1. Ngaa nanamian ka sa mga tawo nga mapinasensiahon?

 NANAMIAN gid kita sa mga tawo nga mapinasensiahon. Nagadayaw gid kita kon makita naton ang mga tawo nga wala naugot bisan pa kinahanglan nila maghulat. Nagapasalamat gid kita kon mapinasensiahon ang iban sa aton kon makasala kita. Nagapasalamat man kita kay nangin mapinasensiahon gid ang mga nag-Bible study sa aton. Wala sila natak-an bisan pa nabudlayan kita nga maintiendihan ang aton ginatun-an ukon bisan pa madugay naton naaplikar ang isa ka panudlo sang Biblia. Ang pinakaimportante sa tanan, nagapasalamat gid kita kay nangin mapinasensiahon si Jehova nga Dios sa aton.—Roma 2:4.

2. Ano nga mga sitwasyon nga posible mabudlayan kita nga mangin mapinasensiahon?

² Bisan pa nanamian kita sa mga tawo nga mapinasensiahon, posible nga mabudlayan kita kon kaisa nga mangin mapinasensiahon. Halimbawa, posible nga maubusan kita sang pasensia kon grabe ka traffic, ilabi na kon daw ma-late na kita. Posible nga maugot kita kon may ginhimo ang iban nga nagpaakig sa aton. Kag kon kaisa, posible nga magbatyag kita nga daw kadugay matuman sang promisa ni Jehova nga bag-o nga kalibutan. Gusto mo bala nga mangin mas mapinasensiahon? Binagbinagon naton sa sini nga artikulo kon paano kita mangin mapinasensiahon kag kon ngaa importante ini. Binagbinagon man naton kon paano pa gid kita mangin mas mapinasensiahon.

3. Ano ang ginahimo sang mapinasensiahon nga tawo kon may ginhimo ang iban nga posible magpaakig sa iya?

³ Ari ang apat nga puede naton himuon para mapakita ang pagkamapinasensiahon. Una, ang mapinasensiahon nga tawo indi dali maakig. Kon na-stress sia ukon may ginhimo ang iban nga posible magpaakig sa iya, kalmado lang sia kag wala sia nagabalos. Ang ekspresyon nga “indi dali maakig” una nga ginsambit sa Biblia sang ginlaragway  si Jehova bilang “isa ka Dios nga maluluy-on kag mainawaon, indi dali maakig kag bugana sa mainunungon nga gugma kag kamatuoran.”—Ex. 34:6.

4. Ano ang reaksion sang isa ka mapinasensiahon nga tawo kon kinahanglan niya maghulat?

⁴ Ikaduha, ang mapinasensiahon nga tawo makahulat sing kalmado. Kon may ginahulat sia kag madugay ini mag-abot, ginatinguhaan niya nga indi maugot ukon indi mairitar. (Mat. 18:26, 27) Madamo nga sitwasyon nga kinahanglan naton maghulat sing kalmado. Halimbawa, mapakita naton nga mapinasensiahon kita kon nagapamati kita sing maayo samtang nagahambal ang isa ka tawo kag ginapatapos naton sia hambal. (Job 36:2) Kag kon ginabuligan naton ang aton Bible study nga maintiendihan ang isa ka panudlo sang Biblia ukon para mabag-o niya ang iya malain nga batasan, posible nga kinahanglan man naton mangin mapinasensiahon.

5. Paano pa naton mapakita nga mapinasensiahon kita?

⁵ Ikatlo, ang mapinasensiahon nga tawo wala nagapadasudaso. Kon kaisa, may mga dapat gid man kita himuon nga kinahanglan naton tapuson dayon. Pero, wala ginapadalian sang mapinasensiahon nga tawo ang iya mga ulubrahon bisan pa importante ini katama. Sa baylo, ginaplanuhan niya sing maayo ang iya dapat himuon. Dayon, nagapain sia sang bastante nga tion para mahimo niya sing maayo ang iya ulubrahon.

6. Ano ang ginahimo sang mapinasensiahon nga tawo kon may mga problema sia?

⁶ Ikap-at, ginatinguhaan sang mapinasensiahon nga tawo nga mabatas ang iya mga problema kag wala sia nagareklamo. Gani masiling naton nga kon mapinasensiahon ang isa ka tawo, nagabatas man sia. Siempre, puede gid naton masugid sa aton suod nga abyan ang aton mga problema. Pero, ginabatas sang mapinasensiahon nga tawo ang iya mga problema kag ginatinguhaan niya nga padayon nga mag-alagad sing malipayon kay Jehova. (Col. 1:11) Bilang katawhan ni Jehova, dapat naton himuon ining apat ka butang nga ginbinagbinag naton para mangin mapinasensiahon kita. Ngaa dapat kita mangin mapinasensiahon? Binagbinagon naton ang pila ka rason.

7. Suno sa Santiago 5:7, 8, ngaa dapat kita mangin mapinasensiahon? (Tan-awa man ang piktyur.)

⁷ Dapat kita mangin mapinasensiahon para maluwas kita. Pareho sa ginhimo sang matutom nga mga alagad sang Dios sang una, dapat man kita maghulat sing mapinasensiahon kon san-o tumanon ni Jehova ang iya mga promisa. (Heb. 6:11, 12) Suno sa Biblia, daw pareho kita sa isa ka mangunguma. (Basaha ang Santiago 5:7, 8.) Bisan pa wala kabalo ang isa ka mangunguma kon san-o gid matubo ang binhi nga iya ginsab-ug, padayon niya ini gihapon nga ginabunyagan. Mapinasensiahon sia nga nagahulat kay kabalo sia nga makaani gid sia sa ulihi. Sing kaanggid, mapisan kita nga nagaalagad bisan pa “wala [kita] makahibalo kon sa ano nga adlaw magakari ang [aton] Ginuo.” (Mat. 24:42) Mapinasensiahon kita nga nagahulat kay kabalo kita nga tumanon gid ni Jehova ang tanan niya nga promisa sa iya gintalana nga tion. Kon indi kita mangin mapinasensiahon, posible nga matak-an kita sa paghulat kag amat-amat kita nga magbiya kay Jehova. Posible man nga magpokus kita sa paghimo sang mga butang nga sa banta naton makahatag sa aton sang kalipay subong. Pero kon mangin mapinasensiahon kita, sigurado nga makabatas kita asta sa katapusan kag maluwas kita.—Miq. 7:7; Mat. 24:13.

8. Kon mapinasensiahon kita, paano ini makabulig sa aton para mangin maayo ang aton kaangtanan sa iban? (Colosas 3:12, 13)

⁸ Kon mapinasensiahon kita, makabulig ini para mangin maayo ang aton kaangtanan sa iban. Magapalig-on ini sa aton nga mamati sing maayo kon nagahambal ang iban. (Sant. 1:19) Makabulig man ini para indi madula ang paghidait. Kon mapinasensiahon kita, wala kita naga-react dayon ukon nagahambal sing masakit kon na-stress kita. Kag makabulig ini sa aton nga indi maakig dayon kon nasakitan kita sa ginhimo ukon ginsiling sang iban. Imbes nga magbalos, ginatinguhaan naton nga ‘padayon nga batason ang isa kag isa kag magpinatawaray sing kinabubut-on.’—Basaha ang Colosas 3:12, 13.

9. Paano makabulig sa aton ang pagkamapinasensiahon kon may desisyon kita nga himuon? (Hulubaton 21:5)

⁹ Kon mapinasensiahon kita, makabulig man ini sa aton para makahimo kita sang mas maayo nga mga desisyon. Kon may kinahanglan kita desisyunan, wala kita nagapadasudaso sa pagdesisyon. Sa baylo, gina-research anay naton ini kag ginabinagbinag sing maayo para mabal-an naton kon ano ang pinakamaayo nga desisyon nga himuon naton. (Basaha ang Hulubaton 21:5.) Halimbawa, kon nagapangita kita sang obra, posible nga batunon naton dayon ang una nga obra nga ginatanyag sa aton, bisan pa nga makaapekto ini sa aton pag-attend sa mga miting kag pagbantala. Pero kon mapinasensiahon kita, ginabinagbinag anay naton kon daw ano kalayo sa aton balay ini nga obra, kon pila ka oras dapat kita mag-obra, kag kon ano ang epekto sini sa aton pamilya kag sa aton kaangtanan kay Jehova. Gani kon mapinasensiahon kita, malikawan naton nga makahimo sang indi maayo nga desisyon.

10. Ano ang dapat himuon sang isa ka Cristiano para mangin mapinasensiahon sia?

¹⁰ Mangamuyo nga buligan ka nga mangin mas mapinasensiahon. Ang pagkamapinasensiahon isa sa mga kinaiya nga ginapatubas sang balaan nga espiritu. (Gal. 5:22, 23) Gani puede naton ipangamuyo kay Jehova nga buligan kita nga mapakita ang mga kinaiya nga ginapatubas sang balaan nga espiritu. Kon makaeksperiensia kita sang sitwasyon nga mabudlayan kita nga mangin mapinasensiahon, dapat ‘padayon naton nga pangayuon’ ang balaan nga espiritu para buligan kita nga mangin mapinasensiahon. (Luc. 11:9, 13) Puede man naton pangabayon si Jehova nga buligan kita nga mailog ang iya pagtamod. Pagkatapos naton pangamuyo, dapat naton panikasugan nga mangin mapinasensiahon kada adlaw. Kon padayon kita nga mangamuyo nga buligan kita nga mangin  mapinasensiahon kag kon panikasugan naton nga ipakita ini nga kinaiya, buligan kita ni Jehova nga mangin mas mapinasensiahon.

11-12. Paano ginpakita ni Jehova nga mapinasensiahon sia?

¹¹ Pamalandungi ang mga halimbawa sa Biblia. Madamo kita sang mabasa sa Biblia parte sa mga tawo nga mapinasensiahon. Kon pamalandungan naton ini nga mga halimbawa, makatuon kita kon paano mangin mapinasensiahon. Pero antes sini, binagbinagon anay naton ang halimbawa ni Jehova kay sia ang pinakamaayo nga nagpakita sini.

¹² Sa hardin sang Eden, ginpasipalahan ni Satanas ang ngalan ni Jehova. Ginsulay niya si Eva nga duhaduhaan si Jehova bilang isa ka matarong kag mahigugmaon nga Manuggahom. Wala dayon ginlaglag ni Jehova si Satanas. Sa baylo, nangin mapinasensiahon si Jehova kag nagpakita sia sang pagpugong sa kaugalingon. Kabalo sia nga kinahanglan sang malawig nga tion para pamatud-an nga ang iya paggahom amo ang pinakamaayo. Samtang nagahulat sia, ginbatas niya ang tanan nga pagpasipala sa iya ngalan. Dugang pa, mapinasensiahon man nga nagahulat si Jehova kay gusto niya nga mas madamo nga tawo ang makatigayon sang kabuhi nga wala sing katapusan. (2 Ped. 3:9, 15) Bangod sini, minilyon ka tawo ang nakatuon parte sa iya kag nakilala sia. Gani kon pamalandungan naton kon paano kita nakabenepisyo kay nangin mapinasensiahon si Jehova, mangin mas mahapos sa aton nga hulaton ang tion nga laglagon na niya ini nga kalibutan.

13. Paano gin-ilog ni Jesus sing perpekto ang pagkamapinasensiahon sang iya Amay? (Tan-awa man ang piktyur.)

¹³ Gin-ilog ni Jesus sing perpekto ang pagkamapinasensiahon sang iya Amay, kag ginpakita niya ini sang ari sia sa duta. Posible nga may mga tion nga nabudlayan si Jesus nga mangin mapinasensiahon ilabi na sa salimpapaw nga mga escriba kag mga Fariseo. (Juan 8:25-27) Pero pareho sa iya Amay, indi man dali maakig si Jesus. Sang  gin-insulto sia ukon ginpakalain, wala sia naakig. (1 Ped. 2:23) Mapinasensiahon nga ginbatas ni Jesus ang mga kabudlayan kag wala sia nagreklamo. Amo ini ang rason kon ngaa ginasilingan kita sang Biblia nga ‘binagbinagon sing maayo ang isa nga nagbatas sang pagpakalain sang mga makasasala.’ (Heb. 12:2, 3) Paagi sa bulig ni Jehova, mabatas man naton sing mapinasensiahon ang bisan ano nga kabudlayan.

14. Ano ang matun-an naton sa pagkamapinasensiahon ni Abraham? (Hebreo 6:15) (Tan-awa man ang piktyur.)

¹⁴ Posible nga may pila sa aton nga naghunahuna sadto nga maabot na ang katapusan. Pero subong, nabalaka kita kay basi indi na naton makita ang pag-abot sang katapusan. Ano ang makabulig sa aton nga padayon nga maghulat sing mapinasensiahon? Binagbinaga ang halimbawa ni Abraham. Sang 75 anyos si Abraham, wala pa sia sing bata. Pero nagpromisa si Jehova sa iya: “Himuon ko ikaw nga isa ka daku nga pungsod.” (Gen. 12:1-4) Nakita bala ni Abraham ang bug-os nga katumanan sini nga promisa? Wala. Sang nakatabok na si Abraham sa Suba Eufrates, naghulat sia sing 25 ka tuig antes niya nakita ang pagkabun-ag sang iya anak nga si Isaac paagi sa milagro. Kag 60 ka tuig pa ang nagligad antes natawo ang iya mga apo nga sanday Esau kag Jacob. (Basaha ang Hebreo 6:15.) Wala nakita ni Abraham kon paano nangin isa ka daku nga pungsod ang iya mga kaliwat kag kon paano nila napanubli ang Ginsaad nga Duta. Pero bangod sang iya katutom, nangin suod sia sa iya Manunuga. (Sant. 2:23) Kon mabanhaw na si Abraham, sigurado nga malipay gid sia kon mabal-an niya nga bangod sang iya pagtuo kag pagkamapinasensiahon, ginpakamaayo ang tanan nga pungsod sa duta. (Gen. 22:18) Ano ang matun-an naton? Posible nga indi naton makita ang katumanan sang tanan nga promisa ni Jehova. Pero kon mangin mapinasensiahon kita pareho kay Abraham, sigurado nga pakamaayuhon kita ni  Jehova subong kag ilabi na sa Iya ginpromisa nga bag-o nga kalibutan.—Mar. 10:29, 30.

15. Ano ang puede naton binagbinagon sa aton personal nga pagtuon?

¹⁵ Madamo pa sing halimbawa sa Biblia parte sa mga tawo nga mapinasensiahon. (Sant. 5:10) Puede mo ilakip sa imo personal nga pagtuon ang parte sa ila. b Halimbawa, bata pa lang si David sang ginhaplasan sia para mangin masunod nga hari sang Israel, pero madamo pa nga tinuig ang iya ginhulat antes sia nangin hari. Samtang ginahulat ni Simeon kag ni Ana ang pag-abot sang ginpromisa nga Mesias, padayon sila nga nagaalagad kay Jehova sing matutom. (Luc. 2:25, 36-38) Samtang ginatun-an mo ang mga halimbawa sa Biblia sang mga tawo nga mapinasensiahon, pangitaa ang sabat sa sini nga mga pamangkot: Ano ang nakabulig sa sini nga tawo nga mangin mapinasensiahon? Ano nga pagpakamaayo ang nabaton niya bangod mapinasensiahon sia? Paano ko sia mailog? Makabenepisyo ka man kon tun-an mo ang parte sa mga tawo nga indi mapinasensiahon. (1 Sam. 13:8-14) Pangitaa ang sabat sa sini nga mga pamangkot: ‘Ano ang posible nga rason kon ngaa wala sila nangin mapinasensiahon? Ano ang malain nga resulta sa ila bangod wala sila nangin mapinasensiahon?’

16. Ano ang pila ka benepisyo kon mapinasensiahon kita?

¹⁶ Binagbinaga ang mga benepisyo kon mapinasensiahon kita. Kon mapinasensiahon kita, mas malipayon kita kag matawhay ang aton hunahuna. Gani, mangin mas maayo ang aton mental health kag ang aton panglawas. Kon mapinasensiahon kita sa iban, mangin maayo ang aton kaangtanan sa ila. Kag mangin suod pa gid kita sa aton mga kauturan. Kon may ginhimo ang iban nga posible magpaakig sa aton, wala kita dayon nagapangakig. Gani malikawan naton nga maglala pa gid ang sitwasyon. (Sal. 37:8, footnote; Hulu. 14:29) Pero ang pinakaimportante, kon mapinasensiahon kita, ginailog naton ang aton Amay sa langit kag mangin suod pa gid kita sa iya.

17. Ano ang dapat naton nga himuon?

¹⁷ Kanami gid kon mapinasensiahon kita kay makabenepisyo gid kita tanan. May mga sitwasyon nga indi mahapos mangin mapinasensiahon, pero buligan kita ni Jehova nga padayon nga mapakita ini nga kinaiya. Kag samtang ginahulat naton sing mapinasensiahon ang bag-o nga kalibutan, makasalig kita nga “ang mata ni Jehova nagabantay sa mga nagakahadlok sa iya, sa mga nagasalig sa iya mainunungon nga gugma.” (Sal. 33:18) Kabay pa nga padayon kita nga mangin mapinasensiahon.