mga kauturan, masarangan naton nga mangin maisog kag magpadayon sa pagbantala.

MANGIN FLEXIBLE KAG POSITIBO

11. Ano ang puede mo himuon para mas madamo nga tawo ang imo maistorya sa imo pagbantala? (Tan-awa man ang piktyur.)

¹¹ Kon nagabantala ka kag pila lang ka balay ang may tawo, nagaluya bala ang imo buot? Pamangkuta ang imo kaugalingon: ‘Kon wala sing mga tawo ang kalabanan nga balay sa amon teritoryo, diin ayhan sila subong?’ (Binu. 16:13) ‘Ara bala sila sa ila ulubrahan ukon naglakat bala sila kay may baklon sila?’ Kon wala sila sa ila balay, indi ayhan mas madamo ang imo mabantalaan kon magpanaksi ka sa dalan? Ang isa ka brother nga si Joshua nagsiling, “Madamo ako sing mabantalaan kon nagalakatlakat ako sa lugar nga madamo sing balaligyaan kag sa pangpubliko nga mga lugar.” Natalupangdan man niya kag sang iya asawa nga si Bridget nga mas madamo nga tawo ang ara sa ila balay kon sirom na kag kon Domingo sang hapon.​—Efe. 5:​15, 16.

12. Ano ang puede naton himuon para mabal-an naton ang mga ginapatihan ukon ginakabalak-an sang aton ginabantalaan?

¹² Kon indi interesado ang mga tawo sa maayong balita, tinguhai nga hibalua kon ano ang ila mga ginapatihan ukon ginakabalak-an.  Ginagamit ni Joshua kag ni Bridget ang pamangkot sa una nga pahina sang aton mga tract bilang ila introduksion. Halimbawa, ginagamit nila ang tract nga Ano ang Biblia Para sa Imo? kag nagasiling sila: “Para sa iban, ang Biblia isa ka libro nga halin sa Dios. May iban naman nga wala nagapati sa sini. Ano ’ya ang imo opinyon parte sa sini?” Sa masami, nagaresulta ini sa maayo nga pag-istoryahanay.

13. Ngaa masiling naton nga madinalag-on kita sa aton pagbantala bisan pa indi mamati sa aton ang aton mga ginabantalaan? (Hulubaton 27:11)

¹³ Bisan pa indi mamati sa aton ang aton mga ginabantalaan, madinalag-on gihapon kita. Ngaa? Bangod gintuman naton ang ginsugo sa aton ni Jehova kag sang iya Anak nga magpanaksi. (Binu. 10:42) Bisan pa wala gid sing may mamati sa aton ukon bisan pa indi pagbatunon sang aton ginabantalaan ang maayong balita, nalipay kita gihapon bangod kabalo kita nga nalipay sa aton ang aton Amay sa langit.​—Basaha ang Hulubaton 27:11.

14. Ngaa dapat kita malipay kon makakita sing interesado ang iban nga manugbantala?

¹⁴ Dapat man kita malipay kon makakita sing interesado ang iban nga manugbantala. Suno sa Ang Lalantawan, ang aton hilikuton daw pareho sa pagpangita sa isa ka bata nga nadula. Madamo nga tawo ang nagabulig sa pagpangita sa bata sa isa ka lugar. Kon indi nila sia makita, masaylo naman sila sa iban nga lugar. Kon makita ang bata, indi lang ang nakakita sa iya ang malipay kundi ang tanan nga nagbulig para makita sia. Sing kaanggid, kinahanglan ang bulig sang tanan sa kongregasyon para tudluan ang mga tawo nga mangin disipulo ni Jesus. Kinahanglan ang bulig sang tanan para matuptupan ang teritoryo sang kongregasyon. Gani nalipay ang tanan kon magtambong na sa miting ang isa ka interesado.

MAGPOKUS SA IMO GUGMA KAY JEHOVA KAG SA IMO ISIGKATAWO

15. Paano makabulig ang Mateo 22:​37-39 para manamian pa gid kita sa pagbantala? (Tan-awa man ang piktyur.)

¹⁵ Para manamian pa gid kita sa pagbantala, dapat magpokus kita sa aton gugma kay Jehova kag sa aton isigkatawo. (Basaha ang Mateo 22:​37-39.) Imadyina ang kalipay ni Jehova kon nagabantala kita kag ang kalipay sang mga interesado kon mag-umpisa na sila sa pag-Bible study. Hunahunaa man nga may paglaum nga mabuhi sing wala sing katapusan ang mga tawo nga magapamati sa aton mensahe.​—Juan 6:40; 1 Tim. 4:16.

16. Paano kita mangin malipayon sa aton pagbantala kon indi kita makahalin sa aton balay? Maghatag sing mga halimbawa.

 ¹⁶ Indi ka bala makahalin sa inyo balay bangod sa pila ka rason? Kon huo, magpokus sa puede mo himuon para mapakita mo ang imo gugma kay Jehova kag sa imo isigkatawo. Sa tion sang COVID-19 nga pandemic, indi makahalin sanday Samuel kag Dania sa ila balay. Sa sining mabudlay nga tion, regular sila nga nagapanaksi paagi sa telepono, nagahimo sila sing mga sulat, kag gina-Bible study nila ang ila mga study paagi sa Zoom. Sa kada tion nga magpaospital si Samuel para magpabulong sa iya kanser, ginapanaksihan niya ang mga maistorya niya sa ospital. Nagsiling sia: “Kon may mga kabudlayan, posible nga makabatyag kita sang grabe nga kabalaka, kapuyon kita, kag matilawan ang aton pagbatas. Gani dapat may himuon kita para mangin malipayon kita sa aton pag-alagad kay Jehova.” Sa sini man nga tion, natumba si Dania. Bangod sini, indi sia makahalin sa ila balay kag ara lang sia sa iya katre sa sulod sang tatlo ka bulan. Pagkatapos sini, kinahanglan naman sia i-wheelchair sa sulod sang anom ka bulan. Nagsiling sia: “Ginhimo ko ang akon bug-os nga masarangan sa akon sitwasyon. Napanaksihan ko ang isa ka nurse nga nagkadto sa akon, kag ginbantalaan ko ang mga naga-deliver sang amon mga kinahanglanon sa balay. Pila ka beses ko man nga napanaksihan paagi sa telepono ang isa ka babayi nga nagaobra sa isa ka medical company.” Bangod sang kahimtangan nanday Samuel kag Dania, limitado na lang ang ila mahimo sa pagbantala. Pero ginhimo nila ang ila bug-os nga masarangan, gani nalipay gid sila.

17. Ano ang himuon mo para makabulig gid sa imo ang mga panugda nga ginbinagbinag sa sini nga artikulo?

¹⁷ Tinguhai nga iaplikar ang tanan nga panugda sa sini nga artikulo. Ang kada panugda daw pareho sa isa ka ingredient sa isa ka resipe. Kon gamiton mo ang tanan nga ingredients, mangin manamit gid ang imo linuto. Gani kon iaplikar naton ang tanan nga panugda, masarangan naton nga dulaon ang negatibo nga mga balatyagon kag mangin mas malipayon kita sa aton pagbantala.