1. Ano ang dapat himuon sang mga Cristiano para matapos nila ang palumba para sa kabuhi?

ANG mga Cristiano nagadalagan sa palumba para sa kabuhi. Bag-uhan man kita ukon tinuig na nga nagadalagan, tanan kita dapat magpadayon sa pagdalagan asta matapos ang palumba. Ang laygay ni apostol Pablo para sa mga Cristiano sa kongregasyon sa Filipos sang una makapalig-on sa aton nga matapos ini nga palumba. Ang iban sa ila tinuig na nga nagaalagad kay Jehova sang nabaton nila ang sulat ni Pablo. Nagadalagan sila sing maayo, pero ginpahanumdom sila ni Pablo nga dapat sila magpadayon sa pagdalagan nga may pagbatas. Gusto niya nga ilugon nila ang iya halimbawa nga ‘nagatinguha nga mabaton ang padya.’—Fil. 3:14.

2. Ngaa suno gid sa tion ang laygay ni Pablo para sa mga taga-Filipos?

² Suno gid sa tion ang laygay ni Pablo para sa mga taga-Filipos. Ginpamatukan ang mga kauturan umpisa sang gintukod ang kongregasyon didto. Sang mga 50 C.E., gintuman ni Pablo kag ni Silas ang pangabay sang Dios nga ‘magtabok sa Macedonia.’ Gani nagkadto sila sa Filipos para magbantala sang maayong balita. (Binu. 16:9) Nakilala nila didto si Lidia nga “nagpamati” sa ila, kag “ginbuksan ni Jehova ang iya tagipusuon” sa maayong balita. (Binu. 16:14) Nabawtismuhan sia kag ang iya panimalay. Pero ginhingabot gilayon sang Yawa ang mga kauturan. Ginganoy sang mga tawo sang siudad sanday Pablo kag Silas pakadto sa mga mahistrado sibil kag gin-akusahan nga nagapanggamo. Bangod sini, ginbunal kag ginbilanggo sanday Pablo kag Silas, kag sang ulihi ginsilingan sila nga maghalin sa siudad. (Binu. 16:16-40) Nag-untat bala sila? Wala gid! Kag ano ang ginhimo sang mga kauturan sa bag-o nga kongregasyon? Maayo gid ang ila ginhimo kay nagbatas man sila! Sigurado gid nga napalig-on sila sang maayo nga halimbawa nanday Pablo kag Silas.

3. Ano ang narealisar ni Pablo, kag ano nga mga pamangkot ang binagbinagon naton?

 ³ Determinado gid si Pablo nga indi mag-untat. (2 Cor. 4:16) Pero, narealisar niya nga para matapos niya ang palumba para sa kabuhi, dapat sia magpokus sa padya. Ano ang aton matun-an sa halimbawa ni Pablo? Ano nga mga halimbawa sang mga kauturan subong ang nagapamatuod nga mabatas naton ang mga problema? Kag paano ang aton paglaum sa palaabuton makapabaskog sang aton determinasyon nga indi mag-untat?

4. Paano nangin masako si Pablo sa pag-alagad bisan pa napriso sia?

⁴ Hunahunaa kon ano ang kahimtangan ni Pablo sang ginsulatan niya ang mga taga-Filipos. Napriso sia sa isa ka balay sa Roma. Limitado na ang iya mahimo sa pagbantala. Pero nangin masako sia sa pagbantala sa mga nagabisita sa iya kag sa pagsulat sa malayo nga mga kongregasyon. Subong, bangod sang balatian ukon katigulangon, madamo nga Cristiano ang indi na makahalin sa ila balay. Pero ginahingalitan nila ang tanan nga kahigayunan para mabantala ang maayong balita sa mga nagabisita sa ila. Nagahimo man sila sang makapalig-on nga mga sulat para sa mga tawo nga indi naton maistorya sa ila mga balay.

5. Suno kay Pablo sa Filipos 3:12-14, ano ang nakabulig sa iya nga magpokus sa padya?

⁵ Wala gintugutan ni Pablo ang iya mga ginhimo sang una, maayo man ukon malain, nga makatublag sa iya pag-alagad kay Jehova. Nagsiling sia nga para ‘malab-ot ang mga butang sa unahan’ ukon para matapos niya sing madinalag-on ang palumba para sa kabuhi, kinahanglan niya ‘kalimtan ang mga butang sa likuran.’ (Basaha ang Filipos 3:12-14.) Ano ang pila ka butang nga mahimo makatublag kay Pablo? Una, madamo gid sing nahimo si Pablo sang miembro pa sia sang Judaismo. Pero ginkabig niya ini nga “mga basura.” (Fil. 3:3-8) Ikaduha, bisan pa ginkonsiensia sia kay ginhingabot niya ang mga Cristiano sang una, wala ini nagpauntat sa iya sa pag-alagad. Kag ikatlo, wala gid sia naghunahuna nga bastante na ang mga nahimo niya para kay Jehova kag puede na sia mag-untat. Madamo gid sing nahimo si Pablo sa iya ministeryo bisan pa ginpriso sia, ginbunal, ginbato, kag nagub-an sang barko. Naeksperiensiahan man niya nga magutman kag makulangan sing panapton. (2 Cor. 11:23-27) Pero, bisan pa madamo na sia sing nahimo kag gin-antos, nahibal-an ni Pablo nga kinahanglan niya magpadayon sa pag-alagad kay Jehova. Amo man sini ang dapat naton himuon.

6. Ano ang pila ka “butang sa likuran” nga dapat naton kalimtan?

⁶ ‘Ginkalimtan ni Pablo ang mga butang sa likuran.’ Paano naton sia mailog? Ang iban sa aton mahimo ginakonsiensia gihapon bangod sang nahimo naton nga mga sala sang una. Kon amo sini ang aton ginabatyag, dapat naton tun-an kag pamalandungan ang halad-gawad sang Cristo, kag dapat pangabayon naton si Jehova nga buligan kita nga batunon ang iya pagpatawad. Mabuligan kita sini nga malikawan nga magbatyag sing sobra nga kasubo kag indi na magbatyag nga dapat gid kita silutan sa mga sala nga ginpatawad na ni Jehova. May matun-an pa gid kita sa halimbawa ni Pablo. Ang iban mahimo nagbiya sang ila obra nga daku ang sueldo para unahon ang intereses sang Ginharian. Kon indi na naton pagbalikdon kag handumon ang materyal nga mga butang nga ginbiyaan naton, ginakalimtan naton ang mga butang sa likuran. (Num. 11:4-6; Man. 7:10) Puede man nga malakip sa “mga butang sa likuran” ang mga nahimo naton sa pag-alagad kay Jehova ukon ang mga problema nga aton ginbatas sang una. Matuod, mas mangin suod pa gid kita kay Jehova kon hunahunaon naton kon paano niya kita ginpakamaayo kag ginbuligan sang una. Pero indi dapat naton pagpamensaron nga nahimo na naton ang tanan para  kay Jehova kag wala na kita sing may madugang pa.—1 Cor. 15:58.

7. Suno sa 1 Corinto 9:24-27, ano ang dapat himuon sang isa para matapos niya ang palumba para sa kabuhi? Maghatag sing halimbawa.

⁷ Nahangpan gid sing maayo ni Pablo ang ginsiling ni Jesus: “Magpanikasog kamo sing lakas.” (Luc. 13:23, 24) Nahibal-an ni Pablo nga dapat gid sia magpanikasog asta sa katapusan pareho sa ginhimo sang Cristo. Gani ginkumparar niya ang kabuhi sang mga Cristiano sa isa ka palumba. (Basaha ang 1 Corinto 9:24-27.) Ang nagadalagan sa isa ka palumba nagapokus nga matapos ini kag ginalikawan ang mga butang nga makatublag sa iya. Halimbawa, ang mga nagaentra sa palumba sa siudad mahimo maglabay sa dalan nga madamo sing balaligyaan kag iban pa nga mga butang nga mahimo makadula sang ila pokus. May magauntat ayhan sa iya pagdalagan para maglantaw sa mga ginabaligya? Indi gid niya ini paghimuon kon gusto niya magdaug. Sa palumba para sa kabuhi, dapat man naton likawan ang mga butang nga makatublag sa aton. Para mabaton naton ang padya, dapat magpokus kita sa sini kag magpanikasog gid pareho ni Pablo.

8. Ano ang tatlo ka kabudlayan nga aton binagbinagon?

⁸ Binagbinagon naton subong ang tatlo ka kabudlayan nga makapaluya sa aton. Ang una amo ang pagbatyag nga daw kadugay matuman sang aton ginapaabot. Ang ikaduha amo ang pagluya sang lawas. Ang ikatlo amo ang mga pagtilaw nga madugay na naton nga ginabatas. Makabenepisyo kita kon tun-an naton kon paano nabatas sang iban ini nga mga kabudlayan.—Fil. 3:17.

9. Kon pamatyag naton daw kadugay matuman sang aton ginapaabot, ano ang mahimo nga epekto sini sa aton?

⁹ Ang pagbatyag nga daw kadugay matuman sang aton ginapaabot. Normal lang nga maglaum kita nga matuman ang maayo nga mga butang nga ginpromisa ni Jehova. Sang nagpabutyag si manalagna Habacuc nga kuntani pauntaton na ni Jehova ang kalautan sa Juda, ginsilingan sia ni Jehova nga ‘padayon nga paabuton ini.’ (Hab. 2:3) Pero, kon pamatyag naton daw kadugay matuman sang aton ginapaabot, mahimo madula naton ang aton kakugi. Basi maluyahan pa gani kita sing buot. (Hulu. 13:12) Amo ini ang natabo  sa iban naton nga mga utod sang pagsugod sang ika-20 nga siglo. Sadto nga tion, madamo nga hinaplas nga mga Cristiano ang nagpaabot nga mapalangit na sila sang 1914. Sang wala ini natabo, ano ang ginhimo sang matutom nga mga kauturan?

10. Ano ang ginhimo sang isa ka mag-asawa kay wala gilayon natuman ang ila ginpaabot?

¹⁰ Binagbinaga ang halimbawa sang duha ka matutom nga Cristiano nga wala magluya ang buot. Si Brother Royal Spatz ginbawtismuhan sang 1908 sa edad nga 20 anyos. Sigurado gid sia nga mapalangit na sia sa indi madugay. Amo gani nga sang ginhagad niya si Pearl nga magpakasal sang 1911, nagsiling sia: “Bal-an mo naman kon ano ang matabo sa 1914. Ti, mas maayo kon dalion na naton ang pagpakasal!” Sang wala sila nagpalangit sang 1914, nag-untat bala ining Cristiano nga mag-asawa sa pagdalagan sa palumba para sa kabuhi? Wala, kay nagpokus sila sa pag-alagad sing matutom kay Jehova, indi sa ila padya nga magpalangit. Determinado sila nga magdalagan nga may pagbatas. Huo, pagligad sang madamo nga tuig, aktibo kag matutom gihapon sa pag-alagad sanday Royal kag Pearl asta nga napatay sila. Sigurado gid nga ginakalangkagan mo ang tion nga mabindikar na ni Jehova ang iya ngalan kag soberanya, kag matuman ang tanan niya nga promisa. Makasalig ka nga matuman ini sa tion nga gintalana ni Jehova. Samtang ginapaabot naton ini, kabay nga mangin masako kita sa pag-alagad sa aton Dios, kag indi naton pagtugutan nga magluya ang aton buot kon pamatyag naton daw kadugay matuman sang aton ginapaabot.

11-12. Ngaa posible gihapon kita makaalagad kay Jehova sing matutom bisan nagluya na ang aton lawas? Maghatag sing halimbawa.

¹¹ Pagluya sang lawas. Kinahanglan sang isa nga nagadalagan sa isa ka palumba ang madamo nga enerhiya para matapos niya ini. Pero indi kinahanglan nga mabakod gid ang imo lawas para maglig-on ang imo pagtuo kay Jehova kag mangin makugi sa pag-alagad. Madamo ang padayon nga nagaalagad sa ila bug-os nga masarangan bisan nagluya na ang ila lawas. (2 Cor. 4:16) Halimbawa, sang 88 anyos si Brother Arthur Secord, * 55 ka tuig na sia nga nakaalagad sa Bethel kag maluya na ang iya lawas. Isa ka adlaw, ginpalapitan sia sang nars sa iya hiligdaan para atipanon. Gintulok niya sia kag ginkomendahan: “Brother Secord, madamo ka na gid sing nahimo para kay Jehova.” Pero wala nagpokus si Brother Secord sa iya mga nahimo sang una. Gintulok niya ang nars, nagyuhum, kag nagsiling: “Huo, matuod ina. Pero indi importante kon ano ang aton mga nahimo sang una. Mas importante nga magpabilin kita nga matutom subong.”

¹² Mahimo nga tinuig ka na nga nagaalagad kay Jehova. Pero subong, limitado na ang mahimo mo bangod nagluya na ang imo lawas. Kon amo  sini ang imo kahimtangan, indi ka dapat maluyahan sing buot. Ginapabaloran gid ni Jehova ang imo matutom nga pag-alagad sang una. (Heb. 6:10) Tandai nga mapakita naton ang kadakuon sang aton gugma kay Jehova indi sa kadamuon sang aton ginahimo para sa iya, kundi paagi sa aton maayo nga panimuot kag paghimo sang aton bug-os nga masarangan. (Col. 3:23) Nahangpan ni Jehova ang aton limitasyon kag wala sia nagapaabot sang indi naton masarangan.—Mar. 12:43, 44.

13. Ano ang naeksperiensiahan nanday Anatoly kag Lidiya, kag paano kita sini mapalig-on nga magpadayon sa pag-alagad kay Jehova bisan sa madamo nga pagtilaw?

¹³ Mga pagtilaw nga madugay na naton nga ginabatas. Nabatas sang pila sa mga alagad ni Jehova ang dinekada nga mga pagtilaw kag paghingabot. Halimbawa, 12 anyos pa lang si Anatoly Melnik * sang gindakop, ginpriso, kag gintapok sa Siberia ang iya amay. Sobra 7,000 ka kilometro ang kalayuon sini sa ila lugar sa Moldova. Pagligad sang isa ka tuig, gintapok man sia sa Siberia upod ang iya iloy, lolo, kag lola. Nagatambong sila sa mga miting sa pihak nga baryo nga 30 ka kilometro ang kalayuon. Para makatambong, kinahanglan nila maglakat sa snow kag batason ang grabe nga tugnaw. Sang ulihi, napriso si Brother Melnik sing tatlo ka tuig kag napahilayo sa iya asawa nga si Lidiya kag sa ila bata nga babayi nga isa pa lang ka tuig sadto. Bisan tinuig nga nag-antos si Anatoly kag ang iya pamilya, matutom sila gihapon nga nag-alagad kay Jehova. Subong, 82 anyos na si Anatoly kag nagaalagad bilang miembro sang Komite sang Sanga sa Central Asia. Pareho nanday Anatoly kag Lidiya, kabay nga himuon man naton ang aton bug-os nga masarangan sa pag-alagad kay Jehova, kag padayon nga magbatas.—Gal. 6:9.

14. Para mabaton ni Pablo ang padya, ano ang dapat niya himuon?

¹⁴ Sigurado si Pablo nga matapos niya ang palumba para sa kabuhi kag mabaton ang padya. Bilang isa ka hinaplas nga Cristiano, ginpaabot gid niya nga mabaton “ang padya, ang langitnon nga pagtawag sang Dios.” Pero, para mabaton niya ini, dapat sia padayon nga ‘magtinguha.’ (Fil. 3:14) Para mabuligan ang mga taga-Filipos nga magpokus para mabaton ang ila padya, naggamit si Pablo sang ilustrasyon.

15. Paano gingamit ni Pablo ang ilustrasyon parte sa pagkabanwahanon para mapalig-on ang mga Cristiano sa Filipos nga padayon nga ‘magtinguha’?

¹⁵ Ginpahanumdom ni Pablo sa mga taga-Filipos nga ang ila pagkabanwahanon didto sa langit. (Fil. 3:20) Ngaa importante nga dumdumon  nila ini? Sadto, gusto sang mga tawo nga mangin banwahanon sila sang Roma bangod madamo ini sang benepisyo. * Pero ang hinaplas nga mga Cristiano banwahanon sang mas maayo nga gobierno nga makahatag sing mas madamo nga benepisyo. Gamay gid ang balor sang pagkabanwahanon sang Roma kon ikumparar sa pagkabanwahanon sang gobierno sa langit! Gani, ginpalig-on ni Pablo ang mga taga-Filipos nga ‘magkabuhi subong mga banwahanon sa paagi nga takus sa maayong balita tuhoy sa Cristo.’ (Fil. 1:27, footnote) Subong, maayo gid nga halimbawa ang ginapakita sang hinaplas nga mga Cristiano samtang padayon sila nga nagatinguha nga matigayon ang kabuhi nga wala sing katapusan sa langit.

16. Sa langit man ukon sa duta ang aton paglaum, ano ang dapat naton padayon nga himuon suno sa Filipos 4:6, 7?

¹⁶ Sa langit man ukon sa paraiso sa duta ang aton paglaum, dapat kita padayon nga magtinguha nga matigayon ang kabuhi nga wala sing katapusan. Ano man ang aton mga kahimtangan, dapat naton kalimtan ang mga butang sa likuran kag indi naton pagtugutan ang bisan ano nga butang nga pauntaton kita sa pag-alagad kay Jehova. (Fil. 3:16) Mahimo nga nagabatyag kita nga daw kadugay matuman sang aton ginapaabot, ukon nagaluya na ang aton lawas. Mahimo nga tinuig na kita nga nagabatas sang mga pagtilaw kag mga paghingabot. Ano man ang imo kahimtangan, ‘indi magkabalaka sa bisan ano nga butang.’ Sa baylo, ipahibalo sa Dios ang imo mga pangabay kag pag-ampo, kag hatagan ka niya sing paghidait nga labaw pa sa imo mahunahuna.—Basaha ang Filipos 4:6, 7.

17. Ano ang binagbinagon naton sa masunod nga artikulo?

¹⁷ Kon lapit na lang matapos ang palumba, nagapanikasog pa gid ang nagadalagan para matapos ini. Dapat magpanikasog man kita nga matapos ang aton palumba kag magpokus kita sa matahom nga mga promisa sa palaabuton. Padayon naton nga himuon ang aton bug-os nga masarangan suno sa ginatugot sang aton kusog kag kahimtangan. Paano kita makapadayon sa pagbatas? Buligan kita sang masunod nga artikulo kon ano ang dapat naton unahon sa aton kabuhi kag kon paano naton ‘mapat-od ang mas importante nga mga butang.’—Fil. 1:9, 10.