Nabasa mo na bala sing maayo ang ulihi nga mga isyu sang Ang Lalantawan? Kon amo, tilawi kon masabat mo ang masunod nga mga pamangkot:

Ano ang pamatuod sa Kasulatan nga may empatiya ang Dios sa aton?

Sang nangin ulipon sa Egipto ang mga Israelinhon sang una, nahibaluan sang Dios ang ila kabudlayan kag nabatyagan niya ang ila kasakit. (Ex. 3:7; Isa. 63:9) Gintuga kita sang Dios suno sa iya larawan, gani mapakita man naton ang empatiya. May empatiya sia sa aton bisan pa pamatyag naton indi kita takus sang iya gugma.—wp18.3, p. 8-9.

Paano ang mga panudlo ni Jesus nakabulig sa mga tawo nga madula ang pagpasulabi?

Sang panahon ni Jesus, madamo nga Judiyo ang may pinasulabi. Ginpadaku sang Cristo ang pagpaubos, kag ginpakamalaut niya ang pagpabugal sang rasa. Ginlaygayan niya ang iya mga sumulunod nga dapat mag-ulutod ang pagkabig nila sa isa kag isa.—w18.06, p. 9-10.

Ano ang matun-an naton sa desisyon sang Dios nga indi pagpasudlon si Moises sa Ginsaad nga Duta?

Suod gid si Moises kay Jehova. (Deut. 34:10) Sang malapit na matapos sang mga Israelinhon ang ila paglakbay sa kamingawan sing mga 40 ka tuig, nagreklamo sila liwat kay wala sing tubig. Ginsugo sang Dios si Moises nga maghambal sa daku nga bato. Pero, ginhampak ini ni Moises. Mahimo nga naakig gid si Jehova kay wala gintuman ni Moises ang Iya mga instruksion ukon wala niya ginpadunggan ang Dios nga amo ang naghimo sang milagro. (Num. 20:6-12) Matun-an naton sa sini nga importante gid ang pagtuman kay Jehova kag paghatag sa iya sang kadungganan.—w18.07, p. 13-14.

Ngaa mahimo kita magsala sa aton opinyon kon nagahukom kita base lang sa aton makita?

May tatlo nga makita pirme sang mga tawo nga makaimpluwensia sa ila opinyon: rasa ukon nasyonalidad, manggad, kag edad. Wala sing ginapasulabi ang Dios, gani dapat naton tun-an nga mangin pareho sa iya ang aton pagtamod sa iban. (Binu. 10:34, 35)—w18.08, p. 8-12.

Ano ang pila ka paagi nga makabulig ang tigulang nga mga Cristiano?

Ang tigulang nga Cristiano nga may bag-o nga asaynment ginapabaloran gid sang Dios kag madamo sia gihapon sing mahimo para buligan ang iban. Puede sia magbulig sa mga indi Saksi nga tiayon kag mga indi aktibo, magtudlo sang Biblia, kag magpasangkad sang iya ministeryo.—w18.09, p. 8-11.

Ano ang mga gamit sang mga Cristiano nga ara sa Mga Gamit sa Pagpanudlo?

Ara ang contact card kag imbitasyon. Ara man ang walo ka matahom nga tract pati ang mga magasin nga Ang Lalantawan kag Magmata! May pila man ka brosyur, duha ka libro nga ginagamit sa pagtuon sa Biblia, kag apat ka video, nga ang isa amo ang Ngaa Dapat Tun-an ang Biblia?—w18.10, p. 16.

Paano ang isa ka Cristiano ‘makabakal sang kamatuoran’ suno sa Hulubaton 23:23?

Indi naton kinahanglan ang kuarta para mabakal ang kamatuoran. Pero, dapat kita maghatag sing tion kag magpanikasog para matigayon ini.—w18.11, p. 4.

Ano ang matun-an naton sa ginhimo ni Oseas sa iya asawa nga si Gomer?

Sulitsulit nga nagpanghilahi si Gomer, pero ginpatawad sia ni Oseas kag wala niya sia gindiborsiohan. Kon ang isa ka Cristiano makahimo sang imoralidad, puede sia patawaron sang inosente nga tiayon. Kon maghulid sia liwat sa iya tiayon nga nakasala, wala na sing rason nga puede sia makadiborsio suno sa Kasulatan.—w18.12, p. 13.