1. Ano ang gusto naton para sa aton mga paryente?

“SUGOD sang natun-an ko ang kamatuoran, gusto ko nga ang tanan nga miembro sang akon pamilya makaupod ko sa Paraiso,” siling ni Pauline. * “Gusto ko gid nga makaupod ko sa pag-alagad kay Jehova ang akon bana nga si Wayne kag ang amon bata.” May mga paryente ka bala nga wala pa makakilala kag nagahigugma kay Jehova? Pareho ni Pauline, mahimo gusto mo gid nga makaupod ang imo mga paryente sa pag-alagad kay Jehova.

2. Ano nga mga pamangkot ang binagbinagon naton sa sini nga artikulo?

² Indi naton mapilit ang aton mga paryente nga batunon ang maayong balita, pero mapalig-on naton sila nga buksan ang ila hunahuna kag tagipusuon sa mensahe sang Biblia. (2 Tim. 3:14, 15) Ngaa dapat naton panaksihan ang aton mga paryente? Ngaa dapat naton sila hangpon? Paano naton mabuligan ang aton mga paryente nga higugmaon man si Jehova? Kag paano kita mabuligan sang tanan nga kauturan sa aton kongregasyon?

3. Suno sa 2 Pedro 3:9, ngaa dapat naton panaksihan ang aton mga paryente?

³ Sa indi madugay, tapuson na ni Jehova ini nga sistema. Kag ang “may husto nga panimuot sa pagtigayon sing kabuhi nga wala sing katapusan” amo lamang ang maluwas. (Binu. 13:48) Madamo nga tion kag kusog ang aton ginagamit para panaksihan ang mga tawo nga indi naton kilala sa aton lugar, gani normal lang nga gusto man naton panaksihan ang aton mga paryente kay gusto naton nga makaupod sila sa pag-alagad kay Jehova. Ang aton mahigugmaon  nga Amay, nga si Jehova, ‘indi luyag nga ang bisan sin-o malaglag kundi luyag niya nga ang tanan mahatagan sang kahigayunan nga maghinulsol.’—Basaha ang 2 Pedro 3:9.

4. Ano ang indi husto nga paagi sang pagpanaksi ang posible mahimo naton sa aton mga paryente?

⁴ Tandaan naton nga may husto kag indi husto nga paagi sa pagpaambit sang mensahe sang kaluwasan. Mahimo nga mainayuhon kita kon nagapanaksi kita sa mga indi naton kakilala, pero kon nagapakig-istorya kita sa aton mga paryente basi tam-an kita ka prangka.

5. Ano ang dapat naton dumdumon antes kita magpakig-istorya sa aton mga paryente parte sa kamatuoran?

⁵ Madamo sa aton ang mahimo nagabatyag nga kuntani naggamit kita sing mas maayo nga paagi sang ginpanaksihan naton ang aton mga paryente sa una nga tion. Ginlaygayan ni apostol Pablo ang mga Cristiano: “Maghambal kamo pirme sing mainayuhon, nga daw gintimplahan sing asin, agod mahibaluan ninyo kon paano sabton ang kada isa.” (Col. 4:5, 6) Dumdumon naton ini nga laygay kon nagapakig-istorya kita sa aton mga paryente. Kay kon indi naton ini paghimuon, basi maglain ang buot nila sa aton kag indi na sila mamati sa aton.

6-7. Maghatag sing halimbawa nga nagapakita kon ngaa importante nga hangpon sang mga Cristiano ang ila bana ukon asawa nga wala nagaalagad kay Jehova.

⁶ Hangpon naton sila. Si Pauline, nga ginsambit kaina, nagsiling: “Sang una, gusto ko parte lang sa Dios kag sa Biblia ang istoryahan namon sang akon bana. Wala na namon ginaistoryahan ang parte sa iban nga mga butang.” Pero diutay lang ang nahibaluan sang bana ni Pauline nga si Wayne parte sa Biblia kag indi niya maintiendihan ang ginapanghambal ni Pauline. Para kay Wayne, pirme na lang ginapamensar sang iya asawa ang iya relihion. Nabalaka sia nga basi nagaentra sa makatalagam nga sekta ang iya asawa kag nalimbungan na.

 ⁷ Gin-aku ni Pauline nga madamo nga oras ang iya ginahinguyang sa pagpakig-upod sa mga kauturan kon gab-i kag kon Sabado kag Domingo. Upod niya sila sa mga miting, sa pagbantala, kag sa mga pagtililipon. “Kon kaisa, wala sing tawo ang balay kon magpauli si Wayne gani nasubuan sia,” siling ni Pauline. Natural lang nga mahidlaw si Wayne sa iya asawa kag anak. Indi man niya kilala ang mga kaupdanan ni Pauline, kag daw mas nangin importante na sa iya asawa ang iya bag-o nga mga abyan sangsa iya. Gani ginpahog ni Wayne si Pauline nga diborsiohan niya sia. Ano tani ang ginhimo ni Pauline para mapabatyag niya sa iya bana nga nahangpan niya sia?

8. Suno sa 1 Pedro 3:1, 2, ano ang mas matalupangdan sang aton mga paryente?

⁸ Magpakita sing maayo nga paggawi. Sa masami, mas matalupangdan sang aton mga paryente ang aton ginahimo sangsa aton ginahambal. (Basaha ang 1 Pedro 3:1, 2.) Nahangpan ini sang ulihi ni Pauline. “Kabalo ako nga palangga kami ni Wayne kag indi gid niya gusto sang diborsio,” siling niya. “Pero sang ginpahog niya ako, narealisar ko nga dapat ko sundon ang mga ginasiling ni Jehova. Imbes nga magpanaksi ako sa iya pirme, mas importante nga magpakita ako sing maayo nga paggawi.” Wala na ginpilit ni Pauline si Wayne nga istoryahan ang parte sa Biblia, kundi ginaistorya niya sia parte sa iban nga mga butang nga importante sa ila. Nakita ni Wayne nga mas nangin mahidaiton ang iya asawa kag nangin mabuot kag matinumanon ang ila anak. (Hulu. 31:18, 27, 28) Sang nakita ni Wayne ang maayo nga epekto sang panudlo sang Biblia sa iya pamilya, ginbuksan niya ang iya hunahuna kag tagipusuon sa mensahe sang Pulong sang Dios.—1 Cor. 7:12-14, 16.

9. Ngaa dapat padayon naton nga buligan ang aton mga paryente?

 ⁹ Padayon nga buligi ang imo mga paryente. Nagpakita si Jehova sang halimbawa para sa aton. “Sulitsulit” nga naghatag sia sang kahigayunan sa mga tawo nga batunon ang maayong balita para matigayon ang kabuhi. (Jer. 44:4) Kag ginsilingan ni apostol Pablo si Timoteo nga padayon nga buligan ang iban. Ngaa? Bangod kon himuon niya ini, maluwas niya ang iya kaugalingon kag ang mga nagapamati sa iya. (1 Tim. 4:16) Palangga naton ang aton mga paryente, gani gusto naton nga matun-an nila ang kamatuoran sa Pulong sang Dios. Sang ulihi, may maayo nga epekto sa pamilya ni Pauline ang iya mga ginahambal kag ginahimo. Nalipay gid sia nga kaupod na niya subong ang iya bana sa pag-alagad kay Jehova. Payunir sila nga mag-asawa kag nagaalagad si Wayne bilang gulang.

10. Ngaa dapat kita mangin mapinasensiahon?

¹⁰ Mangin mapinasensiahon. Sang nagdesisyon kita nga tumanon ang Dios, naghimo kita sing mga pagbag-o sa aton kabuhi kag mga ginapatihan. Mahimo nga mabudlay para sa aton mga paryente nga batunon ini nga mga pagbag-o. Sa masami, matalupangdan nila nga wala na kita nagaupod sa ila para magselebrar sang relihioso nga mga kapiestahan kag wala na kita nagaentra sa pulitika. Mahimo nga sa umpisa, mangakig sa aton ang iban naton nga mga paryente. (Mat. 10:35, 36) Pero indi kita dapat maghunahuna nga indi na sila magbag-o. Kon mag-untat kita sa pagbulig sa ila nga maintiendihan ang aton mga ginapatihan, daw pareho lang nga ginhukman na naton sila nga indi sila takus nga matigayon ang kabuhi nga wala sing katapusan. Gintugyan ni Jehova kay Jesus ang paghukom, indi sa aton. (Juan 5:22) Kon mapinasensiahon kita, mahimo nga magpamati sa aton ang aton mga paryente sa ulihi.—Tan-awa ang kahon nga “ Gamita ang Aton Website sa Pagtudlo.”

11-13. Ano ang matun-an mo sa pagpakig-angot ni Alice sa iya mga ginikanan?

¹¹ Manindugan pero mangin mainayuhon. (Hulu. 15:2) Binagbinaga ang halimbawa ni Alice. Sang nakatuon sia parte kay Jehova, nagaistar sia sa lain nga lugar nga malayo sa iya mga ginikanan. Wala nagapati sa Dios ang iya mga ginikanan kag aktibo sila sa pulitika. Naghunahuna sia nga dapat niya pahibaluon gilayon ang iya mga ginikanan parte sa maayo nga mga butang nga iya natun-an. Si Alice nagsiling: “Kon padugayon mo pa antes mo ihambal sa imo pamilya ang bag-o mo nga mga ginapatihan kag ginahimo, mas makibot na gid sila.” Gani nagasulat sia sa iya mga ginikanan para pamangkuton sila sang ila opinyon parte sa mga ginatudlo sang Biblia nga mahimo makapainteres sa ila, pareho sang gugma. (1 Cor. 13:1-13) Ginpasalamatan niya sila sa pagpadaku kag pag-atipan sa iya, kag ginpadal-an niya sila sang mga regalo. Kon nagabisita sia sa ila, ginatinguhaan gid niya nga mabuligan ang iya iloy sa mga ulubrahon sa balay. Sang umpisa, wala nalipay ang iya mga ginikanan sang ginsilingan niya sila parte sa iya bag-o nga mga ginapatihan.

¹² Ginasunod gid ni Alice ang iya iskedyul sa pagbasa sang Biblia bisan ara sia sa balay sang iya mga ginikanan. “Bangod sini, naintiendihan sang akon iloy nga importante gid sa akon ang Biblia,” siling ni Alice. Nagdesisyon ang amay ni Alice nga tun-an ang Biblia para maintiendihan niya kon ngaa nagbag-o ang panghunahuna sang iya anak, kag gusto niya nga pangitaan sing sala ang Biblia. “Ginhatagan ko sia sang Biblia kag ginsulatan ko ini sing mensahe para sa iya,” siling ni Alice. Ano ang resulta? Sa baylo nga makakita sing sala sa mga panudlo sang Pulong sang Dios, natandog gid ang balatyagon sang amay ni Alice sa iya nabasahan.

¹³ Dapat manindugan kita pero mangin mainayuhon, bisan sa mga pagtilaw. (1 Cor. 4:12b) Halimbawa, kinahanglan batason ni Alice ang pagpamatok sang iya iloy. “Sang nabawtismuhan ako, nagsiling si Nanay nga indi ko kuno sia palangga.” Ano ang ginhimo ni Alice? “Imbes nga likawan ang pag-istorya parte sa akon bag-o nga relihion, mainayuhon ko nga ginpaathag sa ila ang akon  desisyon nga mangin Saksi ni Jehova kag indi ko na ini pagbag-uhon. Ginpasalig ko ang akon iloy nga palangga ko gid sia. Naghibi kami nga duha, kag ginlutuan ko sia sing manamit nga pagkaon. Sugod sadto, nagsiling ang akon iloy nga nangin mas maayo ako nga tawo bangod sang Biblia.”

14. Ngaa indi naton dapat pagtugutan ang aton mga paryente nga bag-uhon ang aton desisyon sa pag-alagad kay Jehova?

¹⁴ Mahimo nga nagakinahanglan sang tion antes maintiendihan sing bug-os sang aton mga paryente kon daw ano ka importante sa aton ang aton pag-alagad kay Jehova. Halimbawa, sang nagdesisyon si Alice nga magpayunir imbes nga unahon ang propesyon nga gusto sang iya mga ginikanan para sa iya, naghibi liwat ang iya iloy. Pero nanindugan si Alice. “Kon tugutan mo ang imo pamilya nga bag-uhon ang imo desisyon parte sa isa ka butang, mahimo nga tinguhaan man nila nga bag-uhon ang imo desisyon parte sa iban pa nga mga butang,” siling ni Alice. “Kon manindugan ka pero mainayuhon sa imo pamilya, mahimo mamati sa imo ang iban sa ila.” Amo gid sini ang natabo kay Alice. Subong, payunir na ang iya mga ginikanan, kag isa na ka gulang ang iya amay.

15. Suno sa Mateo 5:14-16 kag 1 Pedro 2:12, paano ang “maayong mga buhat” sang mga kauturan makabulig sa aton mga paryente?

¹⁵ Ginabuyok ni Jehova ang mga tawo sa iya paagi sa “maayong mga buhat” sang Cristianong kongregasyon. (Basaha ang Mateo 5:14-16; 1 Pedro 2:12.) Kon ang imo bana ukon asawa indi Saksi ni Jehova, may nakilala na bala sia nga mga kauturan sa inyo kongregasyon? Si Pauline, nga ginsambit kaina, nang-imbitar sang mga kauturan sa ila balay para makilala sila sang iya bana nga si Wayne. Nadumduman ni Wayne kon paano sia ginbuligan sang isa ka brother nga makilala  kon sin-o gid ang mga Saksi: “Nagbakasyon gid sia sa iya trabaho sing isa ka adlaw para lang updan ako maglantaw sang isa ka hampang sa telebisyon sa amon balay. Sa pensar ko, ‘Kabalo man gali sia maglingawlingaw!’”

16. Ngaa dapat naton imbitahon ang aton mga paryente sa aton mga miting?

¹⁶ Kon imbitahon naton ang aton mga paryente sa aton mga miting, isa ini ka maayo nga paagi nga mabuligan naton sila. (1 Cor. 14:24, 25) Memoryal ang una nga miting nga natambungan ni Wayne bangod ginhiwat ini pagkatapos sang iya trabaho kag malip-ot lang ang programa. “Diutay lang ang naintiendihan ko sa pamulongpulong,” siling niya, “pero nagdayaw gid ako sa mga tawo. Ginpalapitan nila ako, gin-abiabi, kag daw indi nila pagbuy-an ang akon kamot sa ila pagpangamusta sa akon. Mabal-an ko gid nga sinsero sila.” May isa ka mag-asawa nga mainayuhon gid kay Pauline, kag ginabuligan nila sia sa pag-atipan sa iya bata sa mga miting kag sa ministeryo. Gani sang nagdesisyon si Wayne nga tun-an ang bag-o nga mga ginapatihan ni Pauline, ginpangabay ni Wayne ang bana nga sia ang magtuon sang Biblia sa iya.

17. Sa ano nga kahimtangan indi naton dapat pagbasulon ang aton kaugalingon, pero ngaa indi kita dapat maghunahuna nga indi na magbag-o ang aton mga paryente?

¹⁷ Nagalaum kita nga ang tanan naton nga paryente mag-upod sa aton sa pag-alagad kay Jehova. Pero, mahimo man nga indi sila magbaton sang kamatuoran bisan ano pa ang aton pagtinguha nga mabuligan sila nga mangin alagad sang Dios. Kon amo sina ang ila desisyon, indi naton dapat pagbasulon ang aton kaugalingon. Indi naton mapilit ang bisan sin-o nga batunon ang aton mga ginapatihan. Pero kon makita sang imo mga paryente kon daw ano ikaw ka malipayon bangod sang imo pag-alagad kay Jehova, daku gid ang epekto sini sa ila. Ipangamuyo sila. Mainayuhon nga magpakig-istorya sa ila. Indi mag-untat sa pagbulig sa ila! (Binu. 20:20) Magsalig nga pakamaayuhon ni Jehova ang imo mga panikasog. Kag kon mamati ang imo mga paryente sa imo, maluwas sila!