SI Diana sobra na 80 anyos. May Alzheimer’s ang iya bana kag pila ka tuig nga ara sa balay para sa mga tigulang antes napatay. Napatay man ang iya duha ka bata nga lalaki kag may breast cancer pa gid sia. Pero pirme sia makita nga malipayon sang mga kauturan sa Kingdom Hall ukon sa ministeryo.

Si John, nga nangin nagalakbay nga manugtatap sing sobra 43 ka tuig, nanamian gid sa iya asaynment. Pero nag-untat sia bangod kinahanglan niya atipanon ang iya paryente nga nagamasakit, kag nagaalagad sia subong sa isa ka kongregasyon. Kon makita si John sang iya mga kakilala sa asembleya ukon sa kombension, nagasiling sila nga wala sia naapektuhan sang pagbag-o sa iya kahimtangan. Pirme sia malipayon.

Ngaa malipayon sanday Diana kag John? Paano mangin malipayon ang isa bisan nagaantos sia? Kag paano mangin malipayon ang isa bisan indi na niya mahimo ang isa ka asaynment nga nanamian gid niya? Ginasabat ini sang Biblia. Ini nagasiling: “Ang matarong magakalipay kay Jehova.” (Sal. 64:10) Mahangpan pa gid naton ang buot silingon sini kon mabal-an naton kon ano gid ang makahatag sang matuod nga kalipay.

May mga butang nga makapahalipay gid sa aton. Hunahunaa ang kalipay sang magnobyohanay nga kalaslon, ukon sang mag-asawa nga mangin isa na ka ginikanan, ukon sang nakabaton sang bag-o nga asaynment sa pag-alagad. Ini nga mga butang makahatag gid sang kalipay bangod naghalin ini kay Jehova. Sia ang nagtukod sang pag-asawahay, naghatag sa aton sang ikasarang nga makapanganak, kag naghatag sa aton sing mga asaynment sa kongregasyon.—Gen. 2:18, 22; Sal. 127:3; 1 Tim. 3:1.

Pero, mahimo umalagi lang ang mahatag sini nga kalipay. Mahimo nga ang isa ka tiayon mangin indi matutom ukon mapatay. (Ezeq. 24:18; Os. 3:1) Ang pila ka kabataan wala nagatuman sa ila mga ginikanan kag sa Dios, kag ang iban na-disfellowship. Ang mga anak ni Samuel wala mag-alagad kay Jehova sa husto nga paagi, kag si David nakaeksperiensia sang mga problema sa iya panimalay bangod sang iya sala.  (1 Sam. 8:1-3; 2 Sam. 12:11) Kasubo kag kasakit ang resulta kon matabo ini nga mga butang, kag indi gid ini makahatag sang kalipay.

Ang mga asaynment sa pag-alagad kay Jehova mahimo nga magbag-o bangod sang pagmasakit, responsibilidad sa pamilya, ukon pagbag-o sa organisasyon. Madamo sa mga nakaeksperiensia sa sini ang nagsiling nga nahidlaw gid sila sa kalipay nga ila natigayon sa paghimo sini.

Maathag nga ini nga mga rason sa kalipay umalagi lang. Pero may kalipay ayhan nga nagadugay bisan pa mabudlay ang kahimtangan sang isa? Sigurado gid nga may ara, bangod amo sini nga kalipay ang nabatyagan ni Samuel, ni David, kag sang iban pa sang nag-antos sila sang mga kabudlayan.

Nahibaluan gid ni Jesus ang matuod nga kalipay. Sang ara sia sa langit, kag maayo ang iya kahimtangan, ‘nalipay sia pirme sa atubangan ni Jehova.’ (Hulu. 8:30) Sang ari na sia sa duta, nakaeksperiensia sia sang mga kabudlayan. Pero nalipay sia gihapon sa paghimo sang kabubut-on sang iya Amay. (Juan 4:34) Kamusta sang nag-antos sia kag malapit na lang sia mapatay? Mabasa naton: “Tungod sa kalipay nga ginbutang sa iya atubangan ginbatas niya ang usok sang pag-antos.” (Heb. 12:2) Gani madamo kita sing matun-an sa duha ka butang nga ginsiling ni Jesus parte sa matuod nga kalipay.

Isa ka bes, nagbalik ang 70 ka disipulo ni Jesus pagkatapos sang ila pagbantala. Nalipay gid sila bangod sang ila mga nahimo, kag nagtabog pa gani sila sang mga demonyo. Pero nagsiling si Jesus sa ila: “Indi kamo magkalipay bangod gintuman kamo sang mga espiritu, kundi magkalipay kamo bangod ang inyo ngalan nasulat na sa langit.” (Luc. 10:1-9, 17, 20) Gani mas importante nga nahamuot si Jehova sa ila sangsa bisan ano man nga hilikuton. Dumdumon gid niya sila kag makahatag gid ini sa ila sang daku nga kalipay.

Sa isa pa gid ka higayon, samtang nagahambal si Jesus sa kadam-an, isa ka Judiyo nga babayi ang nagdayaw gid sa panudlo ni Jesus kag nagsiling sia nga malipayon gid ang iloy ni Jesus. Pero nagsiling si Jesus: “Mas malipayon ang mga nagapamati sa pulong sang Dios kag  nagatuman sini!” (Luc. 11:27, 28) Makapahalipay gid sa mga ginikanan kon maayo ang ila kabataan, pero ang pagtuman kay Jehova kag pagtigayon sang kaangtanan sa iya makahatag sang mas daku nga kalipay.

Gani, ang matuod nga kalipay amo ang paghibalo nga nahamuot si Jehova sa aton. Kag ini nga kalipay indi madula bisan sang mga kabudlayan. Ang matuod, mangin mas malipayon pa gid kita kon matutom kita bisan sa sini nga mga kabudlayan. (Roma 5:3-5) Isa pa, ginahatag ni Jehova ang iya espiritu sa mga nagasalig sa iya, kag isa sa mga kinaiya nga ginapatubas sini amo ang kalipay. (Gal. 5:22) Gani mas mahangpan naton kon ngaa ang Salmo 64:10 nagasiling: “Ang matarong magakalipay kay Jehova.”

Amo ini ang rason kon ngaa malipayon gihapon sanday Diana kag John, bisan sang ila mga kabudlayan. Si Diana nagsiling: “Nagdangop ako kay Jehova pareho sang isa ka bata nga nagadangop sa iya ginikanan.” Paano niya nabatyagan nga nahamuot ang Dios sa iya? Nagsiling sia: “Ginapakamaayo niya ako bangod padayon ako nga makabantala sing malipayon.” Ano naman ang nakabulig kay John nga mahuptan ang kalipay kag padayon nga nangin masako sa ministeryo bisan nag-untat sia sa iya nanamian nga asaynment? Nagsiling sia: “Sugod sang 1998 sang nagtudlo ako sa Ministerial Training School, mas nangin palatuon ako.” Nagsiling pa sia parte sa ginbatyag nila sang iya asawa: “Sa sulod sang mga tinuig, ang amon kahanda sa pag-alagad kay Jehova sa bisan ano man nga asaynment nakabulig gid sa amon nga maka-adjust dayon. Wala gid kami naghinulsol.”

Madamo man ang nakapamatuod sa ginsiling sang Salmo 64:10. Halimbawa, gin-asayn bilang mga espesyal payunir ang mag-asawa nga nag-alagad sa Bethel sa Estados Unidos sing sobra 30 ka tuig. Nagsiling sila: “Normal lang nga masubuan kon indi mo na mahimo ang butang nga nanamian mo gid,” pero nagdugang sila: “Indi puede nga masubuan ka na lang mientras tanto.” Sang ara na sila sa ila bag-o nga asaynment, nangin masako sila sa ministeryo. Nagsiling ang mag-asawa: “Nangamuyo kami sing espesipiko parte sa pila ka butang. Dayon sang ginsabat ang amon pangamuyo, nagpalig-on kag nagpahalipay ini sa amon. Wala madugay pag-abot namon sa amon asaynment, nagpayunir ang pila ka kauturan sa amon kongregasyon, kag nakakita kami sang duha ka interesado magtuon sa Biblia kag nagauswag sila.”

Indi mahapos mangin malipayon, kag may mga tion nga masubuan kita. Pero ginapasalig kita ni Jehova sa Salmo 64:10. Bisan pa naluyahan kita kon kaisa, makasalig kita nga kon mangin “matarong” kita paagi sa pagpabilin nga matutom bisan nagbag-o ang aton kahimtangan, “magakalipay [kita] kay Jehova.” Makasalig man kita nga matuman ang promisa ni Jehova nga “bag-o nga langit kag bag-o nga duta.” Dayon ang tanan mangin himpit na. Ang katawhan sang Dios ‘magakasadya kag magakalipay sing dayon’ bangod sa himuon sang Dios.—Isa. 65:17, 18.

Hunahunaa ang buot silingon sini. Indi na kita magmasakit kag kada adlaw may kapagsik kita. Indi na naton madumduman ang mga hitabo sang una nga naghatag sa aton sing kasakit. Makasalig kita nga “ang nagligad nga mga butang indi na pagdumdumon, ukon magpabilin sa tagipusuon.” Paagi sa pagkabanhaw, makita naton liwat ang aton pinalangga. Mabatyagan man sang minilyon ang ginbatyag sang mga ginikanan sang 12 ka tuig nga bata sang ginbanhaw sia ni Jesus: “Nahayanghag sila kag nagkalipay gid.” (Mar. 5:42) Sa ulihi, ang tanan nga tawo sa duta mangin “matarong” kag “magakalipay kay Jehova” sing wala sing katapusan.