Sa 2 Corinto 12:2, 3, nagsiling si Pablo parte sa isa ka tawo nga ‘ginsabnit pakadto sa ikatlo nga langit.’ Sin-o ini nga tawo? Sang nagsulat sia sa kongregasyon sa Corinto, nagsiling si Pablo nga gintangdo sia sang Dios nga mangin apostol. (2 Cor. 11:5, 23) Dayon nagsiling sia parte sa “mga palanan-awon kag mga bugna sang Ginuo.” Sa konteksto sang iya sulat, wala sing ginpatuhuyan nga iban nga tawo si Pablo. Gani, mahimo nga ginapatuhuyan niya ang iya kaugalingon subong ang tawo nga nakakita sang mga palanan-awon kag mga bugna.—2 Cor. 12:1, 5.

Gani si Pablo ang isa nga ‘ginsabnit pakadto sa ikatlo nga langit’ kag ‘ginsabnit pakadto sa paraiso.’ (2 Cor. 12:2-4) Gingamit niya ang tinaga nga “mga bugna,” nga mahimo ginsugid sa iya kon ano ang matabo sa palaabuton.

Ano ang nakita ni Pablo nga “ikatlo nga langit”?

Sa Biblia, ang “langit” mahimo magpatuhoy sa langit nga makita sang aton mga mata. (Gen. 11:4; 27:28; Mat. 8:20) Pero may iban pa gid ini nga kahulugan. Kon kaisa, nagapatuhoy ini sa paggahom sang tawo. (Dan. 4:20-22) Nagapatuhoy man ini sa paggahom sang Dios, paagi sa iya Ginharian.—Bug. 21:1.

Nakita ni Pablo ang “ikatlo nga langit.” Ano ang iya buot silingon? Kon kaisa, ginasulit sa Biblia sing tatlo ka beses ang isa ka butang para sa pagpadaku ukon pagpabaskog. (Isa. 6:3; Ezeq. 21:27; Bug. 4:8) Gani sang nagsiling si Pablo parte sa “ikatlo nga langit,” ginapatuhuyan niya ang isa ka sahi sang paggahom nga pinakamaayo kag tuman kataas, nga amo ang Mesianikong Ginharian ni Jesucristo kag sang 144,000 nga iya kaupod nga manuggahom. (Tan-awa ang Insight on the Scriptures, Vol. 1, p. 1059, 1062.) Pareho sa ginsulat ni apostol Pedro, ginahulat naton ang promisa sang Dios nga “bag-o nga langit.”—2 Ped. 3:13.

Kamusta naman ang ginsiling ni Pablo nga “paraiso”?

Ang “paraiso” mahimo may lainlain man nga kahulugan. (1) Bangod sa paraiso ginpaistar ang una nga tawo, ang ginsambit ni Pablo nga “paraiso” mahimo nagapatuhoy sa Paraiso sa duta sa palaabuton. (2) Mahimo nagapatuhoy man ini sa isa ka kahimtangan sa espirituwal sa bag-ong kalibutan nga maeksperiensiahan sang katawhan sang Dios. (3) Mahimo nagapatuhoy man ini sa matahom nga kahimtangan sa langit, ang “paraiso sang Dios” nga ginsambit sa Bugna 2:7.—Tan-awa ang Hulyo 15, 2015, nga Ang Lalantawan, p. 8. par. 8.

Posible nga ining tatlo ka butang ang ginapatuhuyan ni Pablo sa iya ginsiling sa 2 Corinto 12:4.

Bilang sumaryo:

Ang “ikatlo nga langit” sa 2 Corinto 12:2 mahimo gid nga amo ang Mesianikong Ginharian sa paggahom ni Jesucristo kag sang 144,000. Amo man ini ang “bag-o nga langit.”—2 Ped. 3:13.

“Ikatlo nga langit” ini nga Ginharian bangod amo ini ang pinakamaayo kag ginpakataas nga sahi sang paggahom.

Ang “paraiso” kon sa diin “ginsabnit” si Pablo sa isa ka palanan-awon mahimo magpatuhoy (1) sa Paraiso sa duta sa palaabuton, (2) sa espirituwal nga paraiso nga matabo sa palaabuton nga mas masangkad sangsa naeksperiensiahan naton subong, kag (3) sa “paraiso sang Dios” sa langit nga magaluntad man sa bag-ong kalibutan.

Gani, ang bag-ong kalibutan amo ang bag-o nga langit kag bag-o nga duta. Isa ini ka bag-o nga kahimusan nga nagalakip sang Ginharian sa langit kag sang katawhan nga nagaalagad kay Jehova sa paraiso sa duta.