• “Pamatyag ko ginluiban ako sang akon bana sing madamo nga beses.”

• “Grabe kanubo sang pagtan-aw ko sa akon kaugalingon, pamatyag ko kalaw-ay sa akon, kag daw wala ako sang pulos.”

• “Nahuya ako nga iistorya sa iban ang parte sa sini. Gani wala gid sing may nagapaumpaw sa akon.”

• “Pamatyag ko ginpabay-an ako ni Jehova.”

Ginapakita sini nga mga ekspresyon nga grabe gid kasakit para sa asawa kon nagatan-aw sang pornograpiya ang iya bana. Kag kon sekreto ini nga ginahimo sang bana sa sulod sang madamo nga binulan ukon tinuig, posible nga indi na sia pagsaligan sang iya asawa. Ang isa ka asawa nagsiling: “Pamatyag ko indi ko na kilala ang akon bana. Ginapamensar ko nga basi may ginasekreto pa sia sa akon.”

Ginhimo ini nga artikulo para sa mga asawa nga ang ila mga bana nagatan-aw sang pornograpiya. a Binagbinagon sa sini ang mga prinsipio sa Biblia nga makapaumpaw sa ila, makapabakod sa ila pagsalig nga buligan sila ni Jehova, kag makabulig sa ila nga mangin malinong ang ila hunahuna kag mangin suod pirme kay Jehova. b

Indi mo makontrol ang tanan nga ginahimo sang imo bana, pero may mahimo ka para maghaganhagan ang kasakit nga imo nabatyagan kag mangin malinong ang imo hunahuna. Ari ang pila sa mga puede mo himuon.

Indi pagbasula ang imo kaugalingon. Posible nga hunahunaon sang isa ka asawa nga may mga kakulangan sia gani nagatan-aw sang pornograpiya ang iya bana. Nahunahuna ni Alice c nga posible wala naguapahan sa iya ang iya bana. Ginapamensar niya, ‘Ngaa mas gusto pa sang akon bana nga magtan-aw sa iban nga babayi?’ Ginabasol sang pila ka asawa ang ila kaugalingon kay pamatyag nila ginapalala lang nila ang sitwasyon bangod sa ila reaksion. Si Danielle nagsiling, “Pamatyag ko ginaguba ko ang amon pag-asawahay bangod nagalalain ako kag nagapangakig.”

Kon amo man sini ang imo ginabatyag, dumduma nga wala ka ginabasol ni Jehova sa mga ginahimo sang imo bana. Ang Santiago 1:14 nagasiling: “Ang kada isa ginatilawan kon ginaganyat sia kag ginahaylo sang iya kaugalingon nga kailigbon.” (Roma 14:12; Fil. 2:12) Gani indi ka pagbasulon ni Jehova. Sa baylo, ginapabaloran niya ang imo katutom sa iya.—2 Cron. 16:9.

 Posible nga hunahunaon sang isa ka asawa nga wala naguapahan sa iya ang iya bana gani nagatan-aw sang pornograpiya ang iya bana. Pero indi ina matuod. Ang mga eksperto nagsiling nga kon nagatan-aw sang pornograpiya ang isa ka lalaki, nagapantasya sia sang seksuwal nga mga buhat nga indi mahatag sa iya sang bisan sin-o nga babayi.

Indi magkabalaka sing sobra. Si Catherine nagsiling nga pirme lang niya ginapamensar ang parte sa ginahimo sang iya bana nga pagtan-aw sang pornograpiya. Si Frances nagsiling: “Indi ako mahim-os kon wala ako kabalo kon diin ang akon bana. Grabe gid ang akon kabalaka.” Ang iban nga mga asawa nagsiling nga nahuya sila kon kaupod nila ang mga kauturan nga posible may nabal-an parte sa problema sang ila bana. May iban naman nga nagsiling nga daw wala sing may nakaintiende sang ila sitwasyon, gani pamatyag nila isahanon nila ini nga ginabatas.

Normal lang ini nga mga balatyagon. Pero kon amo lang ini pirme ang imo pamensaron, madugangan lang ang imo kabalaka. Gani magpokus sa imo kaangtanan kay Jehova. Makabulig ini sa imo nga mangin malig-on para makabatas ka.—Sal. 62:2; Efe. 6:10.

Makabulig man sa imo ang pagbasa sa mga kasaysayan sa Biblia parte sa mga babayi nga nakabatyag sang grabe nga kasubo. Pamalandungi kon paano sila naumpawan sang nangamuyo sila kay Jehova. May mga tion nga wala gindula ni Jehova ang ila mga problema, pero ginhatagan niya sila sang malinong nga hunahuna. Ang isa ka halimbawa amo si Hana. “Nasubuan gid” sia sa iya sitwasyon. Pero pagkatapos niya ‘makapangamuyo sing malawig kay Jehova,’ nangin malinong ang iya hunahuna bisan pa wala sia kabalo kon paano magabag-o ang iya sitwasyon.—1 Sam. 1:10, 12, 18; 2 Cor. 1:3, 4.

Magpabulig sa mga gulang. Puede sila mangin “palasilungan sa hangin, isa ka dalangpan sa unos.” (Isa. 32:2, footnote) Posible pa gani nga may irekomendar sila nga isa ka sister nga puede mo masugiran sang imo problema kag puede makabulig sa imo nga magtawhay ang imo hunahuna.—Hulu. 17:17.

Posible mo pa bala mabuligan ang imo bana para mauntatan niya ang pagtan-aw sang pornograpiya? Posible. Ang Biblia nagasiling nga kon may problema nga dapat solbaron ukon kon may kaaway nga dapat daugon, “ang duha mas maayo sangsa isa.” (Man. 4:9-12) Nadiskobrehan sang mga eksperto nga kon nagabuligay ang mag-asawa, daku ang posibilidad nga mauntatan sang bana ang pagtan-aw sang pornograpiya kag saligan sia liwat sang iya asawa.

 Pero nagadepende sa imo bana kon gusto gid niya untatan ang pagtan-aw sang pornograpiya. Nangamuyo na bala sia kay Jehova nga hatagan sia sang kusog kag nagpabulig na bala sia sa mga gulang? (2 Cor. 4:7; Sant. 5:14, 15) May mga ginahimo na bala sia para malikawan niya ang pagtan-aw sang pornograpiya? Halimbawa, gin-ibanan bala niya ang iya tion sa iya gadyet kag ginalikawan bala niya ang mga sitwasyon nga masulay sia? (Hulu. 27:12) Handa bala sia nga magpabulig sa imo kag mangin honest sa imo? Kon huo, posible nga mabuligan mo sia.

Paano? Binagbinaga ang halimbawa sang isa ka mag-asawa nga sanday Felicia kag Ethan. Adik si Ethan sa pornograpiya sang pamatan-on sia. Ginabuligan ni Felicia si Ethan nga indi matahap mag-istorya sa iya kon daw ginasulay sia nga magtan-aw sang pornograpiya. Si Ethan nagsiling: “Ginasugid ko sa akon asawa ang tanan kag ginapabatyag niya sa akon nga palangga niya ako. Ginabuligan niya ako nga malikawan ang mga sitwasyon nga posible magsulay sa akon nga magtan-aw sang pornograpiya, kag pirme niya ako ginapamangkot para mangin alisto ako sa sini. Kag ginabuligan niya ako nga ibanan ang akon oras sa pag-Internet kag maghalong sa paggamit sini.” Normal lang nga masakitan si Felicia kon daw gusto ni Ethan nga magtan-aw sang pornograpiya. Pero nagsiling si Felicia: “Indi ko sia mabuligan nga untatan ang iya bisyo kon maakig ako sa iya kag magpadala ako sa kasakit nga akon nabatyagan. Gani gin-istoryahan namon ang iya problema. Nakabulig ini para mahangpan niya ang akon ginabatyag kag nagpanikasog pa gid sia nga untatan ang iya bisyo.”

Kon himuon man ini sang mga mag-asawa, makabulig ini sa bana nga indi magtan-aw sang pornograpiya kag saligan sia liwat sang iya asawa. Kay man, kon ginasugid sang bana sa iya asawa ang iya mga kaluyahon, kon diin sia nagakadto, kag kon ano ang iya ginahimo, saligan sia liwat sang iya asawa kay wala sia sing ginasekreto.

Kon sa banta mo mabuligan mo ang imo bana kon sundon mo ini nga paagi, basaha ninyo kag binagbinaga nga magkaupod ini nga artikulo. Kon gusto sang imo bana nga untatan ang pagtan-aw sang pornograpiya kag pamatud-an nga puede mo sia saligan liwat, indi sia dapat maakig kon gusto mo ini istoryahan. Sa baylo, dapat niya mahangpan nga apektado ka sang iya ginahimo. Dapat mo sia buligan nga untatan ang iya bisyo, kag hatagan mo sia sang tsansa nga pamatud-an nga puede mo na sia saligan liwat. Dapat ninyo hibaluon nga duha kon ngaa may mga tawo nga nagatan-aw sang pornograpiya kag kon ano ang dapat himuon para mauntatan ini nga bisyo. d

 Kon nakulbaan ka kay basi magbaisay kamo kon istoryahan ninyo ang problema, puede mo pangabayon ang isa ka gulang nga komportable kamo nga duha para updan kamo kag buligan sa inyo pag-istoryahanay. Tandai nga bisan pa nauntatan na sang imo bana ang pagtan-aw sang pornograpiya, posible nga magaligad pa ang malawig nga tion antes mo sia saligan liwat. Indi ka dapat madulaan sang paglaum. Mangita sang bisan gamay lang nga pag-uswag sa inyo relasyon. Kon mangin mapinasensiahon kamo nga duha, makalaum ka nga magabakod liwat ang inyo pag-asawahay pagligad sang tion.—Man. 7:8; 1 Cor. 13:4.

Kon nagtan-aw liwat sang pornograpiya ang imo bana pagkatapos sang malawig nga tion nga nauntatan na niya ang pagtan-aw sini, buot silingon bala sini nga indi sinsero ang iya paghinulsol kag indi na gid sia magbag-o? Indi. Kon naadik sia sa pornograpiya, posible nga dapat niya ini pakigbatuan sa bilog niya nga kabuhi. Bisan pa tinuig na niya nga nauntatan ang pagtan-aw sang pornograpiya, posible nga masulay sia nga magtan-aw sini liwat. Para indi ini matabo, dapat mas manikasog pa gid sia nga likawan ang mga sitwasyon nga posible makasulay sa iya. Halimbawa, bisan pa nauntatan na niya ang iya bisyo, dapat padayon niya gihapon nga himuon ang mga butang nga nakabulig sa iya nga mauntatan ini. (Hulu. 28:14; Mat. 5:29; 1 Cor. 10:12) Dapat niya ‘bag-uhon ang iya panghunahuna’ kag dapat niya ‘dumtan ang malaut.’ Nalakip sa sini ang pornograpiya kag ang iban pa nga malain nga mga buhat pareho sang masturbasyon. (Efe. 4:23; Sal. 97:10; Roma 12:9) Kon panikasugan niya nga himuon ini, posible gid nga mauntatan niya ang iya bisyo. e

Pero ano abi kon indi gusto sang imo bana nga untatan ang iya bisyo? Normal lang nga may mga tion nga makabatyag ka sang kasubo kag kaakig. Posible nga makabatyag ka man nga daw ginaluiban ka niya. Itugyan kay Jehova ang imo ginabatyag para mangin malinong ang imo hunahuna. (1 Ped. 5:7) Magtuon, mangamuyo, kag magpamalandong para mangin suod ka pa gid kay Jehova. Kon himuon mo ini, makasalig ka nga magasuod man sia sa imo. Ang Isaias 57:15 nagasiling nga nagapuyo sia upod sa “mga nalisdan kag mapainubuson” kay gusto niya nga buligan sila nga mangin malipayon liwat. Padayon nga mangin matutom kay Jehova. Magpabulig sa mga gulang. Kag indi madulaan sang paglaum nga magaabot ang tion nga magahimo sang pagbag-o ang imo bana.—Roma 2:4; 2 Ped. 3:9.