Indi. Wala ginsilingan sang Yawa si Eva nga kon magkaon sia sang ginadumilian nga bunga, mapatay sia pero may indi makita nga bahin sang iya lawas (ginatawag subong sang iban nga kalag nga indi mapatay) nga padayon nga magakabuhi sa iban nga lugar. Paagi sa isa ka man-ug, ginsilingan ni Satanas si Eva nga kon magkaon sia sang bunga sang kahoy, ‘indi gid sia mapatay.’ Ginapahangop niya nga padayon nga magakabuhi si Eva sa duta, mas mangin malipayon, kag indi na niya kinahanglan ang Dios.—Gen. 2:17; 3:3-5.

Kon wala nagsugod sa Eden ang butig nga panudlo nga ang kalag kuno indi mapatay, san-o ini nagsugod? Indi naton masigurado kon san-o gid ini nagsugod. Kabalo kita nga ang tanan nga nagasakdag sang butig nga mga panudlo nalaglag sa Baha sang panahon ni Noe. Gani wala sing may nabilin nga magatudlo sang kabutigan bangod si Noe lang kag ang iya pamilya ang nakaluwas sa Baha kag tanan sila nagasimba sa matuod nga Dios.

Gani ang panudlo subong nga ang kalag kuno indi mapatay mahimo nagsugod pagkatapos sang Baha. Sang gingumon sang Dios ang mga lenguahe sa Babel kag ang katawhan ‘nag-alaplaag sa bug-os nga duta,’ sigurado gid nga gindala nila ang panudlo nga ang tawo may kalag nga indi mapatay. (Gen. 11:8, 9) Bisan pa wala kita kabalo kon san-o gid nagsugod ining butig nga panudlo, sigurado kita nga ang “amay sang kabutigan,” si Satanas nga Yawa, amo ang ginhalinan sini kag nalipay sia nga naglapnag ini.—Juan 8:44.