Ginsulatan ni apostol Pablo ang mga Cristiano sa Tesalonica: “Kon may isa nga indi matinumanon sa amon ginasiling sa sini nga sulat, tandai ninyo sia.” (2 Tes. 3:14) Sang una, nagsiling kita nga para sa mga gulang ini nga instruksion. Kon may isa ka utod nga padayon nga nagabalewala sang mga prinsipio sa Biblia bisan pa pila ka beses na sia nga ginlaygayan, puede makahatag sang pamulongpulong ang mga gulang bilang paandam sa kongregasyon. Paagi sa sini, mabal-an sang mga kauturan nga indi sila dapat magpakig-upod sa gintandaan nga utod sa mga tipontipon ukon sa mga lingawlingaw.

Pero, may kinahanglan kita bag-uhon sa sini nga paghangop. Nahangpan na naton subong nga ang laygay ni Pablo nagapatuhoy sa desisyon nga himuon sang kada isa sa kongregasyon bangod sa pila ka kahimtangan. Gani, indi na kinahanglan maghatag sang pamulongpulong ang mga gulang bilang paandam sa kongregasyon. Ngaa ginbag-o naton ang aton paghangop? Binagbinagon naton ang iban pa nga ginsiling ni Pablo sa iya sulat.

Nagsiling si Pablo nga may pila ka utod sa kongregasyon nga “indi matinumanon.” Ginlaygayan niya sila base sa Pulong sang Dios, pero wala nila sia gintuman. Sang ginbisitahan niya sadto ang mga kauturan sa Tesalonica, ginsilingan niya sila: “Ang bisan sin-o nga indi luyag mag-obra, indi pagpakan-a.” Pero, may pila gihapon nga wala nagaobra bisan pa makasarang sila mag-obra para suportahan ang ila kaugalingon. Kag nagapasilabot man sila sa kabuhi sang iban. Paano dapat trataron sang mga kauturan ang indi matinumanon?​—2 Tes. 3:​6, 10-12.

“Tandai ninyo sia,” siling ni Pablo. Ang Griego nga tinaga sang sini nga ekspresyon nagapahangop nga dapat kabalo sila kon sin-o ang indi matinumanon, kag dapat sila maghalong para indi sila maimpluwensiahan. Indi lang ang mga gulang ang ginhatagan ni Pablo sini nga instruksion, kundi ang bilog nga kongregasyon. (2 Tes. 1:1; 3:6) Gani kon matalupangdan sang kada isa sa kongregasyon nga wala ginatuman sang isa ka utod ang mga laygay sa Pulong sang Dios, puede sia makadesisyon nga ‘untatan ang pagpakig-upod’ sa iya.

Buot silingon bala sini nga dapat nila trataron nga daw ginsikway sa kongregasyon ini nga utod? Indi. Kay man, nagsiling pa gid si Pablo: “Padayon ninyo sia nga laygayi subong isa ka utod.” Gani, magapakig-upod gihapon ang mga kauturan sa gintandaan nga utod sa tion sang miting kag pagbantala. Pero, indi sila dapat magpakig-upod sa iya sa mga tipontipon ukon sa mga lingawlingaw. Ngaa? “Agod mahuya sia,” siling ni Pablo. Kon sundon nila ang laygay ni Pablo, posible mahuya ang indi matinumanon nga utod kag magahimo sia sang mga pagbag-o.​—2 Tes. 3:​14, 15.

Paano naton iaplikar ini nga laygay sa aton tion subong? Una, dapat naton siguraduhon nga makabig gid man nga “indi matinumanon” ang isa ka utod base sa ginlaragway ni Pablo. Kay man, wala niya ginapatuhuyan ang mga utod nga lain ang desisyon sangsa aton desisyon kon parte sa mga butang nga dapat desisyunan base sa konsiensia. Kag wala niya ginapatuhuyan ang mga utod nga nakasakit sang aton balatyagon. Sa baylo, ang ginapatuhuyan ni Pablo amo ang mga utod nga hungod nga wala nagatuman sa maathag nga mga laygay sang Pulong sang Dios.

Subong, kon makita naton nga wala ginatuman sang isa ka utod ang mga laygay sang Pulong sang Dios, a ang kada isa sa aton amo ang magahimo sang personal nga desisyon nga indi magpakig-upod sa iya sa mga tipontipon ukon sa mga lingawlingaw. Bangod personal ini nga desisyon, indi naton ini dapat pag-iistorya sa mga miembro sang aton pamilya nga indi naton kaupod sa aton balay. Kag puede kita gihapon makapakig-upod sa utod sa tion sang miting kag pagbantala. Kon bag-uhon niya ang iya paggawi kag panimuot, puede na kita makapakig-upod sa iya liwat sa mga tipontipon ukon sa mga lingawlingaw.