1. Ano nga mga sakripisyo ang ginhimo sang madamo nga kauturan, kag ngaa ginhimo nila ini?

MINILYON sa katawhan sang Dios subong ang naghimo sang mga sakripisyo. Madamo nga kauturan ang nagdesisyon nga indi magpangasawa ukon magpamana. May mga mag-asawa nga nagdesisyon nga indi lang anay magbata. Kag ang pila ka pamilya nagpasimple sang ila kabuhi. Ginhimo nila ini bangod sang isa ka importante nga rason. Gusto nila nga alagaron si Jehova sa bug-os nila nga masarangan. Kontento sila sa ila kabuhi kag nagasalig sila nga amanan sila ni Jehova sang tanan nga kinahanglan nila. Amanan gid man bala sila ni Jehova? Huo. Ngaa masiling naton ini? Bangod ginhimo na ini sang una ni Jehova sa iya mga alagad. Halimbawa, ginpakamaayo niya si Abraham nga ‘amay sang tanan nga may pagtuo.’—Roma 4:11.

2. (a) Suno sa Hebreo 11:8-10, 16, ngaa handa si Abraham nga bayaan ang Ur? (b) Ano ang binagbinagon naton sa sini nga artikulo?

² Komportable ang kabuhi ni Abraham sa siudad sang Ur, pero handa sia nga isakripisyo ini. Ngaa? Kay ginahulat niya “ang siudad nga may matuod nga mga sadsaran.” (Basaha ang Hebreo 11:8-10, 16.) Ano ini nga “siudad”? Ano nga mga kabudlayan ang naeksperiensiahan ni Abraham samtang ginahulat niya nga matukod ini nga siudad? Kag paano naton mailog ang halimbawa ni Abraham kag ang halimbawa sang mga kauturan nga nag-ilog man sa iya?

3. Ano ang siudad nga ginahulat ni Abraham?

³ Ang siudad nga ginahulat ni Abraham amo ang Ginharian sang Dios. Si Jesucristo ang Hari sini nga Ginharian, kag kaupod niya nga magagahom ang 144,000 ka hinaplas nga mga Cristiano. Gintawag ni Pablo ini nga Ginharian nga “siudad sang buhi nga Dios,  ang langitnon nga Jerusalem.” (Heb. 12:22; Bug. 5:8-10; 14:1) Gintudluan ni Jesus ang iya mga disipulo nga ipangamuyo nga magkari ini nga Ginharian para matuman ang kabubut-on sang Dios sa duta subong sang sa langit.—Mat. 6:10.

4. Suno sa Genesis 17:1, 2, 6, ano lang ang nabal-an ni Abraham parte sa siudad, ukon Ginharian, nga ginpromisa sang Dios?

⁴ Nabal-an bala ni Abraham ang mga detalye parte sa Ginharian sang Dios? Wala. Sa sulod sang ginatos ka tuig, “sagrado nga likom” ini nga mga detalye. (Efe. 1:8-10; Col. 1:26, 27) Pero nabal-an ni Abraham nga mangin hari ang pila sa iya mga kaliwat bangod ginpromisa ini ni Jehova sa iya. (Basaha ang Genesis 17:1, 2, 6.) Mabakod gid ang pagtuo ni Abraham sa mga promisa sang Dios kay daw pareho lang nga nakita niya ang Hinaplas, ukon ang Mesias, nga amo ang mangin Hari sang Ginharian sang Dios. Amo ini ang rason kon ngaa ginsilingan ni Jesus ang mga Judiyo sang panahon niya: “Si Abraham nga inyo amay nagkasadya gid sa paglaum nga makita ang akon adlaw, kag nakita niya ini kag nagkasadya sia.” (Juan 8:56) Maathag nga kabalo si Abraham nga ang pila sa iya mga kaliwat magahari sa Ginharian nga ginpromisa ni Jehova.

5. Ngaa makasiling kita nga ginhulat ni Abraham ang siudad nga gindesinyo sang Dios?

⁵ Paano ginpakita ni Abraham nga handa sia sa paghulat sa siudad, ukon Ginharian, nga gindesinyo sang Dios? Una, wala niya ginhimo nga permanente nga puluy-an ang bisan ano nga ginharian sa duta. Nagasaylosaylo sia sang lugar, kag wala sia sing may ginsuportahan nga hari. Wala man si Abraham naghimo sang iya kaugalingon nga ginharian. Sa baylo, padayon niya nga gintuman si Jehova kag naghulat sia kon san-o tumanon ni Jehova ang Iya promisa. Ang mga ginhimo ni Abraham nagapakita nga tumalagsahon gid ang iya pagtuo kay Jehova. Binagbinagon naton ang pila ka kabudlayan nga naeksperiensiahan niya kag hibaluon naton kon ano ang matun-an naton sa iya halimbawa.

6. Ano ang masiling mo parte sa siudad sang Ur?

⁶ Ang siudad nga ginbayaan ni Abraham naamligan sing maayo. Ang mga tawo didto matawhay ang pagkabuhi, may tinun-an, kag manggaranon. Napalibutan sang mabakod nga pader ang siudad. May ginhimo man nga madalom nga alagyan sang tubig sa tatlo ka kilid sang siudad.  Ang mga taga-Ur kabalo magbasa kag magsulat kag sagad sa math. Kag posible gid nga madamo ang naganegosyo sa sini nga siudad bangod nakutkutan sa sini nga lugar ang mga dokumento parte sa negosyo. Ang mga balay diri human sa tisa. Napalitadahan ang mga dingding sini kag napintahan sing puti. Ang pila ka balay may 13 ukon 14 ka kuarto kag may bakante kag sementado nga lugar sa tunga.

7. Ngaa dapat magsalig si Abraham kay Jehova nga amligan niya sia kag ang iya pamilya?

⁷ Dapat magsalig si Abraham kay Jehova nga amligan niya sia kag ang iya pamilya. Ngaa? Dumduma nga naamligan si Abraham kag si Sara sa siudad sang Ur kag komportable ang ila kabuhi sa ila kaugalingon nga balay. Pero ginbayaan nila ini kag nag-istar sila sa mga tolda sa kaumhan sang Canaan. Wala na sang madamol nga pader kag madalom nga alagyan sang tubig nga makaamlig sa ila. Gani, mahapos lang sila salakayon sang iban.

8. Ano ang naeksperiensiahan ni Abraham?

⁸ Ginhimo ni Abraham ang kabubut-on sang Dios, pero may tion nga nabudlayan sia sa pag-aman sing pagkaon sa iya pamilya. Grabe gid ang tiggulutom sa lugar nga ginpakadtuan sa iya ni Jehova, gani ginsaylo anay ni Abraham ang iya pamilya sa Egipto. Pero sang ara na sila sa Egipto, gindala ang asawa ni Abraham sa Paraon, nga amo ang manuggahom sang sini nga pungsod. Sigurado nga nabalaka gid si Abraham, pero nadula ang iya kabalaka sang ginbalik sang Paraon si Sara sa bulig ni Jehova.—Gen. 12:10-19.

9. Ano nga mga problema sa pamilya ang naeksperiensiahan ni Abraham?

⁹ May mga problema ang pamilya ni Abraham. Indi makabata ang iya pinalangga nga asawa nga si Sara. Bangod sini, nasubuan gid sila sa sulod sang madamo nga tinuig. Sang ulihi, ginhatag ni Sara kay Abraham ang iya alagad nga babayi nga si Hagar. Ginhimo niya ini para makabata sila ni Abraham paagi kay Hagar. Pero sang ginbusong ni Hagar si Ismael, ginpakanubo niya si Sara. Mabudlay gid ini para kay Sara, gani ginpahalin niya si Hagar sa ila balay.—Gen. 16:1-6.

10. Ano ang natabo kay Ismael kag kay Isaac nga nagtilaw sang pagsalig ni Abraham kay Jehova?

¹⁰ Sang ulihi, nagbusong si Sara kag nakabata sila ni Abraham. Ginngalanan ni Abraham ang ila anak nga Isaac. Palangga ni Abraham ang iya duha ka anak nga si Ismael kag si Isaac. Pero bangod sang indi maayo nga pagtratar ni Ismael kay Isaac, napilitan si Abraham nga pahalinon sanday Ismael kag Hagar. (Gen. 21:9-14) Sang ulihi, ginpangabay ni Jehova si Abraham nga ihalad si Isaac. (Gen. 22:1, 2; Heb. 11:17-19) Sa sining duha ka hitabo, dapat magsalig si Abraham nga tumanon ni Jehova ang iya mga promisa parte sa iya duha ka anak.

11. Ngaa dapat mapinasensiahon nga maghulat si Abraham kay Jehova?

¹¹ Dapat mapinasensiahon nga maghulat si Abraham kay Jehova. Posible nga sobra na sia 70 anyos sang naghalin sila sang iya pamilya sa Ur. (Gen. 11:31–12:4) Mga isa ka gatos ka tuig sia nga nag-istar sa mga tolda sa lainlain nga lugar sa Canaan. Napatay si Abraham sa edad nga 175. (Gen. 25:7) Napatay sia antes natuman ang promisa ni Jehova sa iya nga ihatag sa iya mga kaliwat ang duta sang Canaan. Kag patay na sia sang gintukod ang siudad, ukon ang Ginharian sang Dios. Pero suno sa Biblia, napatay si Abraham nga “tigulang kag kontento.” (Gen. 25:8) Bisan pa sang mga kabudlayan nga naeksperiensiahan ni Abraham, mabakod gihapon ang iya pagtuo kag handa sia nga maghulat kay Jehova. Ngaa nabatas niya ang mga kabudlayan? Bangod sa bug-os nga kabuhi ni Abraham, gin-amligan sia ni Jehova kag ginkabig sia nga abyan.—Gen. 15:1; Isa. 41:8; Sant. 2:22, 23.

12. Ano ang aton ginahulat, kag ano ang binagbinagon naton?

¹² Pareho kay Abraham, ginahulat naton ang  siudad nga may matuod nga mga sadsaran. Pero, wala na naton ginahulat ang pagtukod sa sini. Kay man, natukod na ang Ginharian sang Dios sang 1914 kag nagagahom na ini sa langit. (Bug. 12:7-10) Ang ginahulat naton amo ang paggahom sini sa bug-os nga duta. Samtang ginahulat naton ini, mahimo makaeksperiensia kita sang madamo nga kabudlayan nga pareho sa naeksperiensiahan ni Abraham kag ni Sara. Nailog bala sang mga alagad ni Jehova sa aton tion subong ang halimbawa ni Abraham? Ang mga sugilanon sang kabuhi nga mabasa sa Ang Lalantawan nagapamatuod nga madamo nga kauturan subong ang may mabakod man nga pagtuo kag mapinasensiahon man nga nagahulat pareho kay Abraham kag kay Sara. Binagbinagon naton ang pila sa sini kag hibaluon naton kon ano ang matun-an naton sa ila.

13. Ano ang natun-an mo sa eksperiensia ni Brother Walden?

¹³ Mangin handa sa pagsakripisyo. Kon ang Ginharian sang Dios amo ang pinakaimportante sa aton kabuhi, dapat naton ilugon si Abraham nga nagsakripisyo para malipay sa iya ang Dios. (Mat. 6:33; Mar. 10:28-30) Binagbinaga ang halimbawa ni Brother Bill Walden. * Sang 1942, sang manuggradweyt si Bill sa isa ka unibersidad sa United States sa kurso nga architectural engineering, nagtuon sia sang Biblia upod sa mga Saksi ni Jehova. Ginsilingan si Bill sang isa niya ka propesor nga may nagahulat na sa iya nga obra pagkatapos sang ila gradwasyon, pero wala ini ginbaton ni Bill. Ginpaathag niya nga gusto niya nga alagaron ang Dios sing bug-os sa baylo nga batunon ang obra nga daku ang sueldo. Sang ulihi, ginpatawag si Bill para magsoldado. Matinahuron sia nga nangindi, pero ginmultahan sia sing 10,000 ka dolyares kag ginsentensiahan nga mapriso sing lima ka tuig. Ginpagua sia sa prisuhan pagligad sang tatlo ka tuig. Sang ulihi, nakaeskwela sia sa Gilead School kag nangin misyonero sia sa Africa. Napangasawa ni Bill si Eva kag magkaupod sila nga nag-alagad sa Africa. Nagakinahanglan gid ini sang mga sakripisyo. Pagligad sang pila ka tuig, nagbalik sila sa United States para  atipanon ang iloy ni Bill. Parte sa iya kabuhi, nagsiling si Bill: “Nagalumawlumaw ang akon mga mata kon madumduman ko ang tumalagsahon nga pribilehiyo nga mag-alagad kay Jehova sing sobra 70 ka tuig. Pirme ko sia ginapasalamatan sa paggiya sa akon nga himuon nga sentro sang akon kabuhi ang pag-alagad sa iya.” Masarangan mo man bala nga mag-alagad sing bug-os tion?

14-15. Ano ang natun-an mo sa eksperiensia nanday Brother kag Sister Apostolidis?

¹⁴ Indi paghunahunaa nga indi ka na makaeksperiensia sang mga problema. Matun-an naton sa halimbawa ni Abraham nga bisan pa ang mga nagaalagad kay Jehova sa bug-os nila nga kabuhi makaeksperiensia gihapon sang mga problema. (Sant. 1:2; 1 Ped. 5:9) Amo ini ang naeksperiensiahan ni Brother Aristotelis Apostolidis. * Nabawtismuhan sia sang 1946 sa Greece. Sang 1952, nangin nobya niya si Sister Eleni, kag pareho nila nga gusto nga alagaron si Jehova sing bug-os. Pero, nagmasakit si Eleni bangod may tumor sia sa utok. Gin-operahan sia kag nakuha ang tumor. Pero pagligad lang sang pila ka tuig pagkatapos nila magpakasal, nagtubo liwat ang tumor. Gin-operahan sia liwat sang mga doktor, pero may parte sang lawas ni Eleni nga na-paralyze, kag pukol na sia maghambal. Mapisan gihapon sia magbantala bisan pa may balatian sia kag bisan pa ginahingabot sila sadto sang gobierno.

¹⁵ Gin-atipan ni Aristotelis ang iya asawa sing 30 ka tuig. Samtang ginahimo niya ini, nagaalagad man sia bilang isa ka gulang, miembro sia sang mga assembly committee, kag nagbulig sia nga mapatindog ang Assembly Hall. Dayon sang 1987, samtang nagabantala si Eleni, naigo sia sang salsalon nga puertahan nga gulpi lang nagsira. Na-coma sia sing tatlo ka tuig kag dayon napatay sia. Amo ini ang ginsiling ni Aristotelis parte sa iya naeksperiensiahan: “Sa sulod sang madamo nga tinuig nakaeksperiensia ako sang madamo nga problema. Wala ko gid ginapaabot ang pila sa sini, gani kinahanglan ko nga magbatas kag mangin mabakod. Pero pirme ako ginahatagan ni Jehova sang kinahanglan ko nga kusog para masarangan ko ini nga mga problema.” (Sal. 94:18, 19) Palangga gid ni Jehova ang iya mga alagad nga nagahimo sang ila  bug-os nga masarangan bisan pa sang ila mga problema.

16. Ano ang maayo nga laygay ni Brother Knorr sa iya asawa?

¹⁶ Magpokus sa palaabuton. Nagpokus si Abraham sa mga padya nga ihatag sa iya ni Jehova sa palaabuton, kag nakabulig ini sa iya nga mabatas niya ang mga problema. Nagpokus si Sister Audrey Hyde sa iya ginalauman nga matabo sa palaabuton. Ang iya una nga bana nga si Nathan H. Knorr napatay bangod sa kanser, kag ang iya ikaduha nga bana nga si Glenn Hyde nagbalatian sing Alzheimer. * Mga pila ka semana antes napatay si Brother Knorr, may ginsiling sia sa iya asawa nga nakabulig sa iya nga magbatas. Si Sister Hyde nagsiling: “Ginpahanumdom ako ni Nathan: ‘Sa tapos sang kamatayon, sigurado ang aton paglaum, kag indi na gid kita mag-antos.’ Nian ginpalig-on niya ako: ‘Tulok ka sa unahan, kay ang imo padya yara pa sa palaabuton.’ . . . Nagdugang sia: ‘Mangin masako—gamita ang imo kabuhi sa pagbulig sa iban. Magabulig ini sa imo nga magmalipayon.’” Maayo gid ini nga laygay nga mangin masako sa pagbulig sa iban kag ‘magkasadya sa paglaum.’—Roma 12:12.

17. (a) Ngaa dapat mas magpokus pa gid kita sa palaabuton? (b) Ano ang ginasiling sang Miqueas 7:7 nga dapat naton himuon para mabaton naton ang mga pagpakamaayo sa palaabuton?

¹⁷ Dapat mas magpokus pa gid kita sa palaabuton. Ang mga nagakatabo sa kalibutan nagapamatuod nga ara na kita sa ulihi nga bahin sang katapusan nga mga adlaw sang sini nga sistema. Sa indi na lang madugay, indi na naton kinahanglan nga hulaton ang Ginharian sang Dios bangod magagahom na ini sa bug-os nga duta. Madamo gid kita nga mabaton nga pagpakamaayo kag isa sa sini amo ang pagbanhaw sang aton napatay nga mga pinalangga. Sa sina nga tion, padyaan ni Jehova si Abraham bangod sang iya pagtuo kag mapinasensiahon nga paghulat. Banhawon niya sia kag ang iya pamilya sa duta. Gusto mo bala nga abiabihon sila? Mahimo mo ini kon ilugon mo si Abraham. Mangin handa sa pagsakripisyo para sa Ginharian sang Dios, pabakura ang imo pagtuo bisan pa may mga problema, kag mapinasensiahon nga maghulat kay Jehova.—Basaha ang Miqueas 7:7.