ANG sinsero nga mga estudyante sang Biblia daw pareho sa mga nagapangita sang bulawan. Agod makita nila ang bilidhon nga kaalam, dapat sila magpanikasog kag padayon nga mangita sa Kasulatan. Subong mga estudyante sang Biblia, ano ang matun-an naton sa tatlo ka paagi sa pagpangita sang bulawan?

Imadyina nga nagalakat ka sa higad sang suba kag may nakita ka nga nagabadlak. Ginpudyot mo ini kag nalipay ka nga nakakita ka sang bulawan. Mas gamay ini sangsa ulo sang palito pero mas maiwat ini sangsa malahalon nga diamante. Indi bala nga mangita ka pa gid sang bulawan sa palibot?

Sing kaanggid, mahimo nga indi mo malipatan ang adlaw nga ginkadtuan ka sang isa ka alagad ni Jehova kag ginpaambit sa imo ang mensahe sang paglaum nga makita sa Biblia. Ayhan lab-as pa sa imo hunahuna ang una nga espirituwal nga bulawan nga imo natun-an. Mahimo nga nakita mo sa una nga tion ang ngalan sang Dios nga Jehova sa Biblia. (Sal. 83:18) Ukon mahimo natun-an mo nga puede ka mangin abyan ni Jehova. (Sant. 2:23) Narealisar mo dayon nga may nakita ka nga mas maayo sangsa bulawan! Kag nalangkag ka nga mangita sing dugang pa.

Kon kaisa, ang gagmay nga mga bulawan nagakaanod sa mga sapa kag suba. Kon ang isa mapisan magpangita diri, mahimo sia makakita sing pila ka gramo nga bulawan, nga nagabili sing linibo ka dolyar.

Sang gintun-an ka sa Biblia sang isa ka Saksi ni Jehova, mahimo pamatyag mo daw pareho ka sa nagapangayag sang bulawan. Ang pagpamalandong sa mga teksto sa Biblia mahimo nagdugang sa imo ihibalo kag nagpabakod sang imo espirituwalidad. Samtang ginabinagbinag mo sing maayo ining hamili nga mga kamatuoran sa Biblia, natun-an mo kon paano magpalapit kay Jehova kag magpabilin sa iya gugma nga nagadul-ong sa kabuhi nga wala sing katapusan.—Sant. 4:8; Jud. 20, 21.

Pareho sang isa nga nagatinguha gid nga makakita sang bulawan, mahimo nga maukod ka man sa pagpangita sang bilidhon nga espirituwal nga manggad. Sang matun-an mo ang sadsaran nga  mga kamatuoran sa Biblia, mahimo nga napahulag ka nga magdedikar kag magpabawtismo.—Mat. 28:19, 20.

Ang mainit nga mga bato nga nagbugnaw kag nagtig-a mahimo may unod nga bulawan. Ginamina ini nga mga bato kag ginadugmok agod makuha ang bulawan. Kon tan-awon mo lang ang bato, daw wala ini sing bulawan. Ngaa? Bangod sa isa ka tonelada nga bato, mahimo nga mga napulo ka gramo lang nga bulawan ang makuha! Pero, para sa nagapangita sang bulawan, dapat gid ini minahon.

Kinahanglan man ang pagpanikasog pagkatapos matun-an sang isa “ang panguna nga doktrina tuhoy sa Cristo.” (Heb. 6:1, 2) Kinahanglan mo manikasog agod makakuha ka sing bag-o nga mga punto kag praktikal nga mga leksion sa imo pagtuon sa Biblia. Gani, ano ang himuon mo agod mapat-od nga madamo ka gihapon sing matun-an sa imo personal nga pagtuon sa Biblia, bisan pa tinuig mo na nga ginatun-an ang Kasulatan?

Hupti ang kalangkag sa pagtuon. Talupangda ang mga detalye. Padayon nga manikasog, kag makakita ka sing hamili nga mga manggad sa Kasulatan nga amo ang kaalam kag panuytoy halin sa Dios. (Roma 11:33) Para madugangan ang imo ihibalo sa Kasulatan, panginpusli ang mga gamit sa pag-research nga matigayon sa imo lenguahe. Indi matak-an kon nagapangita ka sing mga prinsipio nga kinahanglan mo kag sing mga sabat sa mga pamangkot mo parte sa Biblia. Pamangkuta ang iban kon ano nga mga teksto kag artikulo ang nakabulig kag nakapalig-on sa ila. Kon may nanamian ka nga punto sa imo pagtuon sa Pulong sang Dios, isugid ini sa iban.

Siempre, indi mo tuyo nga magdamo lang ang imo ihibalo. Nagpaandam si apostol Pablo nga “ang ihibalo mahimo bangdan sang pagpahambog.” (1 Cor. 8:1) Gani, manikasog nga mangin mapainubuson kag mabakod ang imo pagtuo. Ang regular nga pangpamilya nga pagsimba kag personal nga pagtuon sa Biblia makabulig sa imo nga magkabuhi nahisuno sa mga talaksan ni Jehova kag magapalig-on sa imo nga buligan ang iban. Labaw sa tanan, mangin malipayon ka kay may nakita ka nga mas maayo sangsa bulawan.—Hulu. 3:13, 14.