1. Paano naorganisar ang katawhan ni Jehova sang unang siglo?

 KON ginahatagan ni Jehova ang iya katawhan sing asaynment, gusto niya nga himuon nila ini sing organisado. (1 Cor. 14:33) Halimbawa, kabubut-on sang Dios nga ibantala ang maayong balita sa bug-os nga duta. (Mat. 24:14) Si Jesus ang ginhatagan ni Jehova sing responsibilidad nga magpanguna sa sini nga hilikuton. Kag ginasigurado ni Jesus nga ginahimo ini sing organisado. Sang unang siglo, samtang nagadamo ang mga kongregasyon sa lainlain nga mga lugar, may ginatangdo man nga mga gulang para maghatag sing mga instruksion kag para magpanguna sa kongregasyon. (Binu. 14:23) Ara sadto sa Jerusalem ang nagadumala nga hubon nga ginahuman sang mga apostoles kag sang pila ka eksperiensiado nga mga gulang. Naghimo sila sang pila ka desisyon nga dapat tumanon sang tanan nga kongregasyon. (Binu. 15:2; 16:4) Bangod gintuman sang mga kauturan ang mga instruksion nga ila nabaton, “padayon nga naglig-on sa pagtuo ang mga kongregasyon kag nagdugang ang ila kadamuon.”​—Binu. 16:5.

2. Sugod sang 1919, paano ginagiyahan ni Jehova ang iya katawhan kag paano niya sila ginaamanan sang espirituwal nga pagkaon?

² Padayon nga ginaorganisar ni Jehova ang iya katawhan asta subong. Sugod sang 1919, ginagamit ni Jesus ang gamay nga grupo sang mga hinaplas para organisahon ang pagbantala nga hilikuton kag para amanan sang espirituwal nga pagkaon ang iya mga sumulunod. a (Luc. 12:42) Maathag nga ginapakamaayo ni Jehova ang ginahimo sini nga grupo.​—Isa. 60:22; 65:​13, 14.

3-4. (a) Maghatag sing halimbawa nga nagapakita sang benepisyo bangod organisado kita. (b) Ano ang binagbinagon naton sa sini nga artikulo?

³ Kon indi kita organisado, indi gid naton mahimo ang hilikuton  nga ginsugo sa aton ni Jesus. (Mat. 28:​19, 20) Halimbawa, ibutang ta nga wala gin-organisar ang teritoryo sang aton kongregasyon kag makapagusto lang kita sa pagbantala bisan diin. Posible gid nga may mga teritoryo nga pirme lang mabantalaan, pero ang iban nga teritoryo indi gid mabantalaan. May mahunahuna ka pa bala nga mga benepisyo bangod organisado kita?

⁴ Gin-organisar ni Jesus ang iya mga sumulunod sang ari sia sa duta, gani ginaorganisar man niya kita subong. Sa sini nga artikulo, binagbinagon naton kon paano gin-organisar ni Jesus ang iya mga sumulunod sadto kag kon paano ini ginasunod sang aton organisasyon subong. Binagbinagon man naton kon paano naton mapakita nga nagasalig kita sa organisasyon ni Jehova.

GINASUNOD SANG ATON ORGANISASYON ANG HALIMBAWA NI JESUS

5. Ano ang isa ka paagi nga ginasunod naton ang halimbawa ni Jesus? (Juan 8:28)

⁵ Natun-an ni Jesus sa iya Amay sa langit kon ano ang iya himuon kag isiling. Ginasunod sang organisasyon ni Jehova ang halimbawa ni Jesus paagi sa paggamit sang Pulong sang Dios para buligan kita nga mabal-an kon ano ang husto kag sala kag para giyahan kita sa aton pagkabuhi. (Basaha ang Juan 8:28; 2 Tim. 3:​16, 17) Gani pirme kita ginapahanumdom nga dapat naton basahon ang Pulong sang Dios kag iaplikar naton ang aton natun-an. Ano ang aton mabenepisyo sa pagsunod sa sini nga laygay?

6. Ano ang isa ka importante nga benepisyo kon nagatuon kita sang Biblia?

⁶ Madamo gid sing benepisyo kon nagatuon kita sang Biblia kag ginagamit naton ang aton mga publikasyon. Halimbawa, makumparar naton ang ginasiling sang Biblia sa mga instruksion nga nabaton naton halin sa organisasyon. Gani makita naton nga nabase sa Biblia ini nga mga instruksion. Bangod sini, mas nagabakod pa gid ang aton pagsalig sa organisasyon ni Jehova.​—Roma 12:2.

7. Ano nga mensahe ang ginbantala ni Jesus, kag paano ginasunod sang organisasyon ni Jehova ang iya halimbawa?

⁷ Ginbantala ni Jesus “ang maayong balita sang Ginharian sang Dios.” (Luc. 4:​43, 44) Ginsugo man ni Jesus ang iya mga disipulo nga ibantala ang parte sa Ginharian. (Luc. 9:​1, 2; 10:​8, 9) Subong, nagabantala parte sa Ginharian ang tanan nga nagapakig-upod sa organisasyon ni Jehova bisan diin man sila nagaistar kag bisan pa madamo ang ila mga responsibilidad.

8. Ano nga pribilehiyo ang ginhatag sa aton?

⁸ Isa gid ka pribilehiyo para sa aton nga isugid sa iban ang parte sa Ginharian sang Dios. Kay man, indi tanan may amo sini nga pribilehiyo. Halimbawa, sang ari si Jesus sa duta, wala niya gintugutan ang mga demonyo nga magpanaksi parte sa iya. (Luc. 4:41) Subong, antes makabantala ang isa ka tawo upod sa katawhan ni Jehova, dapat anay sia makalipikar sa sini nga pribilehiyo. Kon ginasugid naton sa mga tawo ang parte sa Ginharian sang Dios sa tanan nga kahigayunan, ginapakita naton nga ginapabaloran gid naton ang aton pribilehiyo nga magbantala. Pareho kay Jesus, gusto naton itanom sa tagipusuon sang mga tawo ang mga binhi sang kamatuoran parte sa Ginharian kag dayon bunyagan ini.​—Mat. 13:​3, 23; 1 Cor. 3:6.

9. Ano ang ginahimo sang organisasyon para makilala sang mga tawo ang ngalan sang Dios?

⁹ Ginpakilala ni Jesus ang ngalan sang Dios. Sang nangamuyo si Jesus sa iya Amay sa langit, nagsiling sia: “Ginpakilala ko ang imo ngalan.” (Juan 17:26) Bilang pagsunod sa halimbawa ni Jesus, ginahimo sang organisasyon ni Jehova ang bug-os sini nga masarangan para makilala sang mga tawo ang ngalan sang Dios. Parte sa sini, daku gid ang nabulig sang Bag-ong Kalibutan nga Badbad sang Balaan nga Kasulatan. Ginbalik sa sini nga translation sang Biblia ang ngalan sang Dios sa mga teksto diin makita ini sa orihinal nga sinulatan. Na-translate na ang kabilugan sini ukon ang bahin lang sini sa sobra 270 ka  lenguahe. Makita sa Apendise A4 kag A5 sang sini nga translation ang mga detalye parte sa pagbalik sang ngalan sang Dios sa Biblia. Mabasa naman sa Appendix C sang Study Bible ang madamo nga ebidensia nga nagapamatuod nga dapat makita ang ngalan sang Dios sa Cristianong Griegong Kasulatan sing 237 ka beses.

10. Ano ang natun-an mo sa ginsiling sang isa ka babayi nga taga-Myanmar?

¹⁰ Pareho kay Jesus, gusto naton nga madamo nga tawo ang aton mabuligan nga makilala ang ngalan sang Dios. Sang nabal-an sang isa ka 67 anyos nga babayi nga taga-Myanmar nga may ngalan ang Dios, naghibi sia kag nagsiling: “Subong ko lang nabal-an nga Jehova ang ngalan sang Dios. . . . Gintudluan mo ako sang pinakaimportante nga butang nga puede ko matun-an.” Ginapakita sini nga eksperiensia nga kon mabal-an sang sinsero nga mga tawo ang ngalan sang Dios, daku gid ang epekto sini sa ila.

PADAYON NGA MAGSALIG SA ATON ORGANISASYON

11. Paano mapakita sang mga gulang nga nagasalig sila sa organisasyon ni Jehova? (Tan-awa man ang piktyur.)

¹¹ Ano ang isa ka paagi nga mapakita sang mga gulang nga nagasalig sila sa organisasyon sang Dios? Kon makabaton sila sang mga instruksion halin sa organisasyon, dapat nila ini basahon sing maayo kag dapat nila ini tumanon sa bug-os nila nga masarangan. Halimbawa, nakabaton sila sing instruksion parte sa mga bahin kag mga pangamuyo sa tion sang miting. Nakabaton man sila sing instruksion parte sa pag-atipan sa mga karnero sang Cristo. Kon ginatuman sang mga gulang ang tanan nga instruksion halin sa organisasyon, mabatyagan sang mga kauturan ang pagpalangga kag pag-atipan ni Jehova.

12. (a) Ngaa dapat kita magkooperar sa mga nagapanguna sa aton? (Hebreo 13:​7, 17) (b) Ngaa dapat kita magpokus sa maayo nga mga kinaiya sang mga nagapanguna sa aton?

¹² Kon makabaton kita sing instruksion halin sa mga gulang, dapat naton ini tumanon sing kinabubut-on. Kon ginahimo naton ini, nagabulig kita para indi mabudlayan ang mga nagapanguna sa aton sa paghimo sang ila responsibilidad. Ginapalig-on kita sang Biblia nga dapat kita magtuman kag magpasakop sa ila. (Basaha ang Hebreo 13:​7, 17.) Posible may mga tion nga mabudlay ini himuon. Ngaa? Bangod indi sila perpekto. Pero, kon magpokus kita sa ila indi maayo nga mga kinaiya imbes nga sa ila maayo nga mga kinaiya, daw pareho lang nga ginabuligan naton ang aton mga kaaway. Ngaa masiling naton ini? Kay man, gusto sang aton mga kaaway nga madula ang aton pagsalig sa organisasyon sang Dios. Gani kon daw nagakadula ang aton pagsalig sa mga gulang, posible madula man ang aton pagsalig sa aton organisasyon. Ano ang himuon naton para mabal-an naton ang mga kabutigan sang aton mga kaaway kag masikway ini?

INDI PAGPASUGTI NGA DULAON SANG IBAN ANG IMO PAGSALIG

13. Paano ginapakalain sang mga kaaway sang Dios ang iya organisasyon?

¹³ Ginapakalain sang mga kaaway sang Dios ang maayo nga ginahimo sang iya organisasyon. Halimbawa, natun-an naton sa Biblia nga gusto ni Jehova nga matinlo ang iya mga sumilimba. Buot silingon, dapat matinlo kita sa pisikal, dapat ginatuman naton ang iya mga kasuguan parte sa husto kag sala, kag dapat ginasimba naton sia sa husto nga paagi. Nagsiling sia nga dapat sikwayon sa kongregasyon ang bisan sin-o nga nagahimo sing malain nga indi gusto magbag-o. (1 Cor. 5:​11-13; 6:​9, 10) Ginatuman gid naton ini nga sugo sang Biblia. Pero gusto paguaon sang mga nagapamatok sa aton nga estrikto kuno kita katama, ginahukman kuno naton ang iban sing indi husto, kag indi kuno naton palangga ang mga tawo.

14. Kay sin-o naghalin ang mga kabutigan parte sa organisasyon?

¹⁴ Dumduma kon kay sin-o naghalin ang mga kabutigan parte sa organisasyon. Si Satanas nga  Yawa ang sa likod sini tanan kay sia ang “amay sang kabutigan.” (Juan 8:44; Gen. 3:​1-5) Gani mapaabot naton nga gamiton ni Satanas ang aton mga kaaway para magpalapta sang mga kabutigan parte sa organisasyon ni Jehova. Ginapamatud-an ini sang natabo sang unang siglo.

15. Ano ang ginhimo sang mga lider sang relihion kay Jesus kag sa iya mga sumulunod?

¹⁵ Perpekto ang Anak sang Dios nga si Jesus kag naghimo sia sang mga milagro. Pero, gingamit ni Satanas ang pila ka tawo sang unang siglo para magpalapta sang madamo nga kabutigan parte kay Jesus. Halimbawa, ginsilingan sang mga lider sang relihion ang mga tawo nga naghalin kuno sa “manuggahom sang mga demonyo” ang gahom ni Jesus sa pagtabog sang mga demonyo. (Mar. 3:22) Sang ginbista si Jesus, ginsumbong sia sang mga lider sang relihion nga nagapasipala kuno sia kag ginhaylo nila ang mga tawo nga ipapatay sia. (Mat. 27:20) Sang ulihi, ginpamatukan sang iban ang pagbantala sang mga sumulunod ni Jesus parte sa maayong balita. ‘Ginsugyot nila kag gin-impluwensiahan ang mga tawo’ nga hingabuton ini nga mga Cristiano. (Binu. 14:​2, 19) Parte sa Binuhatan 14:​2, ang Disiembre 1, 1998, nga Ang Lalantawan nagsiling: “Indi pa kontento nga sikwayon nila mismo ang mensahe, nagpalapta pa ang Judiyo nga mga manugpamatok sing butig nga mga impormasyon, sa pagtinguha nga pakalainon sang mga Gentil ang mga Cristiano.”

16. Ano ang dapat naton dumdumon kon makabati kita sang mga kabutigan parte sa organisasyon?

¹⁶ Padayon nga nagabinutig si Satanas asta subong. ‘Ginapatalang niya gihapon ang bug-os napuy-an nga duta.’ (Bug. 12:9) Kon makabati ka sang mga kabutigan ukon indi matuod nga mga istorya parte sa organisasyon ukon parte sa mga kauturan nga nagapanguna sa aton, dumduma ang ginhimo sang mga kaaway sang Dios kay Jesus kag sa mga disipulo sang unang siglo. Nagsiling si Jesus nga hingabuton sang mga tawo  ang katawhan ni Jehova kag pakalainon sila sang iban. Amo gid ini ang nagakatabo sa aton tion subong. (Mat. 5:​11, 12) Kon dumdumon naton kon kay sin-o naghalin ini nga mga kabutigan kag kon amligan naton dayon ang aton kaugalingon, indi gid kita sini mapatalang. Ti, paano naton maamligan ang aton kaugalingon?

17. Ano ang himuon naton para indi kita mahalitan sang mga kabutigan? (2 Timoteo 1:13) (Tan-awa man ang kahon nga “ Ano ang Dapat Mo Himuon Kon Makabati Ka sang mga Kabutigan?”)

¹⁷ Isikway ang mga kabutigan. Maathag ang ginsiling ni apostol Pablo kon ano ang dapat naton himuon kon makabati kita sang mga kabutigan. Ginsilingan niya si Timoteo nga ‘hambalan ang pila nga indi nila dapat pagtalupangdon ang butig nga mga sugilanon’ kag ‘indi nila dapat pagpamatian ang butig nga mga sugilanon nga nagapakahuya sa Dios.’ (1 Tim. 1:​3, 4; 4:7) Binagbinaga ini nga ilustrasyon. Posible puluton sang isa ka bata ang isa ka mahigko nga butang nga ara sa salog kag ibutang ini sa iya baba, pero indi gid ini paghimuon sang isa ka adulto bangod kabalo sia nga makahalit ini sa iya. Gani isikway naton ang mga kabutigan bangod kabalo kita kon kay sin-o ini naghalin. Ang “maayo nga mga pulong” sang kamatuoran amo lang gid ang dapat naton pamatian.​—Basaha ang 2 Timoteo 1:13.

18. Paano naton mapakita nga nagasalig kita sa organisasyon ni Jehova?

¹⁸ Natun-an naton nga ginailog sang organisasyon sang Dios si Jesus. Ginbinagbinag naton ang tatlo lang ka paagi nga ginahimo ini sang organisasyon. Samtang ginatun-an mo ang Biblia, talupangda ang iban pa nga mga paagi nga ginasunod sang organisasyon ang halimbawa ni Jesus. Buligi ang iban sa inyo kongregasyon nga magsalig pa gid sa organisasyon. Kag padayon nga ipakita nga nagasalig ka kay Jehova kag sa iya organisasyon. Paano? Paagi sa pag-alagad sing mainunungon kay Jehova kag paagi sa pagpabilin sa organisasyon nga ginagamit niya sa pagtuman sang iya kabubut-on. (Sal. 37:28) Kabay pa nga padayon naton nga pabaloran ang aton pribilehiyo nga makaupod ang mahigugmaon kag mainunungon nga katawhan ni Jehova.