PIRME ka bala nagapasalamat? Dapat naton tanan binagbinagon ini nga pamangkot. Gintagna sang Biblia nga madamo nga tawo sa aton tion ang mangin “indi mapinasalamaton.” (2 Tim. 3:2) Mahimo may nakilala ka nga mga tawo nga nagahunahuna nga sila ang dapat serbisyuhan ukon hatagan sang mga butang. Para sa ila, indi nila kinahanglan magpasalamat sa ila mga nabaton. Indi ka gid malipay kon upod mo ang amo sini nga klase sang mga tawo.

Ginsugo ni Jehova ang iya mga alagad: “Ipakita nga mapinasalamaton kamo.” Kag dapat kita ‘magpasalamat tungod sa tanan nga butang.’ (Col. 3:15; 1 Tes. 5:18) Ang matuod, may benepisyo kon pirme kita nagapasalamat. May pila ka rason kon ngaa.

Ang isa ka importante nga rason kon ngaa dapat pirme kita magpasalamat amo nga nagabulig ini para mangin malipayon kita. Kon nagapasalamat ang isa, mahimo gid nga malipay sia pati na ang ginpasalamatan niya. Ngaa amo sini ang aton ginabatyag? Binagbinaga ini nga halimbawa: Kon ang isa ka tawo handa magsakripisyo sang iya tion para sa imo, ginapakita sini nga nagaulikid sia sa imo. Kon mabatyagan mo ini nga pag-ulikid, mangin malipayon ka. Naeksperiensiahan ini ni Rut. Bangod nangin maalwan sa iya si Boaz, sigurado gid nga nangin malipayon sia kay nabatyagan niya nga may nagaulikid sa iya.—Rut 2:10-13.

Importante gid nga magpasalamat kita sa Dios. Sigurado gid nga may mga tion nga ginhunahuna mo ang madamo nga espirituwal kag materyal nga mga regalo nga gin-aman niya kag padayon niya nga ginaaman. (Deut. 8:17, 18; Binu. 14:17) Pero mas maayo kon hatagan mo gid sing tion nga pamalandungan ang madamo nga pagpakamaayo sang Dios sa imo kag sa imo mga pinalangga sangsa hunahunaon lang ini sing makadali. Kon pamalandungan mo ang kaalwan sang Manunuga, mapalig-on ka sini nga pirme sia pasalamatan kag magabatyag ka nga palangga ka gid niya kag ginapabaloran.—1 Juan 4:9.

Pero indi lang pagpamalandong parte sa kaalwan kag mga pagpakamaayo ni Jehova ang dapat mo himuon. Dapat mo man sia pasalamatan sa iya kaayo. (Sal. 100:4, 5) Suno sa isa ka libro, “ang pagpasalamat nagapahalipay sa mga tawo.”

Ang isa pa ka rason kon ngaa dapat pirme kita magpasalamat amo nga nagapabakod ini sang pag-abyanay. Gusto naton tanan makabatyag nga ginapabaloran kita. Kon sinsero mo nga pasalamatan ang isa ka tawo bangod sang iya kaayo, mas magasuod kamo sa isa kag isa. (Roma 16:3, 4) Ang mga tawo nga pirme nagapasalamat mabinuligon man sa iban. Ginapabaloran nila ang kaayo nga ginapakita sa ila kag nagapalig-on ini sa ila nga magpakita man sang kaayo sa iban. Huo, ang pagbulig sa iban nagaresulta sa kalipay. Amo gid sini ang ginsiling ni Jesus: “Mas malipayon ang nagahatag sangsa nagabaton.”—Binu. 20:35.

Si Robert Emmons, nga isa sa mga direktor sang pagtuon nga ginhimo sang University of California parte sa pagpasalamat, nagsiling: “Para mapalig-on kita nga pirme magpasalamat, dapat naton mahangpan nga kinahanglan naton ang isa kag isa. Kon kaisa, kita ang nagahatag. Kag kon kaisa, kita ang nagabaton.” Ang matuod, para padayon kita nga mabuhi kag mangin malipayon, kinahanglan naton ang iban. Halimbawa,  mahimo nga sila ang magaaman sang aton pagkaon ukon magaatipan sa aton kon magmasakit kita. (1 Cor. 12:21) Kon ang isa ka tawo pirme nagapasalamat, ginaapresyar niya ang ginahimo sang iban para sa iya. Pirme ka bala nagapasalamat sa mga ginahimo sang iban para sa imo?

Ang isa pa ka rason kon ngaa dapat pirme kita magpasalamat amo nga makabulig ini sa aton nga magpokus sa positibo imbes nga sa negatibo. Kon himuon mo ini, ang imo hunahuna daw mangin pareho sa isa ka salaan. Buligan ka sini nga magkonsentrar sa positibo nga mga butang, indi sa mga problema. Kon pirme ka nagapasalamat, mas madamo ka sing makita nga maayo, kag magapalig-on ini sa imo nga labi nga magpasalamat. Kon magpokus ka sa mga butang nga dapat mo pasalamatan, mabuligan ka sini nga himuon ang ginpalig-on ni apostol Pablo: “Magkasadya kamo pirme sa Ginuo.”—Fil. 4:4.

Kon pirme ka nagapasalamat, mabuligan ka sini nga indi mangin negatibo. Mabudlay magpasalamat kon nahisa ka, nasubuan, ukon naakig. Kon ang isa ka tawo pirme nagapasalamat, mabuligan sia sini nga indi mangin materyalistiko. Kay man, kontento sia sa kon ano ang ara sa iya kag wala sia nagahingamo sang sobra.—Fil. 4:12.

Bilang isa ka Cristiano, kabalo ka nga gusto ni Satanas nga masubuan ka kag maluyahan sing buot sa mga kabudlayan sa sining katapusan nga mga adlaw. Gusto niya nga mangin negatibo ka kag pirme magreklamo. Kon may amo ka sini nga mga kinaiya, mabudlayan ka mangin isa ka epektibo nga manugbantala sang maayong balita. Ang matuod, ang pagpasalamat may direkta nga kaangtanan sa mga kinaiya nga ginapatubas sang espiritu sang Dios. Halimbawa, nalipay kita sa maayo nga mga butang nga ginahatag sang Dios sa aton kag nagatuo kita sa iya mga promisa sa palaabuton.—Gal. 5:22, 23.

Bilang isa sa mga katawhan ni Jehova, mahimo gid nga nagaugyon ka sa ginbinagbinag sa sini nga artikulo parte sa pagpasalamat. Pero, kabalo ka nga indi mahapos nga pirme magpasalamat kag mangin positibo. Indi ka dapat maluyahan sing buot. Masarangan mo ini nga himuon. Paano? Magpain sing tion kada adlaw para hunahunaon ang pila ka butang sa imo kabuhi nga dapat mo pasalamatan. Kon pirme mo ini ginahimo, mabuligan ka sini nga pirme magpasalamat. Kag mas mangin malipayon ka sangsa mga tawo nga nagapokus sa mga kabudlayan. Hunahunaa ang maayo nga mga butang nga ginhimo sang Dios kag sang iban nga nagpalig-on kag nagpahalipay sa imo. Mahimo mo pa gani ini isulat. Kada adlaw, puede mo ilista ang duha ukon tatlo ka butang nga ginapasalamatan mo.

Nadiskobrehan sang mga researcher nga kon regular kita nga nagapasalamat sa iban, nagabulig ini sa aton utok nga magpokus sa positibo nga mga butang. Mas malipayon ang pirme nagapasalamat. Gani hunahunaa ang mga pagpakamaayo nga nabaton mo, pabalori ang imo makapalig-on nga mga eksperiensia, kag pirme magpasalamat! Indi pagbalewalaa ang maayo nga mga butang, kundi ‘magpasalamat kay Jehova, kay maayo sia.’ Huo, ‘magpasalamat tungod sa tanan nga butang.’—1 Cron. 16:34; 1 Tes. 5:18.