1. Ano ang ginhatag ni Jehova sa iya matutom nga mga alagad?

BANGOD sang gugma ni Jehova, ginhatagan niya ang iya matutom nga mga alagad sang responsibilidad sa iya kongregasyon. Bisan pa lainlain ang aton responsibilidad, importante kita tanan kag kinahanglan naton ang isa kag isa. Ginabuligan kita ni apostol Pablo nga mahangpan nga importante ini. Paano?

2. Suno sa Efeso 4:16, ngaa dapat naton pabaloran ang kada isa kag ngaa dapat kita magbuligay?

² Sa teksto nga ginbasihan sini nga artikulo, maathag nga nagsiling si Pablo nga wala sa aton nga makasiling sa isa ka alagad ni Jehova: “Indi ko ikaw kinahanglan.” (1 Cor. 12:21) Para indi madula ang paghidait sa kongregasyon, dapat naton pabaloran ang kada isa kag dapat kita magbuligay. (Basaha ang Efeso 4:16.) Kon nahiusa kita kag nagabuligay, nagauswag ang kongregasyon kag mabatyagan sang tanan ang pagpalangga sang kada isa.

3. Ano ang binagbinagon naton sa sini nga artikulo?

³ Paano naton mapakita nga ginarespeto naton ang iban nga kauturan sa kongregasyon? Sa sini nga artikulo, binagbinagon naton kon paano mapakita sang mga gulang nga ginarespeto nila ang pareho nila nga mga gulang. Dayon, binagbinagon naton kon paano naton mapakita nga ginapabaloran naton ang aton mga kauturan nga soltero kag dalaga. Kag tun-an naton kon paano naton mapakita nga palangga naton ang mga kauturan nga indi pa masyado kabalo sang aton lenguahe.

4. Ano ang ginlaygay ni Pablo sa Roma 12:10 nga dapat sundon sang mga gulang?

⁴ Ang tanan nga gulang sa kongregasyon gintangdo sang balaan nga espiritu ni Jehova. Pero ang kada isa may lainlain nga ikasarang. (1 Cor. 12:17, 18) Ang iban nga gulang mahimo nga bag-o pa lang gintangdo, gani diutay pa lang ang ila eksperiensia sa sini nga responsibilidad.  Ang iban limitado na lang ang mahimo bangod sa ila edad kag problema sa panglawas. Pero, indi dapat paghunahunaon sang isa ka gulang nga wala sing mabulig ang iban nga mga gulang kay daw pareho lang nga nagasiling sia, “Indi ko kamo kinahanglan.” Sa baylo, dapat sundon sang tanan nga gulang ang laygay ni Pablo sa Roma 12:10.—Basaha.

5. Paano mapakita sang mga gulang nga ginarespeto nila ang pareho nila nga mga gulang, kag ngaa importante nga himuon nila ini?

⁵ Ginapakita sang mga gulang nga ginarespeto nila ang pareho nila nga mga gulang kon ginapamatian nila sing maayo ang isa kag isa. Importante gid ini kon nagamiting ang mga gulang para istoryahan ang serioso nga mga butang. Ngaa? Ang Oktubre 1, 1988, nga The Watchtower nagsiling: “Dapat nahangpan sang mga gulang nga puede gamiton ni Jesus ang balaan nga espiritu para buligan ang bisan sin-o sa ila nga magpanugda sang mga prinsipio sa Biblia nga makabulig sa ila kon ano ang dapat nila himuon. (Binu. 15:6-15) Indi lang isa ka gulang ang ginabuligan sang balaan nga espiritu, kundi tanan nga gulang sa kongregasyon.”

6. Paano mapakita sang mga gulang nga nagabuligay sila kag nahiusa, kag paano makabenepisyo ang kongregasyon kon himuon nila ini?

⁶ Kon ginarespeto sang isa ka gulang ang pareho niya nga mga gulang, ginalikawan niya nga sia pirme ang una nga maghambal sa ila mga miting. Ginalikawan niya nga sia lang pirme ang maghambal kag wala sia nagainsister nga husto pirme ang iya opinyon. Sa baylo, ginahambal niya ang iya panghunahuna sa mapainubuson nga paagi. Ginapamatian niya sing maayo ang ginasiling sang iban. Labaw sa tanan, handa sia nga magpagiya sa mga prinsipio sang Biblia kag magsunod sa mga panuytoy sang “matutom kag mainandamon nga ulipon.” (Mat. 24:45-47) Kon ang mga gulang nagapakita sang gugma kag respeto sa isa kag isa sa tion sang ila miting, buligan sila sang balaan nga espiritu sang Dios nga makahimo sang mga desisyon nga makapalig-on sang kongregasyon.—Sant. 3:17, 18.

7. Paano gintamod ni Jesus ang mga soltero kag dalaga?

⁷ Sa mga kongregasyon, may mga mag-asawa kag mga pamilya. Pero may mga kauturan man  nga soltero kag dalaga. Paano naton dapat tamdon ang mga soltero kag dalaga? Binagbinaga kon paano sila gintamod ni Jesus. Sa tion sang ministeryo ni Jesus diri sa duta, wala sia nagpangasawa. Gingamit niya ang iya tion sa iya asaynment kag nagpokus sia sa sini. Wala gid gintudlo ni Jesus nga dapat magpangasawa ukon magpamana ang mga Cristiano. Kag wala man niya gintudlo nga dapat sila magpabilin nga soltero ukon dalaga. Pero nagsiling sia nga may pila nga nagdesisyon nga indi magpangasawa ukon magpamana. (Mat. 19:11, 12) Ginrespeto ni Jesus ang mga wala nagpangasawa ukon nagpamana. Wala ginhunahuna ni Jesus nga may kulang sa ila kabuhi ukon mas maayo ang mga mag-asawa sangsa ila.

8. Suno sa 1 Corinto 7:7-9, ano ang ginpalig-on ni Pablo nga binagbinagon sang mga Cristiano?

⁸ Pareho kay Jesus, wala man nagpangasawa si apostol Pablo sa tion sang iya ministeryo. Wala gid gintudlo ni Pablo nga isa ka sala kon magpangasawa ukon magpamana ang isa ka Cristiano. Kabalo sia nga desisyon ini sang kada isa. Pero, ginpalig-on ni Pablo ang mga Cristiano nga binagbinagon kon bala masarangan nila nga makapadayon sa pag-alagad kay Jehova bilang soltero ukon dalaga. (Basaha ang 1 Corinto 7:7-9.) Wala ginpakanubo ni Pablo ang mga Cristiano nga soltero kag dalaga. Ginpili pa gani niya ang pamatan-on nga si Timoteo nga isa ka soltero para atipanon ang mabudlay nga mga asaynment. * (Fil. 2:19-22) Gani, may asawa man ang isa ka brother ukon wala, indi gid husto nga amo lang ini ang basihan kon bala hatagan sia sang asaynment ukon indi.—1 Cor. 7:32-35, 38.

9. Paano naton dapat tamdon ang parte sa pagpangasawa ukon pagpamana kag ang pagpabilin nga soltero ukon dalaga?

⁹ Wala gintudlo ni Jesus kag ni Pablo nga dapat gid magpangasawa ukon magpamana ang isa ka Cristiano. Kag wala man nila gintudlo nga dapat magpabilin nga soltero ukon dalaga ang isa ka Cristiano. Gani, paano naton dapat tamdon ang parte sa pagpangasawa ukon pagpamana kag ang pagpabilin nga soltero ukon dalaga? May sabat sa sini nga pamangkot ang Oktubre 1, 2012, nga Ang Lalantawan. Nagsiling ini: “Ang pagminyo kag pagkadiminyo regalo halin sa Dios. . . . Wala [ginatamod ni Jehova ang pagkadiminyo] nga makahuluya ukon makapasubo.” Gani, dapat naton respetuhon ang mga soltero kag mga dalaga sa aton kongregasyon.

10. Paano naton mapakita nga ginarespeto naton ang aton mga kauturan nga soltero kag dalaga?

¹⁰ Paano naton mapakita nga ginarespeto naton ang balatyagon sang aton mga kauturan nga soltero kag dalaga? Dapat naton dumdumon nga ang pila ka Cristiano nagdesisyon nga indi magpangasawa ukon magpamana. Ang iban gusto man  magpangasawa ukon magpamana, pero wala pa sila sing nakita nga gusto nila pangasaw-on ukon pamanahon. Ang iban naman balo na. Nagakaigo bala nga pamangkuton naton sila kon ngaa wala sila nagpangasawa ukon nagpamana? Ukon nagakaigo bala nga silingan naton sila nga buligan naton sila nga makakita sang palangasaw-on ukon palamanhon? Mahimo nga may pila ka soltero ukon dalaga nga magsiling nga buligan naton sila. Pero kon indi sila magsiling, ano ayhan ang mabatyagan nila kon silingan naton sila nga buligan naton sila nga makakita sang palangasaw-on ukon palamanhon? (1 Tes. 4:11; 1 Tim. 5:13) Binagbinagon naton ang ginsiling sang pila ka matutom nga soltero kag dalaga.

11-12. Ano ang aton mga ginahimo nga mahimo magpaluya sang buot sang mga soltero kag dalaga?

¹¹ Para sa isa ka soltero nga manugtatap sang sirkito nga maayo gid sa iya asaynment, madamo sang benepisyo ang mga wala sing asawa. Pero, ginapamangkot sia sang mga kauturan: “Ngaa wala ka pa nangasawa?” Nagsiling sia nga makapaluya gid ini sang buot bisan pa gusto lang nila magbulig. Ang isa ka soltero nga nagaalagad sa Bethel nagsiling: “Kon kaisa, ginapabatyag sa akon sang mga kauturan nga makaluluoy ang mga wala sing asawa ukon bana. Bangod sini, daw isa ka problema ang pagpabilin nga soltero ukon dalaga, imbes nga isa ka regalo.”

¹² Ang isa ka dalaga nga nagaalagad sa Bethel nagsiling: “Ang pila ka kauturan nagahunahuna nga ang tanan nga soltero kag dalaga gusto gid magpangasawa ukon magpamana. Nagahunahuna man sila nga gusto gid sang mga soltero kag dalaga ang mga tipontipon para makapangita sila sang palangasaw-on ukon palamanhon. Isa ka bes, nagkadto ako sa isa ka lugar sa amon pungsod kay may asaynment ako didto. Gab-i na ako nag-abot kag iskedyul sang miting sang kongregasyon. Ang sister nga ginadayunan ko nagsiling nga may duha ka brother sa ila kongregasyon nga kaedad ko. Nagsiling sia nga indi niya ako pag-itugpo sa ila. Pero pagsulod gid namon sa Kingdom Hall, gindala niya ako dayon sa duha ka brother para makilala ko sila. Nasaw-ahan gid kami nga tatlo.”

13. Ano nga mga halimbawa ang nagpalig-on sa isa ka sister nga dalaga?

¹³ Ang isa pa ka dalaga nga nagaalagad sa Bethel nagsiling: “May kilala ako nga mga soltero kag dalaga nga madugay na nga mga payunir. Malig-on sila, nagapokus sila sa ila pag-alagad, handa sila magsakripisyo para buligan ang iban, kag malipayon gid sila. Daku gid sila nga bulig sa kongregasyon. Husto ang ila pagtamod sa ila sitwasyon bilang soltero ukon dalaga. Wala sila nagahunahuna nga mas maayo sila sangsa iban bangod wala sila sing asawa ukon bana. Kag wala man sila nagahunahuna nga indi na sila mangin malipayon bangod wala sila sing asawa ukon bana ukon wala sila sing bata.” Ginapakita sini nga kanami gid kon ginarespeto kag ginapabaloran sang tanan sa kongregasyon ang isa kag isa. Wala ginapabatyag sa imo sang mga kauturan nga makaluluoy ka kag wala man sila nahisa sa imo. Wala ka nila ginabalewala kag wala man nila ginahunahuna nga mas maayo ka sangsa ila. Mabatyagan mo nga palangga ka nila.

14. Paano naton mapakita nga ginarespeto naton ang mga soltero kag dalaga?

¹⁴ Malipay gid ang aton mga kauturan nga soltero kag dalaga kon pabaloran naton sila bangod sang ila maayo nga mga kinaiya, kag indi kita dapat masubuan bangod wala sila sing asawa ukon bana. Sa baylo nga masubuan para sa ila, dapat naton pabaloran ang ila katutom. Kon himuon naton ini, indi gid mabatyagan sang aton mga kauturan nga soltero kag dalaga nga daw nagasiling kita sa ila: “Indi ko kamo kinahanglan.” (1 Cor. 12:21) Sa baylo, mabatyagan nila nga ginarespeto naton sila kag nalipay kita nga kaupod naton sila sa kongregasyon.

15. Ano nga mga pagbag-o ang ginhimo sang pila ka kauturan para mas madamo sila sing mahimo sa ila ministeryo?

¹⁵ Sining nagligad lang nga mga tinuig, madamo nga kauturan ang nagtuon sang iban nga  lenguahe para mas madamo sila sing mahimo sa ila ministeryo. Naghimo sila sang mga pagbag-o. Nagaalagad sila sa kongregasyon nga nagagamit sang ila namat-an nga lenguahe, pero nagsaylo sila sa kongregasyon nga nagagamit sang lain nga lenguahe kay nagakinahanglan ini sang dugang nga manugbantala. (Binu. 16:9) Ila ini desisyon kay gusto nila nga alagaron si Jehova sing bug-os. Tinuig pa ang kinahanglan para mangin sagad sila sa bag-o nga lenguahe, pero madamo sila sing mabulig sa kongregasyon. Ang ila maayo nga mga kinaiya kag mga eksperiensia nagapalig-on sa mga kauturan sa kongregasyon. Ginapabaloran gid naton ini nga mga kauturan nga handa magsakripisyo.

16. Ano dapat ang basihan sang mga gulang kon nagabinagbinag sila kon bala irekomendar nila ang isa ka brother bilang gulang ukon ministeryal nga alagad?

¹⁶ Indi dapat paghunahunaon sang hubon sang mga gulang nga indi pa puede irekomendar ang isa ka brother nga mangin gulang ukon ministeryal nga alagad kay indi pa sia sagad sa lenguahe nga ginagamit sang kongregasyon. Ang ginasiling sang Biblia nga mga kalipikasyon sang isa ka gulang ukon ministeryal nga alagad amo dapat ang basihan sang hubon sang mga gulang kon nagabinagbinag sila kon bala irekomendar nila ang isa ka brother, indi ang iya ikasarang sa paghambal sang lenguahe nga ginagamit sang kongregasyon.—1 Tim. 3:1-10, 12, 13; Tito 1:5-9.

17. Ano ang mga dapat binagbinagon sang mga pamilya nga nagsaylo sa iban nga pungsod?

¹⁷ Ang pila ka Saksi nga pamilya nagsaylo sa iban nga pungsod bangod mabudlay gid ang sitwasyon sa ila pungsod, kag ang iban naman para mangita sang obra. Bangod sini, mahimo nga ang lenguahe nga ginagamit sa eskwelahan sang ila kabataan amo ang lenguahe nga ginagamit sa pungsod nga ila ginsayluhan. Mahimo nga dapat man tun-an sang mga ginikanan ini nga lenguahe para makakita sila sang obra. Pero ano abi kon sa ila ginsayluhan nga lugar may kongregasyon ukon grupo nga nagagamit sang ila namat-an nga lenguahe? Sa ano nga kongregasyon dapat magtambong ini nga pamilya? Sa kongregasyon bala nga nagagamit sang lenguahe sang pungsod nga ila ginsayluhan ukon sa kongregasyon nga nagagamit sang ila namat-an nga lenguahe?

18. Base sa Galacia 6:5, paano naton mapakita nga ginarespeto naton ang desisyon sang ulo sang pamilya?

¹⁸ Ang ulo sang pamilya amo ang magadesisyon kon sa diin nga kongregasyon matambong ang iya pamilya. Bangod personal ini nga desisyon, dapat niya binagbinagon kon ano ang pinakamaayo para sa iya pamilya. (Basaha ang Galacia 6:5.) Dapat naton respetuhon ang desisyon sang ulo sang pamilya. Ano man ang iya desisyon, indi naton ini pagkuestyunon. Sa baylo, abiabihon naton sila sa kongregasyon kag palanggaon naton sila.—Roma 15:7.

19. Ano ang dapat nga ipangamuyo kag binagbinagon sing maayo sang mga ulo sang pamilya?

¹⁹ Ang pila ka pamilya mahimo nagaalagad sa kongregasyon nga nagagamit sang namat-an nga lenguahe sang mga ginikanan, pero indi sagad sa sini nga lenguahe ang ila kabataan. Kon ini nga kongregasyon ara sa lugar nga ang kalabanan nga tawo nagagamit sang lenguahe sang pungsod nga ila ginsayluhan, posible nga mabudlayan ang kabataan  nga mahangpan ang mga miting kag indi sila mag-uswag sa espirituwal. Ngaa? Bangod posible nga ang lenguahe nga ginagamit sa eskwelahan sang mga kabataan amo ang lenguahe sang pungsod nga ila ginsayluhan, indi ang lenguahe nga namat-an sang ila mga ginikanan. Kon amo ini ang kahimtangan, dapat mangamuyo sang kaalam ang mga ulo sang pamilya, kag dapat nila binagbinagon kon ano ang dapat nila himuon para mabuligan nila ang ila kabataan nga magsuod kay Jehova kag sa iya katawhan. Puede nga tudluan nila ang ila kabataan nga magsagad sa ila namat-an nga lenguahe, ukon puede man nga magsaylo sila sa kongregasyon nga nagagamit sang lenguahe nga nahangpan sing maayo sang ila kabataan. Ano man nga kongregasyon ang pilion sang ulo sang pamilya, dapat mabatyagan niya kag sang iya pamilya nga ginarespeto sila kag ginapabaloran sang mga kauturan sa kongregasyon.

20. Paano naton mapakita nga ginarespeto naton ang aton mga kauturan nga nagatuon sang bag-o nga lenguahe?

²⁰ Bangod sang mga sitwasyon nga ginbinagbinag naton, madamo nga kongregasyon ang may mga kauturan nga nabudlayan magtuon sang bag-o nga lenguahe. Mahimo nabudlayan sila nga ipabutyag ang ila ginahunahuna. Pero kon indi kita magpokus sa ila ikasarang nga magtuon sang bag-o nga lenguahe, makita naton nga palangga gid nila si Jehova kag gusto nila nga alagaron sia. Kon makita naton ining maayo nila nga mga kinaiya, palanggaon gid naton sila kag respetuhon. Indi kita magsiling nga ‘Indi namon kamo kinahanglan’ bangod lang indi sila masyado kabalo sang aton lenguahe.

21-22. Ano ang ginhatag sa aton ni Jehova?

²¹ Nagapasalamat gid kita kay Jehova kay ginhatagan niya ang kada isa sa aton sang responsibilidad sa iya kongregasyon. Lalaki man kita ukon babayi, soltero ukon may asawa, dalaga ukon may bana, pamatan-on ukon tigulang, ukon sagad kita sa isa ka lenguahe ukon indi, hamili kita kay Jehova kag kinahanglan naton ang isa kag isa.—Roma 12:4, 5; Col. 3:10, 11.

²² Kabay pa nga pirme naton iaplikar ang mga leksion nga natun-an naton sa ilustrasyon ni Pablo parte sa lawas sang tawo. Kon himuon naton ini, mapalig-on kita sini nga pabaloran pa gid ang aton mga responsibilidad kag magabulig ini sa aton nga pirme palanggaon kag respetuhon ang iban sa kongregasyon ni Jehova.