Tilawi kon masabat mo ini nga mga pamangkot nga ginbinagbinag sa mga isyu sang Ang Lalantawan sang 2019

Ano ang buot silingon sang promisa sang Dios: “Wala sing ginhimo nga hinganiban nga magmadinalag-on batok sa imo”? (Isa. 54:17)

Makasalig kita nga amligan kita sang Dios sa mabaskog nga unos pareho sang “kapintas sang mga mapiguson.” (Isa. 25:4, 5) Ang aton mga kaaway indi gid magmadinalag-on sa paghalit sa aton.—w19.01, p. 6-7.

Paano ginpakita sang Dios ang iya katarungan sa mga Canaanhon kag sa nagrebelde nga mga Israelinhon?

Ginhukman sang Dios ang mga naghimo sang makahuluya nga pagpakigsekso kag ang mga naghimo sang malain sa mga babayi kag kabataan. Ginpakamaayo niya ang katawhan nga nangin matutom sa iya kag naghimo sang maayo sa ila isigkatawo.—w19.02, p. 22-23.

Ano ang himuon naton kon ara kita sang nangamuyo ang indi Saksi?

Puede kita maghipos lang kag magpakita sing pagtahod pero indi kita magsiling sing “amen” ukon mag-entra sa pag-uyatay sing kamot. Mahimo kita mangamuyo sing hipos.—w19.03, p. 31.

Daw ano ka serioso ang seksuwal nga pag-abuso sa bata?

Ang seksuwal nga pag-abuso sa bata isa ka sala sa biktima, sa kongregasyon, sa gobierno, kag sa Dios. Kon may kasuguan ang gobierno nga dapat ireport sa awtoridad kon may ginasumbong nga nagmolestia sa bata, ginatuman ini sang mga gulang.—w19.05, p. 9-10.

Paano mo mabag-o ang imo panghunahuna?

Ari ang mga dapat himuon: Magpakig-istorya kay Jehova paagi sa pagpangamuyo. Usisaa ang imo kaugalingon paagi sa pagpamalandong. Pilia sing maayo ang imo mga kaupdanan.—w19.06, p. 11.

Paano kita magahanda subong para mabatas naton ang paghingabot?

Dapat naton pabakuron ang aton kaangtanan kay Jehova. Indi gid magduhaduha nga palangga niya kita kag indi niya kita pagpabay-an. Basaha ang Biblia kada adlaw, kag pirme mangamuyo. Indi gid magduhaduha nga matuman ang ginpromisa nga mga pagpakamaayo sang Ginharian sang Dios. Sauluha ang paborito mo nga mga teksto kag mga ambahanon nga nagadayaw kay Jehova.—w19.07, p. 2-4.

Paano naton mabuligan ang aton mga paryente para maluwas sila?

Importante nga hangpon naton sila, magpakita kita sing maayo nga paggawi nga nagaresulta sa maayo nga panaksi, kag mangin mapinasensiahon kita kag mainayuhon.—w19.08, p. 15-17.

Ngaa makaparepresko ang hilikuton nga ginapahimo sa aton ni Jesus? (Mat. 11:28)

May ara kita mahigugmaon nga Cristianong mga manugtatap, pinakamaayo nga mga kaupdanan, kag pinakamaayo nga hilikuton.—w19.09, p. 23.

Paano kita mahatagan sang Dios sang handum kag kusog? (Fil. 2:13)

Samtang ginabasa naton ang Pulong sang Dios kag ginapamalandungan ini, hatagan kita sang Dios sang handum nga himuon ang iya kabubut-on kag sang kusog nga kinahanglan naton para matuman ang iya katuyuan. Paagi sa iya espiritu, mapauswag naton ang aton mga ikasarang.—w19.10, p. 21.

Ano ang maayo nga himuon antes kita maghimo sang serioso nga desisyon?

Ari ang lima nga dapat himuon: Mag-research sang maayo. Mangamuyo sang kaalam. Usisaa ang imo motibo. Mangin espesipiko. Mangin realistiko.—w19.11, p. 27-29.

Ang panudlo bala nga ang kalag kuno indi mapatay nagsugod sang ginsilingan ni Satanas si Eva nga indi sia mapatay?

Indi. Wala ginsilingan sang Yawa si Eva nga mapatay sia pero may indi makita nga bahin sang iya lawas nga padayon nga magakabuhi sa iban nga lugar. Wala sing may nabilin nga magatudlo sang kabutigan pagkatapos sang Baha. Ang panudlo nga ang kalag kuno indi mapatay mahimo nagsugod antes ginpaalaplaag sang Dios ang katawhan nga naghimo sang torre sang Babel.—w19.12, p. 15.