Ang sugo sa Deuteronomio 22:25-27 indi isa ka instruksion para pamatud-an kon bala nakasala ang lalaki ukon wala, kay ginapakita sang mga teksto antes sini nga may sala gid sia nga nahimo. Ginsulat ini nga sugo para ipakita nga wala sing sala ang babayi sa amo sini nga sitwasyon.

Mabasa sa Deuteronomio 22:23, 24 ang parte sa isa ka lalaki nga naghulid sa babayi nga kalaslon kag natabo ini “sa siudad.” Nakasala sia sing pagpanghilahi bangod ang babayi nga kalaslon ginakabig nga kasado na. Kamusta naman ang babayi? “Wala sia magsinggit sa siudad.” Kon nagsinggit sia, sigurado gid nga may makabati sa iya kag mabuligan sia. Pero wala sia magsinggit. Gani, nakapanghilahi man sia, amo nga duha sila ang nakasala.

Dayon ginsambit sang Kasuguan ang lain naman nga sitwasyon: “Apang, kon nakita sang lalaki ang babayi sa latagon, kag ginpuersa niya ang babayi kag naghulid sia sa iya, dapat patyon ang lalaki, apang indi ninyo pag-anhon ang babayi. Ang babayi wala makahimo sing sala nga takus sa kamatayon. Pareho ini sa kaso sang isa ka tawo nga nagpatay sa iya isigkatawo. Kay nakita niya ang babayi nga kalaslon sa latagon, kag nagsinggit sia, apang wala sing makatabang sa iya.”—Deut. 22:25-27.

Sa sini nga sitwasyon, ang mga hukom nagapati nga wala nakasala ang babayi. Ngaa? Nagapati sila nga “nagsinggit sia, apang wala sing makatabang sa iya.” Gani wala sia nakapanghilahi. Pero ang lalaki maathag nga nanglugos kag nagpanghilahi bangod “ginpuersa niya ang babayi [nga kalaslon] kag naghulid sia sa iya.”

Gani, bisan pa nga ini nga sugo ginsulat para ipakita nga wala sing sala ang babayi sa amo sini nga sitwasyon, ginapakita man sini nga nanglugos gid kag nagpanghilahi ang lalaki. Makasalig kita nga ‘ginausisa ini sing maayo’ sang mga hukom kag nagadesisyon sila base sa maathag nga mga panuytoy sang Dios nga sulitsulit niya nga ginhatag sa ila.—Deut. 13:14; 17:4; Ex. 20:14.