Wala. Wala kita sing mabasa sa Biblia kag sa mga libro parte sa kasaysayan nga ginhimo ini sang mga Cristiano sadto.

Madamo nga translation sang Biblia ang daw nagapahangop nga nagpabawtismo para sa mga patay ang pila ka Cristiano sang panahon ni Pablo. Halimbawa, ang isa ka translation nagasiling: “Kon ang mga patay wala nga mas-a ginabanhaw, ngaa bala nagapabawtismo ang katawhan tungod sa ila?”—Ang Biblia.

Pero talupangda ang ginsiling sang duha ka eksperto sa Biblia. Si Dr. Gregory Lockwood nagsiling nga wala sing pamatuod sa Biblia ukon sa kasaysayan nga may ginabawtismuhan sadto para sa mga patay. Komporme sa sini si Professor Gordon D. Fee. Nagsulat sia nga wala sing mabasa sa Biblia ukon halimbawa sa kasaysayan parte sa sini nga bawtismo. Nagsiling sia nga wala gid ini ginsambit sa Bag-ong Katipan kag wala sing pamatuod nga ginhimo ini sang mga Cristiano sang unang siglo, kag wala man sing pamatuod nga ginhimo ini sang bag-o nga grupo sang mga Cristiano pagkatapos sang unang siglo.

Amo ini ang ginasiling sang Biblia nga dapat himuon sang mga sumulunod ni Jesus: “Kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. Bawtismuhi ninyo sila . . . Tudlui ninyo sila nga tumanon ang tanan nga ginsugo ko sa inyo.” (Mat. 28:19, 20) Antes bawtismuhan ang isa, dapat sia anay magtuon parte kay Jehova kag sa Iya Anak, dapat sia magtuo sa ila, kag dapat niya sila tumanon. Indi ini mahimo sang patay na, kag indi man ini mahimo sang buhi nga Cristiano para sa patay nga tawo.—Man. 9:5, 10; Juan 4:1; 1 Cor. 1:14-16.

Gani, ano ang buot silingon ni Pablo?

Ang pila ka taga-Corinto nagsiling nga indi na mabanhaw ang mga patay. (1 Cor. 15:12) Nagsiling si Pablo nga indi husto ang ila ginapatihan. Ginsambit niya nga ‘adlaw-adlaw sia nga nagaatubang sa kamatayon.’ Ngaa nasiling niya ini? Ginpaathag niya nga ara pirme sa katalagman ang iya kabuhi. Pero nagasalig sia nga kon mapatay sia, banhawon sia para magkabuhi sa langit pareho kay Jesus.—1 Cor. 15:30-32, 42-44.

Dapat mahangpan sang mga hinaplas sa Corinto nga makaeksperiensia sila sang mga pagtilaw adlaw-adlaw, kag mapatay anay sila antes sila banhawon. Gani sang ‘ginbawtismuhan sila kay Cristo Jesus, ginbawtismuhan man sila sa iya kamatayon.’ (Roma 6:3) Ginapahangop sini nga pareho kay Jesus, makaeksperiensia man sila sang mga pagtilaw, kag banhawon sila para magkabuhi sa langit kon mapatay sila.

Pagligad sang sobra duha ka tuig pagkatapos mabawtismuhan si Jesus, ginsilingan niya ang duha sa iya mga apostoles: “Sa bawtismo nga ginabawtismo sa akon, bawtismuhan kamo.” (Mar. 10:38, 39) Wala ginapatuhuyan ni Jesus ang parte sa pagbawtismo sa iya sa tubig. Buot niya silingon nga pagapatyon sia bangod sang iya katutom sa Dios. Nagsulat si Pablo nga ang mga hinaplas ‘magaantos kaupod ni Jesus agod himayaon man sila kaupod niya.’ (Roma 8:16, 17; 2 Cor. 4:17) Buot silingon, dapat man sila mapatay para banhawon sila para magkabuhi sa langit.

Gani, amo ini ang husto nga translation sang ginsiling ni Pablo: “Kon ang mga patay indi pagbanhawon, ano ang matabo sa mga ginabawtismuhan agod mapatay? Ngaa ginabawtismuhan sila para sa sina nga katuyuan?”