TULUN-AN NGA ARTIKULO 34
Importante Ka sa Kongregasyon ni Jehova!
“Subong nga ang lawas isa apang may madamo nga bahin, kag ang tanan nga bahin sini nga lawas, bisan pa madamo, isa lang ka lawas, amo man ang lawas sang Cristo.”—1 COR. 12:12.
AMBAHANON 101 Pag-alagad nga May Paghiusa
ANG BINAGBINAGON SA SINI NGA ARTIKULO *
1. Ano ang aton pribilehiyo?
ISA gid ka pribilehiyo nga mangin bahin sang kongregasyon ni Jehova. Nalipay gid kita nga kaupod naton ang aton mga kauturan sa pagsimba kay Jehova kag nagahatag ini sa aton sing kalinong. May responsibilidad bala ang kada isa sa aton sa kongregasyon?
2. Ano nga ilustrasyon ang gingamit ni apostol Pablo sa pila niya ka sulat?
2 Madamo kita sing matun-an parte sa sini nga topiko kon binagbinagon naton ang ilustrasyon ni apostol Pablo nga gingamit niya sa pila niya ka sulat. Sa mga sulat ni Pablo, ginpaanggid niya ang kongregasyon sa lawas sang tawo. Ginpaanggid man niya ang kada isa sa kongregasyon sa mga parte sang lawas.—Roma 12:4-8; 1 Cor. 12:12-27; Efe. 4:16.
3. Ano ang tatlo ka leksion nga binagbinagon naton sa sini nga artikulo?
3 Sa sini nga artikulo, binagbinagon naton ang tatlo ka importante nga leksion nga matun-an naton sa ilustrasyon ni Pablo. Una, matun-an naton nga ang kada isa sa aton may responsibilidad * sa kongregasyon ni Jehova. Ikaduha, binagbinagon naton ang puede naton himuon kon nagabatyag kita nga wala kita sing mahimo para sa kongregasyon. Kag ikatlo, binagbinagon naton kon ngaa dapat naton himuon ang aton responsibilidad sa kongregasyon sang Dios sa bug-os naton nga masarangan.
ANG KADA ISA MAY RESPONSIBILIDAD SA KONGREGASYON NI JEHOVA
4. Ano ang ginatudlo sa aton sang Roma 12:4, 5?
4 Ang una nga leksion nga matun-an naton sa ilustrasyon ni Pablo amo ini: Ang kada isa sa aton may importante nga responsibilidad sa pamilya ni Jehova. Gin-umpisahan ni Pablo ang iya ilustrasyon paagi sa pagsiling: “Subong nga ang lawas may madamo nga bahin, apang indi pareho ang ginahimo sini nga mga bahin, kita man isa ka lawas nga nahiusa sa Cristo bisan pa madamo kita, kag mga bahin man kita nga nagaalangot sa isa kag isa.” (Roma 12:4, 5) Ano ang buot silingon ni Pablo? Lainlain ang responsibilidad naton sa kongregasyon, pero importante ang kada isa sa aton.
Lainlain ang responsibilidad naton sa kongregasyon, pero importante ang kada isa sa aton (Tan-awa ang parapo 5-12) *
5. Ano ang ginhatag ni Jehova sa kongregasyon?
5 Kon ginaistoryahan ang parte sa mga may responsibilidad sa kongregasyon, mahimo nga hunahunaon mo dayon ang mga nagapanguna. (1 Tes. 5:12; Heb. 13:17) Ginhatagan gid man ni Jehova sang “mga dulot nga mga lalaki” ang iya kongregasyon paagi sa Cristo. (Efe. 4:8) Nalakip sa “mga dulot nga mga lalaki” ang mga miembro sang Nagadumala nga Hubon, mga kabulig sang Nagadumala nga Hubon, mga miembro sang Branch Committee, mga manugtatap sang sirkito, mga nagatudlo sa teokratiko nga mga eskwelahan, mga gulang sa kongregasyon, kag mga ministeryal nga alagad. Ini nga mga brother gintangdo sang balaan nga espiritu para atipanon ang hamili nga mga karnero ni Jehova kag para palig-unon ang kongregasyon.—1 Ped. 5:2, 3.
6. Suno sa 1 Tesalonica 2:6-8, ano ang ginapanikasugan nga himuon sang mga brother nga gintangdo sang balaan nga espiritu?
6 May mga brother nga gintangdo sang balaan nga espiritu para himuon ang lainlain nga responsibilidad. Mapaanggid naton sila sa lainlain nga parte sang lawas, pareho sang mga kamot kag mga tiil, nga nagabuligay para sa kaayuhan sang bilog nga lawas. Ini nga mga brother nagapangabudlay man para sa kaayuhan sang bilog nga kongregasyon. Ginahimo nila ini indi para dayawon sila. Sa baylo, ginapanikasugan nila nga palig-unon ang mga kauturan. (Basaha ang 1 Tesalonica 2:6-8.) Nagapasalamat gid kita kay Jehova kay ginhatagan niya kita sang mga brother nga nagahimo sang ila mga responsibilidad kag nagauna sang kaayuhan sang iban.
7. Ano ang mga pagpakamaayo sang mga nagaalagad sing bug-os tion?
7 Ang pila ka kauturan sa kongregasyon mahimo itangdo bilang misyonero, espesyal payunir, ukon regular payunir. May mga kauturan sa bilog nga kalibutan nga nagabantala kag nagatudlo sa iban sing bug-os tion. Paagi sa sini, madamo sila sang nabuligan nga mangin disipulo ni Cristo Jesus. Ang kalabanan nga nagaalagad kay Jehova sing bug-os tion indi manggaranon, pero ginapakamaayo gid sila ni Jehova. (Mar. 10:29, 30) Palangga gid naton ini nga mga kauturan, kag nagapasalamat gid kita nga bahin sila sang kongregasyon.
8. Ngaa hamili kay Jehova ang kada manugbantala sang maayong balita?
8 Ang gintangdo lang bala nga mga brother kag ang mga nagaalagad sing bug-os tion ang may responsibilidad sa kongregasyon? Indi. Ang kada manugbantala sang maayong balita importante sa Dios kag sa kongregasyon. (Roma 10:15; 1 Cor. 3:6-9) Kay man, ang isa sa pinakaimportante nga katuyuan sang kongregasyon amo ang pagtudlo sa iban para mangin disipulo sila sang aton Ginuong Jesucristo. (Mat. 28:19, 20; 1 Tim. 2:4) Ginatinguhaan sang tanan nga bawtismado kag indi bawtismado nga manugbantala sa kongregasyon nga unahon sa ila kabuhi ini nga hilikuton.—Mat. 24:14.
9. Ngaa ginapabaloran naton ang aton mga kauturan nga babayi?
9 Ginapadunggan ni Jehova ang mga sister sa kongregasyon paagi sa paghatag sa ila sang importante nga hilikuton. Ginapabaloran niya ang mga asawa, mga iloy, mga balo nga babayi, kag mga dalaga nga matutom nga nagaalagad sa iya. Mabasa sa Biblia ang madamo nga halimbawa sang mga babayi nga matutom nga nag-alagad sa Dios. Gindayaw sila bangod sa ila kaalam, pagtuo, kapisan, kaisog, kaalwan, kag maayo nga mga buhat. (Luc. 8:2, 3; Binu. 16:14, 15; Roma 16:3, 6; Fil. 4:3; Heb. 11:11, 31, 35) Nagapasalamat gid kita kay Jehova kay may mga kauturan nga babayi sa aton mga kongregasyon nga may amo man sini nga mga kinaiya.
10. Ngaa ginapabaloran naton ang mga tigulang?
10 Nalipay man kita nga makaupod sa kongregasyon ang tigulang na nga mga kauturan. Sa pila ka kongregasyon, may tigulang na nga mga kauturan nga matutom nga nagaalagad kay Jehova sa bilog nila nga kabuhi. Pero may iban naman nga nangin Saksi sang tigulang na sila. Madamo sa ila ang may balatian bangod sang ila edad. Bangod sini, diutay na lang ang ila mahimo sa kongregasyon kag sa pagbantala. Pero ginahimo gid nila ang ila bug-os nga masarangan para magbantala, magpalig-on, kag maghanas sa iban. Madamo gid kita sang matun-an sa ila eksperiensia. Hamili gid sila kay Jehova kag sa aton.—Hulu. 16:31.
11-12. Paano ka napalig-on sang mga pamatan-on sa inyo kongregasyon?
11 Hunahunaa man ang mga pamatan-on. Madamo sila sang mga problema bangod ginaimpluwensiahan sila sang kalibutan nga ginakontrol ni Satanas nga Yawa kag sang iya malain nga mga ginatudlo. (1 Juan 5:19) Pero, mapalig-on gid kita sa ila mga komento sa mga miting, sa ila pagbantala, kag sa ila kaisog nga ipaathag ang ila mga ginapatihan. Mga pamatan-on, importante gid kamo sa kongregasyon ni Jehova.—Sal. 8:2.
12 Pero ang pila sa aton mga kauturan nagabatyag nga indi sila importante sa kongregasyon. Ano ang makabulig para mangin kumbinsido gid kita nga importante kita sa kongregasyon? Binagbinagon naton ini.
IMPORTANTE KA SA KONGREGASYON
13-14. Ngaa nagahunahuna ang iban nga indi sila importante sa kongregasyon?
13 Ang ikaduha nga leksion sa ilustrasyon ni Pablo makapahunahuna sa aton sang isa ka problema nga naeksperiensiahan sang madamo nga kauturan. Nagabatyag sila nga indi sila importante sa kongregasyon. Si Pablo nagsulat: “Kon ang tiil magsiling, ‘Bangod indi ako kamot, indi ako bahin sang lawas,’ wala ina nagahimo sa tiil nga indi bahin sang lawas. Kag kon ang dulunggan magsiling, ‘Bangod indi ako mata, indi ako bahin sang lawas,’ wala ina nagahimo sa dulunggan nga indi bahin sang lawas.” (1 Cor. 12:15, 16) Ano ang buot silingon ni Pablo?
14 Kon ikumparar mo ang imo kaugalingon sa iban nga kauturan, mahimo hunahunaon mo nga indi ka importante sa kongregasyon. Ang pila ka kauturan sa kongregasyon maayo magtudlo, ang pila maayo mag-organisar, kag ang pila maayo magpalig-on. Mahimo nagabatyag ka nga indi mo masarangan himuon ang ila ginahimo. Ginapakita sini nga mapainubuson ka kag ginabaton mo ang imo limitasyon. (Fil. 2:3) Pero kon pirme mo ikumparar ang imo kaugalingon sa mga kauturan nga may tumalagsahon nga mga ikasarang, magaluya ang imo buot. Kag pareho sa ginsambit ni Pablo, mahimo magahunahuna ka nga wala ka gid sing mabulig sa kongregasyon. Ano ang himuon mo para indi mo ini paghunahunaon?
15. Suno sa 1 Corinto 12:4-11, paano naton dapat tamdon ang aton mga ikasarang?
15 Binagbinaga ini: Paagi sa balaan nga espiritu, ginhatagan ni Jehova sang mga dulot ang pila ka Cristiano sang unang siglo. Pero indi palareho ang nabaton nila nga mga dulot. (Basaha ang 1 Corinto 12:4-11.) Ginhatagan sila ni Jehova sang lainlain nga mga dulot kag mga ikasarang, pero importante ang kada isa sa ila. Subong, wala na kita nagabaton sang mga dulot sang balaan nga espiritu paagi sa milagro. Pero wala nagbag-o ang pagtamod ni Jehova. Importante kita tanan sa iya bisan pa lainlain ang aton mga ikasarang.
16. Ano ang ginlaygay ni apostol Pablo nga dapat naton iaplikar?
16 Sa baylo nga ikumparar ang aton kaugalingon sa iban nga kauturan, dapat naton iaplikar ang laygay ni apostol Pablo: “Dapat usisaon sang kada isa ang iya kaugalingon nga hinimuan, kag kon makita niya nga maayo ini magkalipay sia, apang indi niya dapat pag-ipaanggid ini sa hinimuan sang iban.”—Gal. 6:4.
17. Paano kita makabenepisyo kon sundon naton ang laygay ni Pablo?
17 Kon sundon naton ang laygay ni Pablo kag usisaon naton ang aton kaugalingon nga hinimuan, makita naton nga may ara kita mga ikasarang nga wala sa iban. Halimbawa, ang isa ka gulang mahimo nga indi masyado maayo magpamulongpulong, pero maayo sia mag-Bible study sa mga interesado kag sa pagbulig sa ila nga mangin disipulo. Ukon mahimo nga indi sia pareho sa iban nga gulang nga maayo mag-organisar, pero mahigugmaon sia kag wala natahap ang mga kauturan nga magpalapit sa iya para mangayo sang laygay nga base sa Biblia. Ukon mahimo nga kilala sia nga maabiabihon. (Heb. 13:2, 16) Kon nabal-an naton ang aton mga ikasarang, malipay gid kita kay may mabulig kita sa kongregasyon. Kag indi kita mahisa sa aton mga kauturan nga may mga ikasarang nga wala sa aton.
18. Paano naton mapauswag ang aton mga ikasarang?
18 Ano man ang aton responsibilidad sa kongregasyon, dapat naton pauswagon ang aton pag-alagad kag ang aton mga ikasarang. Para mabuligan kita nga mag-uswag, ginahanas kita ni Jehova paagi sa iya organisasyon. Halimbawa, ginatudluan kita sa aton midweek meeting kon paano kita mangin mas epektibo sa aton pagministeryo. Ginaaplikar mo bala ini nga paghanas?
19. Ano ang himuon mo para makaeskwela ka sa School for Kingdom Evangelizers?
19 Ang isa pa ka dalayawon nga programa sang paghanas amo ang School for Kingdom Evangelizers. Puede makaeskwela sa sini nga eskwelahan ang mga kauturan nga nagaalagad sing bug-os tion kag nagaedad sing 23 asta 65. Mahimo nagahunahuna ka nga daw indi mo ini masarangan. Pero imbes nga listahon ang mga rason ngaa indi ka makaeskwela, listahon mo ang mga rason ngaa gusto mo mag-eskwela. Dayon maghimo sing plano nga makabulig sa imo nga makaeskwela sa sini nga eskwelahan. Sa bulig ni Jehova kag sa imo pagpanikasog, masarangan mo nga himuon ang abi mo indi mo gid mahimo.
GAMITA ANG IMO MGA IKASARANG PARA PALIG-UNON ANG KONGREGASYON
20. Ano ang matun-an naton sa Roma 12:6-8?
20 Ang ikatlo nga leksion nga matun-an naton sa ilustrasyon ni Pablo mabasa naton sa Roma 12:6-8. (Basaha.) Ginsambit diri liwat ni Pablo nga ang kada isa sa kongregasyon may lainlain nga mga dulot. Pero sa sini nga tion, nagsiling sia nga dapat naton gamiton ang aton mga ikasarang para palig-unon ang kongregasyon.
21-22. Ano ang matun-an naton sa eksperiensia ni Robert kag ni Felice?
21 Binagbinaga ang eksperiensia sang isa ka brother nga tawgon naton nga Robert. Nagaalagad sia sa iban nga pungsod. Dayon gin-asayn sia nga mag-alagad sa Bethel sa iya natawhan nga pungsod. Ginsilingan sia nga ginbag-o ang iya asaynment indi bangod may nahimo sia nga sala. Pero nagsiling sia: “Mga pila man ka bulan nga nasubuan ako bangod ginahunahuna ko nga wala ko nahimo sing maayo ang akon asaynment. May mga tion nga daw gusto ko mag-untat sa pag-alagad sa Bethel.” Paano sia nangin malipayon liwat? Ginpahanumdom sia sang isa ka utod nga pareho niya nga gulang nga ginhanas kita ni Jehova sa aton mga asaynment sang una para mahimo naton sing maayo ang asaynment naton subong. Narealisar ni Robert nga imbes nga pamensaron ang nagligad, dapat sia magpokus sa kon ano ang mahimo niya subong.
22 Daw pareho man sa sini ang naeksperiensiahan ni Brother Felice Episcopo. Naggradweyt sia kag ang iya asawa sa Gilead sang 1956 kag nag-alagad bilang manugtatap sang sirkito sa Bolivia. Sang 1964, nabun-ag ang ila bata. Si Felice nagsiling: “Nabudlayan kami nga bayaan ang amon asaynment nga nanamian gid namon. Mga isa man ka tuig nga nasubuan ako kag nagluya ang akon buot. Pero sa bulig ni Jehova, nabag-o ko ang akon panimuot kag nagpokus ako sa akon bag-o nga responsibilidad bilang isa ka ginikanan.” Nabatyagan mo man bala ang ginbatyag ni Robert kag ni Felice? Nasubuan ka bala bangod nagbag-o ang imo asaynment sa pag-alagad? Mangin malipayon ka kon magpokus ka sa kon ano ang mahimo mo subong sa pag-alagad kay Jehova kag sa imo mga kauturan. Kon pirme mo ginagamit ang imo mga ikasarang para buligan ang iban, malipay ka gid kay mapalig-on mo ang kongregasyon.
23. Ano ang dapat naton himuon, kag ano ang binagbinagon naton sa masunod nga artikulo?
23 Hamili kay Jehova ang kada isa sa aton. Gusto niya nga mabatyagan naton nga bahin gid kita sang iya pamilya. Kon pamalandungan naton kon ano ang puede naton himuon para palig-unon ang aton mga kauturan kag dayon himuon naton ini, malikawan naton nga maghunahuna nga indi kita importante sa kongregasyon. Pero paano naman naton ginatamod ang iban sa kongregasyon? Paano naton mapakita nga palangga naton sila? Binagbinagon ini sa masunod nga artikulo.
AMBAHANON 24 Mataklad Kita sa Bukid ni Jehova
^ par. 5 Gusto naton tanan mabatyagan nga importante kita kay Jehova. Pero kon kaisa, nagabatyag kita nga wala kita sing mahimo para sa iya. Buligan kita sini nga artikulo nga mahangpan nga importante ang kada isa sa aton sa kongregasyon.
^ par. 3 DUGANG NGA PAATHAG: Responsibilidad sang kada isa sa aton nga pabakuron ang kongregasyon ni Jehova. Mahimo naton ini tanan kay wala ini nagadepende sa aton rasa, manggad, pamilya, kultura, ukon ineskwelahan.
^ par. 62 MGA PIKTYUR: Ginapakita sang tatlo ka piktyur ang nagakatabo antes, sa tion, kag pagkatapos sang miting sang kongregasyon. Una nga piktyur: Ginaabiabi sang isa ka gulang ang bisita, ginaplastar sang pamatan-on nga brother ang mga gamit para sa sound system, kag ginaistorya sang isa ka sister ang tigulang na nga sister. Ikaduha nga piktyur: Ang mga pamatan-on kag mga tigulang nagabayaw sang ila kamot para magkomento sa Pagtinuon sa Ang Lalantawan. Ikatlo nga piktyur: Nagabulig ang mag-asawa sa pagtinlo sang Kingdom Hall. Ginabuligan sang isa ka iloy ang iya bata sa paghulog sang amot sa donation box. Ginasigurado sang pamatan-on nga brother nga mahipid kag matinlo ang mga literatura, kag ginapalig-on sang isa ka brother ang tigulang na nga sister.
