1-2. Base sa eksperiensia ni Angelito, ano ang dapat himuon sang kada isa sa aton?

MGA Saksi ni Jehova bala ang imo mga ginikanan? Kon huo, tandai nga indi mo puede panublion ang ila personal nga kaangtanan kay Jehova. Saksi man ukon indi ang aton mga ginikanan, ang kada isa sa aton dapat magpanikasog nga magpakig-abyan kay Jehova.

² Binagbinaga ang eksperiensia sang isa ka utod nga si Angelito. Nagdaku sia sa Saksi nga pamilya. Pero sang pamatan-on sia, pamatyag niya indi sia suod sa Dios. Nagsiling sia, “Nagaalagad ako kay Jehova bangod ginasunod ko lang ang ginahimo sang akon pamilya.” Pero, gindugangan ni Angelito ang iya tion sa pagbasa sang Pulong sang Dios kag sa pagpamalandong sa sini, kag pirme na sia nagapangamuyo kay Jehova. Ano ang resulta? Si Angelito nagsiling, “Narealisar ko nga para magsuod ako sa akon pinalangga nga Amay, nga si Jehova, dapat ako mismo ang magtuon parte sa iya.” Base sa eksperiensia ni Angelito, mahimo kita mamangkot: Ano ang kinalain sang kilala lang naton si Jehova kag sang kilala gid naton sia sing maayo? Kag paano naton makilala sing maayo si Jehova?

3. Ano ang kinalain sang kilala lang naton si Jehova kag sang kilala gid naton sia sing maayo?

³ Masiling naton nga may nabal-an ang isa ka tawo parte kay Jehova kon kabalo sia sang ngalan sang Dios ukon sang pila ka butang nga ginsiling ukon ginhimo Niya. Pero may dapat pa kita himuon para makilala sing maayo si Jehova. Dapat hatagan naton sing tion ang pagtuon parte kay Jehova kag sa iya dalayawon  nga mga kinaiya. Kon himuon naton ini, mahangpan gid naton ang mga rason sa iya mga ginsiling kag ginhimo. Makabulig ini sa aton nga mabal-an kon bala nalipay sia sa aton mga opinyon, desisyon, kag ginahimo. Kon nabal-an na naton ang gusto ni Jehova nga himuon naton, dapat naton ini himuon.

4. Paano makabulig sa aton ang pagbinagbinag sa mga halimbawa sa Biblia?

⁴ Ang pila ka tawo mahimo magyaguta sa aton bangod gusto naton mag-alagad kay Jehova, kag mahimo pamatukan pa gid nila kita kon magtambong kita sa mga miting. Pero, kon magsalig kita kay Jehova, indi niya kita pagpabay-an. Ginasugdan naton ang pagpakig-abyan sa Dios kag mangin abyan naton sia sa bilog naton nga kabuhi. Makilala gid bala naton sing maayo si Jehova? Huo! Ang mga halimbawa sang indi perpekto nga mga tawo, pareho kay Moises kag kay Hari David, nagapamatuod nga posible ini. Samtang ginabinagbinag naton ang ila mga ginhimo, sabton naton ang duha ka pamangkot: Paano nila nakilala si Jehova? Kag ano ang matun-an naton sa ila halimbawa?

5. Ano nga desisyon ang ginhimo ni Moises?

⁵ Gin-aplikar ni Moises ang iya natun-an. Sang mga 40 anyos si Moises, nagdesisyon sia nga mag-upod sa katawhan sang Dios, ang mga Hebreo, sa baylo nga makilala bilang “anak sang anak nga babayi sang Paraon.” (Heb. 11:24) Ginsakripisyo ni Moises ang iya dungganon nga posisyon. Sang nagdampig sia sa mga Hebreo nga mga ulipon sa Egipto, kabalo sia nga maakig sa iya ang Paraon nga isa ka gamhanan nga gumalahom kag ginakabig sang mga Egiptohanon nga isa ka dios. Dalayawon gid ang pagtuo ni Moises! Nagsalig si Moises kay Jehova. Kag bangod sini nga pagsalig, nangin suod gid si Moises kay Jehova sa bilog niya nga kabuhi.—Hulu. 3:5.

6. Ano ang matun-an naton sa halimbawa ni Moises?

⁶ Ano ang matun-an naton sa sini? Pareho kay Moises, tanan kita may desisyon nga dapat himuon: Magaalagad bala kita sa Dios kag magaupod sa iya katawhan? Mahimo nga kinahanglan naton magsakripisyo para makaalagad kita sa Dios, kag mahimo pamatukan kita sang mga wala nakakilala kay Jehova. Pero kon magsalig kita sa aton Amay sa langit, makasigurado kita nga buligan niya kita!

7-8. Ano ang padayon nga natun-an ni Moises?

⁷ Padayon nga nagtuon si Moises parte sa mga kinaiya ni Jehova kag naghimo sang Iya kabubut-on. Halimbawa, sang ginsilingan ni Jehova si Moises nga pangunahan niya ang mga Israelinhon paggua sa Egipto, nagbatyag sia nga indi niya ini masarangan kag sulitsulit niya ini nga ginsiling kay Jehova. Ginpakitaan sang Dios si Moises sang kaluoy, bangod ginbuligan niya sia. (Ex. 4:10-16) Gani nasarangan ni Moises nga ihambal sa Paraon ang matigdas nga mga mensahe sang paghukom. Dayon nakita ni Moises ang gahom ni Jehova sang ginluwas Niya ang mga Israelinhon kag sang ginlaglag Niya ang Paraon kag ang iya mga soldado sa Pula nga Dagat.—Ex. 14:26-31; Sal. 136:15.

⁸ Pagkatapos mapangunahan ni Moises ang mga Israelinhon paggua sa Egipto, madamo nga beses sila nga nagreklamo. Bisan pa sini, nakita ni Moises nga mapinasensiahon gid si Jehova sa Iya katawhan nga ginhilway Niya sa pagkaulipon. (Sal. 78:40-43) Nakita man ni Moises ang tumalagsahon nga pagkamapainubuson ni Jehova sang ginbag-o Niya ang iya hunahuna sang ginpangabay Sia ni Moises nga indi paglaglagon ang mga Israelinhon.—Ex. 32:9-14.

9. Suno sa Hebreo 11:27, daw ano kasuod ang kaangtanan ni Moises kay Jehova?

⁹ Pagkatapos makagua sa Egipto, mas nagsuod pa gid si Moises kay Jehova kay daw pareho  lang nga makita niya ang iya Amay sa langit. (Basaha ang Hebreo 11:27.) Ginalaragway sang Biblia kon daw ano kasuod ang ila kaangtanan sang nagsiling ini: “Nagpakighambal si Jehova kay Moises nga nagaatubang sa iya, pareho sang isa ka tawo nga nagapakighambal sa iya isigkatawo.”—Ex. 33:11.

10. Para makilala naton sing maayo si Jehova, ano ang dapat naton himuon?

¹⁰ Ano ang matun-an naton sa sini? Para makilala naton sing maayo si Jehova, indi lang pagtuon parte sa iya mga kinaiya ang dapat naton himuon kundi dapat man naton himuon ang iya kabubut-on. Subong, kabubut-on ni Jehova nga “ang tanan nga sahi sang tawo maluwas kag makadangat sa sibu nga ihibalo tuhoy sa kamatuoran.” (1 Tim. 2:3, 4) Ang isa ka paagi nga mahimo naton ang kabubut-on sang Dios amo ang pagtudlo sa mga tawo parte kay Jehova.

11. Samtang ginatudluan naton ang iban parte kay Jehova, paano ini nagabulig sa aton nga mas makilala pa gid sia?

¹¹ Sa masami, kon nagatudlo kita sa iban parte kay Jehova, mas makilala pa gid naton sia. Halimbawa, makita naton ang maathag nga pamatuod sang kaluoy ni Jehova samtang ginatuytuyan niya kita nga makita ang interesado nga mga tawo. (Juan 6:44; Binu. 13:48) Makita naton ang gahom sang Pulong sang Dios bangod ginabuligan sini ang aton mga ginatudluan sa Biblia nga untatan ang ila malain nga mga buhat kag magsuksok sang bag-o nga personalidad. (Col. 3:9, 10) Kag makita naton nga mapinasensiahon ang Dios sa mga tawo sa aton teritoryo bangod ginahatagan niya sila sing madamo nga kahigayunan nga makatuon parte sa iya para maluwas sila.—Roma 10:13-15.

12. Suno sa Exodo 33:13, ano ang ginpangabay ni Moises, kag ngaa?

¹² Ginpabaloran ni Moises ang iya kaangtanan kay Jehova. Bisan pa nakahimo si Moises sang gamhanan nga mga buhat sa ngalan sang Dios, matinahuron gihapon sia nga nagpangabay kay Jehova nga buligan sia nga mas makilala pa gid sia. (Basaha ang Exodo 33:13.) Sobra na 80 anyos si Moises sang ginhimo niya ini nga pangabay, pero kabalo sia nga madamo pa sia sing matun-an parte sa iya mahigugmaon nga Amay sa langit.

13. Ano ang isa ka paagi nga mapamatud-an naton nga ginapabaloran naton ang aton pagpakig-abyan sa Dios?

¹³ Ano ang matun-an naton sa sini? Bisan pa madugay na kita nga nagaalagad kay Jehova, pabaloran gihapon naton ang aton kaangtanan sa iya. Ang isa ka paagi nga mapamatud-an naton nga ginapabaloran naton ang aton pagpakig-abyan sa Dios amo ang pirme pag-istorya sa iya paagi sa pangamuyo.

14. Ngaa importante gid ang pangamuyo para mas madamo kita sing matun-an parte sa Dios?

¹⁴ Kon gusto mo mangin suod nga abyan ang isa ka tawo, dapat pirme mo sia istoryahon. Gani para mangin suod mo nga abyan ang Dios, pirme mangamuyo sa iya kag indi mahadlok nga isugid sa iya ang imo mga ginahunahuna kag ginabatyag. (Efe. 6:18) Si Krista, nga taga-Turkey, nagsiling: “Sa kada tion nga ginabuligan ako ni Jehova pagkatapos ako makapangamuyo sa iya para isugid ang akon mga ginahunahuna, mas ginahigugma ko pa gid sia kag ginasaligan. Kon makita ko kon paano ginasabat ni Jehova ang akon mga pangamuyo, nagabulig ini sa akon nga kabigon si Jehova nga akon Amay kag Abyan.”

15. Ano ang ginsiling ni Jehova parte kay Hari David?

¹⁵ Natawo si Hari David sa isa ka pungsod nga nadedikar kay Jehova nga Dios. Buot silingon, mga sumilimba na ni Jehova ang iya mga ginikanan. Pero indi amo ini ang rason kon ngaa ginsimba man ni David si Jehova.  Nagpanikasog sia para mangin abyan sia sang Dios, kag ginpalangga gid sia ni Jehova. Si Jehova mismo nagsiling nga si David “isa ka tawo nga kalahamut-an sa [Iya] tagipusuon.” (Binu. 13:22) Paano nangin suod gid si David kay Jehova?

16. Ano ang natun-an ni David parte kay Jehova paagi sa pag-obserbar sa mga tinuga?

¹⁶ Nakatuon si David parte kay Jehova paagi sa mga tinuga. Sang pamatan-on si David, pirme sia sa wayang kay ginaatipan niya ang mga karnero sang iya amay. Mahimo nga samtang ginahimo niya ini, nagapamalandong sia parte sa mga butang nga gintuga ni Jehova. Halimbawa, makita ni David ang madamo nga bituon kon gab-i. Pero indi lang mga bituon ang nakita ni David, kay nakita man niya ang mga kinaiya sang Isa nga nagtuga sa sini. Gani nagsulat si David: “Ang kalangitan nagapahayag sang himaya sang Dios; ang kahawaan nagasugid sang iya mga binuhatan.” (Sal. 19:1, 2) Sang ginpamalandungan ni David ang dalayawon nga paghimo sa mga tawo, nakita niya ang tumalagsahon nga kaalam ni Jehova. (Sal. 139:14) Ginpamalandungan ni David ang mga butang nga gintuga ni Jehova, kag narealisar niya kon daw ano sia kagamay kon ikumparar kay Jehova.—Sal. 139:6.

17. Ano ang matun-an naton kon pamalandungan naton ang mga tinuga?

¹⁷ Ano ang matun-an naton sa sini? Dapat mangin interesado kita nga magtuon parte sa mga tinuga. Hatagi sing tion ang pag-apresyar sa sining matahom nga kalibutan nga gintuga ni Jehova. Sa imo adlaw-adlaw nga mga hilikuton, pamalandungi kon ano ang matun-an mo parte kay Jehova sa mga tinuga nga makita mo, pareho sang mga tanom, sapat, kag tawo. Kon himuon mo ini, madamo ka sing matun-an parte sa imo mahigugmaon nga Amay. (Roma 1:20) Kag mabatyagan mo nga mas nagabakod ang imo gugma sa iya kada adlaw.

18. Suno sa Salmo 18, ano ang nahangpan ni David?

¹⁸ Nahangpan ni David nga ginabuligan sia ni Jehova. Halimbawa, sang gin-amligan ni David ang mga karnero sang iya amay sa leon kag sa oso, nahangpan niya nga ginbuligan sia ni Jehova para mapatay niya ining mabangis nga mga sapat. Sang napierde niya ang higante nga soldado nga si Goliat, maathag kay David nga si Jehova ang nagbulig sa iya. (1 Sam. 17:37) Kag sang nakaluwas sia kay Hari Saul nga nahisa sa iya, nahangpan ni David nga si Jehova ang nagluwas sa iya. (Sal. 18, superskripsion) Kon bugalon si David, posible nga maghunahuna sia nga nahimo niya ini tanan paagi lang sa iya kaugalingon nga ikasarang. Pero mapainubuson gid si David, gani nahangpan niya nga si Jehova ang nagabulig sa iya.—Sal. 138:6.

19. Ano ang matun-an naton sa halimbawa ni David?

¹⁹ Ano ang matun-an naton sa sini? Indi lang pagpangayo sang bulig kay Jehova ang dapat naton himuon. Dapat man naton hangpon kon san-o kag paano sia nagabulig sa aton. Kon mapainubuson naton nga batunon ang aton mga limitasyon, mangin maathag sa aton nga si Jehova ang nagabulig sa aton nga himuon ang indi naton masarangan. Kag sa kada tion nga makita naton ang bulig ni Jehova, magabakod pa gid ang aton kaangtanan sa iya. Naeksperiensiahan ini ni Isaac, nga taga-Fiji, nga nagaalagad kay Jehova sa sulod sang madamo na nga tuig. Nagsiling sia: “Kon panumdumon ko ang mga naagyan ko sa akon kabuhi, makita ko kon paano ako ginbuligan ni Jehova sugod sang nagtuon ako sa Biblia asta subong. Gani, para sa akon, matuod gid si Jehova.”

20. Ano ang matun-an naton sa kaangtanan ni David sa Dios?

²⁰ Gin-ilog ni David ang mga kinaiya ni Jehova. Gintuga kita ni Jehova nga may ikasarang nga ilugon ang iya mga kinaiya. (Gen. 1:26) Samtang nagadamo ang aton natun-an parte sa mga kinaiya ni Jehova, makabulig ini sa aton nga  mas mailog sia sing maayo. Nakilala sing maayo ni David ang iya Amay sa langit, gani nailog niya Sia sa iya pagpakig-angot sa iban. Binagbinaga ining isa ka halimbawa. Nakasala si David kay Jehova sang nagpakighilahi sia kay Bat-seba kag ginmaniobra niya nga mapatay ang bana ni Bat-seba. (2 Sam. 11:1-4, 15) Pero ginkaluuyan ni Jehova si David, bangod gin-ilog niya si Jehova kag nagpakita sia sing kaluoy sa iban. Bangod maayo gid ang kaangtanan ni David kay Jehova, ginpalangga gid sia sang mga Israelinhon, kag gingamit sia ni Jehova bilang halimbawa nga dapat ilugon sang iban nga hari sang Israel.—1 Hari 15:11; 2 Hari 14:1-3.

21. Suno sa Efeso 4:24 kag 5:1, ano ang mga resulta kon ‘ilugon naton ang Dios’?

²¹ Ano ang matun-an naton sa sini? Dapat naton ‘ilugon ang Dios.’ Kon himuon naton ini, makabenepisyo kita kag makabulig ini sa aton nga makilala sia sing maayo. Kon ilugon naton ang mga kinaiya sang Dios, ginapakita naton nga mga anak gid niya kita.—Basaha ang Efeso 4:24; 5:1.

22-23. Ano ang resulta kon ginaaplikar naton ang aton natun-an parte kay Jehova?

²² Nabinagbinag naton nga makatuon kita parte kay Jehova paagi sa mga tinuga kag sa iya Pulong, ang Biblia. Mabasa sa sining pinasahi nga libro ang madamo nga halimbawa sang matutom nga mga alagad sang Dios nga puede naton ilugon, pareho kay Moises kag kay David. Ginhimo ni Jehova ang iya bahin. Dapat man naton himuon ang aton bahin paagi sa pagtuon sing maayo parte sa iya.

²³ Wala sing katapusan ang aton matun-an parte kay Jehova. (Man. 3:11) Ang kadamuon sang aton nabal-an parte sa iya indi amo ang importante, kundi ang aton ginahimo sa aton nabal-an. Kon ginaaplikar naton ang aton natun-an kag ginailog naton ang aton mahigugmaon nga Amay, padayon sia nga magapalapit sa aton. (Sant. 4:8) Paagi sa iya Pulong, nagapasalig sia nga indi gid niya pagpabay-an ang mga nagapanikasog nga kilalahon sia sing maayo.