MAY ginahandum ka bala nga asaynment sa kongregasyon pero indi mo ini masarangan himuon subong? Ayhan isa ini ka responsibilidad nga ginahimo sang iban. Ukon basi isa ini ka asaynment sa pag-alagad, ukon pribilehiyo, nga ginahimo mo sang una. Pero basi limitado na ang imo mahimo bangod sang katigulangon, indi maayo nga panglawas, kapigaduhon, ukon mga responsibilidad sa pamilya. Ukon basi bangod sang mga pagbag-o sa organisasyon, kinahanglan mo itugyan sa iban ang isa ka asaynment nga madugay mo na nga ginahimo. Ano man ang rason, posible nga magbatyag ka nga daw wala mo ginahimo ang tanan nga luyag mo himuon sa pag-alagad sa Dios. Normal lang nga masubuan ka kon kaisa bangod sa sini nga mga kahimtangan. Ano ang makabulig sa imo para indi magluya kag maglain ang imo buot, ukon para indi ka magsunggod? Paano ka makapabilin nga malipayon?

May importante kita nga matun-an parte sa pagpabilin nga malipayon kon binagbinagon naton ang halimbawa ni Juan nga Manugbawtismo. Madamo sang dalayawon nga mga pribilehiyo si Juan, pero mahimo nga wala gid niya ginpaabot ang natabo sa iya pag-alagad kay Jehova sang ulihi. Mahimo wala gid niya nahunahuna nga mas malawig pa ang ihinguyang niya nga tion sa prisuhan sangsa iya ministeryo. Pero, nagpabilin nga malipayon si Juan sa bug-os niya nga kabuhi. Ano ang nakabulig sa iya? Paano kita makapabilin nga malipayon bisan makaeksperiensia kita sang mga kapaslawan?

Sang tigpamulak sang 29 C.E., ginsugdan ni Juan ang asaynment nga ginhatag sa iya ni Jehova, nga amo ang paghanda sa katawhan sa pag-abot sang Mesias. Nagsiling si Juan sa mga tawo: “Maghinulsol kamo, kay ang Ginharian sang langit malapit na.” (Mat. 3:2; Luc. 1:12-17) Madamo ang nagbaton. Ang iban sa ila naglakbay halin sa malayo nga mga lugar para magpamati sa iya mensahe, kag madamo ang naghinulsol kag nagpabawtismo. Maisugon man nga ginpaandaman ni Juan ang mga lider sang relihion nga nagapakamatarong sang ila kaugalingon. Nagsiling sia nga hukman sila kon indi sila magbag-o. (Mat. 3:5-12) Ang pinakaimportante nga ginhimo ni Juan sa iya ministeryo natabo sang tigragas sang 29 C.E. sang ginbawtismuhan niya si Jesus. Sugod sadto, ginsilingan ni Juan ang iban nga magsunod kay Jesus, nga amo ang ginpromisa nga Mesias.—Juan 1:32-37.

Bangod sang pinasahi nga papel ni Juan, nagsiling si Jesus: “Wala pa gid sing natawo nga labaw pa kay  Juan nga Manugbawtismo.” (Mat. 11:11) Sigurado gid nga nalipay si Juan sa mga pagpakamaayo nga iya nabaton. Pareho kay Juan, madamo subong ang nakabaton sang dalayawon nga mga pagpakamaayo halin sa Dios. Binagbinaga ang halimbawa sang isa ka brother nga si Terry. Sia kag ang iya asawa nga si Sandra nag-alagad sing bug-os tion sa sobra 50 ka tuig. Si Terry nagsiling: “Madamo gid ako sing dalayawon nga mga pribilehiyo. Nakaalagad ako bilang payunir, Bethelite, espesyal payunir, manugtatap sang sirkito, manugtatap sang distrito, kag subong, espesyal payunir naman ako liwat.” Makalilipay gid nga makabaton kita sang mga asaynment sa pag-alagad kay Jehova, pero matun-an naton sa halimbawa ni Juan nga dapat kita magpanikasog para makapabilin kita nga malipayon kon may mga pagbag-o sa aton kahimtangan.

Nagpabilin nga malipayon si Juan nga Manugbawtismo bangod ginpasalamatan niya ang mga pribilehiyo nga ginhatag sa iya. Binagbinaga ang isa ka halimbawa. Pagkatapos nabawtismuhan si Jesus, nabuhinan ang mga sumulunod ni Juan kag nagdamo ang mga sumulunod ni Jesus. Nabalaka sa sini ang mga disipulo ni Juan gani nagsiling sila sa iya: “Ang tawo nga nagkadto sa imo . . . nagapangbawtismo na kag ang tanan nga tawo nagakadto sa iya.” (Juan 3:26) Si Juan nagsabat: “Ang nobya para sa nobyo. Apang nalipay gid ang abyan sang nobyo nga nagatindog malapit sa iya kon mabatian niya ang iya tingog. Gani daku gid ang akon kalipay.” (Juan 3:29) Wala ginkompetensiahan ni Juan si Jesus; kag wala man nagbatyag si Juan nga indi importante ang iya mga nahimo bangod mas importante ang hilikuton ni Jesus. Sa baylo, nagpabilin nga malipayon si Juan bangod ginpabaloran niya ang iya papel bilang “abyan sang nobyo.”

Ang panimuot ni Juan nagbulig sa iya nga magpabilin nga malipayon bisan indi mahapos ang iya asaynment. Halimbawa, isa sia ka Nazareo halin sang ginbun-ag sia, gani gindumilian sia nga mag-inom sang alak. (Luc. 1:15) “Si Juan wala nagakaon ukon nagainom,” siling ni Jesus sang ginpatuhuyan niya ang simple nga kabuhi ni Juan. Pero indi obligado si Jesus kag ang iya mga disipulo nga himuon ang pila ka pagdumili nga ginatuman sang isa ka Nazareo. Nagkabuhi sila sing normal pareho sang iban. (Mat. 11:18, 19) Wala man nakahimo sang milagro si Juan, pero kabalo sia nga ginhatagan sang gahom para makahimo sang milagro ang mga disipulo ni Jesus lakip na ang mga disipulo niya sang una. (Mat. 10:1; Juan 10:41) Imbes nga magpokus sa mga kinatuhayan sang iya mga sumulunod kag sang mga sumulunod ni Jesus, nangin matutom kag masako si Juan sa asaynment nga ginhatag sa iya ni Jehova.

Kon pabaloran man naton ang aton asaynment subong sa pag-alagad kay Jehova, makapabilin kita nga malipayon. Si Terry, nga ginsambit kaina, nagsiling, “Kon may ginahatag sa akon nga asaynment, ginahimo ko gid ini sing maayo.” Samtang ginahunahuna niya ang iya kabuhi sa bug-os tion nga pag-alagad, nagsiling sia, “Wala gid ako sing ginhinulsulan pero madamo ako sing makalilipay nga mga eksperiensia.”

Mangin malipayon pa gid kita kon pamalandungan naton kon ngaa pinasahi gid ang bisan ano nga asaynment ukon responsibilidad sa pag-alagad kay Jehova. Pinasahi gid ini bangod nagahatag ini sa aton sang pribilehiyo nga mangin “masigkamanugpangabudlay sang Dios.” (1 Cor. 3:9) Ang isa ka ginapakabahandi nga butang nga ginpanubli magapabilin nga matahom kon pirme ini ginatinluan. Sing kaanggid, magapabilin kita nga malipayon kon pirme naton pamalandungan ang tumalagsahon nga pribilehiyo nga maalagad ang Dios. Indi naton pag-ipaanggid ang aton mga panikasog sa mga panikasog sang iban. Indi naton paghunahunaon nga indi importante ang ginhatag sa aton ni Jehova nga asaynment kon ipaanggid sa asaynment sang iban.—Gal. 6:4.

Mahimo nga nakahibalo si Juan nga indi maglawig ang iya ministeryo, pero mahimo nga wala niya ginpaabot nga gulpi lang ini matapos. (Juan 3:30) Sang 30 C.E., mga anom ka bulan pagkatapos niya ginbawtismuhan si Jesus, ginpriso si Juan ni Hari Herodes. Pero nagpadayon si Juan sa pagtudlo kon ano ang husto. (Mar. 6:17-20) Ano ang nakabulig sa iya nga magpabilin nga malipayon bisan sa sini nga mga pagbag-o? Nagpokus sia sa kon ano ang importante kay Jehova.

Samtang ara si Juan sa bilangguan, nakabaton sia sang report parte sa nagasangkad nga ministeryo ni Jesus. (Mat. 11:2; Luc. 7:18) Kumbinsido si Juan nga si Jesus amo ang Mesias pero mahimo nga naghunahuna  sia kon paano tumanon ni Jesus ang tanan nga ginsiling sa Kasulatan nga pagahimuon sang Mesias. Bangod mangin hari ang Mesias, magagahom na bala si Jesus sa indi madugay? Kon maggahom na si Jesus, paguaon niya ayhan sa bilangguan si Juan? Gusto mahibaluan ni Juan kon ano pa ang mga pagahimuon ni Jesus, gani ginpakadto niya ang iya duha ka disipulo kay Jesus para pamangkuton sia: “Ikaw bala ang Isa nga Magaabot, ukon may iban pa?” (Luc. 7:19) Sang nakabalik sila, mahimo namati gid sing maayo si Juan samtang ginaistorya nila sa iya ang mga pagpang-ayo ni Jesus paagi sa milagro. Ginsilingan sila ni Jesus nga isugid kay Juan nga “ang mga bulag nakakita, ang mga piang nakalakat, ang mga aruon nag-ayo, ang mga bungol nakabati, ang mga patay nabanhaw, kag ang mga imol nakabati sing maayong balita.”—Luc. 7:20-22.

Sigurado nga napabakod si Juan sa ginreport sang iya mga disipulo. Ginpamatud-an sini nga ginatuman ni Jesus ang mga tagna parte sa Mesias. Bisan wala ginpagua ni Jesus sa bilangguan si Juan, nakahibalo si Juan nga importante ang iya ministeryo. May rason sia nga magkalipay bisan sang iya mga kahimtangan.

Pareho ni Juan, kon magpokus kita sa pag-alagad kay Jehova, makabatas kita nga may kalipay kag pagpailob. (Col. 1:9-11) Makabatas kita kon ginabasa naton ang Biblia kag ginapamalandungan ini, kag mabuligan kita sini nga dumdumon nga importante ang aton ginahimo sa pag-alagad sa Dios. (1 Cor. 15:58) Si Sandra nagsiling: “Nagabulig sa akon nga mangin suod pa gid kay Jehova ang akon pagbasa sang isa ka kapitulo sa Biblia kada adlaw. Nagabulig ini sa akon nga magpokus sa iya kag indi sa akon kaugalingon.” Puede man kita magpokus sa mga ginahimo sang aton mga kauturan para kay Jehova, nga makabulig sa aton nga indi paghunahunaon ang aton mga kahimtangan kundi magpokus sa mga ginahimo ni Jehova. “Ang mga programa sa JW Broadcasting^® kada bulan nagabulig sa amon nga mangin suod pa gid sa aton organisasyon, kag nagabulig ini sa amon nga magpabilin nga malipayon sa amon asaynment,” siling ni Sandra.

Nagbantala si Juan nga Manugbawtismo sa malip-ot lang nga tion, kag nagbantala sia nga “may espiritu kag gahom ni Elias.” Kag pareho ni Elias, sia “tawo man nga may balatyagon kaangay sa aton.” (Luc. 1:17; Sant. 5:17) Kon sundon naton ang iya halimbawa sa pagpakita sing apresasyon kag pagpokus sa pag-alagad kay Jehova, makapabilin man kita nga malipayon sa aton pag-alagad sa Ginharian, bisan ano pa ang matabo sa aton kabuhi.