TULUN-AN NGA ARTIKULO 33
Ginabantayan ni Jehova ang Iya Katawhan
“Ang mata ni Jehova nagabantay sa mga nagakahadlok sa iya.”—SAL. 33:18.
AMBAHANON 4 “Si Jehova ang Akon Manugbantay”
ANG BINAGBINAGON SA SINI NGA ARTIKULO *
1. Ngaa nangabay si Jesus kay Jehova nga bantayan ang iya mga sumulunod?
SANG gab-i antes napatay si Jesus, may pinasahi sia nga ginpangabay sa iya Amay sa langit. Nangabay sia kay Jehova nga bantayan ang iya mga sumulunod. (Juan 17:15, 20) Halin sang una, ginabantayan gid ni Jehova ang iya katawhan, ukon ginaatipan niya sila kag ginaamligan. Pero, kabalo si Jesus nga makaeksperiensia ang iya mga sumulunod sang grabe nga pagpamatok halin kay Satanas. Kabalo man si Jesus nga kinahanglan nila ang bulig ni Jehova para masarangan nila ang mapintas nga mga pagsalakay sang Yawa.
2. Suno sa Salmo 33:18-20, ngaa indi kita dapat mahadlok kon may problema kita?
2 Bangod ginakontrol ni Satanas ini nga kalibutan, madamo ang problema sang matuod nga mga Cristiano subong. May mga problema nga posible magpaluya sang aton buot kag posible magtilaw sang aton katutom kay Jehova. Pero binagbinagon naton sa sini nga artikulo nga indi kita dapat mahadlok. Ginabantayan kita ni Jehova. Buot silingon, nakita niya ang aton mga problema kag handa gid sia pirme nga buligan kita. Binagbinagon naton ang duha ka halimbawa sa Biblia nga nagapakita nga ‘ginabantayan ni Jehova ang mga nagakahadlok sa iya.’—Basaha ang Salmo 33:18-20.
KON PAMATYAG NATON NAGAISAHANON LANG KITA
3. Sa ano nga mga tion posible magbatyag kita nga nagaisahanon lang kita?
3 Bisan pa madamo kita sang kauturan sa kongregasyon, may mga tion nga pamatyag naton nagaisahanon lang kita. Halimbawa, posible magbatyag ang mga pamatan-on nga nagaisahanon lang sila kon ginapaathag nila ang ila mga ginapatihan sa ila mga classmate ukon kon magsaylo sila sang kongregasyon. Posible nga nasubuan ukon na-depress ang pila sa aton, kag pamatyag naton dapat naton ini batason nga nagaisahanon. Posible nga nagaalang-alang kita nga isugid sa iban ang aton ginabatyag kay basi indi nila kita mahangpan. Kag kon kaisa, posible ginahunahuna naton nga wala gid sing may nagaulikid sa aton. Madamo ang rason kon ngaa pamatyag naton nagaisahanon lang kita. Bangod sini, posible mabalaka kita kag hunahunaon naton nga wala na gid kita sang mahimo. Indi gusto ni Jehova nga amo sini ang mabatyagan naton. Ngaa masiling naton ini?
4. Ngaa nagsiling si manalagna Elias: “Ako na lang isa ang nabilin”?
4 Binagbinaga ang halimbawa ni Elias nga matutom nga alagad sang Dios. Sobra na 40 ka adlaw nga nagapalagyo sia bangod gusto sia patyon ni Jezebel. (1 Hari 19:1-9) Sang ulihi, sang nagaisahanon sia sa isa ka kueba, ginsilingan niya si Jehova: “Ako na lang [ang manalagna nga] nabilin.” (1 Hari 19:10) Pero may iban pa nga mga manalagna. Halimbawa, may 100 ka manalagna nga wala napatay ni Jezebel bangod ginluwas sila ni Obadias. (1 Hari 18:7, 13) Ti, ngaa pamatyag ni Elias nagaisahanon na lang sia? Nahunahuna bala niya nga napatay na ang tanan nga manalagna nga ginluwas ni Obadias? Ukon bangod bala wala sing may nag-upod sa iya sa pag-alagad kay Jehova bisan pa ginpamatud-an ni Jehova sa Bukid Carmel nga sia ang matuod nga Dios? Pamatyag bala niya wala sing may nakabalo nga gusto sia patyon sang iya mga kaaway, ukon wala sing may nagaulikid sa iya? Wala gindetalye sang Biblia ang ginbatyag ni Elias. Pero sigurado kita nga nahangpan ni Jehova si Elias, kag kabalo Sia kon paano buligan si Elias.
Sang nagbatyag si Elias nga nagaisahanon lang sia, ginbuligan sia ni Jehova. Paano ini makapaumpaw sa aton kon pamatyag naton nagaisahanon lang kita? (Tan-awa ang parapo 5-6)
5. Ano ang ginhimo ni Jehova para pasaligon si Elias nga wala sia nagaisahanon?
5 Madamo sing ginhimo si Jehova para buligan si Elias. Ginpalig-on niya si Elias nga maghambal. Duha ka beses Niya nga ginpamangkot si Elias: “Ano ang ginahimo mo diri?” (1 Hari 19:9, 13) Sa sining duha ka tion, ginpamatian ni Jehova si Elias samtang ginasugid niya kon ano gid ang iya ginabatyag. Ginsabat ni Jehova si Elias paagi sa pagpakita sang Iya presensia kag tumalagsahon nga gahom. Ginsilingan man niya si Elias nga madamo pa nga Israelinhon ang nagasimba gihapon sa Iya. (1 Hari 19:11, 12, 18) Sigurado gid nga napalig-on si Elias pagkatapos niya masugid kay Jehova ang iya ginabatyag kag sang nabatian niya ang Iya sabat. Ginhatagan ni Jehova si Elias sang importante nga mga asaynment. Ginsugo niya si Elias nga haplasan si Hazael bilang hari sang Siria, si Jehu bilang hari sang Israel, kag si Eliseo bilang manalagna. (1 Hari 19:15, 16) Paagi sa sini nga mga asaynment, ginbuligan ni Jehova si Elias nga magpokus sa maayo nga mga butang. Ginhatagan man sia sang Dios sang suod nga kaupod, nga amo si Eliseo. Ano ang himuon mo para buligan ka ni Jehova kon pamatyag mo nagaisahanon ka lang?
6. Ano ang puede mo ipangamuyo kon pamatyag mo nagaisahanon ka lang? (Salmo 62:8)
6 Gusto ni Jehova nga mangamuyo ka sa iya. Kabalo sia kon ano ang imo mga problema, kag makasalig ka nga pamatian niya ang imo mga pangamuyo sa bisan ano nga oras. (1 Tes. 5:17) Nalipay sia magpamati sa mga pangamuyo sang iya mga alagad. (Hulu. 15:8) Ano ang puede mo ipangamuyo kon pamatyag mo nagaisahanon ka lang? Isugid kay Jehova kon ano gid ang imo ginabatyag, pareho sa ginhimo ni Elias. (Basaha ang Salmo 62:8.) Isugid sa iya ang imo mga ginakabalak-an kag kon ano ang epekto sini sa imo. Pangabaya si Jehova nga buligan ka nga masarangan ang imo ginabatyag. Halimbawa, kon pamatyag mo nagaisahanon ka lang kag nakulbaan ka kon ginapamangkot ka sang imo mga classmate parte sa imo mga ginapatihan, pangabaya si Jehova nga hatagan ka sing kaisog nga makapanaksi. Puede mo pa sia gani pangabayon nga hatagan ka sing kaalam para mapaathag mo sing maayo ang imo mga ginapatihan. (Luc. 21:14, 15) Kon na-depress ka ukon nagaluya ang imo buot, pangabaya si Jehova nga buligan ka nga masugid ini sa hamtong nga utod. Puede mo pangabayon si Jehova nga buligan niya ang utod nga imo sugiran nga mahangpan ang imo ginabatyag. Isugid kay Jehova kon ano gid ang imo ginabatyag, talupangda kon paano niya ginasabat ang imo mga pangamuyo, kag batuna ang bulig sang iban. Kon himuon mo ini, mabatyagan mo nga wala ka nagaisahanon.
Nagatinguha ka bala para madugangan mo ang imo ginahimo sa pagbantala? Ginapanikasugan mo bala nga makaupod sa sini nga hilikuton ang iban nga kauturan? (Tan-awa ang parapo 7)
7. Ano ang natun-an mo sa halimbawa ni Mauricio?
7 Ginhatagan kita tanan ni Jehova sing makalilipay nga hilikuton. Makasalig ka nga nakita niya kag ginapabaloran ang tanan nga ginahimo mo sa kongregasyon kag sa pagbantala. (Sal. 110:3) Kon mapisan mo nga ginahimo ini nga hilikuton, paano ini makabulig sa imo kon pamatyag mo nagaisahanon ka lang? Binagbinaga ang halimbawa sang isa ka pamatan-on nga brother nga si Mauricio. * Wala madugay pagkatapos mabawtismuhan si Mauricio, ginbiyaan sang isa niya ka suod nga abyan ang kamatuoran. “Sang ginbiyaan niya si Jehova, nadulaan ako sang kompiansa sa akon kaugalingon,” siling ni Mauricio. “Nahunahuna ko nga daw indi ko na masarangan nga tumanon ang akon dedikasyon kag mangin bahin gihapon sang pamilya ni Jehova. Pamatyag ko nagaisahanon lang ako, kag wala sing may makaintiende sa akon ginabatyag.” Ano ang nakabulig kay Mauricio? “Nangin masako ako sa pagbantala,” siling niya. “Nakabulig ini sa akon nga untatan ang paghunahuna parte lang sa akon kaugalingon kag parte sa akon ginabatyag. Malipayon ako kon nagabantala ako upod ang iban nga mga kauturan, kag pamatyag ko wala ako nagaisahanon.” Huo, makapalig-on gid ang pagbantala upod ang mga kauturan. Matuod ini bisan pa indi naton sila makaupod sing personal, pareho sang pagbantala paagi sa paghimo sing sulat kag pagtawag sa telepono. Ano pa ang nakabulig kay Mauricio? Nagsiling pa sia: “Nangin masako man ako sa kongregasyon. Kon may bahin ako, ginahandaan ko ini sing maayo kag ginapresentar ko ini sa bug-os ko nga masarangan. Paagi sa sini nga mga bahin, nabatyagan ko nga ginapabaloran ako ni Jehova kag sang iban.”
KON PAMATYAG NATON INDI NATON MASARANGAN ANG MGA PAGTILAW
8. Ano ang posible nga mabatyagan naton kon makaeksperiensia kita sang mabudlay nga mga pagtilaw?
8 Kabalo kita nga makaeksperiensia gid kita sang mga pagtilaw sa sining katapusan nga mga adlaw. (2 Tim. 3:1) Pero, posible nga makibot gihapon kita kay wala kita kabalo kon san-o kita makaeksperiensia sang pagtilaw kag kon ano ini nga klase sang pagtilaw. Posible nga gulpi lang kita makaeksperiensia sang problema sa kuarta, posible nga mabal-an naton nga may malala kita nga balatian, ukon posible nga mapatyan kita sang pinalangga. Sa sini nga mga tion, posible nga magluya ang aton buot kag magbatyag kita nga indi naton ini masarangan, ilabi na kon sunodsunod ang mga pagtilaw ukon nagadululungan ang mabudlay nga mga pagtilaw. Pero, tandai nga ginabantayan kita ni Jehova, kag buligan niya kita nga mabatas ang bisan ano nga pagtilaw.
9. Ilaragway ang pila sa mga pagtilaw nga naeksperiensiahan ni Job.
9 Binagbinaga kon paano ginbuligan ni Jehova ang iya matutom nga alagad nga si Job. Halos nagdululungan ang mabudlay nga mga pagtilaw nga iya naeksperiensiahan. Sa isa lang ka adlaw, nakibot gid si Job sa mga ginbalita sa iya. Wala na ang tanan niya nga kasapatan bangod ginkawat ini ukon ginpatay, kag napatay ang iya mga alagad. Kag ang mas masakit pa gid, napatay man ang iya pinalangga nga mga anak. (Job 1:13-19) Grabe gid ang kasubo ni Job. Pero wala madugay pagkatapos sang mga natabo, nagbalatian naman sia. Daw indi na sia makilala sa iya balatian kag grabe ini kasakit. (Job 2:7) Bangod sang sitwasyon ni Job, nakasiling sia: “Ginakaugtan ko ang akon kabuhi; indi ko na luyag nga mabuhi pa.”—Job 7:16.
Para magpati si Job nga palangga sia ni Jehova kag ginabantayan Niya sia, ginsugid sa iya ni Jehova kon paano Niya ginaatipan ang tanan Niya nga tinuga (Tan-awa ang parapo 10)
10. Paano ginbuligan ni Jehova si Job para mabatas niya ang mga pagtilaw? (Tan-awa ang piktyur sa kober.)
10 Ginabantayan ni Jehova si Job. Palangga ni Jehova si Job, gani ginbuligan Niya sia nga masarangan ang mga pagtilaw. Gin-istorya ni Jehova si Job, kag ginpahanumdom Niya kay Job ang parte sa Iya indi matupungan nga kaalam kag kon paano Niya ginaatipan ang Iya mga tinuga. Ginsambit Niya ang parte sa madamo nga dalayawon nga mga sapat. (Job 38:1, 2; 39:9, 13, 19, 27; 40:15; 41:1, 2) Gingamit man ni Jehova ang matutom nga pamatan-on nga si Elihu para palig-unon kag paumpawan si Job. Ginpasalig sia ni Elihu nga pirme ginapadyaan ni Jehova ang Iya mga alagad nga nagabatas. Pero gingamit man ni Jehova si Elihu para mahigugmaon nga laygayan si Job. Ginbuligan ni Elihu si Job nga untatan ang sobra nga paghunahuna parte sa iya kaugalingon. Ginhimo niya ini paagi sa pagpahanumdom sa iya kon daw ano kita kagamay kon ikumparar kay Jehova, nga amo ang Manunuga sang uniberso. (Job 37:14) Ginhatagan man ni Jehova sang asaynment si Job. Ginsilingan Niya sia nga magpangamuyo para sa iya tatlo ka kaupod nga nakahimo sang sala. (Job 42:8-10) Kamusta subong? Paano kita ginabuligan ni Jehova kon makaeksperiensia kita sang mabudlay nga mga pagtilaw?
11. Paano kita ginapaumpawan sang Biblia kon makaeksperiensia kita sang mga pagtilaw?
11 Wala kita direkta nga ginaistorya ni Jehova pareho sa ginhimo niya kay Job, pero ginaistorya Niya kita paagi sa Iya Pulong, ang Biblia. (Roma 15:4) Ginapaumpawan niya kita paagi sa paghatag sa aton sang paglaum sa palaabuton. Madamo kita sang mabasa sa Biblia nga makapaumpaw sa aton kon makaeksperiensia kita sang mga pagtilaw. Ari ang pila sa sini. Sa Kasulatan, ginapasalig sa aton ni Jehova nga ‘wala gid sing makapugong sa iya,’ bisan pa ang mabudlay nga mga pagtilaw, para ‘mabaton naton ang iya gugma.’ (Roma 8:38, 39) Ginapasalig man niya sa aton nga ‘malapit sia sa tanan nga nagapanawag sa iya’ paagi sa pangamuyo. (Sal. 145:18) Ginasilingan kita ni Jehova nga kon magsalig kita sa iya, mabatas naton ang bisan ano nga pagtilaw, kag posible pa gani nga mangin malipayon kita bisan pa nagaantos kita. (1 Cor. 10:13; Sant. 1:2, 12) Ginapahanumdom man sa aton sang Pulong sang Dios nga temporaryo lang kag wala nagadugay ang mga pagtilaw, pero asta sa wala sing katapusan ang padya nga ihatag sang Dios sa aton. (2 Cor. 4:16-18) Sigurado gid ang paglaum nga ginahatag ni Jehova sa aton. Dulaon niya ang ginabangdan sang tanan naton nga pagtilaw, nga amo si Satanas nga Yawa kag ang tanan nga nagailog sa iya malain nga mga ginahimo. (Sal. 37:10) May nasaulo ka na bala nga makapaumpaw nga mga teksto sa Biblia nga makabulig sa imo nga mabatas ang mga pagtilaw sa palaabuton?
12. Ano ang gusto ni Jehova nga himuon naton para mabuligan kita sang iya Pulong?
12 Gusto ni Jehova nga magpain kita sang tion para sa regular nga pagtuon sang Biblia kag pagpamalandong sa aton nabasa. Kon iaplikar naton ang aton natun-an, magabakod ang aton pagtuo kag magasuod pa gid kita sa aton Amay sa langit. Gani, mangin malig-on kita sa pagbatas sa mga pagtilaw. Ginahatagan man ni Jehova sang iya balaan nga espiritu ang mga nagasalig sa iya Pulong. Ini nga espiritu amo ang magahatag sa aton sang “gahom nga labaw sa kinaandan” para mabatas ang bisan ano nga pagtilaw.—2 Cor. 4:7-10.
13. Paano makabulig ang mga impormasyon nga nabase sa Biblia nga ginahatag sang “matutom kag mainandamon nga ulipon” para mabatas naton ang mga pagtilaw?
13 Paagi sa bulig ni Jehova, nagahimo “ang matutom kag mainandamon nga ulipon” sang madamo nga artikulo, mga video, kag mga musika nga makabulig sa aton nga magbakod ang aton pagtuo kag magpabilin nga suod kay Jehova. (Mat. 24:45) Suno gid sa tion ining tanan nga ginahatag ni Jehova, kag dapat gid naton ini panginpuslan. Sining karon lang, nagsiling ang isa ka sister sa United States nga nagapasalamat gid sia sa sining tanan nga impormasyon nga nabase sa Biblia nga ginahatag ni Jehova. Nagsiling sia: “Sa sulod sang 40 ka tuig nga pag-alagad ko kay Jehova, madamo nga beses nga natilawan ang akon katutom.” Nakaeksperiensia sang mabudlay nga mga pagtilaw ini nga sister. Halimbawa, napatay ang iya lolo kay nabungguan sia sang salakyan nga hubog ang drayber, napatay ang iya mga ginikanan bangod sang malala nga balatian, kag duha ka beses sia nga nagmasakit sing kanser. Ano ang nakabulig sa iya nga makabatas? Nagsiling sia: “Pirme gid ako ginabuligan ni Jehova. Nakabulig sa akon nga makabatas ang espirituwal nga pagkaon nga ginahatag ni Jehova paagi sa matutom kag mainandamon nga ulipon. Bangod sini, masiling ko man ang ginsiling ni Job: ‘Tubtob mapatay ako, indi ko pag-isikway ang akon integridad!’”—Job 27:5.
Ano ang puede naton nga himuon para makabulig kita sa iban nga kauturan sa kongregasyon? (Tan-awa ang parapo 14)
14. Paano ginagamit ni Jehova ang aton mga kauturan para buligan kita sa tion sang mga kabudlayan? (1 Tesalonica 4:9)
14 Ginhanas ni Jehova ang iya katawhan nga maghigugmaanay kag paumpawan ang kada isa sa tion sang mga kabudlayan. (2 Cor. 1:3, 4; basaha ang 1 Tesalonica 4:9.) Ginailog sang aton mga kauturan si Elihu kay handa gid sila nga buligan kita nga mangin matutom kay Jehova kon makaeksperiensia kita sang mga kabudlayan. (Binu. 14:22) Halimbawa, binagbinaga ang eksperiensia ni Diane sang nagmasakit sing grabe ang iya bana. Ginpalig-on sia sang mga kauturan sa ila kongregasyon kag ginbuligan nila sia nga magpabilin nga suod kay Jehova. Nagsiling sia: “Mabudlay gid ang amon sitwasyon sa sulod sang madamo nga binulan. Pero nabatyagan namon ang pagpabakod kag pagpalangga ni Jehova. Madamo sang ginhimo ang amon kongregasyon para buligan kami. Ginabisitahan kami sang mga kauturan, ginatawgan sa telepono, kag ginahakos. Tanan ini nakabulig gid sa amon nga makabatas. Bangod indi ako kabalo magdrayb, ginasigurado sang mga kauturan nga maka-attend ako sa mga miting kag makabantala sa mga tion nga posible sa akon sitwasyon.” Ginapakita sini nga isa gid ka pagpakamaayo ang mahigugmaon nga mga kauturan sa kongregasyon.
NAGAPASALAMAT GID KITA SA PAGPALANGGA KAG PAGBANTAY NI JEHOVA
15. Ngaa kumbinsido kita nga masarangan naton ang mga kabudlayan?
15 Makaeksperiensia gid kita tanan sang pagtilaw. Pero natun-an naton nga indi gid matabo nga magaisahanon lang kita sa pagbatas sini. Kay man, ginabantayan kita pirme ni Jehova pareho sa ginahimo sang isa ka mahigugmaon nga amay. Kaupod naton sia, handa sia nga pamatian ang aton mga pagpangabay sang bulig, kag gusto gid niya nga buligan kita. (Isa. 43:2) Kumbinsido kita nga masarangan naton ang mga kabudlayan bangod ginahatagan niya kita sang tanan naton nga kinahanglanon para makabatas. Ginhatagan niya kita sang regalo nga makapangamuyo sa iya, sang Biblia, sang madamo nga impormasyon nga nabase sa Biblia, kag sang mahigugmaon nga mga kauturan para buligan kita sa tion sang mga kabudlayan.
16. Ano ang himuon naton para bantayan kita pirme ni Jehova?
16 Nalipay gid kita kay may ara kita Amay sa langit nga nagabantay sa aton. “Nagakasadya [kita] tungod sa iya.” (Sal. 33:21) Kon ginapanginpuslan naton ang tanan nga ginahatag ni Jehova para buligan kita, ginapakita naton nga nagapasalamat kita sa iya pagpalangga kag pagbantay. Pero may dapat kita himuon para bantayan kita pirme sang Dios. Dapat padayon naton nga tumanon si Jehova kag dapat naton himuon ang husto sa iya panulok. Kon himuon naton ini sa bug-os naton nga masarangan, bantayan niya kita asta sa wala sing katapusan.—1 Ped. 3:12.
AMBAHANON 30 Akon Amay, Akon Dios, kag Abyan
^ Kinahanglan naton ang bulig ni Jehova para masarangan naton ang aton mga problema subong. Ipahanumdom sa aton sini nga artikulo nga ginabantayan ni Jehova ang iya katawhan. Kabalo sia kon ano nga mga problema ang ginabatas sang kada isa sa aton, kag buligan niya kita nga masarangan ini.
^ Gin-islan ang pila ka ngalan.