1. Suno sa Hebreo 12:1, ano ang dapat naton himuon para matapos naton ang palumba para sa kabuhi?

 GINKUMPARAR sang Biblia sa isa ka palumba ang aton kabuhi bilang mga Cristiano. Padyaan sang kabuhi nga wala sing katapusan ang mga makatapos sa sini nga palumba. (2 Tim. 4:7, 8) Malapit na lang gid matapos ini nga palumba, gani indi gid kita dapat mag-untat sa pagdalagan. Natapos ni apostol Pablo ang iya palumba para sa kabuhi, kag may ginsiling sia nga makabulig sa aton. Nagsiling sia nga ‘ihaboy naton ang tagsa ka kabug-atan kag magdalagan kita nga may pagbatas sa palumba nga ginabutang sa aton atubangan.’—Basaha ang Hebreo 12:1.

2. Ano ang buot silingon sang ekspresyon nga ‘ihaboy ang tagsa ka kabug-atan’?

² Sang nagsiling si Pablo nga dapat naton ‘ihaboy ang tagsa ka kabug-atan,’ buot bala niya silingon nga wala sing lulan ang mga Cristiano nga dapat nila dal-on? Indi amo sina ang buot niya silingon. Sa baylo, buot niya silingon nga indi naton dapat pagdal-on ang bisan ano nga kabug-atan nga indi makabulig sa aton. Ini nga mga kabug-atan posible makapahinay kag makapakapoy sa aton. Para makabatas kita, dapat naton dayon hibaluon kon may dala kita nga amo sini nga klase sang mga kabug-atan kag dapat naton dayon ini ihaboy. Pero may mga lulan kita nga dapat gid naton dal-on. Kon indi naton ini pagdal-on, indi kita makapadayon sa pagdalagan sa palumba para sa kabuhi. (2 Tim. 2:5) Ano nga mga lulan ang dapat naton dal-on?

3. (a) Suno sa Galacia 6:5, ano ang dapat naton dal-on? (b) Ano ang binagbinagon naton sa sini nga artikulo, kag ngaa?

³ Basaha ang Galacia 6:5. May ginsiling si Pablo nga dapat naton  dal-on. Nagsiling sia nga “ang kada isa magadala sang iya kaugalingon nga lulan.” Ginapatuhuyan diri ni Pablo ang responsibilidad sang kada isa sa aton bilang mga alagad sang Dios. Kita ang dapat maghimo sini nga responsibilidad kag indi naton ini puede ipasa sa iban. Sa sini nga artikulo, binagbinagon naton kon ano ang nalakip sa aton “kaugalingon nga lulan” kag kon paano naton ini dal-on. Hibaluon man naton ang mga kabug-atan nga posible ginadala naton kag kon paano naton ini mahaboy. Kon dal-on naton ang aton lulan kag kon ihaboy naton ang mga kabug-atan, matapos naton ang palumba para sa kabuhi.

4. Ngaa indi mabudlay himuon ang aton promisa kay Jehova nga alagaron naton sia asta sa wala sing katapusan? (Tan-awa man ang piktyur.)

⁴ Ang aton promisa kay Jehova nga alagaron naton sia asta sa wala sing katapusan. Sang nagdedikar kita kay Jehova, nagpromisa kita sa iya nga simbahon naton sia kag himuon naton ang iya kabubut-on. Dapat gid naton tumanon ang aton promisa. Serioso ini nga responsibilidad, pero indi ini isa ka kabug-atan. Kay man, gintuga kita ni Jehova para himuon ang iya kabubut-on. (Bug. 4:11) Gintuga niya kita nga may  handum nga kilalahon sia kag simbahon, kag gintuga niya kita suno sa iya larawan. Gani, nangin suod kita sa iya kag nalipay kita sa paghimo sang iya kabubut-on. (Sal. 40:8) Kag kon himuon naton ang kabubut-on sang Dios kag kon sundon naton ang iya Anak, “makakita [kita] sing kapahuwayan.”—Mat. 11:28-30.

5. Ano ang makabulig sa imo para matuman mo ang imo promisa kay Jehova? (1 Juan 5:3)

⁵ Paano mo dal-on ini nga lulan? Duha ka butang ang makabulig sa imo. Una, padayon nga pabakura ang imo gugma kay Jehova. Mahimo mo ini paagi sa pagpamalandong sa tanan nga ginhimo niya para sa imo kag sa mga pagpakamaayo nga ihatag niya sa imo sa palaabuton. Samtang nagabakod ang imo gugma sa Dios, mas mangin mahapos sa imo ang pagtuman sa iya. (Basaha ang 1 Juan 5:3.) Ikaduha, iluga si Jesus. Ano ang nakabulig sa iya para mahimo niya ang kabubut-on sang Dios? Nangamuyo sia kay Jehova nga buligan sia kag nagpokus sia sa padya nga ihatag sa iya. (Heb. 5:7; 12:2) Pareho kay Jesus, mangamuyo kay Jehova nga pabakuron ka kag hunahunaa pirme ang kabuhi nga wala sing katapusan nga imo ginalauman. Kon mas higugmaon mo pa gid si Jehova kag kon ilugon mo ang iya Anak, matuman mo ang imo promisa sa iya.

6. Ngaa dapat naton himuon ang aton mga obligasyon sa aton pamilya? (Tan-awa man ang piktyur.)

⁶ Ang aton mga obligasyon sa aton pamilya. Sa palumba para sa kabuhi, dapat mas palangga naton si Jehova kag si Jesus sangsa aton mga paryente. (Mat. 10:37) Pero indi buot silingon sini nga puede lang nga indi na naton paghimuon ang aton mga obligasyon sa aton pamilya. Kay man, para malipay sa aton ang Dios kag ang Cristo, dapat naton himuon ini nga mga obligasyon. (1 Tim. 5:4, 8) Kon himuon naton ini, mangin mas malipayon kita. Kabalo si Jehova nga mangin malipayon ang mga pamilya kon nagapalanggaanay ang bana kag ang asawa, kon ginarespeto nila ang isa kag isa, kon ginapalangga kag ginahanas sang mga ginikanan ang ila kabataan, kag kon ginatuman sang kabataan ang ila mga ginikanan.—Efe. 5:33; 6:1, 4.

7. Ano ang makabulig sa imo para mahimo mo ang imo mga obligasyon sa imo pamilya?

⁷ Paano mo dal-on ini nga lulan? Kon isa ikaw ka bana, asawa, ukon bata, magsalig sa mga laygay sang Biblia. Indi maghimo sang mga desisyon nga nabase lang sa imo emosyon, sa kustombre sa inyo lugar, ukon sa ginasiling sang mga eksperto. (Hulu. 24:3, 4) Gamita ang aton mga publikasyon nga nabase sa Biblia. May mga panugda ini kon paano mo maaplikar ang mga prinsipio sa Biblia. Ang halimbawa sa sini amo ang mga artikulo nga makita sa “Bulig Para sa Pamilya.” Mabasa mo diri ang mga impormasyon nga makabulig gid sa mga mag-asawa, mga ginikanan, kag mga tin-edyer para masarangan nila ang sarisari nga mga problema. b Panikasugi gid nga iaplikar ang ginasiling sang Biblia bisan pa wala ini ginaaplikar sang iban nga miembro sang inyo pamilya. Kon himuon mo ini, makabenepisyo ang inyo pamilya kag pakamaayuhon ka ni Jehova.—1 Ped. 3:1, 2.

8. Paano makaapekto sa aton ang aton mga desisyon?

⁸ Ang pagbaton sa mga resulta sang aton mga desisyon. Ginhatagan kita ni Jehova sang kahilwayan sa pagdesisyon, kag gusto niya nga maghimo kita sang maayo nga mga desisyon para mangin malipayon kita. Pero kon nakahimo kita sang indi maayo nga desisyon, wala niya kita ginaamligan sa indi maayo nga mga resulta sini. (Gal. 6:7, 8) Gani kon indi maayo ang aton mga desisyon, ukon may nahambal kita nga wala naton  napamensaran sang maayo, ukon may nahimo kita nga indi maayo, dapat naton batunon ang indi maayo nga mga resulta sini. Depende sa aton nahimo, posible nga konsiensiahon kita. Pero bangod kabalo kita nga manabat kita sa aton ginhimo nga mga desisyon, mapalig-on kita sini nga itu-ad ang aton mga sala, tadlungon ini, kag indi na ini pagsuliton. Kon himuon naton ini, makapadayon kita sa palumba para sa kabuhi.

9. Ano ang puede mo himuon kon nakahimo ka sang indi maayo nga desisyon? (Tan-awa man ang piktyur.)

⁹ Paano mo dal-on ini nga lulan? Kon indi mo na mabag-o ang nahimo mo nga indi maayo nga desisyon, batuna ang nangin resulta sini sa imo sitwasyon. Batuna nga indi mo na mabag-o ang nagligad. Indi pagbasula ang iban kag indi na mangita sang rason para paguaon nga husto ang imo desisyon kay magausik lang ini sang imo tion kag kusog. Sa baylo, batuna ang imo mga sala kag himua ang imo bug-os nga masarangan sa imo sitwasyon. Kon ginakonsiensia ka sa nahimo mo nga sala, mapainubuson nga mangamuyo kay Jehova, akua ang imo sala, kag pangabaya sia nga patawaron ka. (Sal. 25:11; 51:3, 4) Mangayo sing pasaylo sa nahimuan mo sang sala, kag kon kinahanglanon, magpabulig sa mga gulang. (Sant. 5:14, 15) Manuto sa imo mga sala, kag panikasugi nga indi na ini maliwat. Kon himuon mo ini, makasalig ka nga pakitaan ka ni Jehova sang kaluoy kag buligan ka niya.—Sal. 103:8-13.

10. Ngaa isa ka kabug-atan ang pagtinguha nga himuon ang indi naton masarangan? (Galacia 6:4)

¹⁰ Kon ginatinguhaan naton nga himuon ang indi naton masarangan. Kon ginakumparar naton ang aton kaugalingon sa iban, posible nga mabudlayan lang kita. (Basaha ang Galacia 6:4.) Kon pirme naton ginakumparar ang aton kaugalingon sa iban, posible nga mahisa kita kag tinguhaan naton nga labawan sila. (Gal. 5:26) Kon tinguhaan naton nga himuon ang ginahimo sang iban bisan pa indi naton ini masarangan, posible nga mahalitan kita. Ang Biblia nagasiling man: “Ang ginapaabot nga wala madayon nagapasubo sang tagipusuon.” (Hulu. 13:12) Gani kon tinguhaan naton nga himuon ang indi naton masarangan, masubuan lang kita, kapuyon, kag magahinay sa aton pagdalagan sa palumba para sa kabuhi.—Hulu. 24:10.

11. Ano ang makabulig sa imo para indi mo pagtinguhaan nga himuon ang indi mo masarangan?

¹¹ Paano mo mahaboy ini nga kabug-atan? Wala ginapaabot ni Jehova nga himuon mo ang indi mo masarangan, gani himua lang ang imo masarangan. (2 Cor. 8:12) Makasalig ka nga wala ginakumparar ni Jehova ang imo ginahimo sa ginahimo sang iban. (Mat. 25:20-23) Ginapabaloran niya ang imo bug-os kalag nga pag-alagad, ang imo katutom, kag ang imo pagbatas. Mangin mapainubuson. Batuna nga posible indi mo na mahimo ang mga gusto mo kuntani nga himuon bangod sa imo edad, panglawas, kag sitwasyon. Pareho kay Barzilai, indi pagbatuna ang isa ka asaynment kon indi mo ini masarangan bangod sang imo edad ukon panglawas. (2 Sam. 19:35, 36) Pareho kay Moises, batuna ang bulig sang iban. Ihatag man sa iban ang pila ka responsibilidad kon puede man lang nga ihatag ini sa ila. (Ex. 18:21, 22) Kon mapainubuson ka, indi mo pagtinguhaan nga himuon ang indi mo masarangan. Gani malikawan mo nga makapoy sa pagdalagan sa palumba para sa kabuhi.

12. Kita bala ang dapat basulon sa indi maayo nga mga desisyon nga ginhimo sang iban? Ipaathag.

¹² Kon ginabasol naton ang aton kaugalingon bangod sa indi maayo nga mga desisyon nga ginhimo sang iban. Indi kita ang makadesisyon para sa iban, kag indi sa tanan nga tion maamligan naton sila sa indi maayo nga mga resulta sang ila desisyon. Halimbawa, posible nga mag-untat sa pag-alagad kay Jehova ang isa ka  bata. Kon matabo ini, grabe gid ang kasubo sang mga ginikanan. Pero kon basulon sang mga ginikanan ang ila kaugalingon, mabug-at gid ini nga palas-anon. Indi gusto ni Jehova nga dal-on nila ini nga kabug-atan.—Roma 14:12.

13. Ano ang himuon sang mga ginikanan kon indi maayo ang desisyon sang ila bata?

¹³ Paano mo mahaboy ini nga kabug-atan? Dumduma nga ginhatagan ni Jehova ang kada isa sa aton sang kahilwayan sa pagdesisyon. Gani ang kada isa sa aton ang nagadesisyon kon bala alagaron naton sia ukon indi. Kabalo si Jehova nga indi ka isa ka perpekto nga ginikanan. Gusto lang niya nga himuon mo ang imo bug-os nga masarangan. Responsibilidad sang imo bata nga magdesisyon para sa iya kaugalingon, kag indi ikaw ang makadesisyon para sa iya. (Hulu. 20:11) Pero posible nga pirme mo ginapamensar ang imo mga kakulangan bilang isa ka ginikanan. Kon amo sini ang imo ginabatyag, isugid ini kay Jehova kag pangabaya sia nga patawaron ka. Kabalo sia nga indi mo na mabalik ang tion para bag-uhon kuntani ang natabo. Kag wala ginapaabot ni Jehova nga maamligan mo gid ang imo bata sa tanan nga indi maayo nga resulta sang iya desisyon. Tandai nga kon panikasugan sang imo bata nga magbalik kay Jehova, malipay gid si Jehova nga batunon sia liwat.—Luc. 15:18-20.

14. Ngaa dapat naton ihaboy ang balatyagon nga wala kita ginpatawad ni Jehova?

¹⁴ Kon nagabatyag kita nga wala kita ginpatawad ni Jehova. Kon makasala kita, normal lang nga makonsiensia kita. Pero kon nagabatyag kita nga wala kita ginpatawad ni Jehova sa aton sala, isa ini ka kabug-atan nga dapat naton ihaboy. Paano naton mabal-an nga amo sini ang aton ginabatyag? Kon natu-ad na naton ang aton sala, naghinulsol na kita, kag ginapanikasugan naton nga indi na ini masulit, makasalig kita nga ginpatawad na kita ni Jehova. (Binu. 3:19) Kon nahimo na naton ini, indi gusto ni Jehova nga hunahunaon naton nga wala pa niya kita napatawad. Kabalo sia nga makahalit sa aton ini nga panghunahuna. (Sal. 31:10) Kon grabe gid ang aton kasubo, posible nga mag-untat kita sa pagdalagan sa palumba para sa kabuhi.—2 Cor. 2:7.

15. Ano ang makabulig sa imo kon nagabatyag ka nga wala ka ginpatawad ni Jehova? (1 Juan 3:19, 20) (Tan-awa man ang piktyur.)

 ¹⁵ Paano mo mahaboy ini nga kabug-atan? Kon nagabatyag ka nga wala ka ginpatawad ni Jehova, hunahunaa ang iya “matuod nga kapatawaran.” (Sal. 130:4) Amo ini ang iya ginpromisa sa mga sinsero nga nagahinulsol kag ginpatawad na niya: “Indi ko na pagdumdumon ang ila sala.” (Jer. 31:34) Ginapahangop sini nga indi gid pag-isukmat sa imo ni Jehova ang imo mga sala nga napatawad na niya. Gani kon makaeksperiensia ka sang mga kabudlayan nga resulta sang nahimo mo nga mga sala, indi paghunahunaa nga wala ka ginpatawad ni Jehova. Kag indi pagpabudlayi ang imo kaugalingon kon ginkuhaan ka sang mga responsibilidad sa kongregasyon. Wala na ginadumdom ni Jehova ang imo mga sala, gani indi mo man ini dapat pagdumdumon.—Basaha ang 1 Juan 3:19, 20.

16. Ano ang dapat naton mahangpan samtang nagadalagan kita sa palumba para sa kabuhi?

¹⁶ Samtang nagadalagan kita sa palumba para sa kabuhi, dapat ‘magdalagan kita sa paagi nga makuha naton ang padya.’ (1 Cor. 9:24) Mahimo naton ini kon nahangpan naton ang kinalain sang mga lulan nga dapat naton dal-on sa mga kabug-atan nga dapat naton ihaboy. Sa sini nga artikulo, ginbinagbinag naton ang pila lang ka halimbawa sini. Pero madamo kita sang mga lulan kag mga kabug-atan. Nagsiling si Jesus nga posible “mabug-atan [kita] sang sobra nga pagkaon kag sobra nga pag-inom kag mga kabalaka sa kabuhi.” (Luc. 21:34) Makabulig sa imo ini nga teksto kag ang iban pa nga mga teksto para mabal-an mo ang mga dapat mo bag-uhon samtang nagadalagan ka sa palumba para sa kabuhi.

17. Ngaa makasalig kita nga matapos naton ang pagdalagan sa palumba para sa kabuhi?

¹⁷ Makasalig kita nga matapos naton ang pagdalagan sa palumba para sa kabuhi bangod hatagan kita ni Jehova sing kusog nga kinahanglan naton. (Isa. 40:29-31) Gani, indi maghinayhinay sa imo pagdalagan. Iluga si apostol Pablo nga nagdalagan sa bug-os niya nga masarangan para mabaton niya ang padya. (Fil. 3:13, 14) Indi puede nga iban ang magdalagan sa sini nga palumba para sa imo, pero matapos mo gid ini nga palumba bangod buligan ka ni Jehova. Buligan ka ni Jehova sa pagdala sang imo mga lulan kag sa paghaboy sa mga kabug-atan. (Sal. 68:19) Kaupod mo si Jehova, gani mabatas mo ang pagdalagan sa palumba para sa kabuhi kag matapos mo ini.