Isa lang ini sa madamo nga panumbungon sang mga kaaway ni Jesus sa iya kag sa iya mga disipulo. Ginapaathag sang Mosaikong Kasuguan ang mga rason nga mahimo mangin indi matinlo ang isa, pareho halimbawa kon ginapangguaan sia sa iya kinatawo, may aro sia, ukon nakatandog sia sing patay nga tawo ukon sapat. May mga instruksion man ang Kasuguan kon paano mangin matinlo liwat. Puede ini himuon paagi sa paghalad, pagpanghinaw, ukon pagwisik.—Lev., kap. 11-15; Num., kap. 19.

Ini nga mga kasuguan gindugangan sang Judiyo nga mga manunudlo ukon mga rabbi sang ila kaugalingon nga mga pagsulundan. Ang isa ka reperensia nagsiling nga ang mga rabbi nagdugang sing detalyado nga mga pagsulundan parte sa mga rason nga mahimo mangin indi matinlo ang isa ka tawo kag kon paano sia makalaton sa iban. Naghimo man sila sing mga pagsulundan parte sa mga klase sang kagamitan kag pagkabutang nga mahimo malatnan ukon indi malatnan sang pagkadimatinlo, kag mga ritwal nga dapat himuon para mangin matinlo liwat.

Ginpamangkot si Jesus sang iya mga kaaway: “Ngaa ginalapas sang imo mga disipulo ang tradisyon sang mga tawo sang una, kay nagakaon sila nga indi matinlo ang ila mga kamot?” (Mar. 7:5) Indi ang parte sa pagpanghinaw sang kamot antes magkaon ang ginapatuhuyan sang iya mga kaaway. Ang mga rabbi may ritwal nga dapat anay bubuan sang tubig ang mga kamot antes magkaon. Ang reperensia nagdugang: “Ginabaisan man kon ano nga klase sang suludlan ang gamiton sa pagbubo, ano nga klase sang tubig ang dapat gamiton, sin-o ang mabubo, kag kon asta diin ang hinawan.”

Simple lang ang sabat ni Jesus sa sining mga kasuguan nga ginhimo sang tawo. Ginsilingan niya ang unang-siglo nga mga lider sang relihion sang mga Judiyo: “Mga salimpapaw, husto gid ang gintagna ni Isaias tuhoy sa inyo, subong sang nasulat, ‘Ini nga katawhan nagapadungog sa akon paagi lamang sa ila bibig, apang ang ila tagipusuon malayo sa akon [kay Jehova]. Wala sing pulos ang ila padayon nga pagsimba sa akon, kay ang ila mga panudlo mga sugo lamang sang mga tawo.’ Wala ninyo ginasunod ang mga sugo sang Dios, apang estrikto nga ginasunod ninyo ang mga tradisyon sang mga tawo.”—Mar. 7:6-8.