1. Suno sa 1 Tesalonica 5:11, ano nga klase sang hilikuton ang ginahimo naton tanan?

 GINPATINDUGAN bala sang Kingdom Hall ang inyo kongregasyon ukon ginkay-o bala ang inyo Kingdom Hall? Sigurado gid nga indi mo malipatan ang inyo una nga miting sa inyo bag-o nga Kingdom Hall. Daku gid ang pagpasalamat mo kay Jehova. Posible pa gani nga nakahibi ka sa kalipay, kag daw indi ka na makakanta sang nagabukas nga ambahanon. Bangod matahom kag mabakod ang aton mga Kingdom Hall, nagaresulta ini sa pagdayaw kay Jehova. Pero mas madayaw pa gid naton sia paagi sa paghimo sang isa ka klase sang hilikuton. Indi literal nga mga bilding ang aton patindugon ukon pabakuron, kundi ang mga tawo nga nagakadto sa mga pasilidad nga ginagamit naton sa pagsimba. Amo ini nga klase sang pagpabakod ang ginapatuhuyan ni apostol Pablo sang ginsulat niya ang mabasa sa 1 Tesalonica 5:11, nga amo ang teksto nga ginbasihan sini nga artikulo.—Basaha.

2. Ano ang binagbinagon naton sa sini nga artikulo?

² Isa gid ka maayo nga halimbawa si apostol Pablo kay kabalo sia kon paano pabakuron ang iya mga kauturan. May empatiya sia sa ila. Sa sini nga artikulo, binagbinagon naton kon paano niya ginbuligan ang iya mga kauturan (1) para mabatas nila ang mga problema, (2) para pabaloran nila ang paghidait, kag (3) para magbakod ang ila pagtuo kay Jehova. Binagbinagon naton kon paano naton sia mailog para mapabakod man naton ang aton mga kauturan subong.—1 Cor. 11:1.

3. Ano ang balanse nga pagtamod ni Pablo?

³ Palangga gid ni Pablo ang iya mga kauturan. Nakaeksperiensia man sia sang mga kabudlayan, gani makapakita sia sang kaluoy kag empatiya sa iya mga kauturan kon may mga problema sila. Isa ka bes, wala na sing kuarta si Pablo kag kinahanglan niya mag-obra  para masuportahan ang iya kaugalingon kag ang iya mga kaupod. (Binu. 20:34) Paghimo sing tolda ang iya palangitan-an. Pag-abot niya sa Corinto, nag-obra sia upod kanday Aquila kag Priscila nga nagapanghimo man sing tolda. Pero “kada adlaw nga inugpahuway,” nagabantala sia sa mga Judiyo kag sa mga Griego. Dayon pag-abot nanday Silas kag Timoteo, “nangin masako gid si Pablo sa pagbantala sang pulong sang Dios.” (Binu. 18:2-5) Wala gid ginkalimtan ni Pablo nga ang pag-alagad kay Jehova amo ang panguna niya nga hilikuton. Bangod mapisan si Pablo sa pagbantala kag sa pag-obra para sa iya mga kinahanglanon, napalig-on niya ang iya mga kauturan. Ginpahanumdom niya sa ila nga bisan pa may mga problema sila kag dapat nila amanan ang ila pamilya, indi nila dapat pagpabay-an “ang mas importante nga mga butang” ukon ang tanan nga ginahimo nila sa pagsimba kay Jehova.—Fil. 1:10.

4. Paano ginbuligan ni Pablo kag ni Timoteo ang ila mga kauturan para masarangan nila ang pagpamatok?

⁴ Wala madugay pagkatapos maporma ang kongregasyon sa Tesalonica, nakaeksperiensia sang grabe nga pagpamatok ang bag-o nga mga kauturan didto. Sang indi makita sang nagapamatok nga mga tawo sanday Pablo kag Silas, ginganoy nila “ang pila ka kauturan pakadto sa mga manugdumala sang siudad,” kag nagsinggit sila: “Ginasupak sini nga mga tawo ang mga kasuguan sang Cesar.” (Binu. 17:6, 7) Imadyina ang kahadlok sining bag-o nga mga Cristiano sang narealisar nila nga ginapamatukan sila sang mga tawo sa siudad. Puede kuntani ini mangin rason para magluya sila sa ila pag-alagad kay Jehova, pero indi gusto ni Pablo nga matabo ina. Gani bisan pa kinahanglan maglakat nanday Pablo kag Silas, ginsigurado nila nga maatipan sing maayo ang bag-o nga kongregasyon. Ginpahanumdom ni Pablo ang mga taga-Tesalonica: “Ginpadala namon si Timoteo, nga aton utod . . . , agod palig-unon kag lugpayan kamo para sa inyo pagtuo, agod wala sing isa nga malingkang bangod sini nga mga kapipit-an.” (1 Tes. 3:2, 3) Posible gid nga nakaeksperiensia man si Timoteo sang pagpamatok sa ila lugar sa Listra, kag nakita niya kon paano ginpalig-on ni Pablo ang mga kauturan didto. Bangod nakita ni Timoteo kon paano sila ginbuligan ni Jehova, may pagsalig nga masiling niya sa iya bag-o nga mga kauturan nga amo man sini ang himuon ni Jehova sa ila.—Binu. 14:8, 19-22; Heb. 12:2.

5. Paano nakabenepisyo ang isa ka brother nga si Bryant bangod ginbuligan sia sang isa ka gulang?

⁵ Ano pa gid ang ginhimo ni Pablo para mapalig-on ang iya mga kauturan? Pagbalik nanday Pablo kag Bernabe sa Listra, sa Iconio, kag sa Antioquia, ‘nagtangdo sila sing mga gulang sa tagsa ka kongregasyon.’ (Binu. 14:21-23) Sigurado gid nga ginpalig-on sining gintangdo nga mga lalaki ang mga kauturan sa kongregasyon, pareho sa ginahimo sang mga gulang subong. Talupangda ining ginsiling sang isa ka brother nga si Bryant: “Sang 15 anyos ako, ginbiyaan kami ni Tatay kag na-disfellowship si Nanay. Pamatyag ko nagaisahanon na lang ako kag nagluya ang akon buot.” Ano ang nakabulig kay Bryant nga makabatas? Nagsiling sia: “Pirme ako ginaistorya sang isa ka gulang nga si Nong Tony. Ginaistorya niya ako kon may miting, kag kon nagakit-anay kami sa iban pa gid nga tion. Ginasugid niya sa akon ang eksperiensia sang mga kauturan nga malipayon gihapon bisan pa may mga problema sila. Ginpabasa niya sa akon ang Salmo 27:10 kag pirme niya ginaistorya ang parte kay Ezequias, nga matutom nga nag-alagad bisan pa indi maayo nga halimbawa ang iya amay.” Ano ang epekto sini kay Bryant? “Bangod sang pagpalig-on ni Nong Tony,” siling ni Bryant, “nagpayunir ako kag nalipay gid ako sa sini.” Mga gulang, mangin alisto sa pagbulig sa mga kauturan, nga pareho kay Bryant, kinahanglan man palig-unon paagi sa “maayo nga pulong.”—Hulu. 12:25.

6. Paano gingamit ni Pablo ang mga eksperiensia sang iban para palig-unon ang iya mga kauturan?

⁶ Ginpahanumdom ni Pablo sa iya mga kauturan ang parte sa “tuman kadaku nga panganod  sang mga saksi” nga nabatas ang tanan nga klase sang kabudlayan bangod ginpabakod sila ni Jehova. (Heb. 12:1) Kabalo si Pablo nga ini nga mga eksperiensia makahatag sing kaisog sa iya mga kauturan, kag makabulig ini sa ila nga magpokus sa “siudad sang buhi nga Dios.” (Heb. 12:22) Matuod man ini subong. Indi bala nga makapalig-on gid ang pagbasa sang kasaysayan ni Gideon, ni Barak, ni David, ni Samuel, kag sang iban pa nga ginbuligan ni Jehova? (Heb. 11:32-35) Makapalig-on man ang pagbasa sang mga eksperiensia sang matutom nga mga alagad ni Jehova subong. Pirme makabaton sang sulat ang world headquarters halin sa mga kauturan nga nagasiling nga nagbakod gid ang ila pagtuo sang nabasa nila ang isa sini nga mga eksperiensia.

7. Ano ang matun-an mo sa laygay ni Pablo sa Roma 14:19-21?

⁷ Mapabakod naton ang aton mga kauturan kon ginatinguhaan naton nga pabaloran ang paghidait. Bisan pa lainlain ang aton mga opinyon kon kaisa, wala kita nagabahinbahin. Kag kon wala man lang sing malapas nga prinsipio sa Biblia, wala naton ginainsister ang aton gusto. Binagbinaga ini nga halimbawa. Sa kongregasyon sa Roma, may Judiyo kag Gentil nga mga Cristiano. Suno sa Kasuguan nga ginhatag paagi kay Moises, ginadumilian sadto ang pila ka pagkaon. Pero nag-abot ang tion nga wala na ginpatuman ini nga Kasuguan. (Mar. 7:19) Gani, puede na kaunon sang Judiyo nga mga Cristiano ang tanan nga klase sang pagkaon. Pero para sa pila ka Judiyo nga mga Cristiano, sala gihapon ang pagkaon sini. Bangod sini, nabahinbahin ang kongregasyon. Ginpadaku ni Pablo nga mas importante nga padayon nga pabaloran ang paghidait. Nagsiling sia: “Mas maayo nga indi magkaon sing karne ukon mag-inom sing alak ukon maghimo sing bisan ano nga butang nga makapasandad sa imo utod.” (Basaha ang Roma 14:19-21.) Ginbuligan ni Pablo ang iya mga kauturan nga makita nga kon may ara mga pagbinaisay, mahalitan gid sila kag ang bilog nga kongregasyon. Handa man makigbagay si Pablo para indi masandad ang iban. (1 Cor. 9:19-22) Kon may gusto nga himuon ang isa ka utod kag wala man lang sia may ginalapas nga prinsipio, indi naton ini dapat paghimuan sang isyu bisan pa lain ini sa gusto naton nga himuon. Paagi sa sini, mapabakod man naton ang iban kag mapakita naton nga ginapabaloran naton ang paghidait.

8. Ano ang ginhimo ni Pablo sang may problema ang kongregasyon nga posible makadula sang paghidait?

⁸ Bisan pa indi husto ang pagtamod sang iban sa importante nga mga butang, nagpakita si Pablo sang maayo nga halimbawa para indi madula ang paghidait. Halimbawa, ang pila ka utod sa kongregasyon sang unang siglo nagsiling nga dapat magpatuli ang mga Gentil nga nangin Cristiano. Posible nga ginhunahuna nila nga basi pakalainon sila sang mga tawo kon wala natuli ini nga mga Gentil. (Gal. 6:12) Indi gid komporme si Pablo sa ila gusto nga himuon. Pero wala ginpilit ni Pablo ang iya gusto. Sa baylo, nagpaubos si Pablo kag nangayo sia sing laygay sa mga apostoles kag sa mga gulang sa Jerusalem. (Binu. 15:1, 2) Bangod sang ginhimo ni Pablo, padayon nga nangin malipayon ang mga kauturan kag wala nadula ang paghidait sa kongregasyon.—Binu. 15:30, 31.

9. Paano naton mailog ang halimbawa ni Pablo?

⁹ Kon may mga pagbinaisay, mapakita naton nga ginapabaloran naton ang paghidait kon mangayo kita sing laygay sa mga gintangdo ni Jehova nga mag-atipan sa kongregasyon. Sa masami, makita sa aton mga publikasyon ukon sa mga panuytoy nga ginahatag sang organisasyon ang mga instruksion nga nabase sa Biblia. Kon panikasugan naton nga sundon ini nga mga instruksion sa baylo nga ipilit ang aton gusto, makabulig kita para indi madula ang paghidait sa kongregasyon.

10. Ano pa gid ang ginhimo ni Pablo para indi madula ang paghidait sa kongregasyon?

 ¹⁰ May ginhimo pa gid si Pablo para indi madula ang paghidait sa kongregasyon. Wala sia nagpokus sa indi maayo nga batasan sang iya mga kauturan, kundi sa maayo nila nga mga kinaiya. Halimbawa, sa katapusan sang iya sulat para sa mga taga-Roma, madamo nga ngalan ang ginsambit ni Pablo. Sa kalabanan sa sini nga mga ngalan, may ginasiling sia nga maayo parte sa ila ukon may ginasugid sia nga detalye parte sa ila. Mailog naton si Pablo kon sambiton naton ang maayo nga mga kinaiya sang aton mga kauturan. Kon himuon naton ini, magasuod kag magapalanggaanay pa gid ang mga kauturan sa kongregasyon.

11. Kon wala kita nag-intiendihanay sang isa ka utod, ano ang himuon naton para indi madula ang paghidait?

¹¹ May mga tion nga nagabaisay bisan ang hamtong nga mga Cristiano. Natabo ini kay Pablo kag sa iya suod nga abyan nga si Bernabe. Nagbaisay sila nga duha kon bala paupdon nila si Marcos ukon indi sa ila masunod nga paglakbay bilang misyonero. “Akig sila nga nagbaisay,” kag nagbulagay sila. (Binu. 15:37-39) Pero ginsolbar nila ini. Nag-ayuhay liwat sanday Pablo, Bernabe, kag Marcos bangod ginpabaloran nila ang paghidait kag paghiusa sa kongregasyon. Sang ulihi, maayo ang mga ginsiling ni Pablo parte kay Bernabe kag kay Marcos. (1 Cor. 9:6; Col. 4:10) Kon wala kita nag-intiendihanay sang isa ka utod sa kongregasyon, dapat man naton ini solbaron kag dapat padayon kita nga magpokus sa iya maayo nga mga kinaiya. Kon himuon naton ini, nagabulig kita para indi madula ang paghidait kag para indi maguba ang paghiusa sa kongregasyon.—Efe. 4:3.

12. Ano ang pila sa mga kabudlayan sang aton mga kauturan?

¹² Mapalig-on naton ang aton mga kauturan kon pabakuron naton ang ila pagtuo kay Jehova. Ang pila sa ila ginapakalain sang mga miembro sang ila pamilya nga indi Saksi ukon sang ila mga kaupod sa ulubrahan ukon mga kaeskwela. Ang iban naman may malala nga balatian ukon nabudlayan nga magpatawad. Kag ang iban naman tinuig na nga nabawtismuhan kag madugay na nga nagahulat nga tapuson ini nga sistema. Bangod sini nga mga sitwasyon, posible matilawan ang pagtuo sang mga Cristiano subong. Naeksperiensiahan man sang mga kauturan sang unang siglo ang pareho sini nga mga kabudlayan. Ano ang ginhimo ni Pablo para pabakuron ang iya mga kauturan?

13. Paano ginbuligan ni Pablo ang iya mga kauturan nga ginpakalain sang iban bangod sang ila mga ginapatihan?

¹³ Gingamit ni Pablo ang Kasulatan para pabakuron ang pagtuo sang iya mga kauturan. Halimbawa, posible nga nabudlayan ang Judiyo nga mga Cristiano kon ano ang ila isiling sa mga miembro sang ila pamilya nga nagapakalain sa ila kag nagasiling nga mas maayo ang Judaismo sangsa Cristianismo. Sigurado nga napalig-on gid ini nga mga Cristiano sa sulat ni Pablo para sa mga Hebreo. (Heb. 1:5, 6; 2:2, 3; 9:24, 25) Puede nila gamiton ang maayo gid nga pagpaathag ni Pablo para mabal-an nila kon ano ang ila isiling sa mga miembro sang ila pamilya nga indi Cristiano. Subong, puede naton buligan ang aton mga kauturan nga ginapakalain man sang mga miembro sang ila pamilya. Buligan naton sila nga gamiton ang aton mga publikasyon nga nabase sa Biblia para ipaathag ang aton mga ginapatihan. Kag kon ginapakalain ang aton mga kauturan nga pamatan-on bangod nagapati sila sa pagpanuga, puede naton sila buligan sa pagpangita sang mga impormasyon sa mga brosyur nga Gintuga Bala ang Kabuhi? kag The Origin of Life—Five Questions Worth Asking para mapaathag nila kon ngaa nagapati sila sa pagpanuga.

14. Bisan pa masako si Pablo sa pagbantala kag pagtudlo sa iban, ano pa gid ang iya ginhimo?

¹⁴ Ginpalig-on ni Pablo ang iya mga kauturan nga ipakita ang gugma paagi sa “maayong mga buhat.” (Heb. 10:24) Magluwas nga ginbuligan  niya ang iya mga kauturan paagi sa iya mga ginsiling, ginbuligan man niya sila paagi sa iya mga ginhimo. Halimbawa, sang may tiggulutom sa Judea, nagbulig si Pablo sa pagpanagtag sang mga kinahanglanon sang mga kauturan didto. (Binu. 11:27-30) Bisan pa masako si Pablo sa pagbantala kag pagtudlo sa iban, nagapangita sia pirme sang paagi kon paano buligan ang mga imol. (Gal. 2:10) Paagi sa sini, nagbakod ang pagsalig sang iya mga kauturan nga atipanon gid sila pirme ni Jehova. Subong, kon ginagamit naton ang aton tion, kusog, kag mga ikasarang para buligan ang mga nahalitan sang kalamidad, ginapabakod man naton ang pagtuo sang aton mga kauturan. Amo man sini ang resulta kon regular kita nga nagahatag sang donasyon para sa bug-os kalibutan nga hilikuton. Pila lang ini sa mga paagi para mabuligan naton ang aton mga kauturan nga magsalig nga indi gid sila pagpabay-an ni Jehova.

15-16. Paano naton mabuligan ang aton mga kauturan nga nagluya ang pagtuo?

¹⁵ Padayon nga ginbuligan ni Pablo ang mga kauturan nga nagluya ang pagtuo. Ginpakitaan niya sila sang kaluoy, kag mahigugmaon ang iya paagi sang paghambal kon nagaistorya sia sa ila. (Heb. 6:9; 10:39) Halimbawa, sa iya sulat para sa mga Hebreo, pirme niya ginagamit ang mga tinaga nga “kita” kag “aton” para ipakita nga dapat man niya iaplikar ang iya ginalaygay. (Heb. 2:1, 3) Pareho kay Pablo, indi kita dapat madulaan sang paglaum kon nagabulig kita sa aton mga kauturan nga nagluya ang pagtuo. Sa baylo, pabakuron naton sila paagi sa pagpabatyag sa ila nga importante sila sa aton. Paagi sa sini, mabatyagan nila nga palangga gid naton sila. Mapalig-on naton sila paagi sa aton mga ginasiling, pero mas mapalig-on pa gid naton sila kon mahigugmaon ang aton paagi sang paghambal.

¹⁶ Ginpahanumdom ni Pablo sa iya mga kauturan nga nabal-an ni Jehova ang ila maayo nga mga ginhimo. (Heb. 10:32-34) Puede man naton  ini himuon kon nagabulig kita sa aton utod nga nagluya ang pagtuo. Puede naton sia pamangkuton kon paano sia nangin Saksi ni Jehova, ukon palig-unon naton sia nga dumdumon ang mga tion nga ginbuligan sia ni Jehova. Paagi sa sini, mabuligan naton sia nga magsalig nga wala nalimtan ni Jehova ang mga ginhimo niya sang una para ipakita nga palangga niya si Jehova, kag indi gid sia pagpabay-an ni Jehova sa palaabuton. (Heb. 6:10; 13:5, 6) Paagi sa sini nga mga pag-istoryahanay, posible nga mapalig-on ining aton pinalangga nga mga kauturan nga magpadayon sa pag-alagad sa Iya.

17. Ano ang ginahimo naton nga puede pa naton mapauswag?

¹⁷ Mapauswag pa naton ang aton mga ginahimo para pabakuron ang isa kag isa, pareho sa isa ka construction worker nga nagauswag ang mga ikasarang samtang nagaligad ang tion. Mabuligan naton ang iban nga mangin mabakod sa pagbatas sa mga problema paagi sa pagsugid sa ila sang mga halimbawa sang mga nagbatas sang una. Mapakita naton nga ginapabaloran naton ang paghidait paagi sa pagsambit sang maayo nga mga kinaiya sang iban, paagi sa pagpanikasog nga indi madula ang paghidait kon may nag-utwas nga problema, kag paagi sa pagsolbar sang mga indi pag-intiendihanay. Kag padayon naton nga mapabakod ang pagtuo sang aton mga kauturan paagi sa pagsugid sa ila sang importante nga mga kamatuoran sa Biblia, paagi sa pagbulig sa mga nagakinahanglan, kag paagi sa pagbulig sa mga nagluya ang pagtuo.

18. Ano ang gusto mo nga himuon?

¹⁸ Malipayon kag kontento ang mga nagaboluntaryo sa konstruksion sang mga bilding kag mga pasilidad sang organisasyon. Kon buligan naton ang aton mga kauturan nga magbakod ang ila pagtuo, mangin malipayon kita kag kontento. Ang mga bilding maguba sa ulihi, pero magapadayon asta sa wala sing katapusan ang mga resulta sang aton ginahimo nga pagpabakod sa aton mga kauturan. Kabay pa nga ‘padayon naton nga palig-unon kag pabaskugon ang isa kag isa.’—1 Tes. 5:11.