Natun-an naton sa ginsambit nga artikulo nga may isa lang ka hulusayon nga importante gid para sa mga tawo kag mga anghel. Amo ini ang pagpakabalaan sa ngalan ni Jehova. Natun-an man naton nga nalakip sa pagpakabalaan sa ngalan ni Jehova ang isyu parte sa iya pagkasoberano ukon kon bala ang paggahom niya amo ang pinakamaayo. Nalakip man sa sini ang isyu parte sa katutom sang tawo sa Dios.

Ngaa masiling naton nga ang pinakaimportante nga hulusayon amo ang parte sa ngalan ni Jehova kag ang pagpakabalaan sa sini? Binagbinagon naton ang tatlo ka rason.

Una, ginpasipalahan ni Satanas ang ngalan, ukon reputasyon, ni Jehova sa hardin sang Eden. Paagi sa pamangkot ni Satanas kay Eva, gusto niya paguaon nga indi maalwan nga Dios si Jehova kag ginadingutan ni Jehova si Adan kag si Eva. Dayon kabaliskaran sa ginsiling ni Jehova ang ginsiling ni Satanas kay Eva, gani ginpagua niya nga butigon ang Dios ukon ginpasipalahan niya ang ngalan ni Jehova. Bangod sa ginhimo niya, nangin “Yawa” sia, nga buot silingon “manugpasipala.” (Juan 8:44) Nagpati si Eva sa mga kabutigan ni Satanas. Bangod sini, wala nagtuman si Eva sa Dios kag nagrebelde sia sa paggahom ni Jehova. (Gen. 3:1-6) Padayon nga ginapasipalahan ni Satanas ang ngalan ni Jehova asta subong paagi sa pagpalapta sang kabutigan parte sa Iya. Kon magpati ang mga tawo sa sini nga mga kabutigan, posible gid nga indi sila magtuman kay Jehova. Gani para sa katawhan sang Dios, ang pagpasipala sa balaan nga ngalan ni Jehova amo ang pinakamalain nga inhustisya. Amo ini ang panguna nga rason sang tanan nga pag-antos kag kalainan sa kalibutan.

Ikaduha, determinado si Jehova nga ibindikar ang iya ngalan para sa kaayuhan sang tanan niya nga tinuga. Pinakaimportante gid ini kay Jehova. Gani, nagsiling sia: “Pakabalaanon ko ang akon dungganon nga ngalan.” (Ezeq. 36:23) Kag maathag sa ginsiling ni Jesus kon ano dapat ang pinakaimportante nga ipangamuyo sang tanan nga matutom nga alagad ni Jehova. Nagsiling sia: “Pakabalaanon ang imo ngalan.” (Mat. 6:9) Sulitsulit nga ginasiling sang Biblia nga importante ang paghimaya sa ngalan ni Jehova. Binagbinaga ang pila ka halimbawa: “Ihatag ninyo kay Jehova ang himaya nga nagakadapat sa iya ngalan.” (1 Cron. 16:29; Sal. 96:8) “Mag-amba kamo sing mga pagdayaw para sa iya mahimayaon nga ngalan.” (Sal. 66:2) “Himayaon ko ang imo ngalan sa wala sing katubtuban.” (Sal. 86:12) Binagbinaga man ang isa sa mga tion nga naghambal si Jehova halin sa langit. Isa ka bes, sang ara si Jesus sa templo sa Jerusalem, nagsiling sia: “Amay, himayaa ang imo ngalan.” Dayon nagsabat si Jehova: “Ginhimaya ko na ini kag himayaon ko ini liwat.”—Juan 12:28. a

Ikatlo, bangod katuyuan ni Jehova nga dayawon ang iya balaan nga ngalan asta sa wala sing katapusan. Binagbinaga ini: Pagkatapos sang katapusan nga pagtilaw pagkatapos sang Isa ka Libo ka Tuig nga Paggahom sang Cristo, mangin hulusayon bala gihapon sa tanan nga anghel kag tawo ang parte sa pagpakabalaan sa ngalan ni Jehova? Para masabat  naton ini nga pamangkot, dumdumon naton ang duha ka isyu nga nalakip sa sini nga amo ang katutom sang mga tawo kag ang pagkasoberano ni Jehova. Kinahanglan pa bala tilawan liwat ang mga nakalampuwas sa katapusan nga pagtilaw para pamatud-an ang ila katutom? Indi na. Kay man, perpekto na sila kag napamatud-an na nila ini. Magakabuhi na sila sing wala sing katapusan. Indi naman kinahanglan nga pamatud-an pa kon bala ang paggahom ni Jehova amo ang pinakamaayo ukon indi. Kay man, magapasakop na ang tanan nga ara sa langit kag sa duta sa paggahom ni Jehova. Pero, mangin pinakaimportante bala gihapon para sa katawhan ni Jehova ang iya ngalan?

Pagkatapos sang katapusan nga pagtilaw, mapakabalaan na ang ngalan ni Jehova. Pero, mangin pinakaimportante gihapon para sa tanan nga alagad ni Jehova sa langit kag sa duta ang iya ngalan. Ngaa? Kay man, makita nila nga padayon nga magahimo si Jehova sang dalayawon nga mga butang. Binagbinaga ini: Bangod mapainubuson nga ibalik ni Jesus ang bug-os nga paggahom kay Jehova, ang Dios na “ang magagahom sa tanan.” (1 Cor. 15:28) Dayon, mabaton sang tanan nga tawo sa duta “ang mahimayaon nga kahilwayan [bilang] mga anak sang Dios.” (Roma 8:21) Kag matuman ang katuyuan ni Jehova nga ang tanan nga tawo sa duta kag ang mga anghel sa langit mangin isa ka nahiusa nga pamilya.—Efe. 1:10.

Ano dayon ang mangin epekto sini sa pamilya ni Jehova sa langit kag sa duta? Sigurado gid nga mapalig-on kita nga dayawon pa gid ang ngalan ni Jehova. Gintuytuyan si salmista David nga isulat ini: “Kabay nga dayawon si Jehova nga Dios . . . Kabay nga dayawon ang iya mahimayaon nga ngalan sa wala sing katubtuban.” (Sal. 72:18, 19) Samtang nagakabuhi kita sing wala sing katapusan, makakita gid kita pirme sang bag-o kag dalayawon nga mga rason para dayawon si Jehova.

Ginarepresentar sang ngalan ni Jehova ang tanan nga parte sa iya. Gani, madumduman naton sa ngalan ni Jehova ang parte sa iya gugma sa aton. (1 Juan 4:8) Madumduman naton pirme nga bangod sang gugma ni Jehova gintuga niya kita kag ginhatag niya ang iya Anak bilang gawad. Madumduman man naton pirme nga ang paagi sang paggahom ni Jehova matarong kag mahigugmaon. Kag samtang nagakabuhi kita sing wala sing katapusan, padayon pa gid naton nga makita ang gugma ni Jehova sa aton. Magapalig-on ini sa aton nga mangin mas suod pa gid sa iya bilang aton Amay kag mag-amba sing mga pagdayaw para himayaon ang iya ngalan.—Sal. 73:28.