1, 2. Ngaa maalamon nga mamati sa aton Manunuga kon nagahimo sang importante nga mga desisyon? (Tan-awa ang mga piktyur sa umpisa sini nga artikulo.)

KON pamatan-on ka, mahimo nga madamo ang nagalaygay sa imo parte sa imo palaabuton. Ang mga manunudlo, mga manuglaygay sa eskwelahan, ukon iban pa mahimo magpalig-on sa imo nga magkuha sang mataas nga edukasyon kag mangita sang trabaho nga daku ang sueldo. Pero, indi amo sina ang ginalaygay ni Jehova sa imo. Siempre, gusto niya nga mag-eskwela ka sing maayo para masuportahan mo ang imo kaugalingon pagkatapos mo eskwela. (Col. 3:23) Pero kon nagahimo ka sang importante nga mga desisyon, ginapalig-on ka niya nga sundon ang mga prinsipio nga makabulig sa imo nga magkabuhi nga nagapahamuot sa iya sa sining tion sang katapusan.—Mat. 24:14.

² Dumduma nga nahibaluan ni Jehova ang tanan. Nahibaluan niya kon ano ang matabo sa palaabuton, kag nahibaluan niya nga malapit na gid ang katapusan. (Isa. 46:10; Mat. 24:3, 36) Kilala man niya kita, nahibaluan niya kon ano ang makapahalipay kag  makapasubo sa aton. Bisan pa daw maayo ang laygay sang mga tawo, pero kon indi ini base sa Pulong sang Dios, indi ini matuod nga kaalam.—Hulu. 19:21.

3, 4. Paano nakaapekto kanday Adan kag Eva kag sa ila mga kaanakan ang indi maayo nga laygay?

³ Madugay na nga ginahimo ang paglaygay sang indi maayo. Si Satanas ang una nga naglaygay sang indi maayo sa mga tawo. Ginsilingan niya si Eva nga mangin mas malipayon sila ni Adan kon sila ang magdesisyon para sa ila kaugalingon. (Gen. 3:1-6) Pero ang matuod, maiyaiyahon si Satanas. Gusto niya nga sia ang tumanon kag simbahon nanday Adan kag Eva kag sang ila mga kaanakan sa baylo nga si Jehova. Pero may nahimo na bala si Satanas para sa ila? Si Jehova ang naghatag sang tanan nga ara sa ila. Ginhatag niya si Eva para kay Adan kag si Adan para kay Eva, ang ila matahom nga puluy-an, kag ang ila perpekto nga lawas nga puede mabuhi sing wala sing katapusan.

⁴ Makapasubo nga gin-utod nanday Adan kag Eva ang ila kaangtanan sa Dios bangod wala sila magtuman sa iya. Indi gid maayo ang resulta sini. Pareho sa bulak nga gin-utod halin sa tanom, amat-amat sila nga nagtigulang kag napatay. Nag-antos man ang ila kaanakan bangod sang sala. (Roma 5:12) Bisan pa sang malain nga resulta, ang kalabanan nga tawo wala gihapon nagatuman sa Dios. Gusto nila nga sila ang magadesisyon para sa ila kaugalingon. (Efe. 2:1-3) Ano ang resulta? Ang Biblia nagasiling nga “wala [nagapakita] sing kaalam” ang mga nagapamatok kay Jehova.—Hulu. 21:30.

5. Ano ang nahibaluan ni Jehova nga himuon sang mga tawo, kag husto bala sia?

⁵ Nahibaluan ni Jehova nga may mga tawo nga gusto nga makilala sia kag mag-alagad sa iya, lakip sa sini ang mga pamatan-on. (Sal. 103:17, 18; 110:3) Ginapabaloran gid ni Jehova ini nga mga pamatan-on. Isa ka bala sa ila? Sigurado nga nalipay ka gid sa “maayo nga mga butang” nga ginhatag sang Dios. (Basaha ang Salmo 103:5; Hulu. 10:22) Ining “maayo nga mga butang” nagalakip sang bugana nga espirituwal nga pagkaon, maayo gid nga mga abyan, mapuslanon nga mga tulumuron, kag matuod nga kahilwayan. Binagbinagon naton ini.

6. Ngaa indi naton dapat pagpabay-an ang aton espirituwal nga kinahanglanon, kag paano ini ginahatag ni Jehova sa aton?

⁶ Indi pareho sa mga sapat, may espirituwal kita nga kinahanglanon nga mahatag lang sang aton Manunuga. (Mat. 4:4) Kon pamatian naton sia sing maayo, mabaton naton ang paghangop, kaalam, kag kalipay. “Malipayon ang mga mahunahunaon sa ila espirituwal nga kinahanglanon,” siling ni Jesus. (Mat. 5:3) Ginahatag sang Dios ang aton espirituwal nga kinahanglanon paagi sa iya Pulong kag paagi sa bugana nga espirituwal nga pagkaon nga ginaaman sang “matutom kag mainandamon nga ulipon.” (Mat. 24:45) Nalipay gid kita sa madamo nga klase sang espirituwal nga pagkaon!—Isa. 65:13, 14.

7. Paano ang espirituwal nga pagkaon nga ginaaman sang Dios makabulig sa imo?

⁷ Ang espirituwal nga pagkaon nga ginaaman sang Dios makahatag sa imo sang kaalam kag ikasarang sa paghunahuna sing maayo nga makaamlig sa imo. (Basaha ang Hulubaton 2:10-14.) Halimbawa, ini nga mga kinaiya makabulig sa imo nga indi maimpluwensiahan sang butig nga mga panudlo, pareho sang pagpati nga wala sing Manunuga ukon ang materyal nga mga butang amo ang makapahalipay sa imo. Makabulig man ini nga malikawan ang mga handum ukon mga buhat nga makahalit sa imo. Gani himua ang bug-os mo nga masarangan nga mangin maalam kag makahunahuna sing maayo, kag pabalori  ini. Kon himuon mo ini, mabatyagan mo ang pagpalangga ni Jehova kag gusto niya nga mangin maayo ang imo kabuhi.—Sal. 34:8; Isa. 48:17, 18.

8. Ngaa dapat subong na ang tion nga magpalapit sa aton Dios, kag paano ini makabulig sa aton sa palaabuton?

⁸ Sa indi madugay, laglagon na ang kalibutan ni Satanas. Si Jehova lang ang makaamlig sa aton kag makahatag sang aton kinahanglanon, lakip ang aton masunod nga kaunon. (Hab. 3:2, 12-19) Subong na ang tion nga magpalapit sa aton Dios kag pabakuron ang aton pagsalig sa iya. (2 Ped. 2:9) Kon himuon mo ini, bisan ano pa ang matabo, mabatyagan mo man ang ginbatyag ni salmista David, nga nagsulat: “Ginahunahuna ko si Jehova sa tanan nga tion. Bangod yara sia sa akon tuo nga kamot, indi ako malingkang.”—Sal. 16:8.

9. (a) Suno sa Juan 6:44, ano ang ginahimo ni Jehova? (b) Kon may makilala kita nga iban nga Saksi, ano ang tumalagsahon sa sini?

⁹ Ginabuyok ni Jehova ang mga interesado nga tawo nga mangin bahin sang iya pamilya kag sang matuod nga pagsimba. (Basaha ang Juan 6:44.) Kon may nakilala ka nga indi Saksi ni Jehova, ano ang nahibaluan mo parte sa iya? Mahimo nga diutay lang, pareho sang iya ngalan kag hitsura. Pero indi amo sina kon may nakilala ka nga Saksi kag nagahigugma kay Jehova. Bisan pa nga lain ang iya gindak-an, pungsod, tribo, ukon kultura, madamo ka na sing nahibaluan parte sa iya kag amo man sia sa imo!

10, 11. Sa ano nangin pareho ang katawhan ni Jehova, kag paano ini makabulig sa imo?

¹⁰ Bisan pa indi pareho ang inyo lenguahe, pareho kamo nga nagahambal sang “putli nga lenguahe” sang kamatuoran. (Sof. 3:9) Buot silingon nga pareho ang inyo ginapatihan parte sa Dios, talaksan sa moral, kag paglaum sa palaabuton. Makabulig ini sa inyo nga magsalig sa isa kag isa kag magbakod ang inyo pag-abyanay.

¹¹ Gani kon ginasimba mo si Jehova, may maayo ka gid nga mga abyan. May mga abyan ka sa bug-os nga kalibutan, bisan wala mo pa sila makita! Magluwas sa katawhan ni Jehova, sin-o pa ang may amo sini nga pagpakamaayo?

12. Ano ang puede mo himuon nga espirituwal nga mga tulumuron?

¹² Basaha ang Manugwali 11:9–12:1. May espirituwal ka bala nga mga tulumuron? Mahimo nga ginatinguhaan mo nga basahon ang Biblia kada adlaw. Ukon ginapanikasugan mo nga mapauswag ang imo pagkomento kag paghatag sang bahin sa miting. Ukon gusto mo nga mangin epektibo pa gid sa paggamit sang Biblia sa ministeryo. Ano ang batyagon mo kon nagauswag ka ukon ginakomendahan sang iban ang imo pag-uswag? Sigurado nga malipay ka gid. Ngaa? Bangod ginahimo mo ang kabubut-on ni Jehova, pareho kay Jesus.—Sal. 40:8; Hulu. 27:11.

13. Ngaa ang pag-alagad sa Dios mas maayo sangsa pagpokus sa mga tulumuron sini nga kalibutan?

¹³ Kon nagapokus ka sa pag-alagad kay Jehova, mangin malipayon ka kag may katuyuan ang imo kabuhi. Si apostol Pablo nagsulat: “Mangin malig-on kamo, mapag-on, kag madamo pirme sing ginahimo sa hilikuton sang Ginuo, kay nahibaluan ninyo nga ang inyo pagpangabudlay sa Ginuo indi wala sing pulos.” (1 Cor. 15:58) Sa kabaliskaran, ang mga tawo nga nagapokus sa mga tulumuron sang kalibutan indi gid mangin malipayon. Bisan pa daw nagmadinalag-on sila, masami nga nagabatyag sila nga may kulang gihapon sa ila kabuhi. (Luc. 9:25) May matun-an kita sa halimbawa ni Hari Solomon.—Roma 15:4.

14. Ano ang matun-an mo sa ginhimo ni Solomon?

¹⁴ Si Solomon ang isa sa pinakamanggaranon kag gamhanan nga tawo nga nagkabuhi sang una. Sia nagsiling: “Tilawan ko nga magpangalipay kag tan-awon kon ano ang maayo sa sini.” (Man. 2:1-10) Nagpatindog sia sang mga balay, naghimo sang mga hardin kag mga parke, kag ginhimo niya kon ano ang iya gusto. Ano dayon ang iya nabatyagan pagkatapos? Kontento bala sia kag malipayon? Si Solomon mismo nagsiling: “Sang ginpamalandungan ko ang tanan ko nga ginhimo . . . , nakita ko nga ang tanan wala sing pulos . . . Wala sing pulos ang bisan ano nga butang.” (Man. 2:11) Leksion gid ini sa aton! Iaplikar mo bala ini nga leksion?

15. Ngaa kinahanglan mo ang pagtuo, kag paano ini makabulig sa imo suno sa Salmo 32:8?

¹⁵ Indi gusto ni Jehova nga mag-antos ka para makatuon sang leksion. Kinahanglan mo ang pagtuo para tumanon ang Dios kag himuon ang iya kabubut-on. Ini nga pagtuo makabulig gid, kag indi ka gid sini pagpaslawon. Kay man, indi pagkalimtan ni Jehova “ang gugma nga ginpakita [mo] para sa iya ngalan.” (Heb. 6:10) Gani pabakura ang imo pagtuo, kag makita mo nga gusto sang imo Amay sa langit kon ano ang pinakamaayo para sa imo.—Basaha ang Salmo 32:8.

16. Ngaa dapat naton pabaloran ang aton kahilwayan kag gamiton ini sing maayo?

¹⁶ “Kon diin ang espiritu ni Jehova, may kahilwayan,” sulat ni Pablo. (2 Cor. 3:17) Ginapabaloran ni Jehova ang kahilwayan, kag gintuga niya kita nga pabaloran man ini. Pero, gusto niya nga gamiton mo sing maayo ang imo kahilwayan, kay magaamlig ini sa imo. Mahimo may kilala ka nga mga pamatan-on nga nagatan-aw sang pornograpiya ukon nagahimo sang seksuwal nga imoralidad, nagaentra sa delikado nga mga sport, ukon nagagamit sang droga kag palahubog. Sa umpisa, mahimo nga nanamian sila. Pero sa masami nagahalit gid ini, pareho sang balatian, pagkaadik, ukon kamatayon pa gani. (Gal. 6:7, 8) Maathag nga indi matuod ang ila “kahilwayan.”—Tito 3:3.

17, 18. (a) Paano ang pagtuman sa Dios makahatag sang matuod nga kahilwayan? (b) Ngaa mas labaw ang kahilwayan nanday Adan kag Eva kon ipaanggid sa mga tawo subong?

 ¹⁷ Sa kabaliskaran, may kilala ka bala nga mga tawo nga nagmasakit bangod ginsunod nila ang mga talaksan sa Biblia? Maathag nga ang pagtuman kay Jehova makabulig nga mangin maayo ang aton panglawas kag makahatag sang matuod nga kahilwayan. (Sal. 19:7-11) Dugang pa, kon gamiton mo sing maayo ang imo kahilwayan, ukon tumanon mo ang himpit nga mga kasuguan kag mga prinsipio sang Dios, mapakita mo sa Dios kag sa imo mga ginikanan nga masaligan ka. Katuyuan gid sang Dios nga mabaton sang iya matutom nga mga alagad ang matuod nga kahilwayan, nga ginalaragway sang Biblia nga “mahimayaon nga kahilwayan sang mga anak sang Dios.”—Roma 8:21.

¹⁸ Naeksperiensiahan nanday Adan kag Eva ini nga kahilwayan. Sa hardin sang Eden, pila ang ginsiling sang Dios nga indi nila dapat paghimuon? Isa lang. Indi nila dapat pagkaunon ang bunga sang isa ka kahoy. (Gen. 2:9, 17) Estrikto bala ang Dios kay may gindumili sia nga isa ka butang? Indi! Indi bala mas madamo nga kasuguan ang ginhimo sang tawo kag ginapilit nila ang iban nga tumanon ini?

19. Paano kita ginatudluan nga mangin hilway nga tawo?

¹⁹ Maalamon gid si Jehova kon nagapakig-angot sa iya mga alagad. Sa baylo nga hatagan kita sang madamo nga kasuguan, mapailubon sia nga nagatudlo sa aton nga sundon ang kasuguan sang gugma. Gusto niya nga tumanon naton ang iya mga prinsipio kag dumtan ang malain. (Roma 12:9) Paagi sa gintudlo ni Jesus sa iya Sermon sa Bukid, nahangpan naton kon ngaa nagahimo sang malain ang mga tawo. (Mat. 5:27, 28) Sa bag-ong kalibutan, bilang Hari sa Ginharian sang Dios, padayon kita nga tudluan ni Jesus nga himuon ang maayo kag dumtan ang malain pareho sa ginahimo niya. (Heb. 1:9) Himuon man niya nga mangin perpekto ang aton hunahuna kag lawas. Hunahunaa nga indi na kita masulay nga maghimo sang malain kag indi na kita mag-antos bangod sang sala. Sa ulihi, mabaton na naton ang “mahimayaon nga kahilwayan” nga ginpromisa ni Jehova.

20. (a) Paano ginagamit ni Jehova ang iya kahilwayan? (b) Ano ang benepisyo kon ilugon naton ang Dios?

²⁰ Siempre, may mga limitasyon gihapon ang aton kahilwayan. Kinahanglan nga pirme naton hunahunaon ang aton gugma sa Dios kag sa aton isigkatawo sa tanan naton nga ginahimo. Ang matuod, gusto ni Jehova nga ilugon naton sia. Wala sing limitasyon ang iya kahilwayan, pero ang iya gugma amo ang nagagiya sa tanan niya nga ginahimo, lakip ang iya pagpakig-angot sa aton. (1 Juan 4:7, 8) Gani mangin hilway lang kita kon ilugon naton ang Dios.

21. (a) Ano ang ginbatyag ni David parte kay Jehova? (b) Ano ang binagbinagon naton sa masunod nga artikulo?

²¹ Ginaapresyar mo bala ang “maayo nga mga butang” nga ginhatag ni Jehova sa imo, pareho sang bugana nga espirituwal nga pagkaon, maayo gid nga mga abyan, mapuslanon nga mga tulumuron, kag matuod nga kahilwayan sa palaabuton? (Sal. 103:5) Kabay pa nga mangin pareho man kay David ang imo ginabatyag nga makita sa Salmo 16:11: “Ginpakita mo sa akon ang banas sang kabuhi. Sa imo atubangan may tuman nga kasadya; sa imo tuo nga kamot wala sing katapusan ang kalipay.” Binagbinagon naton sa masunod nga artikulo ang iban pa nga hamili nga mga kamatuoran nga makita sa Salmo 16. Makabulig ini sa imo nga mangin malipayon ang imo kabuhi.