1. Ano ang himuon naton para manamian kita sa pagtuon sa mga tagna sa Biblia?

 “NANAMIAN gid ako magtuon sang mga tagna sa Biblia,” siling sang isa ka pamatan-on nga brother nga si Ben. Amo man bala sini ang ginabatyag mo? Ukon nagabatyag ka bala nga daw kabudlay tun-an sang mga tagna sa Biblia? Posible gani nga natak-an ka sa pagtuon sang mga tagna sa Biblia. Pero, kon hibaluon mo ang mga rason kon ngaa ginpasulat ini ni Jehova sa iya Pulong, posible nga manamian ka sa pagtuon sa sini.

2. Ano ang binagbinagon naton sa sini nga artikulo?

² Sa sini nga artikulo, binagbinagon naton kon ngaa dapat naton tun-an ang mga tagna sa Biblia kag kon paano naton tun-an ini nga mga tagna. Dayon, binagbinagon naton ang duha ka tagna sa libro sang Daniel kag hibaluon naton kon ano ang mabenepisyo naton kon mahangpan naton ini nga mga tagna.

3. Ano ang dapat naton himuon para mahangpan naton ang mga tagna sa Biblia?

³ Para mahangpan naton ang mga tagna sa Biblia, dapat kita magpabulig. Halimbawa, imadyina nga nagbisita ka sa isa ka lugar nga indi mo sunado, pero pamilyar sa sini nga lugar ang upod mo nga abyan. Kabalo sia kon diin na kamo kag kon diin nagapadulong ang kada dalan. Sigurado nga magapasalamat ka gid kay gin-updan ka sang imo abyan. Daw pareho sa sini nga abyan si Jehova. Kabalo sia kon diin na kita sa iya gintalana nga tion kag kon ano ang matabo sa palaabuton. Gani para mahangpan naton ang mga tagna sa Biblia, dapat kita mangin mapainubuson kag magpabulig kay Jehova.—Dan. 2:28; 2 Ped. 1:19, 20.

4. Ngaa ginpasulat ni Jehova ang mga tagna sa iya Pulong? (Jeremias 29:11) (Tan-awa man ang piktyur.)

⁴ Gusto sang maayo nga mga ginikanan nga may maayo nga palaabuton ang ila kabataan, kag amo gid ini ang gusto ni Jehova para sa aton. (Basaha ang Jeremias 29:11.) Pero lain si Jehova  sa mga tawo kay kabalo sia kon ano ang matabo sa palaabuton. Ginpasulat ni Jehova ang mga tagna sa iya Pulong para mabal-an naton ang parte sa importante nga mga hitabo antes ini matabo. (Isa. 46:10) Gani regalo sa aton sang aton mahigugmaon nga Amay sa langit ang mga tagna sa Biblia. Pero paano ka makasigurado nga matabo gid ang mga tagna sa Biblia?

5. Ano ang matun-an sang mga pamatan-on sa eksperiensia ni Max?

⁵ Sa eskwelahan, napalibutan ang aton mga pamatan-on sang mga tawo nga wala nagatahod sa Biblia. Kon kaisa, bangod sang mga ginasiling kag ginahimo sini nga mga tawo, nagakaapektuhan ang mga pamatan-on nga Saksi amo nga ginaduhaduhaan nila ang ila ginapatihan. Talupangda ang eksperiensia sang isa ka brother nga si Max. Nagsiling sia, “Sang nagaeskwela ako, ginduhaduhaan ko kon bala matuod gid nga relihion ang ginatudlo sang akon mga ginikanan kag kon bala ang Biblia naghalin gid sa Dios.” Ano ang ginhimo sang iya mga ginikanan? Nagsiling sia, “Kabalo ako nga nagalalain sila, pero kalmado lang sila gihapon.” Gingamit sang mga ginikanan ni Max ang Biblia para sabton ang iya mga pamangkot. Gintun-an man ni Max ang Biblia. “Gintun-an ko ang mga tagna sa Biblia,” siling niya, “kag ginasugid ko sa iban nga mga pamatan-on ang akon natun-an.” Ano ang resulta? Nagsiling si Max, “Sang ginhimo ko ini, nangin kumbinsido ako nga ang Biblia naghalin gid sa Dios.”

6. Ano ang dapat mo himuon kon nagaduhaduha ka, kag ngaa dapat mo ini himuon dayon?

⁶ Ginduhaduhaan ni Max kon bala ang ginasiling sang Biblia amo gid ang kamatuoran. Kon amo man sini ang imo ginabatyag, indi ka dapat maluyahan sang buot. Pero may dapat ka himuon dayon. Ang pagduhaduha daw pareho sa tuktok. Kon pabay-an lang naton ang tuktok sa aton hamili nga pagkabutang, amat-amat ini nga maguba. Bangod sa pagduhaduha, posible man magluya ang imo pagtuo. Gani para madula ang imo pagduhaduha, dapat mo pamangkuton ang imo kaugalingon, ‘Nagapati bala ako sa ginasiling sang Biblia parte sa palaabuton?’ Kon nagaduhaduha ka, dapat mo tun-an ang mga tagna sa Biblia nga natuman na. Paano mo ini mahimo?

7. Paano nagpakita si Daniel sang maayo nga halimbawa kon paano tun-an ang mga tagna? (Daniel 12:10) (Tan-awa man ang piktyur.)

⁷ Nagpakita si Daniel sang maayo nga halimbawa kon paano tun-an ang mga tagna. Gintun-an ni Daniel ang mga tagna nga may husto nga motibo. Gusto niya nga mabal-an ang kamatuoran. Mapainubuson man si Daniel. Kabalo sia nga kon padayon sia nga mangin suod kay Jehova kag magtuman sa iya, buligan sia ni Jehova nga mahangpan ang mga tagna. (Dan. 2:27, 28; basaha ang Daniel 12:10.) Mapainubuson sia kay nagsalig sia nga buligan sia ni Jehova. (Dan. 2:18) Gintun-an man sing maayo ni Daniel ang mga Kasulatan nga matigayon sadto nga tion. (Jer. 25:11, 12; Dan. 9:2) Paano mo mailog si Daniel?

8. Ngaa indi magpati ang iban nga tawo nga natuman ang mga tagna sa Biblia, pero ano ang dapat naton himuon?

⁸ Usisaa ang imo motibo. Ginatun-an mo bala ang mga tagna sa Biblia kay gusto mo nga mabal-an ang kamatuoran? Kon huo, buligan ka ni Jehova. (Juan 4:23, 24; 14:16, 17) Pero lain ang  motibo sang iban nga tawo kon ngaa ginatun-an nila ang mga tagna sa Biblia. Gusto nila pamatud-an nga wala naghalin sa Dios ang Biblia. Nagahunahuna sila nga kon wala naghalin sa Dios ang Biblia, makadesisyon sila para sa ila kaugalingon kon ano ang husto kag sala. Gani importante nga husto ang aton motibo sa pagtuon sa mga tagna sa Biblia. Kag para mahangpan naton ang mga tagna sa Biblia, dapat naton ipakita ang isa ka importante nga kinaiya.

9. Ano nga kinaiya ang dapat naton ipakita para mahangpan naton ang mga tagna sa Biblia? Ipaathag.

⁹ Mangin mapainubuson. Nagpromisa si Jehova nga buligan niya ang mga mapainubuson. (Sant. 4:6) Gani dapat kita mangamuyo nga buligan niya kita para mahangpan naton ang mga tagna sa Biblia. Kon mapainubuson kita, kabalo man kita nga kinahanglan naton ang bulig sang matutom nga ulipon. Kay man, sila ang gintangdo ni Jehova nga maghatag sa aton sing espirituwal nga pagkaon sa husto nga tion. (Luc. 12:42) Bangod organisado nga Dios si Jehova, indi na kita matingala nga ang matutom nga ulipon lamang ang ginagamit niya para buligan kita nga mahangpan ang mga kamatuoran sa iya Pulong.—1 Cor. 14:33; Efe. 4:4-6.

10. Ano ang natun-an mo sa eksperiensia ni Esther?

¹⁰ Magtuon sing maayo. Magpili sang isa ka tagna nga nanamian mo kag dayon tun-i ini. Amo ini ang ginhimo sang isa ka sister nga si Esther. Nanamian sia sa mga tagna parte sa pag-abot sang Mesias. “Sang 15 anyos ako,” siling niya, “nag-research ako para mapamatud-an ko nga ini nga mga tagna ginsulat antes pa sang panahon ni Jesus.” Napamatud-an niya ini sang gintun-an niya ang parte sa Dead Sea Scrolls. Nagsiling sia: “Ang pila sa sini ginsulat antes pa sang panahon sang Cristo, gani sigurado nga ang mga tagna nga mabasa sa sini naghalin sa Dios.” Nagsiling pa sia, “Madamo nga beses ko nga ginbasa ang pila ka impormasyon antes ko ini nahangpan.” Pero nalipay gid sia kay ginhimo niya ini. Pagkatapos niya gintun-an ang pila ka tagna sa Biblia, nagsiling sia, “Kumbinsido ako nga matuod gid ang ginasiling sang Biblia.”

11. Paano kita makabenepisyo kon kumbinsido kita nga matuod ang ginasiling sang Biblia?

¹¹ Kon mabal-an naton kon paano natuman ang pila ka tagna sa Pulong sang Dios, mas magasalig pa gid kita kay Jehova kag sa iya mga instruksion. Ginasugiran man kita sang mga tagna sa Biblia nga may matahom kita nga paglaum sa palaabuton. Gani kon tun-an naton ini nga mga tagna, mangin malipayon kita gihapon bisan pa may mga problema kita. Binagbinagon naton ang duha ka tagna ni Daniel nga nagakatuman subong. Kon mahangpan naton ini nga mga tagna, makabulig ini sa aton nga makahimo sang maayo nga mga desisyon.

12. Ano ang ginasimbulo sang mga tiil nga ‘salsalon nga may samo nga mahumok nga daga’? (Daniel 2:41-43)

¹² Basaha ang Daniel 2:41-43. Sa damgo nga ginpaathag ni Daniel kay Hari Nabocodonosor, ang mga tiil sang estatwa nga nakita sang hari human sa ‘salsalon nga may samo nga mahumok nga daga.’ Kon ikumparar naton ini nga tagna sa iban pa nga mga tagna sa libro sang Daniel kag Bugna, makasiling kita nga nagasimbulo ini sa  pag-alyansa sang United States kag Britain nga amo ang pinakagamhanan nga mga gobierno subong sa kalibutan. Nagsiling si Daniel nga ini nga ‘ginharian may bahin nga mabakod kag may bahin nga mahuyang.’ Ngaa may bahin ini nga mahuyang? Bangod ang mahumok nga daga nga nagasimbulo sa ordinaryo nga mga tawo amo ang nagapaluya sa puersa sini nga ginharian. b

13. Ano nga importante nga mga kamatuoran ang matun-an naton sa sini nga tagna?

¹³ May matun-an kita nga importante nga mga kamatuoran sa damgo nga ginpaathag ni Daniel, ilabi na sa mga tiil sang estatwa. Una, ginpakita sang United States kag Britain nga mabakod gid sila. Halimbawa, nalakip sila sa mga pungsod nga nagdaug sa duha ka Bug-os Kalibutan nga Inaway. Pero, bangod nagaginamo ang mga pumuluyo sini kag nagaprotesta sa gobierno, nagluya ini nga kagamhanan sa kalibutan kag padayon pa gid ini nga magaluya. Ikaduha, ang pag-alyansa sang United States kag Britain amo ang katapusan nga kagamhanan sa kalibutan antes laglagon sang Ginharian sang Dios ang tanan nga ginharian sang tawo. Bisan pa kon kaisa ginatinguhaan sang iban nga pungsod nga buslan ang United States kag Britain bilang kagamhanan sa kalibutan, indi gid nila ini mabuslan. Masiling naton ini bangod “ang bato” nga nagasimbulo sa Ginharian sang Dios amo ang magadugmok sa mga tiil nga nagasimbulo sa pag-alyansa sang United States kag Britain.—Dan. 2:34, 35, 44, 45.

14. Paano kita makahimo sang maayo nga mga desisyon kon mahangpan naton ang tagna parte sa mga tiil nga human sa salsalon kag daga?

¹⁴ Kumbinsido ka bala nga matuod ang tagna ni Daniel parte sa mga tiil nga human sa salsalon kag daga? Kon huo, sigurado nga makabenepisyo ka gid. Malikawan mo nga magpokus sa pagtipon sang madamo nga kuarta ukon mga pagkabutang. Kay man, kabalo ka nga malapit na lang laglagon ining malain nga kalibutan. (Luc. 12:16-21; 1 Juan 2:15-17) Makabulig man ini sa imo nga unahon sa imo kabuhi ang pagbantala kag pagtudlo sa iban. (Mat. 6:33; 28:18-20) Pagkatapos mo matun-an ini nga tagna, pamangkuta ang imo kaugalingon, ‘Nagapati bala ako nga malapit na lang laglagon sang Ginharian sang Dios ang tanan nga gobierno sang tawo? Makita bala ini sa akon mga desisyon?’

15. Sin-o ang “hari sang aminhan” kag “hari sang bagatnan” subong? (Daniel 11:40)

¹⁵ Basaha ang Daniel 11:40. Mabasa naton sa Daniel kapitulo 11 ang parte sa duha ka hari, ukon gobierno, nga nagadis-uganay para mangin pinakagamhanan sa kalibutan. Kon ikumparar naton ini nga tagna sa iban pa nga mga tagna sa Biblia, masiling naton nga ang “hari sang aminhan” amo ang Russia kag ang mga kaalyado sini, kag ang “hari sang bagatnan” amo ang pag-alyansa sang United States kag Britain. c

16. Paano ginatratar sang “hari sang aminhan” ang katawhan sang Dios?

¹⁶ Ginahingabot sang “hari sang aminhan” ang katawhan sang Dios nga nagaistar sa mga lugar nga ginagamhan sini. Ginkastigo kag ginpriso ang pila ka Saksi bangod sa ila pagtuo. Bisan pa sang paghingabot sang “hari sang aminhan,” wala gid nagluya ang pagtuo sang aton mga kauturan. Sa baylo, nagbakod pa gid ang ila pagtuo kay Jehova kag sa iya Pulong. Ngaa? Bangod kabalo ang aton mga kauturan nga ang paghingabot sa katawhan sang Dios katumanan sang tagna sa libro sang Daniel. d (Dan. 11:41) Bangod nabal-an man naton ini, makabulig ini  sa aton nga magsalig nga matuman gid ang aton paglaum kag padayon nga mangin matutom kay Jehova.

17. Ano nga mga kabudlayan ang naeksperiensiahan sang katawhan sang Dios sa paggahom sang “hari sang bagatnan”?

¹⁷ Sang una, ginhingabot man sang “hari sang bagatnan” ang katawhan ni Jehova. Halimbawa, sa tion sang duha ka Bug-os Kalibutan nga Inaway, madamo nga kauturan ang ginpriso bangod nangindi sila nga magsoldado. Ginpahalin man sa eskwelahan ang pila ka Saksi nga kabataan kay nangindi sila nga magsaludo sa bandera. Pero sang nagligad nga mga tinuig, lain naman nga mga pagtilaw ang naeksperiensiahan sang katawhan ni Jehova nga nagaistar sa mga lugar nga ginagamhan sang “hari sang bagatnan.” Halimbawa, sa tion sang eleksion, posible masulay ang isa ka Cristiano nga suportahan ang isa ka partido sa pulitika ukon kandidato. Bisan pa nga indi sia magboto, posible nga gusto niya nga magdaug ang isa ka partido sa pulitika. Gani importante nga siguraduhon naton nga wala kita sing may ginadampigan sa pulitika, indi lang sa aton mga ginahimo,  kundi bisan sa aton hunahuna.—Juan 15:18, 19; 18:36.

18. Ano dapat ang epekto sa aton sang pag-inaway sang “hari sang aminhan” kag sang “hari sang bagatnan”? (Tan-awa man ang piktyur.)

¹⁸ Kon wala nagapati ang isa ka tawo nga matuod ang mga tagna sa Biblia, posible nga grabe gid ang iya kabalaka kon makita niya ang ‘pagsungayay’ sang “hari sang aminhan” kag sang “hari sang bagatnan.” (Dan. 11:40, footnote) Masarangan sining duha ka hari nga dulaon ang tanan nga kabuhi sa duta bangod sang ila nuklear nga mga armas. Pero kabalo kita nga indi gid magsugot si Jehova nga matabo ina. (Isa. 45:18) Gani, wala kita nabalaka sa pag-inaway sang “hari sang aminhan” kag sang “hari sang bagatnan.” Sa baylo, nagapabakod pa gid ini sang aton pagtuo. Kay man, ginapakita sini nga malapit na lang matapos ini nga sistema.

19. Ano ang dapat naton dumdumon parte sa mga tagna sa Biblia?

¹⁹ Wala kita kabalo kon paano matuman ang pila ka tagna sa Biblia. Bisan gani si manalagna Daniel wala nakahangop sang kahulugan sang pila ka tagna nga ginsulat niya. (Dan. 12:8, 9) Pero bisan pa wala kita kabalo kon paano gid matuman ang isa ka tagna, indi buot silingon sini nga indi na ini matuman. Kay man, sigurado nga isugid ni Jehova sa aton sa husto nga tion ang mga dapat naton mahangpan. Makasalig kita sa sini kay ginhimo na niya ini sang una.—Amos 3:7.

20. Ano nga mga tagna sa Biblia ang ginapaabot naton nga matuman sa indi na lang madugay, kag ano dapat ang padayon naton nga himuon?

²⁰ Ang mga pungsod magapahibalo sang “paghidait kag kalig-unan!” (1 Tes. 5:3) Dayon, salakayon sang mga gobierno sa kalibutan ang butig nga relihion kag laglagon ini. (Bug. 17:16, 17) Pagkatapos, salakayon naman sang mga gobierno ang katawhan sang Dios. (Ezeq. 38:18, 19) Magasugod dayon ang Armageddon nga amo ang katapusan nga inaway. (Bug. 16:14, 16) Malapit na lang ini tanan matabo. Samtang wala pa ini, kabay pa nga padayon naton nga bantayan ang katumanan sang mga tagna sa Biblia kag buligan naton ang iban nga himuon man ini. Kon himuon naton ini, ginapakita naton nga nagapasalamat gid kita sa aton mahigugmaon nga Amay sa langit.