1-2. Ano ang binagbinagon naton sa sini nga artikulo?

KON kaisa, mahimo ginapamensar naton nga malip-ot lang ang aton kabuhi kag ‘puno ini sing kagamo.’ (Job 14:1) Bangod sini, may mga tion nga nagaluya ang aton buot. Amo sini ang ginbatyag sang pila ka alagad ni Jehova sang una. Gusto gani sadto sang iban sa ila nga kuntani mapatay na lang sila. (1 Hari 19:2-4; Job 3:1-3, 11; 7:15, 16) Pero pirme sila ginapaumpawan kag ginapalig-on ni Jehova. Ginsulat sa Biblia ang ila mga eksperiensia kay may matun-an kita sa sini kag makapaumpaw ini sa aton.—Roma 15:4.

² Sa sini nga artikulo, binagbinagon naton ang naeksperiensiahan sang pila ka alagad ni Jehova nga nagluya ang buot. Binagbinagon naton ang halimbawa ni Jose nga anak ni Jacob, sang balo nga si Noemi kag sang iya umagad nga si Rut, sang Levinhon nga nagsulat sang Salmo 73, kag ni apostol Pedro. Paano sila ginpalig-on ni Jehova? Kag ano ang matun-an naton sa ila? Ang sabat sa sini nga mga pamangkot magapalig-on sa aton pagsalig nga “malapit si Jehova sa mga nagaantos,” kag “ginaluwas niya ang mga naluyahan sing buot.”—Sal. 34:18, footnote.

3-4. Ano ang natabo kay Jose sang pamatan-on sia?

³ Mga 17 anyos si Jose sang ginpadamgo sia sang Dios sing duha ka beses. Ginapahangop sang iya mga damgo nga magaabot ang tion nga mangin isa sia ka importante nga tawo kag padunggan sia sang iya pamilya. (Gen. 37:5-10) Pero wala madugay pagkatapos sini, madamo sia sing naeksperiensiahan nga malain. Sa baylo nga padunggan sia, ginbaligya sia sang iya mga utod bilang ulipon. Sang ulihi, nangin ulipon sia sa panimalay sang isa ka opisyal sang Egipto nga si Potifar. (Gen. 37:21-28) Gulpi lang nagbag-o ang iya kabuhi. Ang isa ka pinalangga nga anak sang iya  amay nangin isa ka ulipon sang pagano nga opisyal sa palasyo sa Egipto.—Gen. 39:1.

⁴ Dayon naglala pa gid ang sitwasyon. Nagsiling ang asawa ni Potifar nga luguson sia kuno kuntani ni Jose. Sa baylo nga paimbestigahan ang natabo, ginpapriso lang dayon ni Potifar si Jose kag ginkadenahan sia. (Gen. 39:14-20; Sal. 105:17, 18) Pamatan-on lang sadto si Jose. Gani imadyina kon ano ayhan ang iya ginbatyag sang gin-akusahan sia nga gusto niya kuno luguson ang asawa ni Potifar. Kag bangod sini, mahimo gid nga may malain nga ginsiling ang mga tawo parte kay Jehova. Sigurado gid nga nagpaluya ini sang buot ni Jose.

5. Ano ang ginhimo ni Jose sang nagluya ang iya buot?

⁵ Sang nangin ulipon si Jose kag napriso sia, wala sia sing mahimo sa iya sitwasyon. Ano ang nakabulig sa iya nga indi madulaan sing paglaum? Gintuman niya ang mga ginasugo sa iya sa bug-os niya nga masarangan, sa baylo nga pamensaron ang indi niya mahimo. Kag ang pinakaimportante kay Jose amo ang pagsigurado nga malipay si Jehova sa iya. Gani ginpakamaayo ni Jehova ang tanan nga ginhimo ni Jose.—Gen. 39:21-23.

6. Paano napalig-on si Jose sang iya mga damgo?

⁶ Mahimo nga napalig-on man si Jose sang ginpamalandungan niya ang mga ginpadamgo sa iya ni Jehova sang una. Base sa iya mga damgo, makita niya liwat ang iya pamilya kag mangin maayo ang iya sitwasyon. Kag amo gid sini ang natabo. Sang mga 37 anyos si Jose, nag-umpisa nga matuman ang iya mga damgo kag tumalagsahon gid ini.—Gen. 37:7, 9, 10; 42:6, 9.

7. Suno sa 1 Pedro 5:10, ano ang makabulig sa aton nga mabatas ang mga kabudlayan?

⁷ Ang matun-an naton. Ginapahanumdom sa aton sang natabo kay Jose nga makaeksperiensia kita sang inhustisya bangod sang malain nga mga tawo. Posible pa gani nga ang aton mga kauturan mismo ang makasakit sa aton. Pero kon ginakabig naton si Jehova nga aton Igang, ukon Dalangpan, indi gid kita mag-untat sa pag-alagad sa iya. (Sal. 62:6, 7; basaha  ang 1 Pedro 5:10.) Dumduma man nga posible mga 17 anyos lang si Jose sang ginpadamgo sia ni Jehova. Gani may salig si Jehova sa mga pamatan-on nga nagaalagad sa iya. Madamo nga pamatan-on subong ang pareho man kay Jose. Mabakod man ang ila pagtuo kay Jehova. Ginpriso pa gani ang iban sa ila bisan wala sila sing sala. Pero matutom sila gihapon sa Dios.—Sal. 110:3.

8. Ano ang natabo kay Noemi kag kay Rut?

⁸ Bangod sang grabe nga tiggulutom sa Juda, nagsaylo sa Moab si Noemi kag ang iya pamilya. Sang didto na sila nagaistar, napatay ang bana ni Noemi nga si Elimelec. Gani ang duha na lang niya ka anak nga lalaki ang iya upod. Sang ulihi, nangasawa ang iya mga anak sang mga Moabnon, nga sanday Rut kag Orpa. Pagligad sang mga napulo ka tuig, napatay man ang duha ka anak ni Noemi. Napatay sila nga wala sing anak. (Rut 1:1-5) Gani grabe gid ang kasubo sang tatlo ka babayi. Puede pa makapamana liwat sanday Rut kag Orpa. Pero sin-o ang magaatipan kay Noemi nga tigulang na? Nasubuan gid si Noemi gani nagsiling sia: “Indi ninyo ako pagtawga nga Noemi. Tawga ninyo ako nga Mara, kay gintugutan sang Labing Gamhanan nga Dios nga mangin mapait gid ang akon kabuhi.” Pagkatapos sang masubo nga mga naagyan ni Noemi, nagbalik sia sa Betlehem, kag nag-upod si Rut sa iya.—Rut 1:7, 18-20.

9. Suno sa Rut 1:16, 17, 22, paano ginpalig-on ni Rut si Noemi?

⁹ Ano ang nakapahaganhagan sang kasubo ni Noemi? Ang mainunungon nga gugma. Ginpakita ni Rut ini nga gugma sang nag-upod sia kay Noemi. (Basaha ang Rut 1:16, 17, 22.) Sang ara na sila sa Betlehem, nangin mapisan si Rut sa pagpanaghaw sang sebada para sa ila ni Noemi. Bangod sini, nakilala sia nga isa ka maayo nga babayi.—Rut 3:11; 4:15.

10. Paano ginpakita ni Jehova nga naluoy sia sa mga imol pareho kay Noemi kag kay Rut?

¹⁰ Makita sa kasuguan nga ginhatag ni Jehova sa mga Israelinhon nga naluoy sia sa mga imol pareho kay Noemi kag kay Rut. Ginsugo niya ang iya katawhan nga kon magpaani sila, ibilin nila ang mga ara sa higad sang ila uma kay para ini sa mga imol. (Lev. 19:9, 10) Bangod sini, makakuha sang pagkaon sanday Noemi kag Rut kag indi nila kinahanglan magpakilimos.

11-12. Ano ang ginhimo ni Boaz nga naghatag sing kalipay kay Noemi kag kay Rut?

¹¹ Ang manggaranon nga si Boaz amo ang tag-iya sang uma nga ginsaghawan ni Rut. Nagdayaw gid sia kay nag-unong si Rut kay Noemi kag palangga gid niya ang iya ugangan. Gani ginpangasawa ni Boaz si Rut. Ginbakal man niya ang duta nga ginapanag-iyahan sadto sang pamilya ni Noemi, gani mapanubli na ini sang mangin kabataan ni Rut. (Rut 4:9-13) Nangin anak nanday Boaz kag Rut si Obed, nga nangin lolo ni Hari David.—Rut 4:17.

¹² Imadyina ang kalipay ni Noemi samtang ginakugos niya ang lapsag nga si Obed kag nagapangamuyo kay Jehova para pasalamatan sia. Pero mangin mas malipayon pa gid si Noemi kag si Rut kon banhawon na sila, kay mabal-an nila nga nangin katigulangan si Obed sang Ginsaad nga Mesias, nga si Jesucristo.

13. Ano ang matun-an naton sa natabo kay Noemi kag kay Rut?

¹³ Ang matun-an naton. Kon may mga problema kita, mahimo magluya ang aton buot ukon masubuan kita. Posible nga ginapamensar naton nga wala na sing solusyon ang aton mga problema. Kon amo sini ang aton ginabatyag, dapat kita magsalig sing bug-os sa aton Amay sa langit kag indi kita magpalayo sa aton mga kauturan. Pero posible nga indi pagdulaon ni Jehova ang aton problema. Halimbawa, wala niya ginbanhaw ang bana kag mga anak ni Noemi. Pero buligan niya kita nga makabatas,  kag puede niya gamiton ang aton mga kauturan para buligan kita.—Hulu. 17:17.

14. Ngaa nagluya ang buot sang isa ka Levinhon?

¹⁴ Isa ka Levinhon ang nagsulat sang Salmo 73, gani may pribilehiyo sia nga mag-alagad sa lugar nga ginagamit sa pagsimba kay Jehova. Pero may tion nga nagluya ang iya buot. Ngaa? Nahisa sia sa mga malauton kag bugalon. Indi buot silingon nga gusto man niya maghimo sing malain. Nahisa sia sa ila kay daw ara na sa ila ang tanan. (Sal. 73:2-9, 11-14) Manggaranon sila, daw pirme sila malipayon, kag daw wala sila sang problema. Sang nakita ini sang Levinhon, nagluya ang iya buot kag nagsiling sia: “Wala gid sing pulos ang pagtipig ko nga putli sang akon tagipusuon kag ang paghinaw ko sang akon mga kamot agod ipakita nga wala ako sing sala.” Ginapakita sini nga nagluya ang iya espirituwalidad.

15. Suno sa Salmo 73:16-19, 22-25, ano ang ginhimo sang Levinhon nga nagsulat sini nga salmo sang nagluya ang iya buot?

¹⁵ Basaha ang Salmo 73:16-19, 22-25. “Nagsulod [ang Levinhon] sa balaan nga santuaryo sang Dios.” Gani nakapakig-upod sia sa iban pa nga nagasimba man kay Jehova. Bangod sini, nangin kalmado sia, nakahunahuna sia sing maayo, kag nakapangamuyo sia parte sa iya sitwasyon. Nabuligan sia sini nga marealisar nga indi husto ang iya panghunahuna kag posible makaguba ini sa iya kaangtanan kay Jehova. Nahangpan man niya nga ang mga malauton ara “sa madanlog nga duog” kag may “makakulugmat nga katapusan.” Para madula ang kahisa kag pagluya sang buot sang Levinhon, dapat niya ilugon ang panghunahuna ni Jehova. Sang ginhimo niya ini, nangin malipayon sia kag nagtawhay ang iya hunahuna. Nagsiling sia: “Luwas [kay Jehova] wala na ako sing ginahandum sa duta.”

16. Ano ang matun-an naton sa natabo sa isa ka Levinhon?

¹⁶ Ang matun-an naton. Indi gid kita dapat mahisa sa mga malauton nga daw pirme malipayon sa ila kabuhi. Indi matuod ang ila kalipay kag temporaryo lang ini kay indi sila mabuhi sing wala sing katapusan. (Man. 8:12, 13) Kon mahisa kita sa ila, magaluya ang aton buot kag posible maguba ang aton kaangtanan kay  Jehova. Gani kon pamatyag mo daw nahisa ka na sa mga malauton, iluga ang ginhimo sang Levinhon. Tumana ang laygay sang Dios, kag magpakig-upod sa mga nagahimo sang kabubut-on ni Jehova. Kon si Jehova ang pinakaimportante sa imo kabuhi, mabatyagan mo ang matuod nga kalipay. Kag magapabilin ka sa dalan nga nagapadulong “sa matuod nga kabuhi.”—1 Tim. 6:19.

17. Ano ang mga rason sa pagluya sang buot ni Pedro?

¹⁷ Makugi gid kag mapagsik si apostol Pedro. Pero kon kaisa, nagapadasudaso sia sa iya mga ginahimo kag mga ginasiling, nga ginahinulsulan man niya sang ulihi. Halimbawa, sang ginsilingan ni Jesus ang iya mga apostoles nga magaantos sia kag mapatay, ginsabdong sia ni Pedro: “Indi gid ina matabo sa imo.” (Mat. 16:21-23) Gani ginlaygayan sia ni Jesus. Sang nag-abot ang mga soldado para dakpon si Jesus, nagpadasudaso naman si Pedro. Ginlabo niya ang dulunggan sang ulipon sang mataas nga saserdote kag nautas ini. (Juan 18:10, 11) Ginlaygayan liwat ni Jesus si Pedro. Nagpabugal man si Pedro sang nagsiling sia nga bisan pa biyaan sang iban nga apostoles si Jesus, indi gid sia magbiya. (Mat. 26:33) Sobra ang pagsalig ni Pedro sa iya kaugalingon, pero hinadlukan sia sa mga tawo gani ginpanghiwala niya ang iya Agalon sing tatlo ka beses. Nagluya ang buot ni Pedro, gani “naggua sia kag naghilibion gid.” (Mat. 26:69-75) Mahimo ginpamensar niya kon bala patawaron pa sia ni Jesus.

18. Sang nagluya ang buot ni Pedro, paano sia ginbuligan ni Jesus?

¹⁸ Bisan pa nagluya ang buot ni Pedro, wala sia nag-untat sa pag-alagad kay Jehova. Sang masandad sia, nagbangon sia kag padayon nga nag-alagad upod sa iban pa nga apostoles. (Juan 21:1-3; Binu. 1:15, 16) Ano ang nakabulig sa iya? Antes sini nga hitabo, nangamuyo si Jesus nga kabay pa nga indi magluya ang pagtuo ni Pedro, kag ginpalig-on man niya si Pedro nga magpanumbalik kag palig-unon ang iya mga kauturan. Ginsabat ni Jehova ining hanuot  nga pangamuyo. Sang ulihi, nagpakita si Jesus kay Pedro para palig-unon sia. (Luc. 22:32; 24:33, 34; 1 Cor. 15:5) Nagpakita man si Jesus sa mga apostoles pagkatapos nila magpangisda sa bilog nga gab-i kag wala sila sing nakuha. Sadto nga tion, ginhatagan ni Jesus si Pedro sang kahigayunan nga ipabutyag kon daw ano niya ka palangga si Jesus. Ginpatawad ni Jesus ang iya pinalangga nga abyan kag ginhatagan niya sia sang dugang nga hilikuton.—Juan 21:15-17.

19. Suno sa Salmo 103:13, 14, paano kita ginatamod ni Jehova kon makasala kita?

¹⁹ Ang matun-an naton. Makita sa ginhimo ni Jesus kay Pedro nga maluluy-on gid sia pareho sang iya Amay. Gani kon makasala kita, indi naton dapat paghunahunaon nga indi na gid kita mapatawad ni Jehova. Tandaan naton nga amo ini ang gusto ni Satanas nga hunahunaon naton. Gani dapat naton pirme hunahunaon nga palangga gid kita ni Jehova, nahangpan niya ang aton mga limitasyon, kag patawaron niya kita. Dapat man naton ilugon si Jehova kon may ginhimo ang iban nga nagpalain sang aton buot.—Basaha ang Salmo 103:13, 14.

20. Ano ang binagbinagon naton sa masunod nga artikulo?

²⁰ Ang halimbawa ni Jose, nanday Noemi kag Rut, sang Levinhon, kag ni Pedro nagapasalig sa aton nga “malapit si Jehova sa mga nagaantos.” (Sal. 34:18) Ginatugutan niya nga makaeksperiensia kita sang mga pagtilaw kag magluya ang aton buot kon kaisa. Pero buligan niya kita nga mabatas ini. Bangod sini, nagabakod pa gid ang aton pagtuo. (1 Ped. 1:6, 7) Sa masunod nga artikulo, binagbinagon pa gid naton kon paano ginabuligan ni Jehova ang iya matutom nga mga alagad nga nagluya ang buot, ayhan bangod sang ila mga kaluyahon ukon sang ila mabudlay nga mga sitwasyon.