1. Ano ang gusto ni Jehova nga panikasugan naton?

 ANG isa sa pinakamalipayon nga tion para sa mag-asawa amo ang tion nga matawo ang ila bata. Pero, bisan pa palangga gid nila ang ila bata nga bag-o lang nabun-ag, indi nila gusto nga magpabilin lang sia nga bata asta san-o. Ang matuod, mabalaka gid sila kon indi magdaku ang ila bata. Sing kaanggid, nalipay gid si Jehova sang nag-umpisa kita sa paglakat bilang mga sumulunod ni Jesus, pero indi Niya gusto nga magpabilin lang kita nga bata sa espirituwal. (1 Cor. 3:1) Sa baylo, gusto niya nga panikasugan naton nga mangin “hamtong” nga mga Cristiano.​—1 Cor. 14:20.

2. Ano ang binagbinagon naton sa sini nga artikulo?

² Paano naton mabal-an nga hamtong na ang isa ka utod? Ano ang dapat naton himuon para mangin hamtong kita? Paano makabulig ang matig-a nga espirituwal nga pagkaon para magbakod ang aton kaangtanan kay Jehova? Kag ngaa indi naton dapat paghunahunaon nga indi na naton kinahanglan pabakuron ang aton kaangtanan kay Jehova kay hamtong na kita? Binagbinagon naton sa sini nga artikulo ang mga sabat sa sini nga mga pamangkot.

PAANO NATON MABAL-AN NGA HAMTONG NA ANG ISA KA UTOD?

3. Ano ang dapat himuon sang isa ka Cristiano para mangin hamtong sia?

³ Sa Biblia, ang Griego nga tinaga nga gin-translate “hamtong” nagakahulugan man sing “adulto.” (1 Cor. 2:6) Gani pareho sa isa ka bata nga padayon nga nagadaku asta nga mangin adulto na sia, dapat padayon naton nga pabakuron ang aton kaangtanan kay Jehova para mangin hamtong kita nga mga Cristiano. Siempre, bisan pa hamtong na kita, dapat padayon gihapon ang aton pag-uswag sa espirituwal. (1 Tim. 4:15) Tanan kita, lakip na ang mga pamatan-on, puede mangin hamtong sa espirituwal. Pero paano naton mabal-an nga hamtong na ang isa ka utod?

4. Paano naton mabal-an nga hamtong na ang isa ka utod?

⁴ Ginatuman sang isa ka hamtong nga utod ang tanan nga ginasugo sang Dios. Wala sia nagapili kon ano lang ang gusto niya nga tumanon.  Siempre, bangod indi kita tanan perpekto, makahimo man sang sala ang hamtong nga utod. Pero kada adlaw, ginapanikasugan gid niya nga malipay ang Dios sa iya mga ginahunahuna kag ginahimo. Ginsuksok na niya ang bag-o nga personalidad kag ginapanikasugan niya nga ilugon pa gid ang panghunahuna sang Dios. (Efe. 4:​22-24) Ginhanas niya ang iya kaugalingon nga maghimo sang maayo nga mga desisyon nga nabase sa mga kasuguan kag prinsipio ni Jehova, gani indi niya kinahanglan ang malaba nga listahan sang mga puede kag indi puede himuon. Kon may ginhimo sia nga desisyon, ginapanikasugan gid niya nga himuon ang iya nadesisyunan.​—1 Cor. 9:​26, 27.

5. Ano ang puede matabo kon indi hamtong ang isa ka utod? (Efeso 4:​14, 15)

⁵ Pero kon indi hamtong ang isa ka utod, mahapos lang sia mapatalang sang “tuso” kag “malimbungon nga mga pahito.” Posible nga patihan niya ang indi matuod nga mga balita sa media kag ang mga panudlo sang mga apostata. a (Basaha ang Efeso 4:​14, 15.) Posible nga nahisa sia sa iban, kontra niya ang iban, madasig sia masandad, kag nagapadala sia sa pagsulay.​—1 Cor. 3:3.

6. Sa ano naton mapaanggid ang aton pag-uswag padulong sa pagkahamtong? (Tan-awa man ang piktyur.)

⁶ Ginsambit kaina nga ginpaanggid sang Biblia ang aton pag-uswag padulong sa pagkahamtong sa isa ka bata nga padayon nga nagadaku. Madamo pa ang dapat matun-an sang isa ka bata, gani kinahanglan niya ang proteksion kag paggiya sang isa ka adulto. Binagbinaga ini nga ilustrasyon. Posible nga silingan sang isa ka iloy ang iya gamay pa nga bata nga babayi nga mag-uyat sa iya kamot samtang nagatabok sila sa dalan. Samtang nagadaku ang iya bata, posible nga pasugtan na niya sia nga magtabok sa dalan nga sia lang. Pero padayon niya gihapon sia nga pahanumdumon nga siguraduhon nga wala sing salakyan antes sia magtabok. Kon adulto na ang bata, kabalo na sia maglikaw sa sini nga peligro kag sa iban pa nga peligro nga pareho sa sini. Pareho sa isa ka gamay pa nga bata nga kinahanglan ang bulig sang mga adulto para malikawan niya ang mga peligro, kinahanglan man sang indi hamtong nga mga utod ang bulig sang hamtong nga mga utod. Dapat sila buligan para malikawan nila ang mga butang nga posible makaguba sa ila kaangtanan kay Jehova kag para makahimo sila sang maayo nga mga desisyon. Ti, ano naman ang ginahimo sang hamtong nga mga utod antes sila magdesisyon? Ginabinagbinag nila  anay ang mga prinsipio sa Biblia para mabal-an nila ang panghunahuna ni Jehova. Dayon ginahimo nila kon ano ang husto.

7. Kinahanglan bala sang hamtong nga mga utod ang bulig sang iban?

⁷ Buot silingon bala sini nga indi na gid kinahanglan sang hamtong nga mga utod ang bulig sang iban? Indi. May mga tion nga kinahanglan man sang hamtong nga mga utod ang bulig. Pero may kinalain sila sa mga indi hamtong. Kon indi hamtong ang isa ka utod, posible nga gusto niya nga hambalan lang sia sang iban kon ano ang dapat niya himuon ukon gusto niya nga iban ang magdesisyon para sa iya. Ano naman ang ginahimo sang isa ka hamtong nga utod? Nagapangayo sia sang bulig sa maalam kag eksperiensiado nga mga utod, pero kabalo sia nga gusto ni Jehova nga sia ang ‘magdala sang iya kaugalingon nga lulan.’—Gal. 6:5.

8. Bisan pa pareho nga hamtong ang duha ka utod, ano ang mga kinalain nila sa isa kag isa?

⁸ Indi palareho ang hitsura sang mga adulto bisan pa pareho sila nga mga adulto. Indi man palareho ang mga kinaiya sang mga hamtong bisan pa pareho sila nga mga hamtong. May iban nga mas maalam, may iban nga mas maisog, may iban nga mas maalwan, kag may iban nga mas maluluy-on. Dugang pa, kon ara sa pareho nga sitwasyon ang duha ka hamtong nga utod, posible nga indi pareho ang himuon nila nga desisyon. Pero bisan pa lainlain ang ila desisyon, pareho ini nga nahisuno sa mga prinsipio sa Biblia. Sa masami, nagakatabo ini sa mga sitwasyon nga nagadepende sa konsiensia sang kada isa ang himuon nga desisyon. Gani wala nila ginahukman ang isa kag isa. Sa baylo, ginapanikasugan nila nga indi maguba ang ila paghiusa.​—Roma 14:10; 1 Cor. 1:10.

ANO ANG DAPAT NATON HIMUON PARA MANGIN HAMTONG KITA?

9. Awtomatiko lang bala kita nga mangin hamtong sa espirituwal? Ipaathag.

⁹ Awtomatiko lang nga nagadaku ang isa ka bata samtang nagaligad ang tion, pero wala sing bisan sin-o nga awtomatiko lang nga mangin hamtong sa espirituwal. Binagbinaga ang mga kauturan sa Corinto. Ginbaton nila ang maayong balita, nagpabawtismo sila, nabaton nila ang balaan nga espiritu, kag madamo sila sing natun-an sa mga gintudlo ni apostol Pablo. (Binu. 18:​8-11) Pero, pagligad sang pila ka tuig pagkatapos nila magpabawtismo, madamo sa ila ang indi gihapon hamtong. (1 Cor. 3:2) Ano ang himuon naton para indi ini matabo sa aton?

10. Ano ang dapat naton himuon para mangin hamtong kita? (Judas 20)

¹⁰ Para mangin hamtong kita, dapat anay naton handumon nga mangin hamtong. Kay man, indi gid mangin hamtong ang mga tawo nga gusto magpabilin nga “kulang sing kinaalam,” ukon gusto nga mangin bata lang gihapon sa espirituwal. (Hulu. 1:22) Indi naton gusto nga mangin pareho sa isa ka adulto nga nagalikaw sa mga responsibilidad kag ang iya lang gihapon mga ginikanan ang nagahimo sang mga desisyon para sa iya. Sa baylo, gusto naton nga kita mismo ang magpabakod sang aton kaangtanan kay Jehova. (Basaha ang Judas 20.) Kon ginapanikasugan mo nga mangin hamtong, mangamuyo kay Jehova nga hatagan ka “sang handum kag kusog nga himuon kon ano ang iya nahamut-an.”​—Fil. 2:13.

11. Ano ang ginhatag sa aton ni Jehova para buligan kita nga mangin hamtong? (Efeso 4:​11-13)

¹¹ Wala ginapaabot ni Jehova nga mangin hamtong kita sa aton lang kusog. Ginhatagan niya kita sang mga manugbantay kag mga manunudlo sa kongregasyon para buligan kita nga mangin “hamtong” sa espirituwal “kaangay sang bug-os nga kahamtong sang Cristo.” (Basaha ang Efeso 4:​11-13.) Ginahatagan man niya kita sang iya balaan nga espiritu para buligan kita nga mabal-an “ang hunahuna sang Cristo.” (1 Cor. 2:​14-16) Ginhatagan man kita sang Dios sang apat ka Ebanghelyo para itudlo sa aton ang panghunahuna ni Jesus, ang iya paagi sang paghambal, kag ang iya mga ginhimo sang ari sia sa duta. Kon ilugon mo ang panghunahuna kag ang mga ginhimo ni Jesus, masarangan mo nga mangin hamtong.

 KON PAANO MAKABULIG ANG MATIG-A NGA ESPIRITUWAL NGA PAGKAON

12. Ano “ang panguna nga doktrina tuhoy sa Cristo”?

¹² Ang Biblia nagsiling nga dapat ‘biyaan man naton ang panguna nga doktrina tuhoy sa Cristo.’ Buot silingon, para mangin hamtong kita, dapat naton dugangan ang aton nabal-an parte sa Cristo. Ang mga halimbawa sang panguna nga doktrina amo ang parte sa paghinulsol, pagtuo, bawtismo, kag pagkabanhaw. (Heb. 6:​1, 2) Pila lang ini sa panguna nga mga panudlo nga ginapatihan sang tanan nga Cristiano. Ginlakip ni apostol Pedro ini nga mga panudlo sang ginbantalaan niya ang mga tawo sang tion sang Pentecostes. (Binu. 2:​32-35, 38) Dapat naton patihan ining panguna nga mga panudlo para mangin disipulo kita sang Cristo. Halimbawa, nagsiling si Pablo nga kon wala kita nagapati sa pagkabanhaw, indi naton masiling nga matuod kita nga mga Cristiano. (1 Cor. 15:​12-14) Pero para mangin hamtong kita, indi lang dapat parte sa panguna nga mga panudlo ang aton nabal-an.

13. Ano ang dapat naton himuon para makabenepisyo kita sa matig-a nga espirituwal nga pagkaon nga ginsambit sa Hebreo 5:14? (Tan-awa man ang piktyur.)

¹³ Kon ikumparar sa panguna nga doktrina, indi lang mga kasuguan ni Jehova ang nalakip sa matig-a nga espirituwal nga pagkaon kundi nalakip man sa sini ang iya mga prinsipio. Ini nga mga prinsipio amo ang nagabulig sa aton nga mahangpan ang panghunahuna ni Jehova. Para makabenepisyo kita sa sini nga pagkaon, dapat naton tun-an ang Pulong sang Dios, pamalandungan naton ang aton natun-an, kag dapat naton ini iaplikar. Kon himuon naton ini, ginahanas naton ang aton kaugalingon nga maghimo sang mga desisyon nga makapahalipay kay Jehova. b—Basaha ang Hebreo 5:14.

14. Paano ginbuligan ni Pablo ang mga taga-Corinto nga mangin hamtong?

¹⁴ May mga sitwasyon nga dapat naton binagbinagon ang mga prinsipio sa Biblia kag iaplikar ini. Sa sini nga mga sitwasyon, nabudlayan ang indi hamtong nga mga utod nga maghimo sang husto nga desisyon. Kon wala sing espesipiko nga kasuguan sa Biblia parte sa isa ka sitwasyon, nagapati ang iban nga puede nila himuon ang bisan ano nga gusto nila. Parte sa sini nga mga sitwasyon, may iban naman nga nagapamangkot kon ano ang puede ukon indi puede himuon. Halimbawa, posible gid nga ginpamangkot sang mga Cristiano sa Corinto si Pablo kon bala puede nila kaunon  ang pagkaon nga ginhalad sa mga diosdios. Wala sila ginsilingan ni Pablo kon ano ang dapat nila himuon. Sa baylo, ginsilingan sila ni Pablo nga may “kinamatarong sa pagpili” ang kada isa sa ila, kag nagadepende ini sa ila konsiensia. Ginsambit niya ang pila ka prinsipio sa Biblia nga makabulig sa ila nga makahimo sang desisyon nga indi magtublag sang ila konsiensia kag indi makapasandad sa iban. (1 Cor. 8:​4, 7-9) Gani gintudluan ni Pablo ang mga taga-Corinto sa paggamit sang ila ikasarang sa paghangop. Indi dapat iban ang magdesisyon para sa ila, kag indi sila dapat mangita sang listahan sang mga puede kag indi puede himuon. Paagi sa sini, ginbuligan niya sila nga mangin hamtong.

15. Paano ginbuligan ni Pablo ang Hebreo nga mga Cristiano nga mag-uswag sa espirituwal?

¹⁵ May matun-an kita nga importante nga leksion sa sulat ni Pablo para sa Hebreo nga mga Cristiano. May pila sa ila nga wala nag-uswag sa espirituwal. Ang matuod, “nagakinahanglan [sila] liwat sang gatas, indi sang matig-a nga [espirituwal nga] pagkaon.” (Heb. 5:12) Wala nila gintun-an kag ginbaton ang bag-o nga mga butang nga amat-amat nga gintudlo sa ila ni Jehova paagi sa kongregasyon. (Hulu. 4:18) Halimbawa, madamo nga Judiyo nga mga Cristiano ang nagapati gihapon nga dapat nila padayon nga tumanon ang Mosaikong Kasuguan. Pero ang matuod, gintapos na sang halad-gawad sang Cristo ini nga Kasuguan 30 ka tuig na ang nagligad. (Roma 10:4; Tito 1:10) Sa sulod sang 30 ka tuig, nahangpan na kuntani sang Judiyo nga mga Cristiano nga indi na nila dapat pagtumanon ang Mosaikong Kasuguan. Gani matig-a nga espirituwal nga pagkaon ang unod sang sulat ni Pablo para sa mga Hebreo kay gusto niya sila buligan. Nakabulig ang iya sulat para mahangpan nila nga mas labaw ang bag-o nga paagi sang pagsimba kay Jehova nga nabase sa halad-gawad ni Jesus. Napalig-on man sila sini nga mangin maisog kag magpadayon sa pagbantala bisan pa ginapamatukan sila sang mga Judiyo.​—Heb. 10:​19-23.

PANIKASUGI NGA MAGPABILIN NGA HAMTONG

16. Magluwas nga dapat naton panikasugan nga mangin hamtong, ano pa ang dapat naton himuon?

¹⁶ Magluwas nga dapat naton panikasugan nga mangin hamtong, dapat man naton panikasugan nga magpabilin nga hamtong. Gani indi naton dapat paghunahunaon nga indi na naton kinahanglan pabakuron ang aton kaangtanan kay Jehova kay hamtong na kita. (1 Cor. 10:12) Sa baylo, dapat ‘padayon naton nga usisaon’ ang aton kaugalingon  para masigurado naton nga padayon kita nga nagauswag.​—2 Cor. 13:5.

17. Paano ginpakita sang sulat ni Pablo para sa mga taga-Colosas nga dapat kita magpabilin nga hamtong?

¹⁷ Sa sulat ni Pablo para sa mga taga-Colosas, ginpakita niya liwat ang importansia sang pagpabilin nga hamtong. Bisan pa hamtong na sila nga mga Cristiano, ginpaandaman sila ni Pablo kay basi maimpluwensiahan sila sang panghunahuna sang kalibutan. (Col. 2:​6-10) Sa bahin naman ni Epafras, kilala gid niya ang mga kauturan sa Colosas kag nagaulikid sia sa ila. Pirme man niya sila ginapangamuyo para ‘makatindog sila sing malig-on,’ ukon para mangin hamtong sila. (Col. 4:12) Ano ang matun-an naton sa sini? Nahangpan ni Pablo kag ni Epafras nga para makapabilin kita nga hamtong, dapat kita magpanikasog kag kinahanglan naton ang bulig sang Dios. Gusto nila nga magpabilin nga hamtong ang mga taga-Colosas bisan pa may mga kabudlayan.

18. Ano ang posible matabo sa isa ka hamtong nga utod? (Tan-awa man ang piktyur.)

¹⁸ Ginpaandaman ni Pablo ang mga Hebreo nga kon indi maghalong ang isa ka hamtong nga utod, posible maguba ang iya kaangtanan sa Dios kag may posibilidad nga indi na gid ini makay-o. Posible magtig-a ang tagipusuon sini nga utod kag indi sia maghinulsol, gani indi sia mapatawad sang Dios. Maayo lang kay wala ini natabo sa mga Hebreo. (Heb. 6:​4-9) Sa aton tion subong, kamusta naman ang mga indi aktibo ukon ang mga na-disfellowship nga naghinulsol sang ulihi? Ang ila sinsero nga paghinulsol nagapakita nga indi sila pareho sa tawo nga ginsambit ni Pablo sa iya sulat. Siempre, kon magbalik sila kay Jehova, kinahanglan nila ang bulig nga ginahatag niya. (Ezeq. 34:​15, 16) Posible pangabayon sang mga gulang ang hamtong nga mga utod para buligan sila nga magbakod liwat ang ila kaangtanan kay Jehova.

19. Ano ang dapat naton panikasugan?

¹⁹ Kon ginapanikasugan mo nga mangin hamtong, mangin hamtong ka gid sa ulihi. Gani padayon nga magkaon sang matig-a nga espirituwal nga pagkaon, kag panikasugi nga iluga ang panghunahuna ni Jehova. Kag kon hamtong ka na, panikasugi nga magpabilin nga hamtong asta sa wala sing katapusan.